ქეთათო - არ მინდა, ჩვენი მრავალტანჯული ქვეყანა ირანს დაემსგავსოს, სადაც გადამწყვეტ სიტყვას სასულიერო პირი ამბობს
გუშინ "დედა ენის" ბაღთან ორი აქცია გაიმართა. "არა თეოკრატია" - ამ ლოზუნგის აქციას ქეთათო ჩარკვიანი შეუერთდა, ხოლო "ეროვნული ფრონტის" აქციაში, რომელიც LGBT პროპაგანდის წინააღმდეგ იმართებოდა, მონაწილეობას უფლებადამცველი გიორგი გაბედავა იღებდა.
ქეთათო ჩარკვიანი:
- არ მინდა, ჩემს ქვეყანაში განსხვავებული ორიენტაციის მქონე ადამიანი იდევნებოდეს, ქვეყანაში, სადაც, უზენაესი კანონი, კონსტიტუცია არსებობს. საშიშროებაა იმის, რომ თეოკრატიულ სახელმწიფოდ გარდავიქმნათ. ისლამისტურ ირანს არ უნდა დავემსგავსოთ, სადაც გადამწყვეტ სიტყვას სასულიერო პირი ამბობს. ჩვენთვის, რამდენადაც ვიცი, მთავარი კონსტიტუციაა და ამიტომ ყოველგვარი ძალადობა ჩემთვის მიუღებელია. გარდა, ამისა, ქრისტეს ათი მცნებიდან პირველი მცნება დარღვეული არ უნდა იქნას. 17 მაისს რაც მოხდა, ქრისტიანობასთან პარადოქსში მოდის. მე "არა თეოკრატიის" აქციას იმიტომ შევუერთდი, რომ ქვეყანაში კონსტიტუციასთან ყველა თანასწორია და არავის აქვს უფლება, სხვის მიმართ ძალადობა განახორციელოს.
- ამბობთ, რომ თეოკრატიის საშიშროება არსებობს. 17 მაისის მოვლენებამდე მსგავს საფრთხეს თუ გრძნობდით?
- მართალი გითხრათ, 17 მაისამდე არანაირი საშიშროება არ მიგრძნია. ამ აქციაზე სექსუალურ უმცირესობებს ძალიან დიდი რეკლამა გაუწიეს ჭინჭრებმა, "ტაბურეტკებმა" და ა.შ. ეს ყველაფერი სასულიერო პირების მხრიდან ინიცირებული არ უნდა ყოფილიყო. ამიტომაც ყველა, ვისაც ამ ქვეყანაზე გული შეგვტკივა, "არა თეოკრატიის" აქციაზე მივედით.
- თქვენი აზრით, "პარალელური" აქციების გამართვა რამდენად შედეგიანი შეიძლება იყოს?
- ყველა ადამიანს თავისი პოზიციის გამოხატვის უფლება აქვს. მთავარია, კანონი არ დაირღვეს და ძალადობას არ ჰქონდეს ადგილი. შეიძლება, სექსუალური უმცირესობა გამოდიოდეს და პარალელურად, მათი მოწინააღმდეგეების აქცია იმართებოდეს, მაგრამ ამ ყველაფერს ცივილური ფორმა უნდა მიეცეს. 17 მაისი ძალადობის აპოთეოზი იყო. ნამდვილად არ მინდა, ჩვენი მრავალტანჯული საქართველო ისლამისტური ირანის რესპუბლიკას დაემსგავსოს.
- პოლიციამ თქვენი მოწინააღმდეგე აქციის მონაწილეები "დედა ენის" ბაღში არ შეუშვა, რამაც მათი უკმაყოფილება გამოიწვია...
- პოლიცია მოწოდების სიმაღლეზე იყო. აღფრთოვანებული ვიყავი მათი ორგანიზებული ქმედებებით. რა თქმა უნდა, ჩვენი მომხრეებისგან არანაირი პროვოცირების მცდელობა არ ყოფილა, მხოლოდ და მხოლოდ ვიდექით და ჩვენს პოზიციას ვაფიქსირებდით, სამართალდამცავები კი გვიცავდნენ, რაც მათი პირდაპირი მოვალეობაა.
- მოწინააღმდეგე აქტივისტების ქცევაზე რას იტყვით?
- რა უნდა ვთქვა? აღშფოთებული ვარ. როდესაც მე და ჩემი მეგობრები აქციაზე მივდიოდით, ისინი უშვერი სიტყვებით ილანძღებოდნენ, ასეთი ტიპის აგრესია ყოველთვის იმის წისქვილზე ასხამს წყალს, ვის მიმართაცაა გამოხატული. ამიტომ, ვთვლი, რომ ამგვარი ქმედებები გამართლებული არ არის.
ეკა აბაშიძე
