როგორ შეიძლება აღმოჩნდე ჟურნალ-გაზეთების პირველ გვერდებზე - ვარსკვლავური მეთოდები

ფიქრობთ, რომ მადონასა და ანჯელინა ჯოლის ცოტა ხნის წინანდელი კამათი და წამიერი შერიგება მხოლოდ და მხოლოდ შემთხვევითობაა? ხოლო შარლიზ ტერონის სურვილი, ჯინსების კოლექცია გამოუშვას - მოულოდნელი შემოქმედებითი აღტკინება? სულაც არა. გთავაზობთ რამდენიმე საეჭვო, მაგრამ ძალიან პოპულარულ მეთოდს, რომლითაც ვარსკვლავები სარგებლობენ, რომ ხშირად აღმოჩნდნენ მსოფლიოს ჟურნალ-გაზეთების გარეკანებზე.

საკუთარი მოდის ხაზი აამოქმედეთ

კეტი ჰოლმსი და მადონა სულაც არ მიიჩნევიან გემოვნების ეტალონებად, მაგრამ ეს არ უშლის მათ ხელს, მოდის ბიზნესში წარმატება მოიპოვონ. თუ ბოლო რამდენიმე ფილმი გაქირავებაში ჩავარდა, თუ ჯილდოებიდან მხოლოდ „ოქროს ჟოლოს“ გაძლევენ, საჭიროა, დროებით შეიცვალოთ სპეციალობა და ტანსაცმლის კოლექცია შექმნათ. ამაყად რომ იწოდებოდე დიზაინერად, სულ არ არის აუცილებელი, საათობით იჯდე სპეციალურ კოლეჯში ან ხატვის ნიჭი გქონდეს. მაგალითად, კორტნი ლავი ორი ათწლეული ლიდერობდა ყველაზე უგემოვნოდ ჩაცმული ვარსკვლავების რეიტინგში, მაგრამ კი მუშაობს ამ სფეროში მშვენივრად. კეტი ჰოლმსს კი შარშან ჰქონდა დებიუტი ნიუ-იორკის მოდის კვირეულზე. ჯასტინ ბიბერი კაცია, მაგრამ ფრჩხილების ლაქის კოლექცია გამოუშვა, კეიტ მოსმა კი ეს-ესაა წარმოადგინა საკუთარი დიზაინის კოლოფი სუშისთვის. ამავე მეთოდს აქტიურად იყენებენ ჯესიკა სიმპსონი, დები ოლსენები და სხვები.

ჩხუბი ატეხეთ

ნიჭიერი ადამიანები ისეთი მგრძნობიარეები არიან, რომ ნერვები მალე უმტყუნებთ ხოლმე. ამ გამართლებით შეიარაღებულთ შეუძლიათ თამამად გავიდნენ იერიშზე მეტოქეებთან. მაგალითად, პაპარაცებთან. მაგალითად, შონ პენი ჟურნალისტებთან ომების ნამდვილი ვეტერანია. პირველად შორეულ 1986 წელს მოსინჯა ეს მეთოდი და დღემდე აგრძელებს. ცოტა ხნის წინ კი მისი 19 წლის ვაჟი ჰოპერიც თავს დაესხა ფოტოგრაფს. ამავე მეთოდს მიმართავენ ავრილ ლავინი, ბრიტნი სპირსი, შაია ლაბაფი, ჯასტინ ბიბერი.

გადაიღეთ საშინაო პორნო

ჯეი ლო იმისთვის იბრძოდა, რომ მისი საშინაო პორნო გაქირავებაში არ გასულიყო, პერის ჰილტონმა კი პირიქით, ამ გულახდილი ჩანაწერით კარიერა გაიკეთა. ეკრანის ვარსკვლავი რომ გახდე, სულ არ არის აუცილებელი, მერილ სტრიპის ნიჭი გქონდეს. პრაქტიკა ამტკიცებს: ოცწუთიანი კუსტარული წარმოების კინო და არაორაზროვანი შინაარსი ბევრს უკვალავს გზას. საკმარისია მხოლოდ სიმპათიური ინტერიერის შერჩევა და დარწმუნება, რომ პარტნიორი სრულწლოვანია, თორემ სკანდალური პოპულარობის ნაცვლად შეიძლება ციხეში ამოყო თავი (კანიე უესტმა, მაგალითად, უსიამოვნებები რომ თავიდან აეცილებინა, გოგონას სთხოვა, კამერის წინ წარმოეთქვა თავისი ასაკი). მერე კი ტექნიკის საქმეა - მთავარია მეტი ვნებიანი ამოოხვრა და ნაკლები მკაფიო კადრი. „კამასუტრის“ ეკრანიზებას ხომ არავინ ითხოვს, ხუთწუთიანი პოპულარობისთვის ბუნდოვანი მინიშნებებიც საკმარისია. ჰოლივუდში ამის შესახებ შესანიშნავად იციან. ლამის არ დარჩა ვარსკვლავი, რომელსაც სადმე გადამალული არ აქვს სექსკასეტა. პერის ჰილტონმა და კიმ კარდაშიანმა სწორედ ამგვარი გულახდილი ვიდეოებით გაითქვეს სახელი. იგივე მეთოდი მოუსინჯავთ კოლინ ფარელს, ლეიტონ მისტერსა და სხვებს.

დაწერეთ სკანდალური მემუარები

არნოლდ შვარცენეგერი ამტკიცებს, რომ ნიჭიერი ადამიანი ყველაფერში ნიჭიერია და მზად არის, წერილობით დაადასტუროს ეს. რატომ უნდა ელოდო ჟურნალისტებს, სანამ შენს კარადაში ჩონჩხს იპოვიან? არ ჯობს, თვითონ მოჰყვე ყველაფერს და ამით ფულიც იშოვო? თან საინტერესო ის არის, რომ კალამს ისინიც კი ჰკიდებენ ხელს, ვისგანაც ამას ყველაზე ნაკლებ ელიან. საკმარისი იყო, შვარცენეგერს კალიფორნიის გუბერნატორის პოსტი დაეტოვებინა და მთავარი როლი მიეღო უკანონო ბავშვთან დაკავშირებულ გრანდიოზულ სკანდალში, მაშინვე მოისურვა „ყველაფრის გახსენება“ ამ სიტყვის პირდაპირი მნიშვნელობით. გულახდილად ისაუბრა სასიყვარულო ფრონტის შესახებაც და არც ცოლის ღალატისთვის აუვლია გვერდი. თქმა არ უნდა, „ტერმინატორის“ აღსარება ბესტსელერად იქცა. დემი მური ეს-ესაა შეუდგა წერას და უკვე გამომცემლობასაც შეუთანხმდა გამოქვეყნებაზე - წიგნში მას ორ მილიონ დოლარს ჰპირდებიან. ამავე სფეროში გამოიჩინეს თავი რუპერტ ევერეტმა, დაიან კიტონმა, ანდრე აგასიმ და სხვებმა.

ჟურნალისტებს ათასგვარი უბედურება დააბრალეთ

ამ მეთოდს მიმართა ბოლო დროს ლინდსი ლოჰანმა, რომელიც უკვე მერამდენედ აღმოჩნდა მართლმსაჯულების წინაშე. გოგონამ „ტვიტერში“ მოუწოდა ყველას, მხოლოდ მის სიტყვებს დაუჯერონ და ამბობს, რომ ყველაფერი, რაც მის გარშემო ხდება, ჟურნალისტების მონაჩმახია. ალბათ მართლაც მათი ბრალია, რომ აგერ უკვე მერამდენედ გზავნიან მას სარეაბილიტაციო კლინიკაში! ჟურნალისტებს „ჰკიდებენ“ ასევე თავიანთ „ცოდვებს“ მაილი საირუსი, ამანდა ბაინსი.

ჰაკერების მსხვერპლი გახდით

ბოროტმზრახველები რატომღაც იოლად ახერხებენ „ცხელი“ ფოტოების აღმოჩენას ვარსკვლავების ტექნიკურ მოწყობილობებში. როგორც ეს სკარლეტ იოჰანსონის შემთხვევაში მოხდა. როგორც ჩანს, სიტყვათშეთანხმება „ქსელური უსაფრთხოება“ ჰოლივუდის მკვიდრთა უმრავლესობისთვის უცნობია. ჰაკერებიც იოლად ტეხენ მათ ელექტრონულ ფოსტას და საინტერესო ამბებსაც იგებენ. ასე აღმოჩნდა საყოველთაო განსჯის საგანი სკარლეტ იოჰანსონის შიშველი უკანალის ფოტოები. თუმცა რისთვის დასჭირდა სკარლეტს ამ ფოტოს გადაღება, დღემდე გამოცანად რჩება. „გატეხილი“ ვარსკვლავების რაოდენობა სულ უფრო იზრდება. არადა, ნეტავ ჰაკერებს მეტი საქმე არ აქვთ, რომ ისინი ატერორონ? ეს გამოცდილება აქვთ ასევე ბლეიკ ლაივლის, კრისტინა ჰენდრიქსს, ვანესა ჰაჯენსს.

არასოდეს გააკეთოთ კომენტარი თქვენს პირად ცხოვრებაზე

უკვე ყველამ შეწყვიტა ლეონარდო დი კაპრიოს მორიგი ლამაზმანების აღნუსხვა. თუმცა ლეოს აზრადაც არ მოსდის, რაიმე კომენტარი გააკეთოს ამ საკითხთან დაკავშირებით. ჰიუ გრანტი მოულოდნელად ორჯერ გახდა მამა, თუმცა არც ჩაუთვლია საჭიროდ, ამაზე ჟურნალისტებთან ელაპარაკა. მადონა თავის მორიგ ჭაბუკ ბოიფრენდთან ერთად ფოტოების გადაღებას არ ერიდება, თუმცა მასთან დაკავშირებით კომენტარს არ აკეთებს. მერე რა, ასეთი „დაფარული“ პირადი ცხოვრება უფრო საინტერესოა. იმავე მეთოდს მისდევენ ნატალი პორტმანი, ჯერემი რენერი, იზაბელ აჯანი და სხვანი.

ჟურნალი „რეიტინგი“