როგორ გავხდე ცოლი, ანუ ცხოვრება ქორწილის მეორე დღიდან
დამთავრდა საქორწილო ორომტრიალი. ყოველგვარი მზადება, კაბის შერჩევა, ხელის მოწერა, ჯვრისწერა და თქვენ უკვე მეუღლეები ხართ.
გათენდა. გაიღვიძეთ და თქვენ აღარ ხართ ჭირვეული გოგონა, რომელიც ხშირად სარგებლობდა მამაკაცის ნებისყოფით და თავს იქცევდა მის ნერვებზე თამაშით.
მნიშვნელობა არ აქვს, რომელს მეტი დრო და ენერგია დაგჭირდათ ერთმანეთის გულის მოსანადირებლად. შედეგი დამდგარია, თქვენი რჩეული თქვენთან არის – თქვენთვის ყველაზე, ყველაზე, ყველაზე...
მის გამო ნაკლებ ყურადღებას უთმობდით მეგობრებს, ნათესავებსა და ახლობლებს. მასთან ერთად თავს საუკეთესოდ გრძნობთ. შეგიძლიათ ისაუბროთ, მოვლენები და ახალი ამბებიც კი განიხილოთ. მთავარია, როგორ შევინარჩუნოთ რომანტიკა და პატივისცემა მომავალში.
ასეთი საკითხები ბევრ ახალდაქორწინებულს აწუხებს. სასურველია, რომ სიყვარული და სითბო ყოველდღიურმა ყოფითმა თანაცხოვრებამ არ გაახუნოს და ჩააქროს.
• პირველივე დღეს ნუ შეუდგებით ოჯახური მოვალეობების გადანაწილებას. ამ პროცესს ნუ დაურთავთ ძველებულ ჭირვეულობას. თავიდან ამას მეუღლე გაგებით შეხვდება, ხოლო შემდეგ მოსწყინდება და შეიძლება კონფლიქტიც წარმოიშვას.
• ოჯახური თანაცხოვრება სხვაგვარ მიდგომას საჭიროებს. აქ აუცილებელია დამოუკიდებლობის, პასუხისმგებლობის გრძნობა და კომპრომისზე წასვლის უნარი. სისტემატური კამათი, ცრემლები და სცენების მოწყობა ყველაზე მომთმენ ადამიანსაც გამოიყვანს წყობიდან.
• გაითავისეთ: – არც ერთი მამაკაცი არ ასრულებს ყველაფერს უპირობოდ, თუნდაც ამის შესახებ ქორწინებამდე ბევრჯერ ჰქონდეს ნათქვამი.
• თუ კი თვლით, რომ ოჯახის ხელმძღვანელი ქმარია, შეეგუეთ ამას. ეს მეუღლესაც აგრძნობინეთ. მან თავი ყოველთვის საჭიროდ უნდა იგრძნოს. უნდა იფიქროს, რომ ოჯახური კეთილდღეობა მასზეა დამოკიდებული და ყველანაირად ეცადოს ამის სრულყოფას.
• ქალმა ფრთხილად, გეგმაზომიერად უნდა იმოქმედოს... სასურველის მიღწევა მხოლოდ დაყვავებით და ალერსითაა შესაძლებელი. ასე გაცილებით მეტს მიაღწევთ, ვიდრე ჭირვეულობით და ცრემლებით.
• თუ შინ რაიმე არაქალური საქმის კეთებას დაიწყებთ, დაანახეთ, გამოიწვიეთ, რომ დაგეხმაროთ.
• ნუ უბრძანებთ და დაავალებთ მისთვის არასასურველს. შემოვლით, მშვიდობიანი და ხალისიანი გზებით მიიყვანეთ იქამდე.
• თუ სამსახურში ძლიერ დაკავებულია, ეცადეთ, ააცილოთ საშინაო საქმეები.
• თუ თქვენც მუშაობთ, თავად შეარჩიეთ დამხმარე. ეცადეთ, დამოუკიდებლად აკონტროლოთ დამხმარე ქალბატონის საქმიანობა. სასურველია, თუ შინ დაბრუნებულ მეუღლეს დამხმარე არ დახვდება. მის მიერ მოწესრიგებულ სახლში კი თქვენ დაუხვდით დიასახლისად.
• სამსახურიდან დაბრუნებულები მოდუნდით და დაისვენეთ.
• სასურველია, თუ გემრიელად მომზადებას შეისწავლით. თუნდაც კვირაში ერთხელ თავად მოუმზადეთ მეუღლეს საყვარელი კერძი.
• თუ დიასახლისი ხართ, სადილები თქვენს თავზე აიღეთ, რომ ქათინაურებიც მხოლოდ თქვენი იყოს.
• დაინტერესდით მისი წარმატებებით და საქმიანობით იმდენად, რამდენადაც ამის გაზიარება მას სურს. რომც არ გიზიდავდეთ მონათხრობი, – ინტერესით განეწყვეთ და მოუსმინეთ.
• თუ ძალიან მოგბეზრდებათ, მოხერხებულად გადაიყვანეთ საუბარი თქვენთვის სასურველ თემაზე.
• დროდადრო მოაწყვეთ დაბალბიუჯეტიანი სიურპრიზები.
• აუცილებელია რომანტიკული საღამოები. ფანტაზია თავად განავითარეთ. შესაძლებელია, ვახშმობა სურნელოვანი სანთლების ფონზე, თქვენი ხელით მომზადებული გემრიელი დესერტი.
• იყავით ყოველთვის ფორმაში.
• მომავალზე მხოლოდ სასიამოვნოდ ისაუბრეთ, ნუ შეაშინებთ გადაწყვეტილების მიღების დროს ისედაც ფრთხილ მამაკაცს.
• ერთბაშად მომავლის რამდენიმე გეგმას ნუ შესთავაზებთ.
• დასაწყისისთვის ისარგებლეთ ჩვენი რჩევებით და გაიხანგრძლივეთ ბედნიერი წლები.
ჟურნალი "... და ქალი"
