ჩემი შვილი შეყვარებულია
ძალიან ადვილია იმის მიხვედრა, რომ მოზარდი შეყვარებულია. თქვენ მაშინვე შეამჩნევთ ცვლილებებს შვილის საქციელში.
როგორც წესი, ამ დროს ბიჭებიც და გოგონებიც მეტ ყურადღებას უთმობენ საკუთარ გარეგნობას, საათობით ტრიალებენ სარკის წინ, უამრავ ტანსაცმელს იზომებენ, სანამ სახლიდან გავლენ.
კიდევ ერთი ნიშანი ტელეფონზე საათობით საუბარია. თუ გრძნობა ორმხრივია, მოზარდი მხნე და ზედმეტად მხიარულიც კია, მშობლებთანაც უფრო თავაზიანი და ზოგადად, ძალიან ბედნიერი. თუმცა არის შემთხვევები, როდესაც მოზარდის გრძნობა უარყოფილია და მაშინ ის დიდი ხნით იკეტება ოთახში, დეპრესიული და გაღიზიანებულია.
სამწუხაროდ, იმის წინასწარ განჭვრეტა, თუ როგორი იქნება მოზარდის პირველი სიყვარული, ძალიან ძნელია. ნებისმიერ შემთხვევაში, შვილს თავისუფლება მიეცით და არ შეზღუდოთ. უბრალოდ, ბევრი ელაპარაკეთ და მოიპოვეთ მისი ნდობა, რათა ყველაფრის საქმის კურსში ჩაგაყენოთ და არაფერი გამოგეპაროთ.
როგორი უნდა იყოს მშობლების რეაქცია:
• ალბათ ძნელია, მაგრამ აუცილებელი, მშვიდად შეხვდეთ იმ ამბავს, რომ თქვენს შვილს შეუყვარდა...
• შეეგუეთ იმ ცვლილებებს, რომლებიც მოხდა თქვენი ვაჟის ან ქალიშვილის ქცევებში.
• შეინარჩუნეთ მეგობრული ურთიერთობა შვილთან, ხშირად ესაუბრეთ, მოუსმინეთ მას.
• თავაზიანობა გამოიჩინეთ შვილის შეყვარებულთან.
• იმ შემთხვევაშიც კი, თუ უკმაყოფილო ხართ მოზარდის არჩევანით, თავი შეიკავეთ მის მიმართ პრეტენზიების გამოთქმისგან, მიეცით შვილს საშუალება, რაღაც დროის შემდეგ თავად მიიღოს გადაწყვეტილება.
• დაელაპარაკეთ, შეეცადეთ გაიგოთ, შეყვარებულის რა თვისებებმა მოხიბლა.
• მაგრამ საუბარს ზნეობრივ მოძღვრებად ნუ გადააქცევთ.
• აუხსენით, რომ პირველი სიყვარული, ხშირ შემთხვევაში, მარადიული არ არის და სთხოვეთ, რომ მისი დასრულების შემთხვევაში ამისგან ტრაგედიას ნუ შექმნის.
• ამ ასაკში ბავშვები სიჯიუტით გამოირჩევიან. ამიტომ, თუ დაინახავთ, რომ თქვენი მოსმენა არ სურს და არ გეთანხმებათ, თავი დაანებეთ. წინააღმდეგ შემთხვევაში, შეიძლება თქვენს ჯიბრზე არასწორი საქციელი ჩაიდინოს.
• გაუგეთ ბავშვებს, ეს მათთვის ყველაზე რთული და თან უამრავი ახალი ემოციით და სიხარულით სავსე პერიოდია!
თათია ბეჟიტაშვილი
ჟურნალი "და ქალი"
