მაშო მელქაძე დედა გახდა

სერიალ „ჩემი ცოლის დაქალებში“ კატოს თანამშრომელი, „სვეტსკი“ ნინი ახალ სეზონში მაყურებლის წინაშე დიდი ნამდვილი მუცლით წარსდგა, მსახიობი მაშო მელქაძე მართლაც ორსულად იყო. 12 მაისს ეთერში გასულ სერიაში ნინის მშობიარობა დაეწყო და ამის გამო მთელი სამსახური თავზე დასტრიალებდა.

ერთი დღის შემდეგ კი მაშომ რეალურად იმშობიარა და გოგონას დედა გახდა. ბავშვს სახელად კატუშა დაარქვეს. მიუხედავად იმისა, რომ მაშო ჯერ კიდევ სამშობიაროშია, ამ თემასთან დაკავშირებით ჩვენი საიტისთვის მოკლედ კომენტარი მაინც გააკეთა.

- მაშო, გილოცავ პატარის შეძენას, ღმერთმა ბედნიერი გიმყოფოს...
- დიდი მადლობა. ჩემი გმირისა და ჩემი მშობიარობა ისე დაემთხვა ერთმანეთს, რომ სამშობიაროში მისულს გაოცებულები მიყურებდნენ ექიმები, დერეფანში ბავშვით რომ დავდივარ, ვგრძნობ, უცხო ადამიანების გაკვირვებულ მზერას. მართლაც, საოცარი დამთხვევა იყო. კატუშა 13 მაისს საღამოს 6-ის 20 წუთზე დაიბადა, 3 კილო და 500 გრამია, 52 სმ, მგონი უფრო მამას ჰგავს (იღიმის). სასაცილო გოგოა, სულ ჭამს, ძალიან გახარებული და დაბნეული ვარ.
- წარმატებებს და სერიალში მალე დაბრუნებას გისურვებ.

ციცი ომანიძე

 „რეიტინგის“