ვინ დაატარებდა როზარიო დოუსონს ნუდისტურ პლაჟებზე

ამერიკელი მსახიობი, მომღერალი და მწერალი როზარიო დოუსონი მაყურებელმა ბოლოს „ტრანსში“ იხილა. თუმცა ბევრმა არ იცის, რომ ამ სურათის რეჟისორი დენი ბოილი კარგა ხანს როზარიოს ბოიფრენდიც იყო. წყვილი ახლახან დაშორდა ერთმანეთს და როზარიოს გული ამჟამად თავისუფალია.

მამა-მამობილი
როზარიო დოუსონი 1979 წელს დაიბადა ნიუ-იორკში, მწერლის, პუერტორიკოელებისა და აფრო-კუბელების მემკვიდრე იზაბელ ჩელესტეს ოჯახში. ის რომ დაიბადა, დედამისი სულ რაღაც 17 წლის იყო, მისი ბიოლოგიური მამა პატრიკ ჰარისი კი სულაც არ აპირებდა ურთიერთობების გაოფიციალურებას. ერთ წელიწადში იზაბელი ირლანდიელ კონსტრუქტორ გრეგ დოუსონს გაჰყვა ცოლად, რომელმაც გოგონა იშვილა და მამობა გაუწია. მსახიობმა მოგვიანებით არაერთხელ აღნიშნა, რომ სწორედ ეს კაცი იყო მისთვის ერთადერთი მამა. 1983 წელს მშობლებმა გოგონას უმცროსი ძმაც აჩუქეს.
სულ მალე ოჯახი მანჰეტენში გადაბარგდა, მიტოვებულ შენობაში, სადაც გამუდმებით გასდიოდა მილებს წყალი და სადენები იწვოდა. „თუ გინდათ, უკეთ იცხოვრო, ყველაფერი თქვენს ხელშია“, - გამუდმებით უმეორებდნენ მშობლები შვილებს.
ბავშვობაშივე გამოჩნდა როზარიო საბავშვო სერიალის „სეზამის ქუჩის“ ეპიზოდში, 15 წლისა კი ფოტოგრაფმა ლარი კლარკმა „აღმოაჩინა“, რომელიც გოგონას შთამბეჭდავმა გარეგნობამ შთააგონა და როლი შესთავაზა პროექტში „ბავშვები“. ამ სკანდალური ფილმის ეკრანებზე გამოსვლის შემდეგ მსახიობის კარიერა აღმა წავიდა, სხვადასხვა სურათში გამოჩნდა - დაბალბიუჯეტიანი ფილმებიდან ბლოკბასტერებამდე.

„დედამ მასწავლა, მეამაყა ჩემი სხეულით“
1999 წელს ცნობილ მუსიკოს პრინცს შეუერთდა და მათ ერთად შეასრულეს რამდენიმე ჰიტი. ამას ხელი შეუწყო როზარიოს მუსიკალურმა ნიჭმა - მსახიობი შესანიშნავად მღერის.
ამას მოჰყვა ედვარდ ნორტონის საყვარლის როლი სპაიკ ლის დრამაში „25-ე საათი“, 2004 წელს კი იმპერატორ ალექსანდრეს მეუღლის როლი ერგო ოლივერ სტოუნის ამავე სახელწოდების ისტორიულ ექშენში. პარალელურად როზარიო თეატრის სცენაზეც გამოდიოდა.
როზარიოს ყველაზე ცნობილ პროექტებს შორის არის „ცოდვების ქალაქი“, „სიკვდილის მტკიცებულება“ და „ტრანსი“. სამივე ფილმში მსახიობი თამამად მონაწილეობს შიშველ სცენებში. ცოტა ხნის წინ კი აღიარა, რომ დედამ ასწავლა საჯაროდ გახდა და ამისთვის მას მადლობა გადაუხადა.
როგორც აღმოჩნდა, მომავალ ვარსკვლავს ბავშვობაში ნუდისტურ პლაჟზე დაატარებდნენ - დედა-შვილი იქ მთელ ზაფხულს ატარებდა. დოუსონის დედა ვერ იტანდა ნარუჯზე თეთრ ზოლებს და შიშვლად გარუჯვას ამჯობინებდა, რასაც მოუწოდებდა თავის შვილსაც. „დედამ მასწავლა, მეამაყა ჩემი სხეულით. როგორ შეიძლება გრცხვენოდეს იმის, რაც ნამდვილად მშვენიერია?“ - ამბობს მსახიობი.

„გვერდიდან შეიძლება მოგეჩვენოთ, რომ ზედმეტად განსხვავებულები ვართ“
რაც შეეხება პირად ცხოვრებას, მსახიობი წლების განმავლობაში ხვდებოდა სერიალ „სექსი დიდ ქალაქში“ ვარსკვლავ ჯეისონ ლიუისს, მოგვიანებით ჯოშუა ჯეკსონთანაც ხედავდნენ. მერე თვითონ გამოაცხადა, რომ მისი გული უცხოელ დიჯეის ეკუთვნოდა, რომელიც ერთ-ერთ ფრანგულ კაფეში გაიცნო.
შემდეგ მის ცხოვრებაში გამოჩნდა 56 წლის რეჟისორი დენი ბოილი, რომელიც „ტრანსის“ გადაღებებზე გაიცნო. „გვერდიდან შეიძლება მოგეჩვენოთ, რომ ზედმეტად განსხვავებულები ვართ, - ამბობდა იმ პერიოდში როზარიო, - მაგრამ სინამდვილეში ბევრი გვაქვს საერთო. მართლა ძალიან ვგავართ. და ის შესანიშნავი ადამიანია“.
თუმცა, მიუხედავად ამისა, მათი ურთიერთობა მაინც დამთავრდა. ახლა მხოლოდ ფილმის პრომოტურში ერთობლივი მონაწილეობის აუცილებლობა აერთიანებთ.
ამ ბოლო დროს როზარიოს მსახიობ მეთიუ შრეიერთან ერთადაც ხედავენ. როზარიო ამბობს, რომ ეს მხოლოდ მეგობრობაა, მაგრამ, სავარაუდოდ, ეს კიდევ ერთი რომანია.

ჟურნალი „რეიტინგი“