თიკო სადუნიშვილი შეყვარებულია, მაგრამ ჯერ არ ამხელს
რუბრიკა "სტილის" სტუმარი თიკო სადუნიშვილია. რამდენიმეწლიანი პაუზის შემდეგ ტელეწამყვანი ეკრანზე "თბილისი ლაივით" დაბრუნდა, რომელიც საკმაოდ რეიტინგული გადაცემა იყო. მას შემდეგ, რაც "იმედი" პატარკაციშვილების ოჯახს დაუბრუნდა, "თბილისი ლაივი" დაიხურა და თიკოს "ცეკვავენ ვარსკვლავები" მიჰყავდა. სეზონის დახურვის შემდეგ კი ის ეკრანზე აღარ გამოჩენილა.
- თიკო, რას საქმიანობთ ამჟამად და აპირებთ თუ არა ეთერში დაბრუნებას?
- ჩვიდმეტი წლიდან ეკრანზე ვარ, ამიტომ არსად წასვლას არ ვაპირებ. სხვა საქმე მე არც ვიცი და არც მინდა. ახლა კარგი დროა იმისთვის, რომ დავისვენო და ახალი ძალითა და იდეებით დავბრუნდე ეთერში. სექტემბრამდე არც ერთ არხზე არ გამოვჩნდები.
- ამბობენ, რომ შეყვარებული ხართ. ვინ არის თქვენი რჩეული?
- უკვე ერთი წელია შეყვარებული ვარ, მაგრამ ვინ არის, არ ვიტყვი. ის არც პოლიტიკოსია, არც სპორტსმენი და არც შოუბიზნესშია ჩართული, ამიტომ არ არის საინტერესო საზოგადოებისთვის (იცინის).
- ჩვენს რუბრიკას დავუბრუნდეთ. ჩაცმის როგორ სტილს ანიჭებთ უპირატესობას?
- ახლა გადაღებები არ მაქვს, ამიტომ თავისუფალ სტილს ვამჯობინებ, ძირითადად კედი და კომფორტული სამოსი მაცვია. მაღალქუსლიან ფეხსაცმელს მგონი გადავეჩვიე კიდეც. რომ ვთქვა, ვზივარ და წლის მოდურ ტენდენციებს ვითვისებ-მეთქი, მოგატყუებთ, მაგრამ სიახლეებს ყოველთვის ვეცნობი, რაც მომწონს, იმას ჩემეულ დეტალებს ვუმატებ და ჩემს გემოვნებას ვარგებ. ცნობილი ბრენდებიდან რომელიმეს გამორჩევა გამიჭირდება, რადგან ყოველ წელს სხვადასხვა დიზაინერი მომწონს, მაგრამ კლასიკური ბრენდებიდან გამოვარჩევ "დიორს". ის ყოველთვის აქტუალური და ლამაზი იქნება. "შანელიც" კლასიკაა, მაგრამ მე არ მომწონს (იცინის).
- ქართველი დიზაინერებიდან ვის გამოარჩევთ?
- ჩემი წარმატების საწინდარი ავთანდილის კაბები იყო. მისმა შექმნილმა პომპეზურმა და ექსტრავაგანტურმა სამოსმა გაცილებით მაღალი რეიტინგი შესძინა გადაცემას. მის ვერც ერთ კაბას ვერ დავიწუნებ. სხვა დიზაინერების სხვადასხვა სამოსი მომწონს, მაგრამ ხარისხზე პასუხს ვერ ვაგებ (იცინის).
ერთ-ერთ გადაცემაში დათუნას კოლექცია ალექსანდრე მაქქუინისას შევადარე და გავანაწყენე. მას შემდეგ მრავალმა წელმა ჩაიარა, ვერ ვიტყვი, რომ ვმეგობრობთ, მაგრამ კარგი ნაცნობები ვართ.
- კაბა თუ შარვალი? რომელი უფრო კომფორტულია თქვენთვის?
- მე ადამიანთა იმ კატეგორიას ვეკუთვნი, რომელთაც ყოველგვარი სტილის მორგება და მოსინჯვა შეუძლიათ. რამდენად ვიხდენ, ეს სხვა საქმეა, მაგრამ მიყვარს ექსპერიმენტები. ერთხელ თმა დავიგრძელე და მუქად შევიღებე, სამი გადაცემა წავიყვანე ამ ვარცხნილობით, მაყურებელმა უარყოფითად შეაფასა ეს ცვლილება, ამიტომ ისევ შევიჭერი და გავიღიავე.
- საზაფხულოდ განაახლეთ გარდერობი?
- მაისში ვაპირებ გარდერობის განახლებას, მაგრამ სად - ჯერჯერობით არ ვიცი. დიდხანს არ ვფიქრობ, რა შევიძინო, მაგრამ არის პერიოდები, როცა მაღაზიებში შენი გემოვნების შესაბამისი არაფერია. ყოფილა შემთხვევები, საზღვარგარეთ, საყიდლებზე, მე და ჩემს მეგობრებს არაფერი მოგვწონებია და ხელცარიელები დავბრუნებულვართ უკან. შოპინგისთვის ძალიან კარგია დუბაი. იქაურ სავაჭრო მოლებში შეიძლება რამდენიმე დღე იარო და ბევრი კარგი სამოსი შეიძინო.
- თბილისის მაღაზიებში თუ უჩუქებიათ რაიმე?
- ნეტავ რამე მაჩუქონ, ღმერთმა ქნას (იცინის). მაგრამ ეს კონსულტანტების გადასაწყვეტი არ არის. გადაღებების დროს კი მჩუქნიდნენ სხვადასხვა სამოსსა და აქსესუარს.
- ცხოვრების ჯანსაღ წესს თუ მისდევთ?
- სამწუხაროდ, ვერ ვახერხებ. ყველაზე კარგ ფორმაში მაშინ ვიყავი, როცა ვმონაწილეობდი პროექტში "ცეკვავენ ვარსკვლავები", ვცდილობდი, შემენარჩუნებინა ის მდგომარეობა, მაგრამ ვერ მოვახერხე. ყოველდღე ვამბობ, რომ დავიწყებ ვარჯიშს, მაგრამ ეს ძალიან რთულია, ამიტომ სხვა ხერხებს მივმართავ: დიეტასაც ვიცავ, სპა სალონებშიც დავდივარ და კოსმეტიკური საშუალებების მეშვეობითაც ვზრუნავ ჩემს სხეულზე.
- მაკიაჟს ყოველდღიურად იკეთებთ?
- ტელევიზიას უყვარს მძიმე მაკიაჟი, მაგრამ ახლა ნაკლებად ვიყენებ, ისიც მხოლოდ მაშინ, როცა წვეულებაზე მივდივარ. მომწონს "ბიოთერმისა" და ზოგი სხვა პარფიუმერიული ბრენდის კოსმეტიკა, ისე კი, მუდმივად ძიებაში ვარ.
- მასის გემოვნება მოგწონთ?
- საქართველოში ყოველთვის გემოვნებით იმოსებოდნენ. ამით ყველაზე ახლოს ვართ ევროპასთან. მოდის კვირეულზე რომ დავდიოდი, ვხედავდი, რომ ცნობილი ადამიანები ყოველთვის გემოვნებით იცვამდნენ.
- ვის მიიჩნევთ გემოვნებიან ადამიანად?
- სალომე ღვინიაშვილს, დალი ჩიტალაძეს... ბევრი გემოვნებიანი მანდილოსანი გვყავს.
- პლასტიკურ ქირურგიაზე რა აზრის ხართ? მოგწონთ?
- კარგია, თუ მარაზმში არ გადავიდა. პლასტიკური ქირურგიის დახმარებით დეფექტი უნდა გამოისწორო, მაგრამ დიდი სილიკონის ტუჩები, ზედმეტად აჭრილი ცხვირი და თვალები მარაზმია.
- თუ გნდომებიათ გარეგნობის კორექტირება?
- ჯერჯერობით მხოლოდ მეზოთერაპიას მივმართავ, მაგრამ სიბერის პირველივე ნიშნებისას რომელიმე პლასტიკური ქირურგის კართან ავიტუზები.
- როგორი ჩანთები მოგწონთ?
- გადაღებების დროს ბევრი რამის ტარება მიწევდა, ამიტომ დიდი ზომის ჩანთებს ვხმარობდი. ყველანაირი ჩანთა მომწონს, გააჩნია, სად როგორი მჭირდება.
- რას ურჩევთ ქართველ მანდილოსნებს?
- კარგად ჩაცმა, კარგი მაკიაჟი და პლასტიკური ოპერაცია ვერაფერს უშველის ქალს, თუ ის ბედნიერი არ არის. ვურჩევ, მეტი იფიქრონ საკუთარ თავზე და ლამაზები იქნებიან.
თამარ ბოჭორიშვილი
ყოველკვირეული გაზეთი "ყველა სიახლე"
