ნინი ცნობილაძე წელს იურმალის კონკურსზე ვეღარ მოხვდება

წელს ''ახალი ტალღის'' კონკურსზე იურმალაში საქართველოდან შეიძლებოდა ორი კონკურსანტი მოხვედრილიყო. მას შემდეგ, რაც ტელეკომპანია ''იმედმა'' კონკურსის ტრანსლირების უფლება ძმები მელაძეების დახმარებით შეისყიდა, ქართველ მომღერლებს კვლავ მიეცათ ''ახალ ტალღაში'' მონაწილეობის უფლება. 4 აპრილს საქართველოს შიდაშესარჩევი ტური გაიმართა, რომელსაც ესწრებოდნენ მომღერალი ვალერი მელაძე, რომელიც იმავდროულად ''ახალი ტალღის'' ჟიურის წევრი გახლავთ, ამავე კონკურსის მთავარი რეჟისორი, საშა რევზინი და კონკურსის დამფუძნებელი, იგორ კრუტოი.

რუსეთიდან ჩამოსულ სტუმრებს რამდენიმე კონკურსანტი ძალიან მოეწონათ, მათ შორის გამორჩეულად ორი - სალომე ქათამაძე და ნინი ცნობილაძე. ჟიურის გადაწყვეტილებით, ორივე მათგანი მეორე ტურზე კიევში გაემგზავრებოდა და იქ გადაწყდებოდა მათი ბედი. ასეც მოხდა, თუმცა ჟიურიმ სალომე ძირითად მონაწილედ შეარჩია და ნინი ცნობილაძე რეზერვში დაიტოვა. ნინის პროდიუსერს, ნატო დუმბაძეს უთხრეს, რომ 25 აპრილს გახდებოდა ცნობილი, წაიყვანდნენ თუ არა სალომე ქათამაძის კონკურენტად იურმალაში მეორე ქართველ მომღერალს.

როგორც ჟურნალ ''რეიტინგთან'' ადრინდელ ინტერვიუში ნატო დუმბაძემ განაცხადა, ეს იმაზე იყო დამოკიდებული, როგორ ჩაივლიდა შესარჩევი ტურები დანარჩენ ქვეყნებში და იპოვიდნენ თუ არა ნინი ცნობილაძის მსგავსი ტემბრის მომღერალს.

ნატო დუმბაძეს სიახლეების გასაგებად დავუკავშირდი. აღმოჩნდა, რომ წელს იურმალის კონკურზე მხოლოდ სალომე ქათამაძე იმღერებს, ხოლო ნინის მომავალ წელს დაელოდებიან, თუმცა შესაძლოა, იმ დროისთვის მისი კარიერა უკვე სხვაგვარად იყოს განვითარებული.

ნატო დუმბაძე:
- სამწუხაროდ, ნინი წელს ''ახალ ტალღაში'' მონაწილეობას ვეღარ მიიღებს. მესიჯი მაქვს შენახული, სადაც მწერენ, რომ ძალიან მაგარი გოგოა და ყველას თხოვნაა, მან აუცილებლად სცადოს ბედი მომავალ წელსაც. მიზეზი არ აუხსნიათ, მაგრამ როგორც ჩანს, სხვა ქვეყნებიდან იყო ნინის მსგავსი ვოკალის შემსრულებელი.
- აპირებთ, შემდეგ წელსაც მიიღოთ მონაწილეობა შესარჩევ ტურში?
- ამას დაზუსტებით ვერ გეტყვით, რადგან ძალიან საინტერესო წინადადება მივიღეთ გერმანიიდან. ნინი ყოველ პარასკევს ერთ-ერთ კლუბში მღერის, სადაც მეც ვახლავარ ხოლმე. სწორედ იქ გავიცანით ქართველი ქალბატონი ირინა ტამბერგი, რომელიც დიდი ხანია გერმანიაში ცხოვრობს და მისი გერმანელი მეუღლე პროდიუსერი გახლავთ. ქალბატონი ირინა და მისი მეუღლე აღფრთოვანებული დარჩნენ ნინის ვოკალით. მათ გვითხრეს, რომ ძალიან მჭიდრო კონტაქტები აქვთ ''სონი რეკორდსთან'', ერთ-ერთ ყველაზე პრესტიჟულ ხმის ჩამწერ სტუდიასთან. მოითხოვეს ჩვენთან შეხვედრა, მაგრამ ვინაიდან სხვა შეხვედრებიც ჰქონდათ და მცირე ხნით იყვნენ ჩამოსულები, საქმიანი მოლაპარაკებები ვერ შედგა, თუმცა გავცვალეთ ნომრები. აღდგომის შემდეგ ელოდებიან ჩვენგან ნინის რამდენიმე სიმღერის გადაგზავნას, მე კი კონტრაქტის პირობები მაინტერესებს. შესაძლოა, გავემგზავროთ გერმანიაში და უშუალო მოლაპარაკებები იქ შედგეს. თუკი ნინის სერიოზული კონტრაქტი გამოუჩნდება, რასაკვირველია, უარს არ ვიტყვით და მიუხედავად იმისა, რომ ძალიან მიყვარს იურმალის კონკურსი, შემდეგ წელს, შესაძლოა, მონაწილეობა ვეღარ მოახერხოს.
- ანუ შეიძლება, ნინის კარიერა გერმანიაში გაგრძელდეს?
- ვნახოთ, როგორ განვითარდება მოვლენები (იღიმის). ახლა სასწრაფოდ გვაქვს გასაკეთებელი ნინის საავტორო სიმღერა, რადგან გვინდა, ნინის თავისი სიმღერა ჰქონდეს და ისიც გავაგზავნოთ ''ქავერებთან'' ერთად.

ნინო მურღულია

 ''რეიტინგის''