რატომ თქვა უარი ნანუკა ჟორჟოლიანმა იერუსალიმში ჯვრისწერაზე
ტელესახე ნანუკა ჟორჟოლიანი უკვე დიდიხანია აპირებს, საპატარძლო კაბა ჩაიცვას და ერეკლე კოდუას გვერდით საკურთხეველთან დადგეს, მაგრამ ყოველთვის რაღაც უშლიდა ხელს. ამჯერად მტკიცედ აქვს გადაწყვეტილი ჯვრისწერა, სამზადისიც დაიწყო და დიეტაზეც დაჯდა. ბოლო პერიოდში სახის კანს განსაკუთრებული ყურადღება მიაქცია. პირდაპირ ეთერში მეზოთერაპიაც გაიკეთა. არ მალავს, რომ ზედმეტი წონის მოსაშორებლად ლიპოსაქციას მიმართა, ნაოჭების წინააღმდეგ კი – ბოტოქსს. მის სასახელოდ უნდა ითქვას, რომ საკმაოდ თვითკრიტიკულია და თუკი რაიმე არ მოსწონს თავის გარეგნობაში, ამის სუბიექტური და ობიექტური მიზეზებიც კარგად იცის.
– ნანუკა, იცავთ თუ არა ჯანსაღი ცხოვრების წესს?
– ვერ ვიტყვი, რომ ჯანსაღი ცხოვრების წესს ვიცავ. სუფთა ჰაერზე ყოფნა, სწორი კვება... ეს ჩემი სტილი არაა. მძიმე რეჟიმი მაქვს. სულ სამონტაჟოში ვარ ან კომპიუტერთან, გვიან ვიძინებ და ა.შ. სამაგიეროდ დღეში აუცილებლად ორი ლიტრი წყალი უნდა დავლიო, გახდომისთვის მჭირდება. ამ ბოლო დროს ხშირად ვარ დიეტაზე.
– თქვენთვის როგორი დიეტაა უფრო ეფექტური?
– უგულავას დიეტით ახლა 9 კილო დავიკელი. წყალბურთელების დიეტა, რომელიც დიდი რაოდენობით კვერცხს შეიცავს, ჩემთვის ასევე ძალიან ეფექტურია. ამას როსტოს დიეტას ვუწოდებ. ადრე, როცა "რუსთავი 2"–ში პირველად დავიწყე მუშაობა, ჩვენი ხელმძღვანელი დათო დვალი ცილების დიეტას იცავდა და მთელი "რუსთავი 2" ამ დიეტაზე იყო. სასადილოში სოსისი და ყველი არ რჩებოდა, ერთმანეთს ვასწრებდით. "იმედში" საბას გაჩენის შემდეგ მივედი. მაყურებელი ხედავდა, რომ იმ დროს ხან ვიკლებდი, ხან – ვიმატებდი. ახლა ცხოვრების ის პერიოდი დამეწყო, როცა ჩემს წონას უნდა დავუბრუნდე. მალე ჯვარი უნდა დავიწერო, ამიტომ ჩემი ამოცანაა, სწრაფად დავიკლო.
– ჯვრისწერისთვის ყოველმხრივ ემზადებით – წონის, გარეგნობის, ჩაცმულობის გათვალისწინებით?
– კაბა იქნება სადა, მოკრძალებული და აუცილებლად რომელიმე ქართველ დიზაინერთან შეკერილი, რადგან მიყვარს ისინი. მინდოდა, იერუსალიმში დამეწერა ჯვარი, მაგრამ მოძღვარმა მითხრა, რომ ამით სერიოზული ჯვრის ტარება მომიწევდა. თურმე წმინდა მიწაზე ჯვრისწერა ბევრად მეტ ტვირთს ნიშნავს. კიდევ ჯვრის ტარება და გამოცდის ჩაბარება მინდა?! ამიტომ, ვფიქრობ, საქართველოში მოკრძალებულად დავიწერო ჯვარი.
– რა წონამდე გინდათ ჩამოსვლა?
– 60–62 კილომდე. რამდენი დამრჩა, ამას ვერ გეტყვით... თუ გავითვალისწინებთ იმას, რომ სამშობიაროდან 103 კილო გამოვედი, ე.ი. ძალიან ბევრი დავიკელი.
– ალბათ ძალიან რთული იყო ორსულობის შემდეგ ფორმაში ჩადგომა.
– საერთოდ ძალიან რთული ორსულობა მქონდა. ფეხმძიმობის პირველი პერიოდი 2008 წლის აგვისტოს ომს დაემთხვა. მაშინ "რუსთავი 2"–ის კორესპონდენტი გახლდით და იცით, სადაც ვიყავი. მთელი ორსულობის განმავლობაში მძიმე ნერვული ფონი მქონდა. 7 თვის რომ გავხდი, ყოველდღე მივდიოდი ექიმ ზაზა სინაურიძესთან და ვეუბნებოდი, გამჭერით–მეთქი. რას აღარ მატყუებდნენ, რომ ეს არ გაეკეთებინათ. ყველაზე რთული ტოქსიკოზი – ტოქსოდერმო მჭირდა. ალერგიული ქავილი ჭკუიდან მშლიდა! ამან გამოიწვია ჩემი შეშუპება. ორსულობის შემდგომი პერიოდიც მძიმე მქონდა. ძალიან მინდა, კიდევ ერთ შვილი გავაჩინო, მაგრამ ის ამბები რომ მახსენდება, უარს ვამბობ.
ორსულობის შემდეგი 3 წელი ფორმაში ჩადგომა ვერ შევძელი, არადა სულ დიეტაზე ვიყავი. მასაჟებზეც ვიარე, ენდოკრინოლოგთანაც ვიყავი და აღმოჩნდა, რომ სრულიად ჯანმრთელი ვარ. საბოლოოდ დღეს უკვე შედეგი მაქვს, მაგრამ ისეთ ფორმაში მაინც არ ვარ, როგორიც საბას გაჩენამდე ვიყავი – 58 კილო. გენეტიკურად ყველა დიდია ჩემ გარშემო. შესაბამისად რთულია ჩემთვის იმ შედეგის მიღება, რასაც სხვა ადვილად აღწევს.
– თქვენი აზრით, ქალისთვის წონა ასე მნიშვნელოვანია?
– ვფიქრობ, რომ ქალის ბედნიერება წონაზეც არის დამოკიდებული. სხვა სტიმული გაქვს, როცა ფორმაში ხარ, ასაკიც გაკლდება, ჯანმრთელობა რეგულირდება და ა.შ. კულტურაა, რომ თავს მოუარო.
– სახლში როგორ გამოიყურებით ხოლმე?
– თუ სახლიდან არ გავდივარ, მაცვია პიჟამა, ხალათი და ჩუსტები, მაგრამ ეს წელიწადში ერთხელ ხდება.
– ჩაცმულობაში ფერებს აქცევთ ყურადღებას?
– თუ შავი მაცვია, ნიშნავს, რომ მინდა, გამხდარი ვჩანდე. ადრე ბევრი მკვეთრი ფერი მიყვარდა. ახლა სადა და დამჯდარ ფერებს ვანიჭებ უპირატესობას. მიხდება ყვითელი, მაგრამ არ მიყვარს. მომწონს შავისა და თეთრის კომბინაცია და ყველანაირი პასტელური ფერი.
– მაკიაჟში როგორ ფერებს იყენებთ?
– ბოლო დროს მაყურებელიც შენიშნავდა, მაკიაჟში იასამნისფერი ტონები მომწონს. ტუჩზე ნაკლებად ვაკეთებ აქცენტს.
– ხშირად აკრიტიკებენ თქვენს ჩაცმულობას და სწორედ ფერების შეხამებას. რა რეაქცია გაქვთ ამაზე?
– მე არ ვარ დიზაინერი, რომელიც სხვას მოსავს. ამიტომ კრიტიკა ჩაცმასთან დაკავშირებით ჩემთვის ნაკლებად მტკივნეულია. ამბობენ, რომ გაურკვეველი სტილი მაქვს, ფერებს ცუდად ვუხამებ. ცუდი სიტყვაა გოიმობა, მაგრამ ახლა გამოვიყენებ – არ გამიგია, ვინმეს ეთქვას, ნანუკა გოიმურად იცვამსო. თუ იტყვიან, არც ეს იქნება პრობლემა. მაღელვებს ის, როცა მეტყველების გამო მაკრიტიკებენ. ჟურნალისტი კარგად უნდა მეტყველებდეს.
გადაცემაში რაც მაცვია, ჩემი გარდერობიდანაა, სამსახური არ ყიდულობს ჩემთვის და ამიტომ ქუჩაშიც მაცვია. ვიცი, რომ ჩემი ჩაცმულობა თინეიჯერებს მოსწონთ. ჩემს რამდენიმე სამოსს ეკა ხოფერიას სტილი დავარქვი. მას ძალიან აკადემიური, მოწესრიგებული სტილი აქვს, რომელიც მომწონს, მაგრამ ვერ ვირგებ. მეგობარი დიზაინერები სულ მეუბნებიან, რომ ასეთი სამოსი მიხდება. მათ ვპასუხობ, რომ, თუ ოდესმე პოლიტიკურ ტოქ შოუს წავიყვან, მაშინ ჩავიცვამ ამგვარად. ჩემს შოუში თავს უფლებას ვაძლევ, მეცვას ის, რაც მიყვარს. მომწონს ბასა ფოცხიშვილის და ნინო დარასელის ჩაცმულობა. მათი გარდერობიდან ყველაფერს წამოვიღებდი.
– ჩაცმის მხრივ, თქვენს რომელ ექსპერიმენტს მიიჩნევთ წარუმატებლად?
– ერთ გადაცემაში ზოლებიანი, ძალიან მოკლე კაბა მეცვა. ანჯელინა ჯოლივით მოკლე კაბით სიარული გადავწყვიტე. სრული "მარაზმი" იყო!
– ოჯახის წევრებისგან ვის აზრს ითვალისწინებთ გარეგნობასთან დაკავშირებით?
– ჩემს მეუღლეს მოსწონს, როცა აკადემიურად და კლასიკურად მაცვია. მე და ჩემიშვილი, მარიამი, უფრო ვუზიარებთ რჩევებს და აზრებს ერთმანეთს იმიტომ, რომ ერთი გარდერობი გვაქვს.
– ვარცხნილობას ხშირად იცვლით თმის ფორმას დიდ ყურადღებას აქცევთ?
– ვთვლი, რომ ვარცხნილობა ცალკე ჩაცმულობაა. კარგი ვარცხნილობის შემთხვევაში ქალი სადა კაბაშიც კი მიმზიდველია. ეს იგივეა, რაც კარგი ჩანთა და ფეხსაცმელი. როგორ გგონიათ, პროექტ "ცეკვავენ ვარსკვლავების" ჟიურიში როცა ვიყავი და ჩემს ვარცხნილობაზე ამბები ატყდა, განა არ ვიცოდი, ასე რომ მოხდებოდა?! ზუსტად ვიცი, პიარი როგორ კეთდება. წარმოიდგინეთ, ჟიურის წევრებიდან ერთი ჰოლივუდის ვარსკვლავი იყო, მეორე – პრიმაბალერინა... მე კი ერთი ჩვეულებრივი შოუს წამყვანი გახლდით. ისინი უნდა გადამეფარა. მეორე დღეს ყველა ჩემს ვარცხნილობაზე ლაპარაკობდა.
დიდი ხანია თმის ფერი არ შემიცვლია და ვფიქრობ, ხომ არ გადავიღებო.
– გარეგნობაში ექსპერიმენტების ჩატარება გიყვართ?
– ვგიჟდები! ბოლოს და ბოლოს კამერის წინ გავიკეთე მეზოთერაპია, თუმცა არ მიყვარს ექსპერიმენტების ჩატარება პლასტიკური ოპერაციებით. თუ არ ჩავთვლით იმას, რომ წონის კორექციისთვის ლიპოსაქცია გავიკეთე და შუბლზე – ბოტოქსი. მიფიქრია, რომ ცოტა დიდი ცხვირი მაქვს, მაგრამ რა ფორმის მინდა მქონდეს, ეს აღარ ვიცი. არც ტუჩებს დავიბერავდი.
– მეზოთერაპიამდე როგორ უვლიდით კანს?
– მხოლოდ სახის საცხებს ვიყენებდი. გარუჯვა მიყვარს, რაც კანს საოცრად აშრობს, ამიტომ დამატენიანებელს აუცილებლად ვიყენებ.
– რა დროს ატარებთ სარკის წინ?
– ძალიან ცოტას. მხოლოდ სახლიდან გასვლის წინ და მაკიაჟის კეთების დროს ვიხედები სარკეში.
– და ვინ გიყურებთ სარკიდან?
– ძლიერი, ჯიუტი, ბევრი ნაკლის მქონე, მაგრამ ერთი "ჯიგარი" გოგო მიყურებს.
მანანა ნოდია
