დიმა ობოლაძე და აჩიკო სოლოღაშვილი ქალურ საიდუმლოებებს ჩასწვდნენ

ორი მამაკაცი და ხუთი ქალი – გადაცემაში "შუადღე" გოლები ძირითადად მშვენიერ სქესს გააქვს, მათ ფონზე სპორტული კომენტატორი დიმა ობოლაძე და მსახიობი აჩიკო სოლოღაშვილი აშკარად დაჩაგრულად გამოიყურებიან. ეს განსაკუთრებით მაშინ არის შესამჩნევი, როცა ეთერში სამი მეგრელი ქალია – გვანცა დარასელია, ნინო ხოშტარია და თიკა ფაცაცია. ამ დროს ძირითადად ისინი ლაპარაკობენ, ძლიერი სქესი კი დუმს. ასეთ შემთხვევებში დიმას და აჩიკოს მამაკაცური სოლიდარობა შველით. იუმორით და თანადგომით ისეთ ქალურ თემებსაც უმკლავდებიან, როგორიც არის მეან–გინეკოლოგია, ორსულობის შემდეგ გაჩენილი სტრიები და ა.შ. თუ როგორ შედგა დიმას და აჩიკოს ტანდემი, ამაზე თავად გვიამბობენ.
– ხუთი ქალის გარემოცვაში თავს როგორ გრძნობთ?
დიმა: ძალიან კარგად ვგრძნობ თავს, თანაც მე ეთერში ყოველდღე ვარ. განსაკუთრებით მაშინ ვარ კარგად, როცა გადაცემაში სამი მეგრელია – დარასელია, ხოშტარია და ფაცაცია. ამ დროს თუ რაღაც არ ვთქვი, შეიძლება მთელი გადაცემა არც გამომხედონ. ერთხელ ეთერში მეოთხე მეგრელიც, ვერა ქობალია იჯდა და მე ფაქტობრივად იქ არც ვიყავი.
– ანუ გამოდის, რომ ქალები გჩაგრავენ.
დიმა: რომ მოვინდომო, დაჩაგვრას ვუჩვენებ მაგათ!.. თავიდან, ცოტა არ იყოს, მეშინოდა, ეს ნაბიჯი ჩემი კარიერისთვის, იმიჯისთვის, პროფესიისთვის სარისკო არ ყოფილიყო, მაგრამ ვთვლი, რომ გაამართლა. ჩემი აზრით, ადამიანი ერთ რაღაცაზე "ჩაციკლული" არ უნდა იყოს. ძალიან დიდი სამეგობრო წრე მყავს, ამ გადაცემის გამო ზოგი მეხუმრება, ზოგი დამცინის, მაგრამ მთლიანობაში ვფიქრობ, რომ სწორი გადაწყვეტილება მივიღე, მით უმეტეს, ამდენ ქალში ძალიან კარგად ვგრძნობ თავს.
აჩიკო: მეც გადასარევად ვგრძნობდი თავს, როცა ეთერში ყოველდღე ვიყავი, ახლა ორი დღე ვარ. ამათთან ყოფნა ძალიან მენატრება. მიუხედავად იმისა, რომ ორი მამაკაცი ვართ, გადაცემის მსვლელობისას არანაირი დისკომფორტი არ მაქვს, მაგრამ ქალები თუ ამოიქოქებიან, მათი გაჩერება ძნელია.
დიმა: როცა სტუდიაში ორი მამაკაცი, მე და აჩიკო ვართ, ამის პრობლემა არ გვაქვს, მაგრამ მარტო რომ ვრჩები, მერე არ მკითხოთ!..
აჩიკო: დიმას გარეშე თუ ვარ, ძალიან მიჭირს და სულ ვახსენებ, ობოლაძე, სად ხარ–მეთქი. ისეთი იმიჯი გვაქვს, თითქოს ერთმანეთს ვერჩით, მაგრამ სინამდვილეში ასე არ არის. დიმას გარეშე მოწყენილი ვარ და ამ დროს ვცდილობ, თავი ძალით გავირთო.
– ქალების გარემოცვას რომ თავი დავანებოთ, ხანდახან ძალიან ქალურ თემებზეც გიწევთ საუბარი. ამ დროს უხერხულობას არ გრძნობთ?
დიმა: ვცდილობთ, რაც ხალხს დააინტერესებს, იმაზე ვისაუბროთ და სტუმრები ვალაპარაკოთ. მაგალითად, ერთ გადაცემაში თემა იყო ორსულობის შემდეგ გაჩენილი სტრიები. შევეხვეწე, ასეთ თემებზე სალაპარაკოდ ნუ დამსვამთ–მეთქი, მაგრამ არაფერი გამოვიდა. მითხრეს, არა, იჯექი, თუ გინდა, რამე თქვი, თუ გინდა, ჩუმად იყავიო.
აჩიკო: როცა მეან–გინეკოლოგიაზეა საუბარი, ძალიან ძნელია, ამ ყველაფერში ჩაერთო.
– ამ დროს სტუდიიდან გაქცევის სურვილი ხომ არ გიჩნდებათ?
დიმა: გავქცეულვარ კიდეც, მაგრამ ისე არის ხოლმე, ვაის გავეყარე და უის შევეყარეო. ერთხელ სტილისტი გვყავდა სტუმრად, რომელიც თან თმას ჭრიდა, თან ცეკვავდა. მასზე ცუდს კი არაფერს ვამბობ, მაგრამ შოკში ვიყავი, ხან თმის ჟელეს გადმომიგდებდა, ობოლაძე, მომეხმარეო, ხანაც – რას. არადა წინა ეთერში გინეკოლოგიის თემა იყო და არ დავჯექი. მესმის, რომ სამსახურია და იქ უნდა ვიყო, მაგრამ ხანდახან ისეთი თემაა, ჩემს იქ ყოფნას აზრი არ აქვს.
აჩიკო: მეც იმავე დღეში ვარ. როცა ასეთ თემებზეა საუბარი, ვცდილობ, ყველაფერი გავიხსენო, რაც კი მეგობარი გოგონებისგან მსმენია, რომ რამენაირად საუბარში ჩავერთო, თუმცა, როცა ეთერში სამი გამოცდილი ქალბატონი ზის, ციკლის არევაზე მე რაღა უნდა ვთქვა?!
დიმა: როცა ბავშვის აღზრდასა და მამის როლზეა ლაპარაკი, ამაში ჩაერთვები, მაგრამ სუფთა ქალური თემები ლაპარაკი ცოტა ისეთი მომენტია... ვთვლი, რომ სასაცილოა, ამაზე ეთერში მე რომ ვთქვა რამე. ოჯახები ყველას გვყავს და ყველაფერი ვიცით, მაგრამ ჩემი მხრიდან ამაზე ლაპარაკი რაღაც ისეთია, რა... საერთოდაც, ჩემთვის "შუადღეში" მისვლა იყო უცხო. მანამდე ჩემი გადაცემა "საფეხბურთო ღამე" დაიხურა და "კურიერის" ამარა დავრჩი. დამიბარეს და მკითხეს, შუადღის გადაცემაში ხომ არ დაჯდებიო და აქ ასე აღმოვჩნდი. როცა 1995 წლიდან ერთ ადგილზე მუშაობ, ვთვლი, რომ შენს არხზე ბევრი რამის გაკეთების უფლება გაქვს, თუნდაც ექსპერიმენტის ჩატარების. საბედნიეროდ, ჩემს ამ ნაბიჯს მაყურებელთა მხრიდან დადებითი შეფასებები მოჰყვა. საყოველთაო აგრესია რომ გამოეწვია, ამას არ გავაკეთებდი.
აჩიკო: დიმა სინამდვილეში უფრო მაგარი ტიპია, ვიდრე ტელევიზორში ჩანს. ძალიან განათლებულია. როცა ფეხბურთის რეპორტაჟი მიგყავს, ძნელია, შენი ინტელექტი წარმოაჩინო. დიმას ბევრად უფრო დიდი იუმორი აქვს, ვიდრე ეკრანზე ეტყობა.
– როგორც მამაკაცებს, ამ გადაცემაში რა თემები გაკლიათ?
დიმა: თითქმის ყველა თემას შევხებივართ.
აჩიკო: ორი წლის თავზე ყველა თემა ამოვწურეთ.
– ეთერისთვის როგორ ემზადებით?
აჩიკო: განსაკუთრებულად არ ვემზადებით. თუ ჩვენგან, წამყვანებისგან, კონკრეტული რამეა სათქმელი, პროდიუსერები ცალკე გვეუბნებიან. თუ არადა, სცენარი იმეილზე მოგვდის და ვკითხულობთ. ეთერში გასვლამდე თუ რაიმე კითხვა გაგვიჩნდება, ვარკვევთ.
დიმა: როცა აქ მუშაობაზე დავთანხმდი, იმედი გამოვთქვი, რომ დაშტამპული თემები არ გვექნებოდა. არის საკითხები, რომლებიც აუცილებლად წინასწარ უნდა მოამზადო, რადგან საფრთხილოა. ძალიან ბევრი თეატრის პრობლემაზეც კი მირეკავს. მეუბნებიან, დიმა, იქნებ შენს პროდიუსერებს უთხრა და თქვენს ეთერში მოვიდეთო.
– მამაკაცებს სულ აინტერესებთ, რა სურთ ქალებს. თქვენმა გადაცემამ ამ კითხვაზე პასუხი გაპოვნინათ?
აჩიკო: ძალიან ბევრი ისეთი რამ გავიგე, რაც აქამდე არ ვიცოდი – სახის მოვლის საშუალებებიდან დაწყებული, ტანის მოვლის საშუალებებით დამთავრებული. ასევე ბევრი რამე გავიგე ჯანმრთელობაზე, კვებაზე. საუბარს ქალებით იწყებენ და მერე კითხვას მაინც ჩავაგდებთ ხოლმე, კაცებმა რა გამოვიყენოთ–თქო. ასე რომ, არამარტო ქალებზე ვიგებთ რაღაცეებს.
დიმა: ამ დროს ქალები გაგიჟებული თვალებით გადმოგვხედავენ ხოლმე, რას კითხულობთო.
აჩიკო: მთავარია, ქალებმა გაიგონ, რა უნდათ, თორემ ჩვენ რა გვინდა, ვიცით!
– ხუთ განსხვავებულ ქალთან ერთად მუშაობთ პირდაპირ ეთერში. მოკლედ როგორ დაახასიათებდით თითოეულ მათგანს?
დიმა: ბაია დვალიშვილი საოცარი ქალია, ეგეთი გულწრფელი ადამიანი ცხოვრებაში არ მინახავს. დღე არ გავა, ძალიან მაგარ განწყობაზე რომ არ დაგვაყენოს.
აჩიკო: ბაია სცენაზე გავიცანი. საოცარი პარტნიორი და მსახიობია.
დიმა: ვერ ვგრძნობთ, რომ ხასიათებით განვსხვავდებით. გასვლითი გადაღებებიც გვქონია, რასაც ქეიფი, ცეკვა, სიმღერაც მოჰყოლია. ამის გარეშე წარმოუდგენელია. თუ გასვლითი გადაცემა იგეგმება, ერთმანეთს ვასწრებთ, კარში პირველი რომელი გავა. ეთერში რაც ხდება, დაგეგმილი არაფერია. იქ იდეალურად ვგრძნობთ თავს.
აჩიკო: ვერ წარმომიდგენია მამაკაცი, რომელსაც ასეთი ლამაზი ქალების გარემოცვაში ჩასვამ და რამეთი უკმაყოფილო იქნება. ერთი ლამაზი ქალბატონი სახლში მყავს, დანარჩენები აქ არიან. ნინო ხოშტარია ტელევიზიაში გავიცანი. ბაიკოს, როგორც გითხარით, მანამდეც გადასარევად ვიცნობდი, გვანცა დარასელიას და თიკა ფაცაციას ბავშვობიდან ვიცნობ და მათთან არაჩვეულებრივი ურთიერთობა მაქვს. მერიკო გუბელაძეც აქ გავიცანი და ნეტავ, არ გამეცნო! ჭამაზე მეტად ამქვეყნად ძალიან ცოტა რამ მიყვარს. იმდენს ვჭამ, ვსკდები, მერიკო ჯადოქარია!
დიმა: მერიკო ყველაფერს თავისი გემოვნებით აკეთებს. ხან მეგრელები გვეჩხუბებიან, ღომს რა უქენითო, ხან – სხვები, მაგრამ მერიკო სიახლეებს ეძებს, ნამდვილი პროფესიონალია. რაც შეეხება დანარჩენ წამყვანებს, თიკას და ჩემი პირველი შეხვედრა 6 წლის წინ, გადაცემა "მხიარულ სტარტებში" შედგა. მაშინვე ვთქვი, ასეთი კარგი ადამიანი, როგორც ფიზიკურად, ასევე შინაგანად, იშვიათად შემხვედრია–მეთქი. ნინო ხოშტარია და მე ერთ–ერთი პირველები ვართ, ვინც "რუსთავი 2"–ში მოვედით. რაც შეეხება გვანცას, ის ძალიან უშუალოა, ჩემი შვილივითაა.
– თქვენ, მამაკაცებმა, თუ გაიცანით ერთმანეთი კარგად?
დიმა: კი, აჩიკო ძალიან კარგად გავიცანი. სხვათა შორის, ერთმანეთს შრომისმოყვარეობით ვგავართ. არც ამას ეზარება რამე და არც – მე. ეს მთელი ცხოვრება ცეკვავს, მე კი დამცინის ჩემი დაგრეხილი, მომტვრეული ფეხების გამო.
– ჩაცმის სტილით ერთმანეთისგან ძალიან განსხვავდებით. აჩიკოს მხიარული, ნათელი ფერების, ულტრამოდური სამოსი უყვარს, დიმა, თქვენ ნაკლებადგამორჩეული, მუქი ფერის ტანსაცმელი გირჩევნიათ.
დიმა: ტანსაცმელი სანამ არ დამეხევა, არ ვყიდულობ.
აჩიკო: დიმას ისეთი ფერი აქვს, ყველაფერი უხდება.
დიმა: ხო, ზოგიერთებივით გარუჯვა არ მჭირდება. მე და აჩიკოს როცა მაღაზიაში ერთად გვიწევს წასვლა, სულ მხიარულ ფერებს მირჩევს. სხვათა შორის, ბავშვობაში სულ ნათელი ფერებით ვიმოსებოდი. ყვითელი, წითელი, იასამნისფერი მეცვა.
აჩიკო: დიმას ნათელი ფერები მართლა ძალიან უხდება. თუ ცუდ ხასიათზეა, ყველაზე მაგარი სამოსიც რომ ჩააცვა, არ მინდაო, იტყვის და მორჩა.
დიმა: აჩიკოს ჩაცმა უყვარს და კარგადაც იცვამს. როგორც გითხარით, მე ტანსაცმელი სანამ არ შემომეხევა და არ გადამეფცქვნება, მანამდე არ ვყიდულობ. ამ დილით გავიღვიძე და მივხვდი, რომ ტანსაცმელი აღარ მაქვს. თან წონაში მოვიმატე და...
– ერთმანეთის სფეროებს რამდენად კარგად იცნობთ, ანუ თეატრსა და სპორტში როგორ ერკვევით?
დიმა: აჩიკო ფეხბურთის აზრზეც არ არის.
აჩიკო: ამ საკითხში მამაჩემი და დიმა უგებენ ერთმანეთს. ის დიმას გულშემატკივრობს და არა – მე.
დიმა: მამამისი ორჯერ ვნახე და უკვე ჩემი ძმაკაცია.
– დიმა, აჩიკოს სპექტაკლები ნანახი გაქვთ?
დიმა: აჩიკო სცენაზე ნანახი არ მყავდა.
აჩიკო: ახლაც არ ვყავარ. სპექტაკლებზე ძირითადად თავისი ოჯახის წევრებს უშვებს ხოლმე.
დიმა: როცა ბილეთებს მაძლევენ, ჩემი ოჯახი მიდის, მე – ვერა.
აჩიკო: როგორც დიმამ სტადიონზე ვერ მიმიტყუა, ისე მე თეატრში ვერ წავიყვანე.
– აჩიკო ბოლოს სტადიონზე როდის იყავით?
აჩიკო: დაახლოებით 4 წლის ასაკში, ნათესავმა ხელში აყვანილი წამიყვანა. ჩემით არადროს წავსულვარ.
– დიმა, თქვენ თეატრში როდის იყავით?
დიმა: 4–5 თვის წინ ვიყავი, უბრალოდ ამის სპექტაკლზე ვერ მოვხვდი. ისე, მართლა რა სირცხვილია, შენი სპექტაკლი ნანახი არ მაქვს.
აჩიკო: ჩემი სტადიონზე წაყვანა უფრო ძნელია, ვიდრე დიმას თეატრში მოხვედრა.
დიმა: იმიტომ, რომ მე უფრო მეტი მყავს ისეთი ადამიანი, ვინც თეატრში წამიყვანს, თუმცა, აჩიკო, მაინც ვთვლი, რომ ესპანეთის და საქართველოს თამაშზე უნდა წამოსულიყავი.
– საქმეში ყოჩაღები ხართ, ოჯახს როგორ უძღვებით?
აჩიკო: დიმა გადასარევი მეოჯახეა. მისგან სულ მესმის, ოჯახში ის მაქვს გასაკეთებელი, ეს მაქვს გასაკეთებელიო.
დიმა: მე კიდევ აჩიკოს და ნუცას წყვილზე ვგიჟდები. ორივე ძალიან მიყვარს. მათ ურთიერთობებში რაღაც მონაწილეობა მეც მაქვს მიღებული. აჩიკო აქამდე ჩვენს სიძედ მიმაჩნდა და ახლა ნუცა მიმაჩნია რძლად (აჩიკოს ცოლი "რუსთავი 2"–დან "იმედზე" გადავიდა. ავტ.). როცა ოჯახი მყარი და ძლიერია, გარეთ ყველაფერი მოგვარდება.
– "შუადღის" სამზარეულოში მიღებულ ცოდნას სახლში თუ იყენებთ?
დიმა: სახლში მარტო თუ ვარ, მაქსიმუმი, კვერცხი შევიწვა. თურმე ხალხს ილუზიები აქვს, რომ რაღაცეების კეთება ვიცი, არადა არაფრის აზრზე არ ვარ. შემიძლია მერიკოს რეცეპტი დავიდო და გავაკეთო, უფრო სწორად, ვცადო.
აჩიკო: ჩვენი გრაფიკის გადამკიდე, ძნელია, სახლში კიდევ რაღაცეები ამზადო. ჩვენი მეუღლეებიც მუშაობენ, ამიტომ, თუ თავისუფალი დრო დაგვრჩება, ერთმანეთს ვუთმობთ და არა – სამზარეულოს.
ეკა ლემონჯავა