„თუ ქათმის შეწვა კარგად იცით, მამაკაცის გულის მოგება არ გაგიჭირდებათ!..“

„რუსთავი 2“-ის დილის ეთერის კულინარიის რუბრიკას რამდენიმე თვეა, ნათია მონტგომერი უძღვება. ნათია უგემრიელესი კერძების მომზადების დროს ვნებიანად საუბრობს. თურმე სამზარეულოში ტრიალისას საკვებთან საუბარი აუცილებელი ყოფილა. ამ შემთხვევაში კერძი გაცილებით გემრიელი გამოდის.

- მეუღლის გვარი მაქვს. მონტგომერები წარმოშობით საფრანგეთიდან არიან. მეუღლის წინაპრები ამერიკაში, აიოვის შტატში დასახლდნენ. ჩემი მეუღლეც ამერიკაში არის დაბადებული.
- სანამ მეუღლის გვარზე გადახვიდოდით, რა გვარს ატარებდით?
- გოგშელიძე ვიყავი. ამერიკაში წესია, რომ ქმრის გვარზე უნდა გადახვიდე. იშვიათად ხდება, რომ ქალი ქალიშვილობის გვარზე რჩება. ამერიკაში მოღვაწეობა მონტგომერის გვარით უფრო ადვილი იყო.
- მეუღლე როგორ გაიცანით?
- ერთ-ერთ მდიდარ ოჯახში პერსონალურ შეფმზარეულად ვმუშაობდი. ჩემი მეუღლე ამ ოჯახის მეგობარი იყო და ხშირად სტუმრად მოდიოდა. სულ მათთან ვტრიალებდი და ნაირ-ნაირ ლანჩს ვამზადებდი. აქედან გამომდინარე, სიმპათიები გაუჩნდა და დაახლოებით ერთი წლის მერე დავქორწინდით. ძალიან კარგი მეუღლე მყავს. რობერტ მონტგომერი. ახლა ამერიკაშია. ზაფხულში მე წავალ ამერიკაში ან თვითონ ჩამოვა.
- მეუღლე რას საქმიანობს?
- საინვესტიციო კორპორაციაში მუშაობს. ნიუ-ჯერსიში გვაქვს სახლი. გვყავს ერთი შვილი, სამი წლის ალექსი, რომელმაც ჯერ მხოლოდ ქართული იცის. ბედს ნამდვილად არ ვუჩივი. ცოტა რთულია, როცა მეუღლე ამერიკაში ცხოვრობს და მე საქართველოში ვარ. ვფიქრობთ, საქართველოში იშოვოს სამსახური, რომ თბილისში დავიდოთ ბინა.
- ამერიკაში საკუთარი სახლი გქონიათ. შეგეძლოთ იქ დამკვიდრება. ბევრი თქვენს ადგილას ასე მოიქცეოდა.
- ვფიქრობ, ცუდი არაფერია, საქართველოში რომ გვინდა ცხოვრება. ძალიან ბევრი ამერიკაში მდიდრდება, მაგრამ მე 25 წლის ვიყავი, რომ წავედი და ჩემი ქვეყნის ნოსტალგიას ვერ ვუძლებდი.
- „რუსთავი 2“-ში მუშაობა როგორ დაიწყეთ?
- ნინო არაზაშვილს მივწერე წერილი. მინდოდა, ჩემთვის სამწუთიანი რუბრიკა მოეცათ, სადაც პრაქტიკულ რჩევებს მივცემდი დიასახლისებს. მაშინ ბატონი ჟანრი ლოლაშვილი და მისი მეუღლე იყვნენ კულინარიული რუბრიკის წამყვანები. არც მიფიქრია, რომ მათ მე შე-ვცვლიდი. ნინო არაზაშვილი მალევე გამომეხმაურა.
- მანამდე ტელევიზიასა და ჟურნალისტიკასთან შეხება არ გქონიათ?
- საქართველოში რომ ჩამოვდიოდით, მე და ჩემს მეუღლეს სხვადასხვა ტელევიზია გვიწვევდა. გადაცემებში იმაზე ვლაპარაკობდით, როგორ შევქმენით ოჯახი და როგორ შეუყვარდა ჩემს ამერიკელ მეუღლეს საქართველო. ჩემი მეუღლე სულ ამბობს, რომ საქართველო არის პატარა მარგალიტი, რომელიც ჯერ არ აღმოუჩენიათ. ამბობს, საქართველოში რომ ჩამოვდივარ, აქ ვცოცხლობ, აქ მიყვარს, ვტირი და ემოციებს გამოვხატავ. არ მჭირდება, რომ კონსერვატორი ვიყოო.
- თქვენი გარეგნობით თუ ვიმსჯელებთ, თქვენც გურმანი ხართ.
- (იცინის) პუტკუნა ვარ, ხომ?.. ჩემი აზრით, ამ რუბრიკას გამხდარი წამყვანი არ უხდება. შოკოლადს ვამზადებ და სულ „შოკოლადნიცას“ მეძახიან.
- შოკოლადის მომზადება სად ისწავლეთ?
- ნიუ-იორკში ფრანგული კულინარიის ინსტიტუტში ვისწავლე შოკოლადის მომზადება და იქვე ვისწავლეარტიზანული პურის მომზადება. ესაა პური, რომელსაც ქარხანაში კი არა, ხელით აცხობენ. ეს პურის მომზადების ფრანგული მეთოდია. პარიზული, მჟავე პური ძალიან გემრიელია. სანამ კურსებს გავივლიდი, ყოველთვის მეგონა, რომ შოკოლადი ქარხნული წესით უნდა დამემზადებინა. არადა, ნამცხვარზე ადვილია შოკოლადის მომზადება.
- ჩვენც გვასწავლეთ.
- დაჭერით 100 გრამი შოკოლადის ფილა. ნახევარი ჭიქა ნაღები აადუღეთ. ჩაყარეთ ნაღებში ვანილი, ან ფორთოხლის გახეხილი ქერქი და რომ ადუღდება, დაასხით შოკოლადს. ფიცარზე გადაიტანეთ მიღებული მასა და რამდენიმე საათი გააჩერეთ. მერე კოვზით აიღეთ, დაახლოებით ისე, როგორც ნაყინს იღებენ ხოლმე და ამოავლეთ კაკაოს ფხვნილში, დაფქულ თხილში, ან დაფქულ ფოთოხალში და უნიკალური ტრიუფელი მზად გექნებათ.
- თქვენს რუბრიკაში ხშირად ამბობთ, საჭმელი გემრიელი რომ გამოვიდეს, უნდა ელაპარაკოო.
- საქართველოში დიდი პრობლემაა ბრინჯის მოხარშვა. ხშირად ჩივიან, რომ უფლავდებათ და არ გამოდის ფანტია. არადა, სულ ელემენტარული ფორმულაა დასაცავი, წყლისა და ბრინჯის რაოდენობა ზუსტად უნდა იყოს დაცული. ფლავს რომ მოხარშავ, ორი ნიჩბით უნდა აურიო. უნდა გაანებივრო და გაათამამო. ამას თუ გინდათ ჩემი და ფლავის საუბარი დაარქვით. ვათამამებ ხოლმე ბრინჯს და ისიც მპასუხობს იმით, რომ მოცინარი და გემრიელი გამოდის. ასეა სხვა კერძებიც. მათ პატივისცემით უნდა მოეკიდო.
- კერძზე ახლაც და გადაცემაშიც ვნებიანად ლაპარაკობთ ხოლმე. ამას ალბათ სხვებიც აღნიშნავენ.
- კი, სხვებიც ამბობენ.
- ეს თქვენი ერთ-ერთი მეთოდია, რომ მამაკაცებმა თქვენ მიერ მომზადებულ კერძზე გააკეთონ არჩევანი?
- მამაკაცებს ეს არანაირად არ უკავშირდება, უბრალოდ, ძალიან მიყვარს გემრიელი, ახალი და მსუბუქი კერძები. კერძზე ხშირად ამბობენ, ძალიან გემრიელიაო. გასაგებია, კერძი თავისთავად უნდა იყოს ძალიან გემრიელი, მაგრამ იმისთვის, რომ კერძი მოიწონონ, არ არის საკმარისი, მხოლოდ გემრიელი იყოს. თავდაპირველად კერძმა ფსიქოლოგიური კომფორტი უნდა შეგიქმნას, ფიზიკური და ესთეტიკური კომფორტი. საჭმელში ინგრედიენტებმა ერთმანეთი არ უნდა დაჯაბნონ. ყველა გემო უნდა იგრძნობოდეს. დაგემოვნების დროს აღმოჩენას უნდა აკეთებდეთ. როდესაც საჭმელს მიირთმევთ, დრო უნდა გაატაროთ, რაღაც ახალი უნდა აღმოაჩინოთ, გამოცდილება უნდა მიიღოთ. ძალიან მიყვარს ფრანგების დამოკიდებულება კერძებთან. კულინარიას, როგორც მხატვრობას, ისე აფასებენ. ქართულ კერძებსაც ასე თუ აღვიქვამთ, ეროვნული კულინარია უფრო მეტად დაფასდება.
- ყველაზე მეტად რომელი ქვეყნის სამზარეულო მოგწონთ?
- იაპონური. მათი სამზარეულო უნივერსალურია. მათ კერძებში აზიურსა და ევროპულ ცივილიზაციასაც ვხედავ. ყველა ადამიანის გემოვნებაზეა მორგებული.
- მეგონა, ამ შემთხვევაში ქართულ კერძებს გამოარჩევდით.
- ქართული ძალიან მიყვარს, მაგრამ ვიტყოდი, რომ ქართულში უფრო მეტად უნდა იყოს მწვანე ბოსტნეული. საკვები არ უნდა იყოს მასასავით. ქართულ სამზარეულოს ეს მინუსი აქვს. ხინკალზე, ხაჭაპურზე, ჩაქაფულსა და შქმერულზე ვერაფერს ვიტყვი. ნაციონალური კერძები იმდენად სრულყოფილია, რომ მათი თემა ამოწურულია. ვეღარაფერს დაამატებ, ვერ შეცვლი. ახალ ქართულ კერძებზე მაქვს საუბარი. ამ შემთხვევაში ჩემი სურვილი იქნება, ბოსტნეული უფრო კარგად იყოს წარმოდგენილი, რასაც დღევანდელი მსოფლიო სტანდარტი მოითხოვს.
- ინტერვიუს დაწყებამდე მითხარით, მამაკაცი რომ მოხიბლო, კარგი კერძი უნდა მოუმზადოო. თქვენ რომელი კერძით მოხიბლეთ მეუღლე?
- მეუღლე ჩემზე უკეთესად ამზადებს. ამერიკაში რომ ვარ, სამზარეულოში საერთოდ არ მიწევს ტრიალი. კულინარიას ორი ადამიანის სიყვარულში დიდი წვლილი მიუძღვის. ვფიქრობ, რომ თუ იცით ქათმის კარგად შეწვა, მამაკაცის გულის დაპყრობის პრობლემა არ უნდა გქონდეთ.
- შემწვარი ქათამი რომ არ უყვარდეს, მაშინ როგორ მოვიქცეთ?
- ასეთი რამ ცოტა წარმოუდგენელია. თუ ვეგეტარიანელი არაა, შემწვარი ქათამი უნდა უყვარდეს და თუ მაინცდამაინც შემწვარი ქათამი არ უყვარს, ზოგადად ხორცის შეწვა თუ იცით, ჩათვალეთ, რომ ყველაფერი გამოგივათ.

მერი კობიაშვილი

ჟურნალი „რეიტინგი“