კოტე თოლორდავა - სერიალში მყარად რჩება

"სოლიდური, მშვიდი არსებაა. თუ რამეში არ გეთანხმებათ, რაც უნდა გაუკეთოთ, ვერაფერს დაუმტკიცებთ. თუ გაბრაზდა, უფრთხილდით - განრისხებული სტიქიასავით დაუნდობელია და ყველაფერ გზად შემხვედრს ანადგურებს. სასურველ ქალს დევნას არასდროს დაუწყებს. მას ურჩევნია, თავისი რჩეული მოხიბლოს და აიძულოს, თვითონ მიელტვოდეს. სასიყვარულო ურთიერთობაში ძალზე გულწრფელია, პარტნიორს არასდროს ატყუებს", - ასე ახასიათებენ ასტროლოგები თხის წელში დაბადებულ კუროს, ეს კი მსახიობ კოტე თოლორდავას ზოდიაქოს ნიშანია.

- ასტროლოგიაში კარგად ვერ ვერკვევი, მაგრამ ჩემი ზოდიაქოს ნიშნის დახასიათება წაკითხული მაქვს. ყოველდღიურ ჰოროსკოპს არ ვეცნობი და არც პირადი ჰოროსკოპი მაქვს შედგენილი.

- "დაჯილდოებულია ხელოვნების სფეროში მოღვაწეობის განსაკუთრებული ნიჭით".
- ხედავ, პროფესია როგორ ამირჩევია?!.

- "ერთი შეხედვით, თითქოს ყველაფერი ძალუძს, მაგრამ სიმორცხვისა და მორიდებულობის გამო, უსუსურ სიტუაციაშიც ხშირად ვარდება".
- მორცხვი და მორიდებული არ ვარ, მაგრამ არც უზრდელობა მახასიათებს. მორიდებულობის გამო, უხერხულ სიტუაციაში არასოდეს აღმოვჩენილვარ.

- ბედნიერი ადამიანი ხარ?
- ბედნიერი ვარ, აბა, რა! უმადურობა არ მახასიათებს, მით უმეტეს - ღმერთის მიმართ. ჩემი შვილი რომ დაიბადა, მასზე ამბობდნენ: ქუდბედიანიაო.

- "უჭირს გადაწყვეტილებების დამოუკიდებლად მიღება".
- ისეთ რაღაცებს მეუბნები, რომ მგონია, ბოლომდე მშიფრავ (იცინის). როცა გადაწყვეტილების მიღება მიჭირს, ერთი მაგარი "ბრატი" მყავს, რომელსაც განო (მეუღლეს - განო მელითაურს გულისხმობს. - ავტ.) ჰქვია და ყოველთვის მის ინტუიციას ვენდობი. განო იშვიათად ცდება!

- "მისგან ბელადი არ გამოვა, არც - მჭევრმეტყველია".
- ბელადობა არ მინდა და ამიტომაც არ გამომდის. მჭევრმეტყველება კი რაღაც დოზით ჩემს პროფესიასაც უკავშირდება. თუ გავითვალისწინებთ იმას, რომ ფილმებს ვახმოვანებ, ასტროლოგებს ვერ დავეთანხმები.

- "უყვარს კომფორტი".
- კომფორტული ცხოვრება ყველაზე მეტად, ძალიან, ძალიან მიყვარს.

- რას ნიშნავს შენთვის ეს სიტყვა?
- მთაში სიარულიც მიყვარს, ღამე კარავში დაძინებაც, კოცონთან გათბობა და გადარევაც, მაგრამ ამ ყველაფერს სასტუმროს ნომერში ცხოვრება მირჩევნია, სადაც მთავარია, ღილაკებზე თითი დავაჭირო და აუცილებლად დამილაგებენ, მომართმევენ, მომეფერებიან. ჩემთვის ეს დასვენების საუკეთესო ფორმაა.

- "რბილი ხასიათი აქვს".
- გააჩნია, ვისთან მაქვს ურთიერთობა; ზოგჯერ გაჯიუტება ვიცი, მაგრამ თუ ახლობელი ადამიანი მთხოვს, ჩემი დაყოლიება იოლია.

- "გემოვნებიანია..."
- უდავოდ, გემოვნებიანი ადამიანი ვარ და ამ შემთხვევაში ასტროლოგებს ყოველგვარი თავმდაბლობის გარეშე ვეთანხმები.

- ფულთან დამოკიდებულება...
- (მაწყვეტინებს) ჩემს საშინელ თვისებას მივადექით. მეც და ჩემი მეუღლეც დღევანდელი დღით ვცხოვრობთ. მომავალზე ისე არ ვფიქრობ, როგორც საჭიროა და ამის გამო თავში ხელი არაერთხელ შემომირტყამს. განო მაინც რომ იყოს ისეთი, რომელიც ცოტას მომქაჩავდა და მანიშნებდა, - გაჩერების დროაო, უკეთესი იქნებოდა.

- "პესიმისტია".
- ზოგჯერ ეს განცდა ძალიან შემომაწვება ხოლმე და ცუდ ხასიათზე ვდგები.

- ამ დროს რა გშველის?
- ოპტიმიზმის ნაპერწკალი, რომლის პოვნას საკუთარ თავში ხშირად ვახერხებ.

- "ძალიან რომანტიკული პიროვნება და კარგი პარტნიორია, მაგრამ მას გვერდით ისეთი ადამიანი სჭირდება, რომელიც რიგ საკითხებში დაეხმარება, რომელიც თავდაჯერებულობის გრძნობას აუმაღლებს".
- გვერდით სწორედ ასეთი ადამიანი მყავს და ბედნიერი ვარ, რომ განოსთან ერთად ვცხოვრობ. მის გარეშე ერთი დღეც კი ვერ წარმომიდგენია... რომანტიკული ვარ; საყვარელი ადამიანისთვის ათასი რამ გამიკეთებია. დღესასწაულებისა და სიურპრიზების მოწყობა ყველაზე დიდ სიამოვნებას მანიჭებს. რა სჯობს, როცა საყვარელი ადამიანის მოულოდნელობისგან გაკვირვებულ და სიხარულისგან გაბრწყინებულ თვალებს ხედავ?!

- "სოლიდური, მშვიდი არსებაა. თუ რამეში არ გეთანხმებათ, რაც უნდა გაუკეთოთ, ვერაფერს დაუმტკიცებთ. თავი დაანებეთ და ბედნიერი იქნება".
- ცვალებადი ხასიათი მაქვს. ზოგჯერ სიმშვიდეს ვერ ვინარჩუნებ, ზოგჯერ კი იმდენად მშვიდი ვარ, რომ ეს თავადაც მიკვირს. რაც არ მინდა, არ მინდა! რაიმეს გაკეთებას ვერავინ მაიძულებს!

- "თუ გაბრაზდა, უფრთხილდით. მისი განრისხება საშინელებაა - სტიქიასავით დაუნდობელია და ყველაფერ გზად შემხვედრს ანადგურებს".
- "უფრთხილდით" ცოტა ხმამაღალი ნათქვამია, უფრო მართებული იქნებოდა, ეთქვათ: "არ ღირს". ჯერ ისე არ გავბრაზებულვარ, რომ ვინმე გამენადგურებინოს. იმის თქმაც კი მიჭირს, - გაბრაზებულმა რა შემიძლია გავაკეთო. ალბათ გააჩნია სიბრაზის ხარისხს და იმ დროს თავში რა აზრი მომივა... ისე კი, ცნობისთვის, ძალიან კომუნიკაბელური ადამიანი ვარ.

- "სასურველ ქალს დევნას არასდროს დაუწყებს. მას ურჩევნია მოხიბლოს თავისი რჩეული და აიძულოს, თვითონ ელტვოდეს".
- ამ კითხვაზე რომ არ გიპასუხო, ხომ შეიძლება?

- პასუხი შენს თვალებში ჩანს, თან - ეშმაკურადაც ჩაიცინე...
- მკითხველი ჩემს თვალებს ვერ დაინახავს...

- ვერ დაინახავს, მაგრამ მე ვეტყვი.
- (იცინის) სასურველი ქალი ახლა ჩემ გვერდით არის. აწი აღარავის დევნას აღარ ვაპირებ.

- "ბუნებით ამაყია".
- მიმაჩნია, რომ სიამაყე ზომიერების ფარგლებში მაქვს. არავის მივცემ უფლებას, ჩემს თავმოყვარეობას ცუდად შეეხოს, რაღაც ზღვარს გადააბიჯოს.

- "ყოველგვარ უსიამოვნებას ვაჟკაცურად ხვდება; დასახული მიზნისკენ მტკიცედ მიიწევს".
- ვცდილობ, უსიამოვნებას არ შევეპუო... მიზნისკენ მიმავალი ჩემი ნაბიჯები რამდენად მტკიცეა, არ ვიცი. დაბრკოლებები ხშირად მხვდება და მათი გადალახვისას, თავს ახალი პრობლემებიც იჩენს...

- ამ დროს როგორ იქცევი?
- არ ვნებდები, რადგან ამისი უფლებაც არ მაქვს.

- ჯიუტი ხარ?
- კი, ეს ჩემი თვისებაა.

- დათმობაზე რა დროს მიდიხარ?
- როცა საღი ანალიზის, ჯანსაღი საუბრის შედეგად მივალ იმ დასკვნამდე, ჩემი სიჯიუტე აბსურდია, ამ შემთხვევაში დავთმობ. ასე მოვქცეულვარ კიდეც, ეს ჩემთვის პრობლემა არ არის.

- "ოჯახისა და მეგობრებისადმი მისი ერთგულება უსაზღვროა".
- ნამდვილად ასეა! ეს ჩემთვის ხელშეუხებელი სიწმინდეა.

- "იმ ადამიანთა კატეგორიას განეკუთვნება, ვინც მთელი ცხოვრება თავად სიყვარულზეა შეყვარებული".
- ასეა!

- ბევრჯერ გიყვარდა?
- ყოველთვის მიყვარდა, მიყვარდა, მიყვარდა... წლების წინ, ამ სიტყვას ძალიან მარტივად ვამბობდი, მაგრამ ყველაზე მეტად მაშინ გამიჭირდა, როცა მართლა ყველაზე მეტად, მთელი გულითა და სულით შემიყვარდა. განოსთვის დიდი ხნის მანძილზე მინდოდა მეთქვა, - მიყვარხარ-მეთქი, მაგრამ ამას დავაპირებდი თუ არა, რატომღაც ვმუნჯდებოდი.

- მერე, ბოლოს და ბოლოს, ეს სიტყვები როგორ უთხარი?
- ერთხელაც, გავბედე და ვთქვი...

- "იშვიათად დარდობს ხვალინდელ დღეზე, იმედოვნებს, რომ ნებისმიერი პრობლემა დროთა განმავლობაში თავისით მოგვარდება".
- ვაღიარებ, ეს ჩემი ცუდი თვისებაა.

- "ყველგან და ყველაფერში მრავალფეროვნებას დაეძებს".
- აბა, არ მოვძებნო? სხვაგვარად არ შემიძლია, ერთფეროვნება ბოლოს მიღებს. რომ არა განო და ჩემი პროფესია, შეიძლება ერთფეროვანი ცხოვრება მქონოდა.

- "თავგადასავლების მაძიებელია".
- თავგადასავლები მიყვარს და არც ხიფათს ვუფრთხი. ბევრი ფათერაკიანი თავგადასავალი მქონია და სასიამოვნოც. როცა იღვიძებ, თვალს ახელ და გვერდით შენს საყვარელ ადამიანებს ხედავ, დღესასწაული იწყება. 3 შვილი მყავს, აქედან 2 ჩემთან ცხოვრობს, უფროსი (კოტეს და მსახიობ მარიამ ჯოლოგუას შვილი) შაბათ-კვირას მოდის და ამ დღეებს ყოველთვის მოუთმენლად ველოდები. შვილებთან მეგობრული ურთიერთობა მაქვს. მინდა, იმის კომპენსაცია მოვახდინო, რაც მამაჩემისგან მაკლდა: მამა მეზღვაური იყო და სახლიდან რომ მიდიოდა, სულ მენატრებოდა... ახლა ამ ინტერვიუს რომ ვწერთ, ესეც ერთგვარი თავგადასავალია.

- დაბოლოს, ხმა გავრცელდა, კოტე თოლორდავა "ჩემი ცოლის დაქალებიდან" წამოსვლას აპირებსო...
- ჰო, ამ ამბავმა ჩემს ყურამდეც მოაღწია. ჩემი სახელით სოციალურ ქსელშიც წერდნენ: "შენთან მოვდივარ, კატო". ეს ვიღაცის ფანტაზიის ნაყოფია, სხვა - არაფერი. სერიალიდან წამოსვლას არ ვაპირებ.

თამუნა კვინიკაძე
ჟურნალი ”გზა”