...”მაპატიე, რომ ვერც ის სახლი გაჩუქე და ვერც ერთგულების პირობა ვერ დავიცავი” - სერიალის სცენარისტმა მაყურებლის მოთხოვნა დააკმაყოფილა

სერიალ "ჩემი ცოლის დაქალების" ერთგულ მაყურებელს კარგად მოეხსენება, თუ როგორ აგონიაში იყო ერი დათოსა და ნინას ოჯახურ იდილიაში გაჩენილი ბზარის გამო. როგორც იქნა, ორთვიანი გაუსაძლისი ნერვიულობის შემდეგ მაყურებლის ტანჯვას ბოლო მოეღო და გოცირიძეების სამაგალითო ოჯახი კვლავ შერიგების გზას დაადგა.

"ეს შერიგება ხარჯიანი ამბავი აღმოჩნდაო" – აღნიშნავს სერიალის მთავარი გმირი და საყვარელი მეუღლის თავიდან მოსანადირებლად ისევ იმ გზის გავლას გადაწყვეტს, რომლითაც ყველაფერი დაიწყო. დათომ მართლაც საინტერესო ტაქტიკა აირჩია ნინას დასაბრუნებლად: ულამაზესი თაიგული, პარფიუმერული ნაწარმის მოზრდილი კალათა, ამაღელვებელი წერილი და ბოლოს, დამაგვირგვინებელ აკორდად, ვნებიანი ღამე სიღნაღის ერთ-ერთი პრესტიჟული სასტუმროს ლუქს-ნომერში.

ერთი საკითხია, რამდენად საკმარისია ამგვარი ნაბიჯები ღალატით მიყენებული ტკივილის მოსაშუშებლად, მაგრამ რაკი არჩევანს თითოეული მეუღლე თავად აკეთებს და რახან ნინას პირველივე თაიგულის შემდეგ წყენამ გადაუარა, ესე იგი, საქმე ამად ღირდა და არჩევანიც ნინაზე იყო, რომელმაც აპატია და მიიღო "უძღები შვილივით" მობრუნებული დათო.

მაყურებელი მართლაც ბედნიერია ამ ამბის ასე კეთილად დაგვირგვინების გამო. ერთი შეხედვით თუ ვიმსჯელებთ, სერიალის სცენარისტმა ხალხის დაჟინებული მოთხოვნა დააკმაყოფილა და საყვარელთან გაქცეული ქმარი ოჯახს დაუბრუნა, მაგრამ არ უნდა დაგვავიწყდეს ისიც, რომ ამ ორომტრიალის თავი და თავი ნათია, რომელიც დროებით მოეფარა თვალს და მონასტერშია, არ აპირებს იქ სამუდამოდ დარჩენას და ადრე თუ გვიან, დაუბრუნდება ოჯახსაც, სამსახურსაც და არაა გამორიცხული, დათოს დაბრუნებაც განიზრახოს.

ასე რომ, არ ღირს მოდუნება, რადგან ყველაფერი ჯერ კიდევ წინაა!

ამასობაში კი ქალაქში აქტიურად განიხილავენ მსახიობების – ლევან ყოჩიაშვილისა და ნინო მუმლაძის ურთიერთობას. მოგეხსენებათ, თოქ-შოუ "პროფილში" ლევანმა თავად აღიარა საკუთარ ოჯახში მომხდარი არეულობის ამბავი, რამაც დიდი მითქმა-მოთქმა და ეჭვები გამოიწვია. შესაძლოა, მსახიობების ურთიერთობაზე აგორებული ჭორი მართლაც უსაფუძვლო და თითიდან გამოწოვილი თემაა, მაგრამ კვამლი რომ უცეცხლოდ არ ჩნდება, ესეც ფაქტია.


p.s. გთავაზობთ ამაღელვებელ წერილს, რომელიც დათომ ნინას მისწერა:

"ნინა, ნინა, ჩემო ნინა... ახლაც მახსოვს, როგორ მომეწონა შენი ეშმაკური ღიმილი, როცა პირველად გნახე, ტუჩებს რომ იკვნეტდი ფიზიოლოგიაში გამოცდის წინ და ნერვიულობდი, შვიდიანის მიღება არ გინდოდა. მე მაშინვე შემიყვარდი და ყოველ ღამე ვნატრობდი, რომ შენც შეგყვარებოდი. მაშინაც მინდოდა შენთვის წერილების და ლექსების წერა, მაგრამ არ გამომდიოდა და ამიტომ სახლი დაგიხაზე, რომელშიც მე და შენ ვიცხოვრებდით.

მაპატიე, რომ ვერც ის სახლი გაჩუქე და ვერც ერთგულების პირობა ვერ დავიცავი. ახლაც არ ვიცი, როგორ დავიმსახურო ისევ შენი სიყვარული, მაგრამ იმედია, ღიმილს მაინც დავიმსახურებ..."

შენი დათო

როგორ ფიქრობთ, ღირდა ამ წერილის შემდეგ წყვილის შერიგება?

გუშაგი