როგორ გავხადოთ გემრიელი დიეტური საკვები?

ამ რადიკალურ ზომებს ქალბატონები, ძირითადად, ზაფხულში მიმართავენ. არადა, სწრაფი შედეგის ხიბლი ხშირად დამანგრევლად მოქმედებს ჯანმრთელობაზე.

გთავაზობთ რამდენიმე მარტივ წესს, რომლებიც წონაში დაკლების "მტკივნეულ" პროცესს მეტ-ნაკლებად შეგიმსუბუქებთ.

* 100 გრამი შემწვარი კარტოფილი "ფრი" და ჩიპსები 40 გრამ ცხიმს შეიცავს. ამდენად, სჯობს, მოხარშულ კარტოფილს მიანიჭოთ უპირატესობა. ასე მეტ სასარგებლო საკვებ ნივთიერებასაც შეინარჩუნებთ და ნაკლებ ცხიმსაც მოიხმართ.

* გირჩევთ, მიუსლი თავად მოამზადოთ, რადგან ნაყიდი პროდუქტი საკმაო რაოდენობით შაქარს შეიცავს. აიღეთ შვრია, შეურიეთ ცოტა ჩირეული, ახალი ხილი და იოგურტი.

* თუ ნაღების კარაქზე უარს ვერ ამბობთ, 250-გრამიანი ბრიკეტი 10 ნაწილად გაყავით და 2-3 დღეში ერთხელ თავს 25 გრამის მირთმევის უფლება მიეცით.

* ტორტები და ყუათიანი კრემები ხილის ჟელეებითა და კისელით ჩაანაცვლეთ. ასე გაცილებით ნაკლებ კალორიებს მიიღებთ.

* მოხარშული ქაშაყი შემწვარზე ნაკლებკალორიულიცაა და გაცილებით მეტ ცილასა და მინერალურ ნივთიერებებსაც შეიცავს.

* ხორცის ბულიონი და სოუსი თავზე ცხიმს იდებს. მისი მოცილება ადვილად შეიძლება, თუ ბულიონსა და სოუსს კარგად გააცივებთ და კოვზით ცხიმს მოხდით, შემდეგ კი კვლავ შეათბობთ.

* სჯობს დიდი ნაჭერი შავი პური მიირთვათ, ვიდრე თხლად დაჭრილი კარაქგადასმული თეთრი პური.

* კერძები დიდი რაოდენობით მწვანილითა და სანელებლებით შეაზავეთ. ასე გემოსაც გაუუმჯობესებთ და ნაკლებ კალორიებსაც მიიღებთ. მწვანილი და სანელებლები მშვენივრად ანაცვლებს ნაღებს, მცენარეულ ზეთსა და კარაქს.

* თუ გახდომა გსურთ, პურზე კარაქის ნაცვლად უცხიმო ხაჭო გადაუსვით და წვრილად დაჭრილი პიტნა ან ქონდარი მოაყარეთ. მდოგვსაც თუ დაუმატებთ, პიკანტურ გემოს შესძენთ.

* სუპებს ცხიმის ნაცვლად კარტოფილის პიურე, ბრინჯი, პომიდორი ან ბანანი დაუმატეთ.
თუ ხაჭოს ცოტა მინერალურ წყალს დაუმატებთ, მშვენივრად აითქვიფება და კარაქის დამატების გარეშეც კრემის სახეს მიიღებს.

* ჩაი და ყავა თაფლით მიირთვით და არა - შაქრითა და მურაბებით.

* ხორცი, თევზი და ბოსტნეული ბულიონში მოთუშეთ და არა - ცხიმში.

* საკვები ორთქლზე მოამზადეთ. ასე მეტ ვიტამინს შეინარჩუნებთ და ზედმეტ ცხიმსაც არ მიიღებთ.

* ფილა შოკოლადი ძალიან კალორიულია. ამიტომ თავი მცენარეული საკვებით გაინებივრეთ. შიმშილის გრძნობას მშვენივრად თრგუნავს ვაშლი, მანდარინი და მინერალური წყალი.