ლიკა ლაბაძეის რომანი მეგობართან

ტელეწამყვანი ლიკა ლაბაძე ყოველ დილით „იმედის“ მაყურებლის კარგი განწყობის შექმნაზე ზრუნავს და გაწერილი აქვს ყოველი სამუშაო დღე, მაგრამ პირადი ცხოვრების მოსაწყობად მაინც მოიცალა. როგორც გვითხრა, მის გვერდით არსებობს ადამიანი, ვისთანაც თავს კარგად გრძნობს. თურმე წყვილი ერთმანეთს თითქმის ოთხი წელია იცნობს, აქამდე მეგობრობდნენ, დღეს კი ურთიერთობა სხვა ფაზაში გადაიზარდა.

- მართალია, დილით ადრე ადგომას მიჩვეული ვიყავი, მაგრამ მაშინ დღეგამოშვებით მიწევდა ეთერში ყოფნა, ახლა კი, 20 იანვრის შემდეგ, ყოველ სამუშაო დღეს 5 საათზე ვდგები, მაგრამ უკვე შევეგუე ამ რეჟიმს. ადგომის შემდეგ ყავას მივირთმევ და თან შხაპს ვიღებ, ფაქტობრივად, ერთდროულად ვაკეთებ ამას, რადგან გამოფხიზლებაში მეხმარება. 6-ს რომ წუთები აკლია, მანქანა მაკითხავს და 6 საათზე უკვე ტელევიზიაში ვარ, რის შემდეგაც ვიწყებ სამზადისს, მიკეთებენ მაკიაჟს, ვარცხნილობას, ვიმეორებ ტექსტს და 8-ის ნახევარზე ეთერში გავდივარ. ასეთი რეჟიმი ჩემი ცხოვრების განუყოფელი ნაწილი გახდა, შაბათ-კვირას, მიუხედავად იმისა, რომ არსად წასასვლელი არ ვარ, მაინც ადრე მეღვიძება, ვცდილობ დავიძინო, რომ დასვენების დღეებში მაინც ვისიამოვნო დილის ძილით.

საეთერო იმიჯი
...თავიდან ავთანდილი ზრუნავდა ჩვენს ჩაცმულობაზე, შემდეგ დაგვემატნენ სპონსორები, გარდა ამისა, ჩემი გარდერობითაც აქტიურად ვსარგებლობ და ისე გამოდის, რომ საკუთარ იმიჯზე თავად ვზრუნავ. ჩამოწერილი მაქვს, ერთი თვის განმავლობაში რომელ დღეს რა უნდა მეცვას ეთერში, ამას იმიტომ ვაკეთებ, რომ რამე არ დამავიწყდეს და სამოსი არ გამეორდეს. საღამოობით ვფიქრობ იმაზე, როგორი ფეხსაცმელი, როგორი ვარცხნილობა მოუხდება ამა თუ იმ სამოსს. სატელევიზიო მაკიაჟი შორსაა ექსპერიმენტებისგან, მიკეთებენ იმას, რაც მიხდება, მხოლოდ ტუჩის საცხი იძლევა ცვლილების საშუალებას. თმის სტილისტი ჩემთან ერთად წყვეტს, კონკრეტულ ჩაცმულობას როგორი ვარცხნილობა მოუხდება, მაქსიმალურად ვცდილობ, ყოველდღე განსხვავებული იმიჯით წარვდგე მაყურებლის წინაშე.

ყოველდღიური სტილი
...ერთი წლის წინ ყოველდღიურობაშიც ისე ვიმოსებოდი, როგორც ეთერში, მთლად საეთერო სამოსი არ მეცვა, მაგრამ ძირითადად უფრო კლასიკურ სტილსა და მაღალქუსლიან ფეხსაცმელს ვანიჭებდი უპირატესობას, მხოლოდ გამონაკლის შემთხვევებში ვიცვამდი თავისუფალ სამოსს. დღეს კი პირიქითაა, რადიკალურად შემეცვალა გემოვნება, ან ყოველდღიურმა სამუშაო ფორმამ მიბიძგა იმისკენ, რომ დაბალძირიან ფეხსაცმელსა და სპორტულ ტანსაცმელზე გადავსულიყავი. პარასკევს ან შაბათს, თუ მეგობრებთან ერთად სადმე მივდივარ, მხოლოდ მაშინ მიჩნდება კლასიკურად ჩაცმის სურვილი.
...მოახლოვდა ზაფხული და მინდა ვიყო უკეთეს ფორმაში. სექტემბრის შემდეგ აღარ მივარჯიშია, ეს კი ძალიან დიდი დროა ჩემთვის, იმ ადამიანისთვის, რომელიც ფიზიკურად მუდმივად დატვირთული იყო. ამის გამო ეთერის შემდეგ ფიტნესცენტრში სავარჯიშოდ დავდივარ, იმავდროულად ვიცავ დიეტას. არ მესმის იმ ადამიანების, რომლებსაც ჭარბი წონა აწუხებთ, არ აქვთ სხვა პრობლემა გარდა იმისა, რომ დაიცვან ჯანსაღი ცხოვრების წესი, მაგრამ მაინც არაფერს აკეთებენ ამისთვის. ვარჯიში ყველასთვის აუცილებელია.
მე და დიეტა ვმეგობრობთ, მაგრამ ვერ ვიტყვი, რომ ამ პერიოდში თავს შიმშილით ვიკლავ. როდესაც ვგრძნობ, რომ ორგანიზმი გადამეტვირთა, მოვიმატე თუნდაც 500 გრამი, რასაც სასწორზე დადგომის გარეშე ვგრძნობ, მეორე დღესვე ვცდილობ ვიყო ხილზე, ბოსტნეულზე და მოვიწყო განტვირთვა. კვირაში ორჯერ თუ მოვიწყვე განტვირთვის დღე, სტაბილურად ვიქნები ერთ წონაზე. ყველაფერს ვაკეთებ, რომ ნორმალურ ფორმაში ვიყო, მით უმეტეს, რომ წინ ზაფხულია, არ მიყვარს, როცა რაღაცას ვერ ვიხდენ. თუ გინდა, კარგად გამოიყურებოდე, ხელი უნდა შეუწყო ორგანიზმს.

შოპინგი
...აქამდე მქონდა იმის შანსი, რომ გასტროლებზე საზღვარგარეთ შემეძინა სამოსი. პრაქტიკულად ხუთი წლის განმავლობაში საქართველოში არაფერი მიყიდია, მაგრამ ახლა ისე ხშირად ვეღარ ვმოგზაურობ და შესაბამისად, ვჯერდები თბილისურ მაღაზიებს, ხშირად მივდივარ „თბილისი მოლში“, სადაც ყოველთვის ვპოულობ იმას, რაც მინდა. დღეს უკვე არის იმის საშუალება, რომ ნორმალურად ჩაიცვა. საერთოდ, ვერიდები და მეშინია ისეთი სამოსის შეძენა, რომელიც გამორჩეულად ჩანს და ყურადღებას იქცევს. საქართველოში ყველაფერი საკმაოდ მცირე კოლექციით შემოდის და ადვილი შესაძლებელია, სხვამაც შეიძინოს ის განსაკუთრებული კაბა, ამიტომ ქორწილში ან თუნდაც სხვა მნიშვნელოვან შეხვედრაზე მირჩევნია სადად და მოხდენილად ჩავიცვა, ვიდრე მეცვას თვალშისაცემად და იქ მისულმა ვინმე ჩემნაირ სამოსში გამოწყობილი აღმოვაჩინო. გარდა ამისა, ინტერნეტითაც ვიწერ ისეთ რაღაცებს, რაც საქართველოში ბევრს არ აცვია და ჯერ კიდევ უცხოა.

ტელევიზია
...საბედნიეროდ, ისეთი პროდიუსერები მყავს, რომლებიც მაქსიმალურად მიდგანან გვერდში, ითვალისწინებენ იმას, რომ ყოველდღიურ რეჟიმში მიწევს მუშაობა და გადაცემის შემდეგ მათავისუფლებენ. ეთერის შემდეგ ვაკეთებ აუცილებელ საქმეებს და ვიძინებ, გამოძინების შემდეგ კი სახლში მომდის მეორე დღის გადაცემის თემა და გეგმები და შინ ვიწყებ მუშაობას. ვცდილობ, მეტი გავიგო კონკრეტული საკითხის შესახებ. წინასწარ არ იცი, რამდენ ხანს გასტანს ინტერვიუ, შეიძლება, შენ 15 წუთზე გქონდეს გათვლილი, მაგრამ 5 წუთში დაასრულოს სათქმელი რესპონდენტმა, ამ დროს თემის ღრმად ცოდნა და ბევრი ინფორმაცია გეხმარება, რომ არ იგრძნობოდეს ჩავარდნა და შეავსო დარჩენილი დრო. მაყურებლის წინაშე ყოველდღიურად წარდგომას ბევრი დადებითი მხარე აქვს, უარყოფითად შეიძლება მხოლოდ ის ჩაითვალოს, რომ სამუშაო დღეებში მოწყვეტილი ვარ გარე სამყაროს, ვერ ვაკეთებ ჩემს საქმეს უპასუხისმგებლოდ და არ ვუდგები ამ ყველაფერს მარტივად. არ შემიძლია, ეთერში მხოლოდ ტექსტი ვიკითხო, მირჩევნია, საფუძვლიანად გავაკეთო საქმე კვირის სამუშაო დღეებში და მერე დავისვენო. ჩემი საქმე იმდენად მომწონს, რომ ერთი წუთითაც არ ვნანობ და არ ვწუხდები იმ შეზღუდვებით, რომლიც ჩემს სამსახურს ახლავს, დღეს ასეთია ჩემი ცხოვრება და მისი შეცვლის სურვილი არ მაქვს.
პოპულარობით გამოწვეული უხერხულობა...
...საერთოდ, არ მსიამოვნებს, როცა პოპულარობის გამო უპირატეს მდგომარეობაში მაყენებენ, მაგალითად, სილამაზის სალონში შესულს მთავაზობენ ყავას. გასაგებია, რომ სითბოს გამოხატვა უნდათ და ეს სასიამოვნოა, მაგრამ ასეთი ქმედებით უხერხულ მდგომარეობაში ვვარდები, ვწუხდები ზედმეტი ყურადღებით, მეც სალონის ისეთივე კლიენტი ვარ, როგორიც სხვა, ამიტომ ზედმეტი ყურადღება მაკომპლექსებს.

შეზღუდული გართობა
...სამუშაო დღეებში, ეთერის შემდეგ თუ კარგად გამოვიძინებ, საღამოს 4-იდან 6 საათამდე თავს უფლებას ვაძლევ, ვნახო მეგობრები, ყავის დასალევად გავიდე სადმე. გემრიელად გართობისთვის კი პარასკევს და შაბათს ვიცლი, კვირის ბოლო სამუშაო დღეს შუადღეზე არ ვიძინებ, ვნახულობ მეგობრებს, მოგვიანებით გასართობად მივდივარ. ეს ჩემთვის საუკეთესო განტვირთვაა.

მუსიკა, წიგნები, პრესა
...სულ ვუსმენ მუსიკას, ვცდილობ, შედარებით მშვიდი მუსიკა მოვისმინო, რომელიც ჩემს სტრესულ გრაფიკს შეესაბამება.
...პრესას შედარებით ნაკლებად ვადევნებ თვალყურს, ვგულისხმობ იმას, რომ არ ვზივარ და არ ველი რომელიმე ჟურნალ-გაზეთის გამოსვლას, მაშინვე რომ ვიყიდო და წავიკითხო. უფრო სოციალური ქსელით და საინფორმაციო გამოშვებით ვიგებ ქვეყანაში მიმდინარე სიახლეებს.
...წიგნები ჩემთვის ყველაზე მტკივნეული თემაა, რადგან დამიგროვდა ახალი წიგნები, რომელთა წასაკითხადაც ზაფხულს ველოდები. დასვენების დღეებში კითხვას ვერ ვიწყებ, რადგან ერთი ამოსუნთქვით მიყვარს წაკითხვა, აქედან გამომდინარე, შემოდებული მაქვს თაროზე ის ლიტერატურა, რომლის წაკითხვაც მინდა.

პირადი ცხოვრება
...პატარა სიახლე მაქვს, გვერდით მყავს ადამიანი, რომელთანაც თავს კარგად ვგრძნობ, თუმცა ამას ჯერ სიყვარულს ვერ დავარქმევ. ოთხი წელია ერთმანეთს ვიცნობთ, ვმეგობრობდით, მაგრამ ურთიერთობა ახლა სხვა ფაზაში გადაიზარდა. მის ვინაობას ჯერჯერობით არ გავამხელ, არც ტელევიზიასთან და არც შოუბიზნესთან არა აქვს შეხება, ისიც ძალიან დაკავებულია და როცა დროს ვპოულობთ, მაშინ ვნახულობთ ერთმანეთს.

ციცი ომანიძე

ჟურნალი „რეიტინგი“