როგორ მოქმედებს მაღალი ქუსლები ქალის ჯანმრთელობაზე

მაღალ ქუსლებზე ქალი უფრო მომხიბვლელი და თავდაჯერებულია, მაგრამ ეს გარკვეულწილად პრობლემებს უქმნის ჯანმრთელობას. მუდმივად მაღალქუსლიანი ფეხსაცმლის ტარებამ შეიძლება ტკივილი, სახსრების დეფორმაცია, ხერხემლის გამრუდება და ოსტეოართრიტიც გამოიწვიოს.

ფეხები მთელ სხეულს აბალანსებს. ქუსლის ხშირად შემაღლებულ მდგომარეობაში ყოფნამ შეიძლება ტერფების დეფორმაციამდე მიგვიყვანოს და ფეხებმა ვეღარ შეძლოს ნორმალურად ფუნქციონირება.

ჭარბწონიან ქალბატონებს, რომლებიც უპირატესობას მაღალ ქუსლებს ანიჭებენ, შეიძლება მყესების დაჭიმვა განუვითარდეთ. ამ დროს ხერხემალსაც დიდი დატვირთვა ადგება. ხშირად ქალბატონებს თავის ტკივილი აწუხებთ, მაღალქუსლიან ფეხსაცმელზე სიარული მოქმედებს კისრის არეში არსებულ ნერვულ დაბოლოებებზე და სწორედ ეს ხდება ხშირად ტკივილის გამომწვევი მიზეზი.

1. შეეცადეთ, არ იაროთ მაღალ ქუსლებზე მთელი დღის განმავლობაში. თუ დროის უმეტეს ნაწილს სამუშაო მაგიდასთან ატარებთ, მიეცით ფეხებს დასვენების საშუალება: გაიხადეთ ფეხზე და რამდენიმე წუთი ამოძრავეთ თითები. ეს გააძლიერებს სისხლის მოწოლას ტერფებთან და მათ მოდუნების და დასვენების საშუალებას მისცემს.

2. ფეხსაცმლის არჩევისას მხოლოდ მისი სილამაზით ნუ იხელმძღვანელებთ. გახსოვდეთ! ის, პირველ რიგში, კომფორტული და მოსახერხებელი უნდა იყოს. მოზომებისას ფეხსაცმელი ორივე ფეხზე ჩაიცვით, რადგან მარჯვენა და მარცხენა ფეხის ზომასა და მოცულობას შორის შეიძლება მცირედი განსხვავება იყოს.

3. ქუსლის ოპტიმალური (უსაფრთხო) სიმაღლე მერყეობს 3-5 სმ-მდე. შედარებით სქელი ქუსლი ნაკლებ ზიანს აყენებს ჯანმრთელობას, ვიდრე წვრილი ქუსლი. ე.წ. შპილკა. თუ მაღალი ქუსლის გარეშე ვერ წარმოგიდგენიათ, ტერფი სიმაღლეს ნელ-ნელა შეაჩვიეთ: ანუ დაიწყეთ 4-5 სმ-იანი ქუსლით და მისი სიმაღლე თანდათანობით გაზარდეთ. ეს სხეულს შეჩვევასა და დატვირთვის სწორად გადანაწილებაში დაეხმარება.

4. ნუ დაზოგავთ ფულს ხარისხიანი ფეხსაცმლის შესაძენად!

5. შეეცადეთ, ყოველ საღამოს ტერფებსა და წვივებზე სარელაქსაციო მასაჟი გაიკეთოთ.