ცალმხრივად შეყვარებულმა ლევან ღონღაძემ გვანცა გაიმეტა

23 წლის სტუდენტი გოგონა გვანცა ადამია, როგორც ამბობენ, მასზე შეყვარებული ბიჭის მსხვერპლი გახდა – ის დიდი სიმაღლიდან გადმოაგდეს. ეჭვმიტანილიც სტუდენტია, იურიდიული ფაკულტეტის მეოთხეკურსელი ლევან ღონღაძე. უბედური შემთხვევა 1 მაისს თბილისის ივანე ჯავახიშვილის სახელობის სახელმწიფო უნივერსიტეტში მოხდა. ღონღაძე დაკავებულია. გამოძიება განზრახ მკვლელობის ფაქტზე საქართველოს სისხლის სამართლის კოდექსის 19–108 მუხლით მიმდინარეობს, რაც, ბრალის დამტკიცების შემთხვევაში, 7–დან 15 წლამდე პატიმრობას ითვალისწინებს. თუ რა მოხდა სინამდვილეში, ჯერჯერობით დადგენილი არ არის. შემთხვევას თვითმხილველებიც ჰყავს, მათ სამართალდამცავებს ჩვენებები უკვე მისცეს.
გადმოვარდნილ გოგონას ადგილზე დახმარება უნივერსიტეტის ექიმმა აღმოუჩინა, შემდეგ კი სასწრაფო დახმარებამ რესპუბლიკურ საავადმყოფოში გადაიყვანა, სადაც გადაუდებელი ოპერაცია ჩაუტარდა.

რა ოპერაცია ჩაუტარდა გოგონას?
– გაუკეთდა ლაპარატომია, მოხდა ღვიძლის ნახეთქი ჭრილობების დამუშავება, გაკერვა და მუცლის ღრუს სტენირება. უტარდება ყოველდღიური მონიტორინგი, რენტგენოლოგიური და ექოსკოპიური კონტროლი. გაუკეთდა კომპიუტერული ტომოგრაფია, რომელსაც უახლოეს დღეებში გავიმეორებთ. პაციენტი დინამიკური მეთვალყურეობის ქვეშ არის.
– ანუ მის სიცოცხლეს საფრთხე არ ემუქრება.
– ვიცი, რომ კარგად იქნება. როგორც ექიმს, ამის დიდი სურვილი მაქვს. წესით, არაფერი უნდა მოხდეს, მაგრამ რაც ჩამოგითვალეთ, იმ დაზიანებებს, ღმერთმა დაგვიფაროს და, შეიძლება ძალიან საშიში გართულებებიც ახლდეს თან. ამის საწინააღმდეგოდ ყველა ზომას ვიღებთ.
...
იურიდიული ფაკულტეტის დეკანი ირაკლი ბურდული გვანცა ადამიასაც კარგად იცნობს და ლევან ღონღაძესაც. ორივე მისი სტუდენტია. მათ ურთიერთობაში საეჭვო არაფერი შეუნიშნავს. იმ დღესაც ნახა, კიბის მოაჯირთან როგორ საუბრობდნენ.
– ბატონო ირაკლი, გვიამბეთ, რა მოხდა იმ დღეს.
– ეს შემთხვევა დაახლოებით დღის 3–ის 4–5 წუთზე მოხდა. ყოველ საათზე ლექცია იწყება, რომელიც 2 საათს გრძელდება. მაგალითად, როცა 2 საათზე ლექცია იწყება, უნივერსიტეტის დერეფანი დაცარიელებულია, რადგან სტუდენტები ლექციებზე შედიან. შესაბამისად, იმ საათებში დერეფანში ხალხის ნაკლებობაა. ეს შემთხვევა მეორე სართულზე, ფიზიკის დიდი აუდიტორიის პირდაპირ მოხდა. კიბეს საკმაოდ მაღალი მოაჯირი აქვს. გოგონა და ბიჭი ამ მოაჯირთან დიდხანს იდგნენ და საუბრობდნენ. ეს ზუსტად დეკანატის პირდაპირაა, მეც ხშირად მიხდება იმ ადგილას გავლა.
არანაირი ყვირილის ან ჩხუბის ხმა არ გამიგია. ახლა ვიხსენებ, რომ ის გოგო და ბიჭი იდგნენ და საუბრობდნენ. ეს ბიჭი ჩემი სტუდენტი იყო, წინა სემესტრში ვუკითხავდი ლექციებს, გოგონას ახლა ვასწავლი. მოკლედ, როცა ისინი დერეფანში საუბრობდნენ და მე ჩავიარე, უცნაური რამ არ შემინიშნავს. როგორც ჩანს, როცა იქ აღარავინ იყო, ეს შემთხვევა მაშინ მოხდა. ყველაფერი სათვალთვალო კამერის მიერაა დაფიქსირებული. როგორც მიყვებიან, ვიდეოჩანაწერი საშინელი სანახავია... ერთი სიტყვით, როცა დერეფანი დაცარიელდა, ბიჭმა ამ საწყალ გოგოს ხელი ჰკრა და მეორე სართულიდან გადააგდო. ამ შენობას ნულოვანი სართულიც აქვს. შესაბამისად, გამოდის, რომ გოგონა სამი სართულის სიმაღლიდან არის ჩამოვარდნილი. ეს სართულები კი ტრადიციული სიმაღლის არ არის, ძველი შენობაა და თითო სართული დაახლოებით, 6 მეტრია.
კიდევ კარგი და მადლობა ღმერთს, რომ ამ ბიჭმა ისე გადააგდო, რომ გვანცა პირით მიწისკენ წავიდა და ხელებით დაეცა. ამიტომაც აქვს მენჯის მოტეხილობა. დაცემისას სისხლი არ დაქცეულა, სისხლისდენა შიგნით მოხდა. უკნიდან რომ გადავარდნილიყო ან თავით დაცემულიყო, ალბათ დავიღუპებოდით.
სანახავად ვიყავი და კალმით დაწერა, მამა შემოვიდესო. საავადმყოფოში ბიჭის დედაც მოვიდა, ტიროდა, გოგონას დედასთანაც მივიდა. გოგოს მშობლები სენაკში ცხოვრობენ და იქიდან ჩამოვიდნენ.
– ვინ დაინახა ეს ყველაფერი?
– თვითმხილველები არიან, რომლებიც უკვე დაკითხეს. რამდენიმე სტუდენტი იმ დროს კიბეზე ადიოდა და დაინახეს, რაც მოხდა. ყვირილი ატეხეს, ჩვენი უნივერსიტეტის ექიმს გამოუძახეს, გვანცას პირველადი დახმარება მან აღმოუჩინა. შემდეგ სასწრაფო დახმარება, პოლიციაც მოვიდა.

– რა შეგიძლიათ გვითხრათ გვანცასა და ლევანზე?
– ეს გოგონა ჩვენს უნივერსიტეტში მობილობის წესით სამედიცინო უნივერსიტეტიდან გადმოვიდა. ნორმალურად სწავლობდა, კარგი ნიშნების ფურცელი აქვს. ბიჭი კი თავიდანვე ჩვენთან ჩაირიცხა, მას ასპროცენტიანი გრანტი აქვს აღებული, რაც იმას ნიშნავს, რომ თავის დროზე კარგი აბიტურიენტი იყო. მთელი ამ ხნის განმავლობაში, თუ არ ვცდები, მეშვიდე სემესტრია, კარგი ნიშნები აქვს. ლექტორები ვსაუბრობდით, ორივე სტუდენტს ვიხსენდებდით. უცნაურობა მათთვის არ შეგვინიშნავს. ეს ბიჭი კარგად სწავლობდა და არც უზრდელი იყო. ხომ იცით, ზოგიერთი სტუდენტი როგორია, შეპასუხება იციან. მსგავსი რამ ამ ბიჭისთვის არ შეგვინიშნავს... ვნახოთ, როგორ წარიმართება გამოძიება. ამაზე მეტს ვერაფერს გეტყვით, დანარჩენი სამართალდამცავი ორგანოების პრეროგატივაა.

– გვანცას და ლევანს ერთად ხშირად ხედავდით? ზოგი ამბობს, შეყვარებულები იყვნენო, ზოგიც – ის ბიჭი დასდევდა და გოგოს არ უყვარდაო.
– მე ისინი ერთად არ მინახავს. როგორც გოგონას ჯგუფელები ამბობენ, ეს ბიჭი სულ დასდევდა, ალბათ უყვარდა. გვანცას არ მოსწონდა. ჩვეულებრივი, სტუდენტური, ახალგაზრდული ისტორიაა, რომელიც, სამწუხაროდ, ასე დამთავრდა. ღმერთმა გადაგვარჩინა, რომ გოგონა არ დაიღუპა. საინტერესოა, ამ ბიჭს რა დაემართა. შესაძლებელია, ფსიქიატრიულ ექსპერტიზაზეც გაუშვან.
...
გვანცას თანაკურსელებს და მეგობრებს ამ ამბის გახსენება ძალიან უჭირთ. დღემდე ვერ გარკვეულან, რა მოხდა. მათ "სარკესთან" ზოგიერთი დეტალი გაიხსენეს.
გვანცას თანაკურსელი:
– როცა ეს მოხდა, ბიბლიოთეკაში ვიყავით. საშინელი კივილის ხმა გავიგონეთ. როგორც გავარკვიეთ, გოგონა გადმოაგდეს. ბავშვები შოკში იყვნენ... როგორც ჩანს, გვანცა არც ელოდა, რომ ის ბიჭი გადააგდებდა, თუმცა, როგორც ამბობენ, ისინი ერთმანეთს ხმამაღლა ესაუბრებოდნენ. ზოგი ამბობს, ხელი ჰკრა და გადააგდოო, ზოგი კი – ხელში აიყვანა და ისე გადმოაგდოო. ამის შემდეგ ეს ბიჭი ერთ–ერთ ლექტორთან მივიდა და უთხრა, გვანცა მე გადავაგდეო. როცა გონზე მოვიდა და მიხვდა, რაც გააკეთა, უთქვამს, დუმილის უფლებით ვსარგებლობ, დამიმტკიცეთ, რომ მე გადავაგდეო.
შემდეგ ვიდეოჩანაწერი ამოიღეს და ნახეს, რომ გვანცა მართლაც ამ ბიჭმა გადააგდო. სასწრაფო დახმარება რომ მოვიდა, თქვეს, საოცარია, როგორ გადარჩაო. იმ წუთას კისერი კი აამოძრავა, მაგრამ მკვდრის ფერი ედო. ბიჭს მე არ ვიცნობ, მისი თანაკურსელები კი კარგად ახასიათებენ. ლექტორებიც ამბობენ, ზრდილობიანი, წყნარი ბიჭიაო. გვანცას თურმე არ უყვარდა. უარი რომ უთხრა, ბიჭმა ვერ აიტანა, არც ჩემი ხარ, არც სხვისი იქნებიო და გადააგდო. უნივერსიტეტის დაცვამ დააკავა, აბა იმას ვინ გაუშვებდა?! პოლიციელებისთვის უთქვამს, ყველანაირ მიზეზს გეტყვით, თუ რატომ გადავაგდეო. რა თქვა და რა მოხდა, არ ვიცი.
გვანცა კარგად სწავლობდა, კარგი ყოფაქცევისაა, მხიარული. ჩვენთან სხვა უნივერსიტეტიდან გადმოვიდა. სენაკელია, აქ, თუ არ ვცდები, ძმასთან ერთად ცხოვრობს, მშობლები იქით არიან.
გვანცას მეგობარი:
– იმ ბიჭს არ ვიცნობ, მაგრამ ვიცი, რომ გვანცას დიდი ხნის განმავლობაში დასდევდა. თურმე ამ შემთხვევის წინა დღეს "ფეისბუქზე" დაწერა, ხვალ ყველაფერი უნდა დამთავრდესო და მეორე დღეს ეს გააკეთა.
ეკა ლემონჯავა