ვინ ზრუნავს იღბლიანი ნათია კვაშალის რელაქსაციაზე

22 წლის ნათია კვაშალი ცოტა ხნის წინ სერიალში - "შუა ქალაქში" გამოჩნდა. მისმა პერსონაჟმა (ნინო) მაყურებლის დიდი ინტერესი გამოიწვია. გარდა სერიალისა, ნათია "თავისუფალ თეატრში" მუშაობს.

- მსახიობობა რატომ გადაწყვიტე?
- ძალიან პატარა ვიყავი, როცა მშობლებს ვეუბნებოდი, - მსახიობი უნდა გამოვიდე-მეთქი. ცხადია, ისინი ამას სერიოზულად არ აღიქვამდნენ; ეგონათ, მომავალში გადავიფიქრებდი და არჩევანს სხვა პროფესიაზე შევაჩერებდი. თუმცა, როცა სკოლა დავამთავარე და ისევ მსახიობობის სურვილი გამოვთქვი, ჩემთვის წინააღმდეგობა არავის გაუწევია. სხვათა შორის, მამაჩემის ოცნება იყო, წარმატებული მსახიობი გამხდარიყო. სამწუხაროდ, ეს სურვილი ვერ აისრულა... ბედნიერი ვარ, ოჯახმა სწავლაში ხელი რომ შემიწყო.

- ნუგზარ კვაშალი შენი ნათესავია?
- ბიძაჩემია, ერთი ოჯახის წევრები ვართ. დატვირთული დღის რეჟიმის გამო, ხშირად ერთად ყოფნას ვერ ვახერხებთ, მაგრამ როდესაც ვხვდებით, სულ მეხუტება, მეფერება, მესიყვარულება. მისგან რჩევებს ყოველთვის ვიღებ. სიამაყით ვამბობ ხოლმე, რომ ნუგზარი ბიძაჩემია.

- ჯერ 22 წლის ხარ, მაგრამ უკვე "თავისუფალ თეატრში" მუშაობ...
- (მაწყვეტინებს) ვფიქრობ, იმაზე უფრო მეტად გამიმართლა, ვიდრე ოდესმე წარმოვიდგენდი. თეატრალურ უნივერსიტეტში არაჩვეულებრივ ჯგუფში მოვხვდი. ჩემი ხელმძღვანელი გიორგი შალუტაშვილი იყო. არაჩვეულებრივი სტუდენტობა მქონდა... ერთხელ მაია დობორჯგინიძე დგამდა სპექტაკლს - "თაფლობის თვე" და მან მთავარი როლი შემომთავაზა, რითაც შოკის მომგვრელი სიხარული მომანიჭა. ეტიუდებიდან დავიწყე და მთავარ როლამდე მივედი - ეს იღბალისა და შრომისმოყვარეობის წყალობით მოხდა. გამოგიტყდებით და, თავიდან ძალიან გამიჭირდა წამყვან როლზე მუშაობა, რადგან უცხო რეჟისორთან, მსახიობებთან მიწევდა ურთიერთობა. არადა, მაიამ თავიდანვე მითხრა, - იცოდე, იმედი უნდა გამიმართლოო. საბედნიეროდ, როლი კარგად მოვირგე და სპექტაკლი შედგა, ამის შემდეგ კი სხვა სპექტაკლებშიც მიმიწვიეს.

- სპექტაკლების გარდა, უკვე არაერთ ფილმსა თუ სერიალში მიიღე მონაწილეობა...
- "ანო და ვანოს" თავგადასავალში წითელქუდა ვიყავი, ფილმში - "გასეირნება ყარაბაღში" - მასწავლებელი. ცოტა ხნის წინ დასრულდა ახალი ფილმის - "არჩევანის" გადაღებები, სადაც მთავარი როლი მქონდა. იმედია, მაყურებელი ფილმს მალე იხილავს და მოეწონება კიდეც... რაც შეეხება სერიალებს - "გოგონა გარეუბნიდან" და "დეტექტივები" ვმონაწილეობდი. ახლა კი, როგორც იცით, "შუა ქალაქში" ვარ.

- "შუა ქალაქში" როგორ მოხვდი? შენი პერსონაჟი რაიმეთი თუ გგავს?
- "ღამის შოუს სტუდიასთან" ხშირად მიწევდა თანამშრომლობა. არ გამკვირვებია, კასტინგში მონაწილეობა რომ შემომთავაზეს. კასტინგის გავლიდან ნახევარ საათში დამირეკეს და მითხრეს: ხვალ სერიების ჩაწერა გვექნებაო. საერთოდ, სცენაზე დგომისას ან კამერების წინ ყოველთვის ძალიან ვნერვიულობ, მაგრამ ნინოს როლის შესრულებისას საერთოდ არ მინერვიულია, თავისუფალი და თავდაჯერებული ვიყავი. ვფიქრობ, ჩემი პერსონაჟი დასახვეწია... მე და ჩემს გმირს საერთო ის გვაქვს, რომ ორივე მხიარულები ვართ, მაგრამ ეჭვი მეპარება, სიმთვრალის დროს ნინოს მსგავსად მოვიქცე და უცხოს ცოლად გავყვე, მის სახლში ვიცხოვრო მხოლოდ იმიტომ, რომ ჩემი ოჯახის წევრები აღარ მიმიღებენ (იღიმის)...

- სად უფრო კომფორტულად გრძნობ თავს - თეატრში თუ გადასაღებ მოედანზე?
- ვფიქრობ, თეატრის გარეშე მსახიობი ნახევრად შემდგარია. ფილმში - "ანო და ვანო" რომ ვითამაშე, მაშინ მივხვდი, როგორ მიტაცებს კამერასთან მუშაობა; ოღონდ კამერის წინ დამაყენე და სხვა არაფერი მინდა. ჩემთვის ორივე სივრცე კომფორტულია და საერთოდაც, მიმაჩნია, რომ მუშაობა დიდი ბედნიერებაა.

- დატვირთული დღის რეჟიმის გაქვს, არა?
- ზოგჯერ საერთოდ არაფრისთვის არ მრჩება დრო, ზოგჯერ კი პირიქით - არ ვიცი, რით დავკავდე. ამ ეტაპზე დაკავებული ვარ და შინ მხოლოდ დასაძინებლად მივდივარ: რეპეტიციები, "შუა ქალაქის" ჩაწერები, სპექტაკლები, ფილმის გახმოვანება - ამ ყველაფერს ერთმანეთს ვუთავსებ. თავისუფალ დროს მეგობრებთან ერთად ვატარებ; მათ ყველაზე უკეთ იციან მეთოდი ჩემი რელაქსაციისთვის.

- შეყვარებული არ გყავს?
- არა. ამ კითხვას ხშირად მისვამენ; მეკითხებიან, - "რატომ არ თხოვდები?" ვფიქრობ, ჩემთვის ოჯახის შექმნა ნაადრევია. ჯერ უამრავი სხვა საქმე მაქვს მოსაგვარებელი. მირჩევნია, კარიერა ავიწყო და პირად ცხოვრებაზე მერე ვიფიქრო.

- სამსახიობო კარიერით თავის რჩენა შეიძლება?
- ქართველი მსახიობები დაბალ ფულად ანაზღაურებას შეგუებულები ვართ. სხვათა შორის, ბევრ ფილმში ყოველგვარი გასამრჯელოს გარეშე ვმონაწილეობდი - უქმად ყოფნას მერჩივნა, გამოცდილება მაინც მიმეღო. ჩემი შემოსავლით საკუთარ თავს ვინახავ, სხვა რაღაცებზე კი ლაპარაკი ზედმეტია.

- სამომავლოდ რა გეგმები გაქვს?
- ზაფხულში ფილმის გადაღებები იწყება, მაგრამ დეტალებს ჯერ ვერ გაგიმხელთ. ბოლო სამი წელია, ზაფხულში დასვენებას ვერ ვახერხებ, სულ გადაღებები მაქვს. მოკლედ, ზაფხულში უფრო მეტად "მოთხოვნადი" მსახიობი ვარ, ვიდრე - ზამთარში (იცინის). ძალიან მინდა, სამსახიობო კარიერა საზღვარგარეთ გავაგრძელო, მაგრამ არ ვიცი, ამას როდის მოვახერხებ...

ჟანა გოგინაშვილი
ჟურნალი ”გზა”