"გოგონა გაუპატიურებას გადავარჩინე"

მართალია, მისი შვებულება იმ ფორმატში ვერ ჩაეტია, რაც წინასწარ ჰქონდა დაგეგმილი, მაგრამ თავად დარწმუნებულია, რომ ზღვისპირეთში ერთი ყველაზე სასარგებლო და უჩვეულო ღამე გაატარა.

დიმა, 32 წლის:

- ვინც წელს ზღვისპირეთს ერთხელ მაინც ესტუმრა, დამეთანხმება, რომ ტურისტების მოსაზიდად და დასაინტერესებლად გახსნილი დაწესებულებების წყალობით, უამრავმა უძველესი პროფესიის ქალბატონმა მოიყარა თავი.

მათ "კავალერთა" რიცხვში, ძირითადად, თურქი, სომეხი და აზერბაიჯანელი მამაკაცები ჭარბობდნენ. ტურისტების სიმრავლით სახელმწიფოს დამატებითი შემოსავალი გაუჩნდა, შემოსავალს მონატრებულმა მსუბუქი ყოფაქცევის ქალებმა სარფიანი საქმე ნახეს და ულვაშიანი, შავგვრემანი მამაკაცები გვპირდებიან, რომ მომავალი წლის შვებულებას ისევ საქართველოში გაატარებენ.

როგორც ჩანს, ყველა მხარე კმაყოფილია და თუ ვინმეს ამ საქმის მორალური მხარე შეაწუხებს, ამ საკითხს არ უნდა ჩაუღრმავდეს, თორემ შეიძლება სწორედ იმ მდგომარეობაში აღმოჩნდეს, რა მდგომარეობაშიც მე ვიყავი, როცა გონიოში დასასვენებლად გავემგზავრე.

- დასასვენებლად მეგობრებთან ერთად წახვედით?

- მარტო წავედი, რადგან ჩემი მეგობრები უკვე ზღვაზე იყვნენ. შვებულება როგორც კი ავიღე, მაშინვე მათთან გავემგზავრე. გონიოში ჩემი მეგობრები: თიკო, ლიკა, ნათია და ზაზა მელოდებოდნენ. გოგონებს ცალკე ნომერი ჰქონდათ, ბიჭები მათ გვერდით ოთახში დავბინავდით.

პლაჟზე დილას გავდიოდით, შუადღეს ვისვენებდით და ღამე იწყებოდა გართობა, ბარები, კლუბები, სეირნობა. ერთ საღამოს მე და ზაზამ ზედმეტი დავლიეთ. ცუდად გავხდი, ბარში გაჩერება აღარ შემეძლო და ქუჩაში, სუფთა ჰაერზე გამოვედი.

სანაპიროსკენ გავუყევი გზას და ამ დროს გვერდიდან ვიღაც დამეჯახა. მივიხედე, ახალგაზრდა ქალი იყო. ჩემთვის არც შემოუხედავს, სირბილით გააგრძელა გზა და თან უკან-უკან სიბნელეში იყურებოდა.

სიბნელეში მისი სხეული თითქოს ლამაზიც მომეჩვენა. რამდენიმე წამში აქოშინებული მამაკაცი წამომეწია და გამცდა. მივხვდი, რომ იმ ქალს მისდევდა და ინტერესის გამო უნებურად ფეხს ავუჩქარე. რამდენიმე წუთით ჩემი მხედველობის არედან ორივე გაქრა.

იმდენად მაინტერესებდა, რა აკავშირებდათ ერთმანეთთან, რომ სანაპიროზე გავიქეცი. ნასვამი რომ არ ვყოფილიყავი, ადრევე შევნიშნავდი ქვიშაზე გაშხლართულ ქალს, რომელსაც მისკენ დახრილი მამაკაცი თმაში ჩაფრენოდა და ჩურჩულით, მაგრამ საშინელი ზიზღითა და დამტვრეული რუსულით ეუბნებოდა: - კახპა, გაქცევა ვერ გიშველის, შენში ფული მაქვს გადახდილი და იმას გააკეთებ, რაც მინდა.

სწორედ ამ დროს წამოვადექი "წყვილს" თავზე. ქალმა გაიბრძოლა, წამოდგომა სცადა, მაგრამ მოძალადემ სახეში ისეთი ძალით გაარტყა, ვიფიქრე, რომ ლოყა გაუსკდებოდა, მაგრამ შევცდი, სისხლი ტუჩებიდან წამოუვიდა. კაცმა გვიან შემნიშნა, ფეხზე წამოდგა და სახეზე დამაკვირდა.

მაღალი იყო, მსუქანი. არ ვიცი, იქნებ ზღვიდან მოდიოდა ეს სუნი, მაგრამ მომეჩვენა, რომ მზეზე დაგდებული თევზივით ყარდა.

- უკან რომ მისდევდით, უნდა მიმხვდარიყავით, რომ მსგავს სცენას წააწყდებოდით...

- სიმართლე გითხრათ, რაინდის რო­ლი არასოდეს მითამაშია. როცა წლე­ბის განმავლობაში კაბინეტში ზიხარ, საქმიან შეხვედრებს მართავ, საბუთებზე ხელს აწერ და ერთადერთი, რაც გაწუხებს, სიცხეში ყელთან განასკვული ჰალსტუხია, აუცილებლად დაიბნევი, თუ სანაპიროზე საომრად შემართული, აყროლებული მამაკაცის პირისპირ მოგიწევს დგომა.

არ შემშინებია, უბრალოდ, ვერ მივხვდი, როგორ უნდა მოვქცეულიყავი. ამასობაში ქალი ფეხზე წამოდგა, მამაკაცს შეშინებულმა შეხედა და გაქცევა აღარც უცდია, ჩემს ზურგს უკან აიტუზა.

გოგონა 19-20 წლის იქნებოდა, თეთრი სახე და მოწითალო, გრძელი, ხვეული თმა ჰქონდა. მეძავივით ეცვა, მაგრამ გულუბრყვილოდ აცეცებდა თვალებს და მთელი ტანით კანკალებდა. ეტყობოდა, ფულის შოვნის იოლი გზისთვის ადრეული ასაკიდან მიეგნო, მაგრამ იმ დღეს არასასურველი პარტნიორისგან გაქცევა არ გამოუვიდა.

- აქედან მოშორდი, - ხანმოკლე სიჩუმე დაარღვია მამაკაცმა და თვალები დამიბრიალა. ერთი ნაბიჯი ჩემკენ გადმოდგა, ქალს მკლავში სწვდა და მოქაჩა. ერთი ძველი ანდაზაა, ხმალს თუ ქარქაშიდან ამოიღებ, უნდა იხმარო კიდეცო. მეც სხვა გზა არ მქონდა, ვხვდებოდი, ეს კაცი ორი მოქნევით ბეჭებზე გამაკრავდა, მაგრამ მუშტი პირდაპირ თვალებს შუა მოვარტყი.

დაჭრილი ცხოველივით დაიბღავლა და ისეთი დამარტყა, ინერციით დავტრიალდი, ჩემს ჟღალთმიანს დავეჯახე და ქვიშაზე დავეცი. ის ცხოველი, ალბათ, დასატორავად ისევ მომადგებოდა, მაგრამ ზაზამ გადამარჩინა.

ბარიდან გამოსულს უკან გამომყოლია და საჭირო დროს მიპოვა. ზაზა ძველი მოკრივეა. ძირითადად, გერმანიაში მოღვაწეობდა და 48 შეხვედრიდან 25 ნოკაუტით ჰქონდა მოგებული. გოგონა გაუპატიურებას გადავარჩინე და ზაზას მუშტები დედის რძესავით შეერგო უცხოელს.

ეს კაცი სანაპიროზე დავტოვეთ. მეორე დილით, ალბათ, რომელიმე დამსვენებელი იპოვიდა ნეკნებდამტვრეულს და საავადმყოფოში გადაიყვანდნენ. არ ვიცი, იქნებ ვინმემ თქვას, კარგი საქმე ვერ გაგიკეთებიათ, ქვეყანამ ერთი ტურისტი დაკარგა და ეს ცუდი მაგალითი იქნება სხვა უცხოელი დამსვენებლებისთვის, ის ჟღალთმიანი კი მაინც ვერ იპოვის სწორ გზასო, მაგრამ ისეთი განცდა მაქვს, რომ კაბინეტში მრავალწლიანი მუშაობით ბევრი ისეთი კარგი საქმე არ გამიკეთებია, როგორიც იმ ღამეს ერთი ახალგაზრდა ქალის დახმარება იყო.