რა მიაძახეს ქუჩაში გეის როლის შემსრულებელ ბასა ხარაზს

"ჩემი ცოლის დაქალების" გეი პერსონაჟს მსახიობი ბასა ხარაზი განასახიერებს. მას ჟურნალისტები ბასა სამხარაძედ ვიცნობდით. ბასა და დაჩი დარჩია შოუბიზნესში ცნობილი თავიანთი კლიპებით გახდნენ. პირველად ამ ტანდემმა კლიპი ქეთა თოფურიას გადაუღო "შაირზე". ბასა ამბობს, რომ სარეჟისორო საქმიანობაზე დღესაც არ უთქვამს უარი, თუმცა ძველ გვართან ერთად მთავარი პროფესიაც გაიხსენა და თორნიკეს როლი საკმაოდ კარგად მოირგო. მისი გმირი სამსახურში რჩება და მომავალ სერიებშიც ვიხილავთ. ამ როლის გამო მსახიობს კრიტიკაც შეხვდა, რაზეც ცოტა გულდაწყვეტილია.

- ბასა, გვარი ხარაზად რატომ შეიცვალე?
- ახლა გადავწყვიტე. ხარაზი აჭარული გვარია, მაგრამ სამხარაძეების შტო იმერეთში ერთადერთია, რომლებსაც ხარაზებად მოიხსენიებენ და უბანიც არის ასეთი - ხარაზი. დიდი ხანი ვინც მიცნობს, მან იცის, რომ ხარაზი ვარ. მალე ოფიციალურადაც გადავიკეთებ გვარს და ხარაზი ვიქნები. ალბათ ეს გვარი კარგადაც ჟღერს (იღიმის).

- ჟურნალისტები რეჟისორად გი­ცნობთ, თურმე მსახიობიც ყოფილხარ.
- ჩემი პირველადი პროფესიაა კინოსა და დრამის მსახიობი, ხოლო შემდეგ გავხდი თეატრის რეჟისორი, ასე რომ, არც ერთი ეს პროფესია ჩემთვის უცხო არ არის. ნუგზარ ლორთქიფანიძის სახელოსნო დავამთავრე თეატრალურში, კინოსა და დრამის სამსახიობო ფაკულტეტზე, ეს დიდი ხნის წინ იყო, წინა საუკუნეში, შემდეგ კი ლიტვაში გავიარე უმაღლესი სარეჟისორო კურსები. სხვათა შორის, ვილნიუსის რუსულ სახელმწიფო დრამატულ თეატრშიც ვთამაშობდი. ლიტვაში რომ გავემგზავრე, 1993 წელი იყო. თბილისში რომ დავბრუნდი, სულ სხვა კუთხით წავიდა ჩემი საქმიანობა. მქონდა შემოქმედებითი ცხოვრება, რადიო, ტელევიზია. "იბერვიზიის" პირველ შემადგენლობაში ვიყავი. ვიყავი ერთ-ერთი კომპანიის სახე და გადაცემის წამყვანი. ამის მიუხედავად, მსახიობობას ვერ შეეშვები, თუკი აცრილი ხარ ამით, სულ ამ სფეროსთან მიახლოებას ცდილობ. გამიმართლა, როცა "ჩემი ცოლის დაქალებში" მოვხვდი. პირველივე შეხვედრიდან ისე ვგრძნობ ამ გუნდთან თავს, როგორც თევზი წყალში. ვაფასებ მათ პროფესიონალიზმს.

- სანამ ამაზე ვისაუბრებდეთ, მანამდე ის კლიპები გავიხსენოთ, რომლებიც დაჩისთან ერთად გადაიღე.
- დაჩი დარჩია კინორეჟისორია, მე - თეატრის და შედგა ჩვენი ტანდემი. ალბათ კარგად წავიდა ჩვენი თანამშრომლობა. მოდი თავს შევიქებ და ამ კლიპსაც, რადგან ქეთა თოფურიას "შაირი" ძალიან პოპულარული გახდა. არ მინდა, შუბლზე ხელმიდებული მოაზროვნესავით ვთქვა, ვფიქრობდი, რომ ჩემი კლიპი წარმატებას მოუტანდა-მეთქი, მაგრამ ყოველთვის ვიცოდი, რომ ქეთას კარიერა აუცილებლად კარგად განვითარდებოდა. მიხარია, რომ ასეთ დიდ წარმატებას მიაღწია.

- კლიპების გადაღებამ მეორე პლანზე გადაიწია?
- ამ საქმეს არ შევეშვი. შეიძლება, ზარმაცი ვარ, მაგრამ არა ჩემს საქმეში, თუკი მაქვს სტიმული. ამ სფეროში მაინც ვრჩები და თუკი ვინმეს სურვილი გაუჩნდება, შეუძლია, მომმართოს. გარდა კლიპების გადაღებისა, გახლავართ დიჯეი და ვუკრავ ხოლმე.

- რაც შეეხება "ჩემი ცოლის დაქალებს". შენი გმირი გეია.
- რამდენჯერ ვიქებ თავს (იცინის) - თორნიკე არის პირველი პერსონაჟი ქართულ სივრცეში, რომელმაც ხმამაღლა თქვა, გეი ვარო. "ჩემი ცოლის დაქალების" გუნდი ეძებდა მსახიობს, რომელიც თორნიკეს განასახიერებდა. თავიდან როცა მითხრეს, რთული როლიაო, ამაზე ასე სერიოზულად არ დავფიქრებულვარ, მაგრამ თორნიკეს როლის შესრულებით მენტალურ სირთულეებს გადავაწყდი. საქართველოში ამ თემის გაჟღერება ცოტა საფრთხილოა. სიმართლე გითხრათ, რასაც თორნიკეზე ინტერნეტში წერენ, იმის წაკითხვას თავს ვარიდებ, არა იმიტომ, რომ არ მაინტერესებს. არ მომწონს, როდესაც გმირს მსახიობთან აიგივებენ. ვერ ვიტყვი, რომ ეს ყოველ ნაბიჯზე მხვდება, მაგრამ ის ერთი-ორი იმდენად ცუდად დამხვდა, რომ ჯობდა, ასეთი რამ არ მომხდარიყო.

- ქუჩაში რაიმე ხომ არ მოგაძახეს?
- მადლობა ღმერთს, თბილისში ეს მოძახებები უკვე აღარ არის, მაგრამ იყო ასეთი შემთხვევა, ქალმა მომაძახა, რომ თავის შვილიშვილს ჩემი გმირის გამო აუკრძალა სერიალის ყურება, პროპაგანდას ეწევითო. ამ დროს ეს სულაც არ არის პროპაგანდა, არამედ ამ თემის სულ სხვა კუთხით წარმოჩენაა. როგორც უფროსს, არ მაინტერესებს, ჩემი თანამშრომელი რას აკეთებს სამსახურს გარეთ, თუკი ჩემი მეგობარი არ არის და თუკი არის, მაშინაც მისი სურვილით ჩავერთვები მის პირად საქმეში. რადგან თორნიკემ სიმთვრალის გამო უფროსს სიყვარული აუხსნა, ეს იმას არ უნდა ნიშნავდეს, რომ თორნიკე ცუდი ადამიანია.

- პირველი შემთხვევაა, როცა ტელევიზიით მამაკაცი მამაკაცს სიყვარულს უხსნის. ელოდი ცუდ რეზონანსს?
- როცა ხარ მსახიობი, უნდა ითამაშო. მე რომ ნარკომანი, მანიაკი, მკვლელი მეთამაშა ან ქალზე მოძალადე? გეისა და მანიაკის შესრულება თანაბრად საინტერესოა მსახიობისთვის. ორივე სათამაშოა. ხალხს მინდა ვუთხრა, რომ ჩვენ ვასახიერებთ პერსონაჟებს და არა საკუთარ თავებს. ალბათ მართლა კარგად მიმაქვს მაყურებლამდე ეს გმირი, რადგან ასეთი გამოხმაურება მოჰყვა (იღიმება).

- იცოდი, რომ შენი გმირი გეი უნდა ყოფილიყო?
- თავიდანვე მითხრეს და ვიცოდი. თუკი მეტყვიან, რომ სკამი უნდა ვითამაშო, ვითამაშებ სკამს. გააჩნია, როგორ შეასრულებ ამა თუ იმ როლს. არ ვიცი, რამდენად კარგად ან ცუდად ვთამაშობ, ეს მაყურებელმა შეაფასოს. რატომღაც ქართულ სივრცეში გეის ინტერპრეტაცია შემდეგნაირია, აუცილებლად მანერული უნდა იყოს და ჭრელი სამოსი ეცვას. "ჩემი ცოლის დაქალებში" თორნიკეს ჩაცმულობაში მხოლოდ მცირე მინიშნება აქვს ამაზე, ვთქვათ, განუყრელი შარფები, რომლებიც სულ უკეთია. თუკი თორნიკე მანამდე კარგი ადამიანი და თანამშრომელი იყო, რატომ უნდა გახდეს ცუდი მისი პირადულის გაგების შემდეგ?!.. ფილმში ზუსტად ჰომოფობიური პრობლემებია წამოჭრილი. ასეთი რაღაცები ალბათ ყველგან ხდება, შესაძლოა, ყველა თანამშრომელი არ არის ამის მოწმე. ნურავინ მიიღებს ამას შეურაცხყოფად. ყველას თავისი პირადი ცხოვრება აქვს და მისი გასაჯაროება ადამიანის გარიყვის მიზეზი არ უნდა გახდეს. კოლექტივში თანამშრომელს საქმით უნდა აფასებდნენ.

ჩემი როლი ეპიზოდურზე მეტია. ეს მეორე პლანის როლია, ასე მივიჩნევ. ჩემი პერსონაჟი ცოტა ცინიკოსია, ზოგჯერ სერიოზული, ზოგჯერ მხიარულიც, საქმის მოყვარული, რომელმაც ძალიან კარგად იცის, რა არის ფასეული ცხოვრებაში და რა - არა. ძალიან მსუბუქად აღიქვამს ზოგიერთის ზედმეტ "მეშჩანობას". თუნდაც ის სცენა გავიხსენოთ, როცა გოგონებზე გაბრაზდება და რაღაცას საყვედურობს, ამასაც მსუბუქად აკეთებს. განათლებული, კარგი იუმორის მქონე პერსონაჟია.

- ეს სახე ვინმეზე დაკვირვებით შექმენი?
- შევეცადე შემექმნა აბსოლუტურად ჩვეულებრივი ადამიანი. გმირს რომ ქმნი, საკუთარი პიროვნებიდან გამომდინარე ქმნი გმირის ხასიათს. ვერ ვიტყვი, რომ ამ პერსონაჟისგან ძალიან განსხვავებული ვარ. თორნიკე მოვაქციე ჩემს ყაიდაზე, მაგრამ არ ვამბობ, რომ თორნიკესნაირი ვარ. უბრალოდ, შევაერთე ორი ადამიანი და ვთამაშობ ისეთს, როგორიც შეიძლება იყოს ერთი რიგითი ადამიანი. უბრალოდ, სხვებისგან განსხვავდება იმით, რომ სამსახურში კოსტიუმში გამოწყობილი არ დადის. ეს იმიჯი თავად შევიქმენი. "ჩემი ცოლის დაქალების" გუნდში სამოსზე ფანტასტიკური ხალხი მუშაობს, ისევე, როგორც ყველა სხვა მიმართულებით.

- ბასა, გსმენია გეებისგან შეფასებები?
- სხვათა შორის, არა, მაგრამ ისიც არ მსმენია, რომ ცუდად ვასახიერებ. რამდენჯერმე გადავხედე ფანების გვერდებს და მივხვდი, რომ ამ ყველაფერს მაინც ჰომოფობიური სუნი უდის. ხალხმა ვერ გაიგო, რომ ეს არ არის სექსუალური უმცირესობის პოპულარიზაცია. რამდენიმე კომენტარში წავიკითხე, ეს ბიჭი კარგად თამაშობსო და ძალიან გამიხარდა. ზოგს ისიც უწერია, თორნიკე შემეცოდაო. მე რომ გროტესკული, ინტონაციური, ჟარგონულად მოლაპარაკე გმირი შემექმნა, ალბათ, ამაზრზენი დასანახავი ვიქნებოდი ბევრისთვის.

- ალბათ იმიტომაც გითვლიან პოპულარიზაციად, რომ ჩვეულებრივი, რიგითი ადამიანი განასახიერე და არა გროტესკული. თამაშობ კარგ პერსონაჟს, რომელიც გეი აღმოჩნდა.
- გეთანხმები. ალბათ ეს არის მიზეზი.

- რადგან ამდენი ხანია არ გითამაშია, ხომ არ გქონდა კომპლექსი კამერის წინ?
- თუკი ცოტას არ ნერვიულობ, ჩათვალე, რომ როლი კარგი არ იქნება. საკმაოდ ბევრი ვეძებე, როგორი უნდა ყოფილიყო რაკურსი, წერტილი, გამოხედვა... ვერ ვიტყვი, რომ მეშინოდა, უბრალოდ, ვნერვიულობდი, რამდენად ჩავჯდებოდი კადრში და ანსამბლში ზოგადად.

- შენ ისაუბრე უარყოფით კომენტარებზე, მაგრამ დადებითიც ხომ აქვს ამ სერიალს ის, რომ პოპულარული გახდი?
- ამას ვერ ვგრძნობ და ვერ ვიტყვი, რომ ქუჩაში მასობრივად მცნობენ. დამინახავს რეაქციები, ეს ის არ არისო?.. რადგან მეორე პლანის მსახიობსაც ცნობენ, ეს იმას ნიშნავს, რომ სერიალი მეგაპოპულარულია.

- ვისი აზრი გაინტერესებს ხო­ლმე შენს პერსონაჟთან დაკავშირებით?
- მეგობრების, რომლებიც თითზე ჩამოსათვლელი მყავს და ყველა ამ სფეროში ტრიალებს. კინომდე თორნიკეს ორიენტაციის ამბავი გაურკვეველი იყო. პრემიერაზე დარბაზიდან ველოდი რეპლიკებს. დარბაზში სიცილი რომ ატყდა, მომეშვა. ეს პარტნიორის დამსახურებაა, რადგან რომ არ იყოს დათო ბეშიტაიშვილი, არ ვიცი, როგორი იქნებოდა ჩემი გმირი. ჩვენ სცენაზეც გვითამაშია ერთად სტუდენტობის დროს, მე დათოზე უფროსი ვარ, გენიალური პარტნიორია.

- არ გეცინებათ ხოლმე გადაღებისას?
- ბევრი დუბლი გაგვიფუჭებია. სიყვარულს რომ უხსნიდა ჩემი გმირი უფროსს, აღარც კი მახსოვს, რამდენი დუბლი იყო. მოგატყუებ, რომ გითხრა, ამ სცენის გადაღებისას ფხიზელი ვიყავი-მეთქი, ცოტა დავლიე კიდეც (იცინის). სხვა სცენებზე უფრო მეტად ვბჟირდები ხოლმე, ვიდრე ამ სცენაზე ვიცინეთ.
როდესაც მეგობრებმა მითხრეს, არაგამაღიზიანებლად თამაშობ ჩვეულებრივ ადამიანსო, ეს სწორედ ის შეფასება იყო, რომელსაც ველოდი. სწორად გამიგეთ, პოპულარობისთვის შეიძლება უამრავი სკანდალი შეთითხნო ან სხვებს შეათითხნინო, მაგრამ მე ეს არ მჭირდება. თუ მოვა პოპულარობა, კარგია, მაგრამ ამისთვის არ ვიბრძვი. ჩემი საქმე მიყვარს და ვაკეთებ. პოპულარობისთვის ბრძოლა რომ მნდომებოდა, სხვა გზით წავიდოდი.

- როგორ ფიქრობ, შესაძლებელია, სერიალის შემქმნელები ეპატაჟზე წავიდნენ და შენი გმირი უფროსსაც შეუყვარდეს?
- არა მგონია. ხალხის აზრიდან გამომდინარე შესაძლოა, ეს ლოგიკურიც იყოს, მაგრამ გიორგი თავისი ცხოვრებით ჩვეულებრივი ადამიანია და ამას ნახავთ მომდევნო სერიებში. რასაც უმეტესობა ვარაუდობს, იმ ლოგიკით არ წავლენ. მათი ურთიერთობა საინტერესოდ განვითარდება.

- ბასა, დაოჯახებული ხარ?
- არა. მოდი ასე ვთქვათ, ჩემი პირადი მხოლოდ ჩემია. მყავს დედ-მამა და არ მყავს დედმამიშვილები.

- რა არ ვიცით შენ შესახებ და რა უნდა ვიცოდეთ?
- საოცრად მიყვარს ავიაცია, ალბათ, გაგეცინებათ. არ ვიცი, რატომ, მაგრამ არანორმალურად მიყვარს თვითმფრინავები, ფიზიკა და აქედან გამომდინარე, ავიაცია. ბევრ ლიტერატურასა და ვიზუალურ მასალას ვეცნობი. ეს არის ჩემი სისუსტე და ასევე ჩემთვის ვხატავ (იღიმის).

ნინო მურღულია
ჟურნალი "რეიტინგი"