რატომ დაშორდნენ სალომე ჭაჭუა და გიგი გაჩეჩილაძე

"სურათების გადაღება ძალიან მიყვარს, მაგრამ კარგა ხანია, ფოტოკამერის წინ არ მიპოზიორია, რის გამოც, ცოტა არ იყოს, გული მწყდება. ჩემს ალბომში ცეკვის დროს გადაღებული სურათები ჭარბობს", - მითხრა სალომე ჭაჭუამ, რომელიც იმაშიც გამომიტყდა, რომ შეყვარებულს, ასევე პოპულარულ მოცეკვავეს - გიგი გაჩეჩილაძეს დაშორდა.

- როგორი ბავშვი იყავი?
- წყნარი და ჩუმი გახლდით. თურმე, ლაპარაკი ძალიან გვიან დავიწყე, მაგრამ ენა რომ ამოვიდგი, მაშინაც სიტყვაძუნწი გახლდით; ჩუმად, ჩემთვის თამაში და საკუთარ თავთან ლაპარაკი მიყვარდა. ადამიანების გარდა, ლამის ყველაფერს ველაპარაკებოდი: ხეს, ფოთოლს, კარადას და ა.შ. რის გამოც, ოჯახის წევრები დღემდე მეხუმრებიან. აი, ბავშვობის დროინდელ ამ ფოტოსურათში დასთან ერთად ვარ. ეს ფოტო ძალიან მიყვარს.

- ალბათ, პრანჭია იყავი...
- კი, პრანჭიკელობაც მიყვარდა. ცოტა რომ წამოვიზარდე და ეზოში დამოუკიდებლად ჩასვლა დავიწყე, ძალიან ბევრს ვცელქობდი. ჩემს ეზოში თანატოლების უმეტესობა ბიჭები იყვნენ და მეც, ძირითადად მათთან მიწევდა ურთიერთობა, თამაში. ვცდილობდი, მათთვის ტოლი არაფერში დამედო და როგორც დედა მეუბნება, თურმე, გამუდმებით ჩემი ყვირილის ხმა ისმოდა. ამ სურათში კარგად ჩანს, თუ როგორი ცელქი ვიყავი.

- ეს სუპერმაღალი კაცი ვინ არის?
- ერთი პერიოდი ქართულ ცეკვებზე დავდიოდი. თურქეთში ვიყავით, გასტროლებზე, სადაც მსოფლიოში ყველაზე მაღალი კაცი ვნახეთ. ჰოდა, მე და ჩემმა ჯგუფელმა შანსი ხელიდან არ გავუშვით და მასთან ერთად სურათი გადავიღეთ. დასამახსოვრებელი ფოტო გამოვიდა.

- თინეიჯერობის პერიოდში როგორ გამოიყურებოდი?
- ჩვეულებრივად: ავანგარდულად ჩაცმა არასდროს მიყვარდა და გამუდმებით გრძელ ვარცხნილობას ვატარებდი. მხოლოდ ერთხელ, ისიც - პატარაობისას მოვიკელი თმის სიგრძე და კარე შევიჭერი. აი, ამ სურათში, სადაც ნათლიასთან ერთად ვარ აღბეჭდილი, სწორედ ამ ვარცხნილობაში ვიწონებდი თავს. იმიჯის შეცვლა დიდად არ მიყვარს.

- ჩაცმის როგორ სტილს ანიჭებ უპირატესობას?
- სპორტულ და კლასიკურ სტილს ერთმანეთს მშვენივრად ვუთავსებ...

- თმას თუ იღებავ?
- თმა პირველად შარშან შევიღებე, ბუნებრივად კი მუქი ყავისფერი თმა მაქვს... აი, ამ სურათში აბიტურიენტი ვარ და მასზე ჩემი თმის ფერი ზუსტად არის აღბეჭდილი. სხვათა შორის, ძალიან მიყვარს "ზაგარი" და სურვილი მაქვს, აუზზე ვიარო, მაგრამ ჯერჯერობით, ამისთვის ვერ მოვიცალე, სოლარიუმში სიარულს კი თავს ვარიდებ.

- აქსესუარები თუ გიყვარს?
- ყველანაირი აქსესუარი მიყვარს, მაგრამ განსაკუთრებულად ოქროს ან მოოქრული სამკაული, ოქროსფერი ბიჟუტერია მიზიდავს. მათ შესაძენად ფული არასდროს მენანება... ყურები გვიან, 15 წლის ასაკში გავიხვრიტე. დედა არ მთანხმდებოდა (თავად არ აქვს გახვრეტილი), მაგრამ მამამ სურვილი ამისრულა და ჩუმად წამიყვანა ყურების გასახვრეტად. სხვათა შორის, შარშან პირსინგიც გავიკეთე.

- ყოველდღიურ ცხოვრებაში მაკიაჟს თუ იკეთებ?
- ვცდილობ, ყოველდღიურ ცხოვრებაში მსუბუქი მაკიაჟით შემოვიფარგლო. ტურნირებზე, სცენაზე გასვლის წინ მაკიაჟს ყოველთვის თავად ვიკეთებ.

- სცენისთვის გაკეთებული მაკიაჟი ძალიან გცვლის; საინტერესოა, ცეკვის დროს შინაგანად თუ იცვლები?
- სცენაზე გასვლისას ყველანაირად ვიცვლები; ამ დროს ყველა კომპლექსი მეხსნება, უფრო მეტად ლაღი და თავისუფალი ვხდები. ყოველთვის ვფიქრობ იმაზე, რაც შეიძლება კარგად ვიცეკვო. ამ დროს ხასიათი, მანერებიც კი მეცვლება.

- ამ სურათში სტეფანესთან ერთად ხარ...
- ეს სურათი "ვერის უბნის მელოდიებში" მონაწილეობისას გადაგვიღეს. ის პერიოდი ძალიან კარგად მახსენდება.

- ეს სურათი კი იმ დროს არის გადაღებული, როცა გაჯილდოებენ, არა?
- ჰო, ასეა! საქართველოში "კავკასიის თასი" ჩატარდა და პირველ ადგილზე გავედი. ძალიან გახარებული, ბედნიერი გახლდით. ისიც უნდა აღვნიშნო, რომ ჩემთვის ეს პირველი კონკურსი იყო, თანაც - ფეხბედნიერი: მას შემდეგ არაერთი გამარჯვება და სიხარული იყო ჩემს ცხოვრებაში. აი, ეს ჩემი პირველი მეწყვილე - ოთარ ცისკარიშვილია. მასთან ერთად ძალიან ცოტა ხანს ვცეკვავდი, რადგან ერთმანეთს ხასიათებით ვერ შევეწყვეთ; შემდეგი ჩემი მეწყვილე ზურა კიკაბიძე გახლდათ. მე და ზურამ ერთად საკმაოდ ბევრს მივაღწიეთ.

- ამის შემდეგ კი შენი უცვლელი მეწყვილე გიგი გაჩეჩილაძე იყო...
- კი, ასეა! გარდა იმისა, რომ მეწყვილეები ვიყავით, ერთმანეთი გვიყვარდა და ეს მთელმა საქართველომ იცის. მოდი, გიგიზე ნუ ვილაპარაკებთ, რადგან ჩვენ ერთმანეთს უკვე დავშორდით.

- ეს თქვენი საბოლოო გადაწყვეტილებაა თუ უბრალოდ, ნაჩხუბრები ხართ?
- არა მგონია, შევრიგდეთ.

- პროექტის - "ცეკვავენ ვარსკვლავების" დასრულების შემდეგ შენს "ვარსკვლავ" მეწყვილესთან, გიორგი ვარდოსანიძესთან სხვა გაგებითაც დაგაწყვილეს; თქვენს ურთიერთობაზე ბევრს ჭორაობდნენ. შენი და გიგის დაშორების მიზეზი ეს ხომ არ არის?
- ჩვენს გადაწყვეტილებასთან არც პირველი და არც მეორე პროექტი არაფერ შუაშია. ეგრე როსტოზეც ამბობდნენ, ბოლო დროს კი მამულიჩაც "გააჩინეს" ჩემს ცხოვრებაში. ეს ყველაფერი სისულელეა!.. უბრალოდ, ჩემი და გიგის ურთიერთობა ძალიან პირადულია და ამაზე სახალხოდ ლაპარაკი ბუნებრივია, არ მსურს.

- პოპულარული მას შემდეგ გახდი, რაც "ცეკვავენ ვარსკვლავებში" გიხილეთ. ამან შენს ცხოვრებაში რა შეცვალა?
- როგორც ადამიანი, ახლობლებისა და მეგობრებისთვის არ შევცვლილვარ. ისე კი, რა თქმა უნდა, პოპულარობამ ბევრი რამ მომიტანა და თუნდაც, ის რად ღირს, რომ უკვე მთელი საქართველო მიცნობს (იცინის).

- ახლა ვინ გიწევს პარტნიორობას?
- მარტო ვარ, მარტო ვვარჯიშობ და ამ ყველაფერს ძალიან განვიცდი. ცეკვაში პარტნიორი თუ არ გყავს, ვერაფერს გააკეთებ. ახლახან "კავკასიის თასი" ჩატარდა. ევროპულ ცეკვებში ეს ყველაზე მასშტაბური კონკურსია და იგი წელიწადში ერთხელ იმართება; მას ჩემი პედაგოგი - თემურ გაჩეჩილაძე ატარებს. ჰოდა, ვინაიდან მეწყვილის გარეშე დარჩენილმა კონკურსში მონაწილეობა ვერ მივიღე, ცრემლიანი თვალებით ვუყურებდი სხვების ცეკვას.

- შენი და გიგის დაშორების შემდეგ პედაგოგებთან ურთიერთობა ხომ არ შეგცვლია?
- მე და გიგის კარგი ურთიერთობა გვაქვს და სხვებს ცეკვას ისევ ერთად ვასწავლით. უბრალოდ, ჩვენი სტატუსი შეიცვალა. რაც შეეხება მის მშობლებს, ისინი ჩემს მასწავლებლებად რჩებიან და ჩვენს ურთიერთობაში არაფერი შეცვლილა.

- პარტნიორის ძიებაში ვარო, - ამბობ. ვერ წარმოვიდგენდი, სალომე ჭაჭუას პარტნიორის მოძებნა ასე თუ გაუჭირდებოდა...
- მერწმუნეთ, ეს ძალიან რთულია. "ცეკვავენ ვარსკვლავების" მონაწილესთან, ეკო ფანგანის მეწყვილე დიტო რობაქიძესთან ერთად დავდექი წყვილში; ჩვენ უკრაინაშიც გავემგზავრეთ ტურნირზე, მაგრამ ერთმანეთს ვერ შევეწყვეთ. მე და ჩემი პედაგოგები ისეთი ადამიანის ძიებაში ვართ, ვისაც გავუგებ და ვინც გამიგებს. ალბათ, ასეთი მოცეკვავეც გამოჩნდება, თორემ მომბეზრდა მარტო ვარჯიში (იცინის).

- სალომე, შენს ალბომში ცეკვის დროს გადაღებული სურათები ჭარბობს. საინტერესოა, ცეკვის გარდა, რითი ხარ დაკავებული?
- ძალიან ბევრი ჰობი მაქვს. მაგალითად, თინეიჯერობის ასაკში "როლიკებით" ვიყავი გატაცებული. ახლაც სიამოვნებით დავდგები, მაგრამ ამისთვის დრო არ მრჩება. ასევე, ძალიან მიყვარს კერძების მომზადება. სულ ვამბობ, - ცეკვას რომ შევეშვები, კულინარიის კურსებზე ვივლი და პირველი კლასის შეფ-მზარეული გავხდები-მეთქი...





მარეხ ჭონიშვილი
ჟურნალი ”გზა”