იყო თუ არა სასიყვარულო სამკუთხედი ნინო მუმლაძისა და ლევან ყოჩიაშვილის ცხოვრებაში

სერიალ "ჩემი ცოლის დაქალებში" განვითარებულ ინტრიგას, რომელიც სამაგალითო მეოჯახის მიერ "გვერდზე" გაჩაღებული რომანით გამოიხატება, იმაზე გაცილებით დიდი რეაქცია მოჰყვა მაყურებლისგან, ვიდრე სერიალის შემქმნელებს სურდათ და ელოდნენ, ზომაზე მეტიც კი. "ფეისბუქზე" სპეციალური გვერდიც შეიქმნა დათოსა და ნინას ოჯახის მხარდასაჭერად და გადასარჩენად. ცოლ–ქმარს შორის ჩამდგარ პერსონაჟს, სტომატოლოგ ნათიას, პირდაპირ წყევლიან. მაყურებლის ასეთი ემოციური გამოხმაურებით მსახიობებიც შეწუხებული არიან, რადგან თავიანთი გმირების საქციელის გამო რატომღაც პასუხს მათ სთხოვენ. დათოს როლის შემსრულებელ ლევან ყოჩიაშვილს ემუქრებიან და მოუწოდებენ, გონს მოეგოს, ნინო მუმლაძეს კი ოჯახის ქალები პირად მტრად აცხადებენ.
მეორე მხრივ, ასეთი პოპულარობა ორივე მსახიობს ახარებს, რადგან ეს იმას ნიშნავს, რომ მათი პროფესიული მუშაობა შედგა და დამაჯერებელი საჯეები შექმნეს.
– ელოდით, თქვენი გმირების საქციელი ასეთ რეზონანსს გამოიწვევდა საზოგადოებაში?
ნინო: ვიცოდი, რომ მაყურებელს გული შესტკივა სერიალის გმირებზე, ამიტომ ნამდვილად ველოდი, ჩემი პერსონაჟი რომ რაღაცას გამოიწვევდა, მაგრამ რაც ახლა ხდება, მეტისმეტია. ასეთი მძაფრი რეაქცია ადამიანებს ხანდახან რეალურ ცხოვრებაში არ აქვთ.
ლევანი: ზუსტად ვიცოდი, რომ ჩვენი გმირების ამბავი ასეთ ხმაურს გამოიწვევდა. გოცირიძეების ოჯახი მაყურებელს ძალიან უყვარდა, კარგი ქართული ოჯახის სიმბოლოდ აღიქვა. ისეთ რაღაცეებს წერენ ჩვენზე, გული გაგისკდებათ! ამას წინათ აფთიაქში ფარმაცევტმა მთხოვა, იქნებ დაანებოთ იმ ქალს თავი და თქვენს ოჯახს დაუბრუნდეთო. მეხვეწებიან, ოჯახს ნუ დაანგრევო.
ნინო: საქართველოში ეს ყოველთვის პრობლემა იყო, ამიტომაც გამოიწვია ასეთი რეაქცია. ყველა ოჯახში არსებობს ისეთი დეტალები, რაც ამ რომანისთვისაა დამახასიათებელი. დათოსა და ნათიაში საკუთარ თავს თუ არა, მეგობრებს მაინც ამოიცნობ. ამ ტიპის ღალატი ჩვენს საზოგადოებაში ყოველთვის იყო, უბრალოდ ბოლო დროს ქართველმა ცოლებმა უფრო ამოიღეს ხმა. ძალიან ბევრი ქალი თვალს ხუჭავს იმაზე, რომ ქმარს საყვარელი ჰყავს. მე ასეთი ცოლების აბსოლუტურად არ მესმის.
ლევანი: ჩემი აზრით, ამ რომანით კლასიკურად არის ნაჩვენები ქართველი მამაკაცის ღალატი. ყველა მაყურებელს იმიტომ მოხვდა გულზე, რომ მათთვის ნაცნობია სააბაზანოში ტელეფონზე ჩუმად ლაპარაკი და კიდევ ბევრი სხვა დეტალი.
– თქვენს ცოლსაც რამე ხომ არ ეცნო ამ ისტორიიდან?
ლევანი: არ ვიცი. ბუნებით ეჭვიანი არ არის და არა მგონია, პარალელები გაავლოს ჩემსა და ჩემს გმირს შორის. პირადად ჩემთვის დათოს თამაში ახლა უფრო საინტერესო გახდა. ცალსახად ვამბობ, რომ უსინდისოდ იქცევა, მაგრამ სათამაშოდ ეს ძალიან საინტერესოა. ჩემმა შვილმა ცოტა ხნის წინ მითხრა, მაგას უთხარი, ჭკვიანად მოიქცესო. ამით ჩემს გმირს შენიშვნა მისცა.
– რა გამართლებას მოუძებნით მამაკაცს, რომელიც ცხოვრებაში ასეთ სიტუაციაში აღმოჩნდა?
ლევანი: როცა ჩემს გმირზე ვმუშაობ, ხანდახან ხმამაღლაც კი ვესაუბრები საკუთარ თავს, დათო, არ ხარ მართალი–მეთქი. ტყუილში ცხოვრება ჩემთვის აბსოლუტურად მიუღებელია. ყველაზე მეტად ის მაღიზიანებს, რომ ჩემი გმირი რომეოდ გადაიქცა. როგორ შეიძლება, ცოლშვილიანმა კაცმა რომეოს როლი მოირგო?! არ მესმის, როგორ ახერხებენ ადამიანები, დამალული რომანი ჰქონდეთ. როგორ არ გიჟდებიან, როდესაც ოჯახს ტყუილში აცხოვრებენ.
ნინო: თქვენ უნდა ნახოთ, სცენარს რომ ეცნობა, რა რეაქციები აქვს ლევანს. აღშფოთებას ვერ მალავს, სულ დათოს ლანძღვაშია. ძალიან განიცდის ღალატისკენ დათოს გადადგმულ თითოეულ ნაბიჯს.
– თუკი მამაკაცი სიყვარულმა გააგიჟა, რა ქნას, როგორ გაუძლოს გრძნობას?
ლევანი: ეს ძალიან რთულია. მამაკაცი ყოველთვის უნდა დაფიქრდეს იმაზე, რაც ამ ცხოვრებაში მოიპოვა და შექმნა. რომეობაზე მაღლა ის ბავშვები და მეუღლე უნდა დააყენო, რომლებიც ამდენი ხანი ყველა სიტუაციაში შენ გვერდით იყვნენ. გაუგებარია, როგორ შეიძლება გიყვარდეს ცოლი და კიდევ სხვა ქალი. მე არ მიყვარს ასეთი მძაფრი შეგრძნებები და არასოდეს მქონია ასეთი თავგადასავლები.
– ნინო, თქვენი პერსონაჟი საზოგადოებაში დიდ აგრესიას იწვევს, როგორც ოჯახის დამანგრეველი. რაიმეს იტყოდით მის დასაცავად?
ნინო: ვერაფერს. ძალიან სწორად იქცევა საზოგადოება, რომ ნათიას მიმართ უარყოფითი დამოკიდებულება აქვს. ქალის ურთიერთობას ცოლიან მამაკაცთან ვერაფრით გავამართლებ. არასოდეს შევხვდები მამაკაცს, თუ გავიგებ, რომ ცოლიანია. ცოლიანი კაცი ჩემთვის ყოველთვის სხვისი კაცია. პრობლემები ყველას უჩნდება ცხოვრებაში, შეიძლება ვიღაცას აღარ უყვარს თავისი ცოლი, მაგრამ ჯერ ის პრობლემა მოაგვარე და მერე იფიქრე ახალ სიყვარულზე. მე რომ ნათიას ადგილზე ვყოფილიყავი, დათო კარგა ხნის დავიწყებული მეყოლებოდა.
– სხვაზე საუბარი ადვილია მანამ, სანამ იმავეს თავად არ გამოცდი. ხანდახან ძნელია, მით უმეტეს, გრძნობებში, ბოლომდე საკუთარი პრინციპების ერთგული იყო.
ნინო: კი. ნათქვამია, არასოდეს თქვა არასოდესო, მაგრამ ნამდვილად არ მქონია ისეთი სიტუაცია, რომ თავს ვერ მოვრეოდი. სულ რომ ბრედ პიტი ყოფილიყო, იმ მამაკაცთან ურთიერთობა არ გამიგრძელებია, რომელსაც ოჯახი ჰყავდა. რაღაც თუ არ მაწყობს ადამიანში, მაშინვე ვწყვეტ ურთიერთობას, გრძნობებში არასოდეს შევდივარ.
– თქვენ მაინც ვის ბრალეულობას უფრო ხედავთ – ქალისას თუ მამაკაცისას?
ნინო: ძნელი სათქმელია. ნათიას იმიტომ არ ვამართლებ, რომ კი, თითქოს არ უნდა სხვის უბედურებაზე საკუთარი ბედნიერების აგება, მაგრამ არც უკან იხევს. საერთოდ არ მჯერა, რომ ოჯახურ ცხოვრებაში მხოლოდ ერთია დამნაშავე. სასიყვარულო სამკუთხედში სამივე დამნაშავეა. კაცი არასოდეს დაიწყებს სხვაგან ყურებას, თუ ყველაფერი კარგად აქვს აწყობილი სახლში. შეიძლება დათოს და ნინას ყველაფერი იდეალურად ჰქონდათ, მაგრამ მათი ცხოვრება ერთფეროვანი გახდა, სახლში მისვლისას ცოლი სულ ხალათით და ფაჩუჩებით ხვდებოდა, ამიტომაც გარკვეულწილად ნინას დანაშაულიცაა.
ლევანი: წვრილმანები ყველაზე მყარ ოჯახსაც კი ღუპავს. ყოველთვის მნიშვნელოვანია, ესა თუ ის ადამიანი რა ეტაპზე გამოჩნდება შენს ცხოვრებაში. ვერასოდეს გამოიტან დასკვნას სხვისი პრობლემებიდან. ძნელია, ადამიანებს იდეალური რჩევა მისცე, რომ ღალატის მსხვერპლი არ აღმოჩნდნენ.
– ხშირად მამაკაცის ცხოვრებას თავდაყირა აყენებს კარგად ნაცნობი "დამნაშავე" – საშუალო ასაკის კრიზისი.
ლევანი: საქმეც მაგაშია, რომ დათოს ცხოვრებაში ეს კრიზისული პერიოდიც კი არ დამდგარა, ამიტომ ეს არ არის გამართლება! პრინციპში, ღალატს არასოდეს აქვს გამართლება, მათ შორის, არც ასაკობრივი კრიზისით.
– სერიალში ნათიას სახით თეთრხალათიანი ქალი ალბათ სპეციალურად არის შერჩეული, მამაკაცების ფანტაზიებში თეთრხალათიანი ქალი – ექიმი, მედდა, ყოველთვის საინტერესოა.
ნინო: ნამდვილად ამ კუთხით არის შერჩეული.
ლევანი: მე სტიუარდესებზეც მაქვს გაგონილი. ალბათ ამ სერიალის შემდეგ სტომატოლოგი ქალების თაყვანისმცემლების რიცხვი გაიზრდება.
ნინო: სტიუარდესების არ ვიცი, მაგრამ ექიმების მიმართ მამაკაცების განსაკუთრებული სიმპათია იმით აიხსნება, რომ კაცისთვის მნიშვნელოვანია, როცა უჭირს, ვინ დგას მის გვერდით. აი, მაგალითად, ნათიას და დათოს შემთხვევაშიც, დათოს პანიკურად ეშინოდა კბილის ექიმთან ვიზიტის და როდესაც იქ ძალიან გულღია ქალი დახვდა, რომელმაც ეს შიში დააძლევინა, მისთვის ნომერი პირველი გახდა. მამაკაცისთვის ყოველთვის მნიშვნელოვანია ქალი, რომელიც მას პრობლემას უგვარებს.
ლევანი: მეც ვყოფილვარ კბილის ექიმთან, მაგრამ ასეთი ისტორიები არ მქონია. ყველა კბილის ექიმი არ არის ერთნაირი. სხვათა შორის, მეც ძალიან მეშინოდა სტომატოლოგის. ერთხელ იმდენად არ მინდოდა ექიმთან მისვლა, რომ მტკივან კბილში იმდენი გამაყუჩებელი ჩავიდე, ნერვი თვითონ მოვკალი.
ნინო: ნათია იმითაცაა მომხიბვლელი, რომ მამაკაცისგან ოჯახის მიტოვებას არ მოითხოვს. ის არაფერს ითხოვს, რაც კაცებისთვის ყოველთვის მნიშვნელოვანია ქალთან ურთიერთობაში.
– თქვენი აზრით, რა შეცდომებს უშვებენ ქართველი ცოლები, როდესაც მათი ქმრები სხვებთან მიდიან?
ნინო: ძალიან რთულია კონკრეტული მიზეზის დასახელება, ყველაფერი ინდივიდუალურია. ზოგისთვის გამაღიზიანებელია, როდესაც ქალი სულ მუდამ იპრანჭება და ზოგისთვის პირიქით, რომ არ იპრანჭება. იცით, ყველაზე მეტად რაზე ვღიზიანდები ხოლმე? ქმრები სთხოვენ ცოლებს, რომ არ იმუშაონ, ისხდნენ სახლში, არ იყვნენ ზედმეტად გაპრანჭულები, რომ სხვისთვის საინტერესონი არ გახდნენ და, როდესაც ცოლი ამ ყველაფერს ასრულებს, ის უკვე აღარ აინტერესებთ. ამიტომაც ამბობს დათო სერიალში, კი მიყვარს ჩემი ცოლი, მაგრამ გული ისე აღარ მიცემს, როგორც ადრეო. ჩემი აზრით, პირველ რიგში, ეს დათოს დანაშაულია, რადგან მან შექმნა ნინასგან ისეთი ცოლი, რომელიც აღარ მოსწონს.
– ადრეულ ასაკში შექმნილი ოჯახები, როგორც წესი, დანგრევისთვისაა განწირული. ლევან, თქვენ გამონაკლისი ხართ. 19 წლის ასაკში შექმნილი თქვენი ოჯახი დღემდე მყარია. ეს როგორ მოახერხეთ?
ლევანი: ადამიანებმა ყოველთვის რაღაცას უნდა გაუწიონ ანგარიში. თავიდან ოჯახური ცხოვრება ძალიან ძნელია, მით უმეტეს, როცა ახალგაზრდა ხარ. ვაღიარებ, ჩემს ცხოვრებაშიც იყო სირთულეები, მაგრამ შემდეგ წამოვიდა ურთიერთპატივისცემა, ერთობლივი ზრუნვა შვილებზე, ერთმანეთზე. ეს ყველაფერი კი უკვე ერთიანობას ქმნის, რომლის დაკარგვაც აღარ გინდა. ბავშვები რომ იზრდებიან, ცოლქმრული თანაცხოვრება უფრო საინტერესო ხდება. ჩემს ოჯახურ ცხოვრებაში ასეთმა მიდგომებმა გაამართლა.
– ნინო, თქვენ ოჯახის შექმნა წინ გელოდებათ. როგორ უნდა მოიქცეთ, რომ ერთ მშვენიერ დღეს ის ქალი არ აღმოჩნდეთ, რომელსაც ქმარი ღალატობს?
ნინო: ძალიან ფრთხილი რომ ვარ და ბევრ რამეს ვითვალისწინებ, ამიტომაც არ ვარ გათხოვილი. ჩემ გარშემო ყველა მეგობარს აქვს ოჯახი და სულ მეუბნებიან, ძალიან ბევრს ფიქრობ, ასე არ შეიძლებაო. არ შემიძლია, ჩემთვის მიუღებელ თვისებებზე და პირობებზე თვალი დავხუჭო. არ მინდა ოჯახის შექმნა მხოლოდ იმის გამო, რომ გათხოვილი ქალი მერქვას. მინდა, ჩემს რჩეულთან მართლა ბედნიერი ვიყო. როცა ასაკი ძალიან მომიჭერს, ალბათ რაღაცეებზე თვალს დავხუჭავ, ჯერჯერობით კი ჩემს პრინციპებზე უარს ვერ ვიტყვი.
– ალბათ გერჩივნათ, ნინას როლი გეთამაშათ, რადგან მაყურებელი გადაგემტერათ.
ნინო: სხვათა შორის, ნინას როლი ნამდვილად არ მინდოდა. ბევრი მეუბნება, ვაი, შე საწყალო, რა ცუდი როლი შეგხვდაო, მაგრამ მე არ ვთვლი, რომ ცუდია, როგორც მსახიობისთვის, ჩემთვის ძალიან საინტერესოა. ნათიამ უკვე დიდი წარმატება მომიტანა. მომწონს ისეთი როლების თამაში, სადაც ჩემს გმირს ბეწვის ხიდზე უწევს სიარული. "ფეისბუქზე" რასაც წერენ, ის რომ სერიოზულად აღვიქვა, შეიძლება გული გამისკდეს. ერთმა ინტერნეტში დაწერა – შენ დაგილპეს ეგ მკერდიო. ასევე დადეს ის კადრი, სადაც ტელეფონით დათოს მესიჯს ვწერ და იქაც მომაწყევლეს – შენ გაგიხმა ეს ხელები, ცოლიან კაცს მესიჯს რომ სწერო. სასაცილოა, რომ სერიალის პერსონაჟები ადამიანებში ასეთ რეაქციას იწვევენ.
– რა ტიპის მამაკაცებს მოსწონხართ ყველაზე მეტად?
ნინო: ჩემ გარშემო თაყვანისმცემელთა ტიპაჟები ეტაპობრივად იცვლება. 4–5 წლის წინ ჩემზე ცოლიანი მამაკაცების შემოტევა იყო. არ ვიცი, რა იყო ამის მიზეზი, მაგრამ ყოველი მეორე თაყვანისმცემელი მამაკაცი ცოლიანი გახლდათ. ბოლო ერთი წლის განმავლობაში ძირითადად ასაკით უმცროს მამაკაცებს მოვწონდი და შესაბამისად – უცოლოებს. ახლა ისევ უფროსების და ცოლიანების რაოდენობა გაიზარდა.
– ლევანთან აქამდე არ გქონიათ მუშაობის გამოცდილება, როგორ დაახასიათებდით პიროვნული და პროფესიული კუთხით?
ნინო: მთელი გადამღები ჯგუფი გეტყვით, რომ ლევანი საოცრად საყვარელი, კეთილი და კარგი ადამიანია. ყოველ წუთში მისგან დადებითი მუხტი მოდის. ყველაფერს აკეთებს იმისათვის, რომ პარტნიორს კომფორტი შეუქმნას. ძალიან ბევრი პარტნიორი მყოლია სერიალებში თუ სპექტაკლებში, მაგრამ ლევანმა ყველა დაჩრდილა. ასეთ ადამიანს ცხოვრებაში იშვიათად შეხვდები. ძალიან მოკლე დროში ერთმანეთს ისე გავუგეთ, რომ ახლა რეპეტიციაზე უსიტყვოდ ვხვდებით, ერთმანეთისგან რა გვინდა.
ლევანი: პარტნიორ ქალებში სულ მიმართლებდა, ერთმანეთზე არაჩვეულებრივ ქალებთან მიწევს თამაში.
ავთო ჩიტიძე