რა არ მოსწონს მანიკა ასათიანის მეუღლეს

რუბრიკა "სტილის" სტუმარია "მაესტროს" დილის გადაცემის წამყვანი მანიკა ასათიანი. მანიკას სატელევიზიო კარიერა რამდენიმე წლის წინ "რუსთავი 2"-ის დილის გადაცემაში დაიწყო, შემდეგ ბავშვი შეეძინა, რამდენიმე თვის წინ კი "მაესტროზე" გადაცემა "მაღვიძარას" წამყვანი გახდა.

- თითქმის ორი წელია, ეკრანზე აღარ გამოვჩენილვარ. "რუსთავი 2"-ის დილის გადაცემიდან წასვლის შემდეგ შვილი შემეძინა. ეს ხანი მის აღზრდას დავუთმე, თავიდან ძიძაც კი არ ამიყვანია, დამოუკიდებლად ვზრდიდი. ახლა ძიძა, დედამთილი და ოჯახის წევრები მეხმარებიან. დილიდან საღამომდე ვმუშაობ, თავისუფალ დროს კი მხოლოდ შვილთან ვატარებ.

- ალბათ, პატარას გამო ღამისთევაც ხშირად გიწევთ, როგორ ახერხებთ უძილო ღამის შემდეგ ეთერში მუშაობას?
- მართლაც ხშირად მიწევს ღამისთევა. პირდაპირ ეთერში მუშაობა დიდი პასუხისმგებლობაა, ამიტომ ვცდილობ, ჩემი დაღლილობა სამუშაოზე არ აისახოს.

- ვინ ზრუნავს თქვენს საეთერო ჩაცმულობაზე?
- გადაცემის ეთერში გასვლამდე მე და ნინუცა მაყაშვილი მილანში ვიყავით მაკა ასათიანთან. მაკასა და პარიზში მოღვაწე დიზაინერ ჯაბა დიასამიძესთან ერთად შევარჩიეთ სატელევიზიო სამოსი, მოვინახულეთ "პრადას", "ივ სენ ლორანისა" და სხვა ბრენდების მაღაზიები, სამოსიც იქ შევიძინეთ, რა თქმა უნდა, ჩემი და ნინუცას გემოვნების გათვალისწინებით.

- ბევრი ცდილობს, თავი სექსუალური სამოსით წარმოაჩინოს. თქვენ როგორ სამოსს ირჩევთ?
- ვისაც სურს, ეცვას სექსუალურად, მე მირჩევნია, პროფესიული კუთხით მოვეწონო ხალხს.

- ამბობენ, რომ თუ კარგი ჩანთა და ფეხსაცმელი გაქვს, სამოსი მეორეხარისხოვანიაო, ეთანხმებით?
- ძალიან მიყვარს კარგი ფეხსაცმელი. უამრავი მაქვს. ხშირად გამიჩუქებია კიდეც. სამოსის საყიდლად წასული, ბოლოს მაინც ფეხსაცმელს ვყიდულობ. დიდ ჩანთებს ვატარებ, კლატჩებს არ ვხმარობ, როცა სპორტულად მაცვია, გვერდზე გადასაკიდებელ ჩანთას ვამჯობინებ.

- მეუღლე თუ გაძლევთ რჩევებს სამოსის არჩევისას?
- ბექას ძალიან კარგი გემოვნება აქვს. ერთადერთი, ქუსლიანი ფეხსაცმელი არ მოსწონს, მაგრამ როცა საჭიროა, არც ამას მიშლის. სამოსს სულ მე ვურჩევ და სავსებით ენდობა ჩემს გემოვნებას. ნებისმიერი ცოლ-ქმრის ცხოვრებაში ასე ხდება.

- სალონში ხშირად დადიხართ?
- თვეში ორჯერ, ფრჩხილებს ვიწესრიგებ. თმა ხვეული მაქვს და ადვილი მოსავლელია. რადგან ყოველდღე მიწევს ფენით დავარცხნა, რომ არ გამიფუჭდეს, თმის ზეთს ვიყენებ და ხვეული თმისთვის განკუთვნილი შამპუნით ვიბან.

- მაკიაჟს ყოველდღე იკეთებთ?
- ვცდილობ, ყოველდღიურად არ გავიკეთო მაკიაჟი, ისე კი "დიორის" ტონალურ საცხს ვხმარობ, რომელსაც თხელი სტრუქტურა აქვს, ასეთივეა "სმეშბოქსის" რუჟი და "ლანვინის" ტუში. საეთეროდ მძიმე მაკიაჟის გაკეთება მიწევს, ამბობენ, რომ ეს კანს აზიანებს, მაგრამ ჯერ ახალგაზრდა ვარ და სპეციალური ნიღბების გაკეთება არ მჭირდება.

- ფორმას როგორ ინარჩუნებთ?
- ბუნებრივად მაქვს ასეთი აღნაგობა. ორსულობის დროს 23 კილო მოვიმატე და ბავშვის გაჩენის შემდეგ, ზუსტად ერთ თვეში, უფრო მეტი დავიკელი. გურმანი ვარ და ამის გამო ხშირად ხუმრობენ ჩემი მეგობრები. არასოდეს ვყოფილვარ დიეტაზე. ვერც ვარჯიშს ვახერხებ.

- რა განსაზღვრავს ადამიანის გემოვნებას?
- რა გარემოშიც იზრდები და რა სოციუმთანაც გაქვს ურთიერთობა, იმის მიხედვით გიყალიბდება გემოვნებაც. გემოვნებიანი ადამიანებიდან ვიქტორია ბექჰემს და ნინჩო ელიავას გამოვარჩევ.

- სოლარიუმში დადიხართ?
- თეთრი კანი მაქვს და აქამდე ყოველთვის თავს ვარიდებდი სოლარიუმს. ამჟამად დილიდან საღამომდე ვმუშაობ, ვერ ვახერხებ აუზზე სიარულსა და გარუჯვას, ამიტომ სოლარიუმში სიარული დავიწყე. გარუჯულ კანს უხდება ღია ფერის სამოსი, ეთერშიც ეფექტურად ჩანს.

- რას ურჩევთ ქართველ ქალებს?
- მოდურ სამოსს მოხერხებული არჩიონ.

თამარ ბოჭორიშვილი

ყოველკვირეული გაზეთი "ყველა სიახლე"