ნინო მუმლაძეს ცოლიან კაცთან რომანის გამო მაყურებელი აუჯანყდა

"როგორ ბედავს, რომ ამ კარგ ოჯახს ანგრევს!" "ცოლიან კაცზე თვალი როგორ უჭირავს!", "ნუთუ იდეალური წყვილი არ არსებობს?!"... – სოციალურ ქსელებში ასეთი მღელვარება მსახიობ ნინო მუმლაძის პერსონაჟის, ნათიას გამოჩენამ გამოიწვია სერიალში "ჩემი ცოლის დაქალები". იდეალური ოჯახური წყვილის, ნინას და დათოს ცოლქმრულ ცხოვრებაში კრიზისია, ამის მიზეზი კი სტომატოლოგი ნათიაა, რომელიც ცოლ–ქმარს შორის ჩადგა.
ეს მაცდური ქალი მსახიობ ნინო მუმლაძისთვის სრულიად განსხვავებული ამპლუაა იმ გმირის ფონზე, რომელიც მას მანამდე სერიალ "ჩვენს ოფისში" აქვს ნათამაშევი – მისი ნუნუკა სიწმინდისა და უმანკოების ფანატიკური დამცველი იყო. ახალ როლში ის საგრძნობლად წონადაკლებულიც გამოგვეცხადა. კიდევ რა მოხდა მის ცხოვრებაში სერიალიდან სერიალამდე, 28 წლის მსახიობი თავად გვიამბობს.
– ნინო, თქვენს პერსონაჟზე რა აზრის ხართ?
– ნათია უჭკუო ქალი არ არის, მას საკმაოდ მძიმე ცხოვრება ჰქონდა, რამაც დამოუკიდებელი გახადა. პირადი ცხოვრება ვერ ააწყო, ჰყავდა ქმარი, რომელმაც სისხლი გაუშრო. ის აღარ ეძებს იდეალურ მამაკაცს, რომელიც ოჯახურ სიმყუდროვეს შეუქმნის, არამედ – ისეთს, ვისთანაც თავს კომფორტულად იგრძნობს. ასეთი კი დათო აღმოჩნდა. ნათია საკმაოდ ძლიერია, ამიტომ არ აპირებს, ვიღაცას კისერზე დააწვეს, მხოლოდ თავისი სიამოვნებისთვის ცხოვრობს. ეს ყველაფერი ქართული მენტალიტეტისთვის რთულად მისაღებია. სცენარისტებმა ჩემი გმირი სპეციალურად შეიყვანეს სერიალში, რომ ხალხი ანერვიულონ. ნათიას გამოჩენას დიდი აურზაური მოჰყვა.
– თქვენი გმირისადმი ნეგატიური დამოკიდებულება თქვენზეც ხომ არ ვრცელდება?
– პირადად არავინ არაფერს მეუბნება, მაგრამ "ფეისბუქზე" დიდი ამბავია ატეხილი. ამბობენ, ხომ შეიძლება სერიალში მაინც არსებობდეს იდეალური ოჯახი და იდეალური კაცი, რატომ შეიყვანეთ ეს გოგო, ნერვებს გვიშლისო. მაგრამ ეს სერიალი ხომ ჩვენი რეალური ცხოვრების ასახვაა. სამწუხაროდ, თითქმის ყველა ოჯახში დგება კრიზისული პერიოდი და დათოს და ნინას ოჯახშიც ეს ეტაპია.
– ნათია თქვენ რაიმეთი გგავთ, თქვენი თვისება ჩადეთ ამ გმირში?
– მისნაირი ცხოვრება არ გამომივლია, ღმერთმა დამიფაროს! ჩემი ალბათ ის აქვს, რომ მეც საკმაოდ დამოუკიდებელი ვარ. უკვე ბევრი წელია, არავის კისერზე არ ვცხოვრობ. ყოველთვის მარტო ვაღწევ ყველაფერს. ნათიასავით არც მე ვეძებ მამაკაცს, რომელიც შემინახავს. ალბათ ამდენ ხანს სწორედ ამიტომაც არ შევქმენი ოჯახი. ვისთანაც ვიქნები, მინდა, მასთან ცხოვრება დიდი სიამოვნება იყოს ჩემთვის. ასეთს კი ჯერჯერობით ვერ შევხვდი.
– ზოგადად რას ფიქრობთ ქალებზე, რომლებიც ცოლიან მამაკაცებთან აბამენ რომანს?
– ამის წინააღმდეგი ვარ. არ შეიძლება შენი ბედნიერება სხვის ხარჯზე შექმნა. მადლობა ღმერთს, ასეთი რაღაც ცხოვრებაში არ დამმართნია.
– ეს ყველაფერი ხომ შეიძლება სიყვარულით ახსნა?
– როდესაც რაღაცაში შეტოპავ, მერე ფიქრობ, თავი რითი გაიმართლო. ნათიასაც ძალიან აწუხებს ნამუსი და ასევე – დათოსაც. ისინი ნამუსგარეცხილი ადამიანები ნამდვილად არ არიან, უბრალოდ ვერ უარყოფენ იმ გრძნობებს, რაც ერთმანეთის მიმართ გაუჩნდათ. ასეთი შემთხვევა არასოდეს მქონია და დიდი იმედი მაქვს, რომ არც მექნება. ვთვლი, რომ, როდესაც ოჯახში პრობლემა იქმნება, ჯობს, ორმა ადამიანმა ერთმანეთში გაარკვიოს. ღალატი საშინელებაა. ნინას ადგილას რომ ვიყო, ვამჯობინებდი, ჩემს ქმარს სიმართლე ეთქვა, ერთმანეთს დავშორდებოდით და ვიღაც სხვა მერე მოეძებნა. მისი ცოლი ვიყო და სხვასთან მღალატობდეს? საშინელებაა! ამიტომ ამ პერსონაჟებს არ ვამართლებ. მათ ადგილას საკუთარი თავის წარმოდგენა არ მინდა. ვერც კი ვიტყვი, ამ შემთხვევაში როგორ მოვიქცეოდი.
– წლებია სტუდია "ფორმულა კრეატივთან" თანამშრომლობთ. იქ მისულს უკვე კარგად ნაცნობი გარემო დაგხვდებოდათ.
– კი, ჩვენი ურთიერთობა ტელეკომპანია "მზეზე" დაიწყო, როდესაც სერიალი "ბიჭები და გოგოები" კეთდებოდა. მერე "რუსთავი 2"–ზე სერიალ "ჩიფსების თაობის" გაკეთება დავიწყეთ, რომელსაც შემდეგ "ჩვენი ოფისი" ერქვა. ამ სერიალმა 3 წელი გასტანა. შეიძლება ითქვას, რომ 5 წელი "ფორმულა კრეატივთან" ერთად ვცხოვრობდი. ოჯახის წევრებივით ვიყავით, პარალელურად სხვადასხვა თეატრში ვმუშაობდი. ტელეკომპანია "რეალ ტივის" დილის ეთერის წამყვანად წელიწადნახევარი ვიმუშავე, მერე ეს არხი დაიხურა. გამიხარდა, როცა "ფორმულა კრეატივიდან" დამირეკეს, მათ წინადადებას სიამოვნებით დავთანხმდი.
– როგორია რეჟისორ გიორგი ლიფონავას მუშაობის სტილი, მსახიობებთან როგორი ურთიერთობა აქვს?
– სერიალს "ჩემი ცოლის დაქალები" ორი რეჟისორი ჰყავს. რატომღაც ხალხი ფიქრობს, რომ "ფორმულა კრეატივში" გიორგი ლიფონავაა ყველაფერი, სინამდვილეში ასე არ არის. გვყავს სცენარისტი, პროდიუსერები... თითოეულ კადრზე ბევრი ადამიანი მუშაობს. გიორგი მთავარი რეჟისორია, გვყავს რატი რამიშვილი, რომელიც ასევე ძალიან კარგი რეჟისორია. ორივე კრეატიულია. გიორგის შეუძლია უცებ ისეთი დეტალი გითხრას, რაც დასკვნების გაკეთებაში დაგეხმარება. თავისი საქმის ოსტატია.
– როცა იმ შედეგს ვერ იღებს მსახიობისგან, რაც უნდა, უკმაყოფილებას რა ფორმით გამოხატავს?
– არიან ადამიანები, მათ შორის – ჩემი კოლეგებიც, რომლებიც აღნიშნავენ, რომ გიორგის უჟმური ხასიათი აქვს, მაგრამ მე მსგავსი რამის თქმა არ შემიძლია. ადრე, გადაღებების დროს, უყვირია, მაგრამ ჩემთან მსგავსი შემთხვევა არ ყოფილა. ერთმანეთს ყოველთვის კარგად ვუგებდით. მასთან მუშაობით კმაყოფილი ვარ. როცა ხედავ, რომ რეჟისორი შემოქმედებით პროცესშია, რაღაცას აკეთებს, შენ თვითონაც ინთები და გინდა, მისი მოლოდინი გაამართლო. ჩვენ მეგობრები საქმის დამთავრების შემდეგ ვართ. არ შეიძლება საქმე ძმაკაცობას და მეგობრობას გადააყოლო.
– თქვენი პირადი ცხოვრება რა ფაზაშია – აქტიურში თუ პასიურში?
– ჩემი პირადი ცხოვრება არ შედგა, ეს ალბათ უკვე ბედისწერის ამბავია.
– ამჟამად თქვენ გვერდით არავინ არის?
– სამწუხაროდ, ახლა ჩემ გვერდით არავინ არის.
– რატომ, ზედმეტს ითხოვთ მამაკაცებისგან თუ წუნია ხართ?
– არ ვიცი. ხანდახან ურთიერთობა დაწყებულა, მაგრამ მერე აღარ შემდგარა. ალბათ წუნიაც ვარ. შეიძლება ეგოისტურად და ხმამაღალ ნათქვამად გამომივიდეს, მაგრამ, ვფიქრობ, რომ კარგი გოგო ვარ და კარგი ბიჭის ღირსი ვარ. არ მინდა, "ისე რა" ბიჭები და რა გავაკეთო?!
– ისეთი ძალით არასოდეს გყვარებიათ, რომ ნაკლზე თვალები დაგეხუჭათ?
– ძალიან შეყვარებული არასოდეს ვყოფილვარ. არ ვიცი, ეს ჩემი ნაკლია თუ შესაფერის ადამიანს ვერ შევხვდი.
– ოჯახის წევრები არ გაჩქარებენ, რომ გათხოვდეთ?
– 22 წლის შემდეგ ყველა მეუბნება, რომ ჩემი გათხოვების დროა, მაგრამ ამაზე ძალიან მეცინება. ბევრი ქართული ტრადიცია მიყვარს, მაგრამ ქართულ მენტალობაში ბევრი რამ არსებობს ისეთი, რაც ძალიან მაღიზიანებს.
– მაგალითად?
– ყველაფრის ჩამოთვლა შორს წაგვიყვანს. იმის გამო, რომ ვიღაცის დიდმა ბაბუამ რაღაც თქვა, ჰგონიათ, რომ სულ ასე უნდა ვიცხოვროთ. ვიცავთ ტრადიციებს, რომლებიც, არც კი ვიცით, რაში გვჭირდება. როცა ბრმად მისდევ რაღაცას, ეს იმაზე მიანიშნებს, რომ ინტელექტი გაკლია.
განათლებული ადამიანების, ხელოვანების ოჯახში გავიზარდე. ჩემს ბაბუაზე – გრიშა ქსოვრელზე ტრადიციული ქართველი კაცი ცხოვრებაში არ შემხვედრია, მაგრამ ამ თვისებამ მას სულაც არ შეუშალა ხელი, რომ შვილები საზღვარგარეთ წაეყვანა და მათთვის კარგი განათლება მიეცა. იმ განათლებულმა ქალმა კი შემდეგ მე გამზარდა. იმედი მაქვს, ჩემს შვილებსაც შესაბამის განათლებას მივცემ.
– "ჩემი ცოლის დაქალებში" წონაში მკვეთრად დაკლებული გამოეცხადეთ მაყურებელს. ეს როგორ მოახერხეთ?
– სერიალი "ჩვენი ოფისი" რომ დამთავრდა, წონაში ძალიან ვიყავი მომატებული. ერთხელ ჩემთან გადაცემაში ცნობილი ენდოკრინოლოგი, ელენე გიორგაძე მოვიდა. მან ბევრი ისაუბრა სწორ კვებაზე, მერე ჩემკენ მოტრიალდა და მითხრა, ხალხს რომ აძლევ რჩევებს, შენ არ გინდა, ჩემთან მოხვიდეო. მეორე დღეს მივედი. დაახლოებით ექვსი თვე უმკაცრეს დიეტაზე ვიყავი.
ფორმას რომ დაიბრუნებ, მერე თავი უნდა აკონტროლო, დაძინებამდე 4 საათით ადრე უნდა ჭამო. დღის განმავლობაში, მინიმუმი, ლიტრნახევარი წყალი უნდა მიიღო. ისეთ ცომეულზე უნდა თქვა უარი, სადაც საფუარია გამოყენებული. არც ტკბილი შეიძლება. დიეტის დროს თაფლს, იოგურტს და ტკბილ ხაჭოს ვიღებდი, მაგრამ გადაჭარბებით – არა. როცა სუფრასთან ხარ, საკუთარ თავს არაფერიუნდა აუკრძალო, მეორე დღეს კი შეგიძლია განტვირთვის დღე მოიწყო. გეტყვით, ეს როგორ უნდა გააკეთოთ: ერთი კილო ხილი – არ უნდა იყოს კარალიოკი, ლეღვი, ყურძენი, არც ბანანია სასურველი, კარგია ვაშლი, ფორთოხალი, ფეიხოა, კივი, 200 გრამი ხაჭო და ერთი ლიტრი მაწონი მთელი დღე უნდა გამოიზოგო და 2 ლიტრამდე წყალი დალიო. თუ ამას მოახერხებ, ჩათვალე, რომ წინა დღეს მიღებული კალორიები განეიტრალებული გაქვს.
ქეთი დინოშვილი