მაია ილურიძე და უილიამ პრატი _ ქართველი ბალერინასა და ინგლისელი ბალერონის სიყვარულის ამბავი

თბილისის ოპერისა და ბალეტის თეატრის დასის წევრები, მაია ილურიძე და უილიამ პრატი, ცოლ–ქმრის უღელს რამდენიმე თვის წინ შეეჭიდნენ. ინგლისელი უილიამი უკვე 5 წელია, რაც საქართველოში ცხოვრობს. ქართული ტრადიციებით, ურთიერთობებით მოხიბლულია და მალე შეიძლება მართლმადიდებლადაც მოინათლოს. ცოლ–ქმარს ერთმანეთის პარტნიორობა უწევთ, თუმცა უილიამს ურჩევნია, სცენაზე მეუღლესთან ერთად არ იდგეს. თუ რატომ, ეს ინტერვიუში აგვიხსნა კიდეც. მაიამ, ქმრის ხათრით, შქმერულის მომზადება ისწავლა და უილიამს ანებივრებს. თვითონ კი ინგლისურ ტრადიციას – საღამოს რძიან ჩაის – ვერაფრით შეეგუა.

– მაია, როგორ აღმოჩნდა უილიამი საქართველოში და თქვენ გვერდით?

მაია: ჩემი მეუღლე დიდი ბრიტანეთის მოქალაქეა. 5 წელია ჩვენს დასში ცეკვავს. ინგლისში დაიბადა, 15 წლის იყო, მისი მშობლები ახალ ზელანდიაში რომ გადავიდნენ და საბალეტო სკოლა იქ დაამთავრა. სამსახურს ეძებდა და ამ დროს გაიგო, რომ საქართველოში დასის წევრების აყვანა სურდათ. თავისი მონაცემები გამოაგზავნა და ასე აღმოჩნდა აქ.
– როგორც წესი, კარიერის გასაკეთებლად საქართველოდან უცხოეთში მიდიან, უილიამი აქეთ რატომ წამოვიდა?
მაია: მისთვის ეს საინტერესო მოგზაურობა იყო, ამავდროულად ნინო ანანიაშვილის ქვეყნის გაცნობის სურვილი ჰქონდა. ვილი პირველი უცხოელი ბალერონი იყო, ვინც საქართველოში ჩამოვიდა. დღეს უკვე ბევრი უცხოელი გვყავს დასში.
– დანახვისთანავე მოგეწონათ?
მაია: თავიდან – არა. უბრალოდ ერთად ვმუშაობდით. გათხოვილი ვიყავი, მერე სხვადასხვა პრობლემის გამო ოჯახი დამენგრა. ვილი რომ ჩამოვიდა, მაშინ ბავშვს ველოდებოდი.
– უილიამიც ხომ არ იყო თქვენი ოჯახის დანგრევის ერთ–ერთი მიზეზი?
მაია: არა, ოჯახის დანგრევის მერე დავუახლოვდით ერთმანეთს. ჩვენი მეგობრობა თანდათან გადაიზარდა გრძნობაში.
უილიამი: მივხვდით, რომ ერთმანეთი მოგვწონდა.

– მაია, სანამ ამ ნაბიჯს გადადგამდით, ალბათ ბევრი იფიქრეთ. მეორედ გათხოვება, თანაც უცხოელზე, ადვილი გადასაწყვეტი არ იქნებოდა.
მაია: მეგონა, არასდროს გავთხოვდებოდი, მაგრამ უილიამმა თავისი ყურადღებით ოჯახის შექმნის სურვილი კვლავ გამიჩინა. ყველაზე რთულ პერიოდში ის ჩემ გვერდით იდგა და მეხმარებოდა. მის მიმართ გრძნობა ამიტომაც გამიჩნდა.
– რა ბარიერების გადალახვა მოგიხდათ, სანამ ორი სხვადასხვა მენტალიტეტის მქონე ადამიანი საერთო ენას გამონახავდით?
მაია: როცა ჩვენი ურთიერთობა დაიწყო, ვილი უკვე 3 წლის ჩამოსული იყო საქართველოში, ჩვენი ქვეყნის ტრადიციებში კარგად ერკვეოდა.

უილიამი: ძალიან მომწონს ქართული ურთიერთობები ოჯახის, მეგობრების მიმართ. უფრო თბილი, მჭიდრო კავშირი გაქვთ ერთმანეთთან.
– ცოლ–ქმარს შორის ენის ბარიერი არ არის?
მაია: არა, თუმცა მიფიქრია, ნეტა, ქართული იცოდეს, ჩემს სათქმელს უკეთესად ვეტყოდი–მეთქი. ვილი სწავლობს ქართულს. ჩემს შვილს ქართულად ესაუბრება, ჩვენი ლაპარაკი ესმის, მაგრამ საინფორმაციო გამოშვებებს ჯერჯერობით ვერ უსმენს.
– უილიამ, ქართველი ქალის მოხიბვლა რთულია?
უილიამი: ერთადერთი სირთულე სხვადასხვა რელიგია აღმოჩნდა. არ მიცდია, მაიასთან ისეთი გამოვჩენილიყავი, როგორიც არ ვიყავი, არ მიპოზიორია.
– რელიგიასთან დაკავშირებით შეთანხმებას მიაღწიეთ?
მაია: კი. ის ანგლიკანური ეკლესიის წევრია და აპირებს, მართლმადიდებლად მოინათლოს. შემდეგ ჯვარს დავიწერთ. ოღონდ ვილის უნდა, ჯერ კარგად გაერკვეს ჩვენი რელიგიის მრწამსში და გადაწყვეტილება ისე მიიღოს.
– ბალეტი დიდ შრომას, ენერგიას, თვითშეწირვას მოითხოვს. ამ მხრივ, მეუღლეები ერთმანეთს ალბათ ადვილად უგებთ.
უილიამი: კარგია, როცა მეუღლეს ესმის, რატომ ხარ დაღლილი ან ცუდ ხასიათზე, მას შეუძლია გაგიგოს. თუმცა მირჩევნია, სცენაზე ცოლთან ერთად არ ვიდგე, რადგან რეპეტიციის დროს პარტნიორთან შელაპარაკება თუ მოგივა, მეორე დღეს დამშვიდებული წახვალ სამსახურში და მცირე კონფლიქტი ამით ამოიწურება. მაგრამ მეუღლესთან თუ მოგივა უთანხმოება, მერე სახლშიც გაგრძელდება, ამიტომაც რთულია ცოლ–ქმრის ერთად დგომა სცენაზე. თუმცა ამ დროს მეუღლის მიმართ შემწყნარებელიც ხდები, რაიმე შეცდომას ძალიან დიდ ყურადღებას აღარ აქცევ.

– ერთმანეთის პარტნიორებზე არასოდეს გიეჭვიანათ?
უილიამი: არასდროს, იმიტომ, რომ ეს ჩვენი პროფესიაა. შეიძლება მე და მაიამ რომეოს და ჯულიეტას როლები სხვადასხვა პარტნიორებთან შევასრულოთ, მაგრამ ეს პრობლემა არ არის. გამორიცხულია, ამ დროს იეჭვიანო.
მაია: არც სცენის მიღმა ვეჭვიანობთ. ერთმანეთს სრულიად ვენდობით.
– თქვენი რომანი რომ გამჟღავნდა, კოლეგებმა რა გითხრეს?
მაია: დადებითი რეაქციებიც იყო და უარყოფითიც. ჩვენზე ბევრი ჭორი გავიგე, მაგრამ ასეთ რაღაცეებს ყურადღება არ უნდა მიაქციო.
– ჭორებში რას გულისმობთ? ვინმეს არ სურდა თქვენი ერთად ყოფნა?
მაია: არა, უბრალოდ როგორც კი ჩვენი სიყვარული დაიწყო, ამის შესახებ ყველა ალაპარაკდა.
– ქართული ტრადიციული ქორწილი გქონდათ?
მაია: კი, ოღონდ ვიწრო წრეში გადავიხადეთ. ვილის მეჯვარე მისი ქართველი მეგობარი იყო.
– უილიამი ქართულ ტრადიციულ სუფრას – თამადას, ღვინოს ყანწით და ა.შ. როგორ უყურებს?

მაია: მისთვის უცხო აღარ არის ქართული ტრადიციები და მათ შორის – სუფრის კულტურა.
– ერთმანეთის მშობლები გაიცანით?
მაია: ჩემი ქმრის მშობლები შარშან გავიცანი. აქ იყვნენ ჩამოსული და ძალიან ადვილად დავუახლოვდი. ვილი და დედაჩემიც ძალიან კარგად უგებენ ერთმანეთს.
– საზღვარგარეთ ხომ არ აპირებთ წასვლას?
მაია: სამუდამოდ წასვლას არ ვგეგმავთ, მაგრამ ამ ზაფხულს გვინდა, ვილის მშობლებთან წავიდეთ ახალ ზელანდიაში.
– მაია, რომელი ქართული კერძი მოსწონს თქვენს ქმარს განსაკუთრებით?
მაია: ძალიან მოსწონს ქათამი შქმერულად, რომელსაც ხშირად – არა, მაგრამ ხანდახან ვაკეთებ.
უილიამი: მწვადი ძალიან მიყვარს, მაგრამ ხინკალი დიდად არ მომწონს, ძალიან ცხიმიანია.
– მაია, ვიცით, რომ ბალერინები მუდმივ და მკაცრ დიეტაზე არიან. შქმერულის და მწვადის დაგემოვნებას როგორ ახერხებთ?
მაია: მკაცრი დიეტა თავიდან გვჭირდებოდა. ახლა უკვე იმდენ ენერგიას ვხარჯავთ მთელი დღის განმავლობაში, რომ მის შესავსებად სწორედ კვებაა საჭირო. მაგრამ, რა თქმა უნდა, საღამოს საათებში, ძილის წინ, მძიმე საკვებს არასდროს ვიღებთ.
– იქნებ გაგვიმხილოთ ბალერინების დიეტა?
მაია: ყველა დიეტა ინდივიდუალურია. მე, მაგალითად, როცა მინდა, უცბათ დავიკლო, სამი დღე მხოლოდ სტაფილოს და კომბოსტოს შევექცევი. როგორც კი ჩვეულებრივ კვებას ვიწყებ, დაკლებულს მალევე ვიმატებ. ამიტომ მთავარია სწორი რეჟიმი – ცომეულსა და შაქარზე უარის თქმა. საღამოს საათებში კი კვებისგან თავი უნდა შეიკავოთ.
– უილიამის ხათრით, ბრიტანული სამზარეულო არ შეისწავლეთ?
მაია: სიმართლე გითხრათ, არა. არც ვილის აქვს სურვილი, რომ მათი ნაციონალური კერძებიდან რაიმე მოვამზადო. ერთადერთი, ჩვევად აქვს, საღამოს რძიანი ჩაი დალიოს. მეც შემომთავაზა, გამესინჯა, მაგრამ არ მომეწონა და ეს ინგლისური ტრადიცია ვერ მივიღე.
– ყურადღებიანი ქმარია, სიურპრიზებს გიწყობთ?
მაია: კი, უყვარს სიურპრიზების გაკეთება. ერთხელ ფანჯრიდან გადამახედა და მანქანაზე ჩვენთვის გაშლილი საუზმე დამანახა. ამ მხრივ, მე ნაკლებად ვაქტიურობ.
– თქვენი შვილი და ქმარი ერთმანეთს კარგად უგებენ?
მაია: ძალიან კარგად. ვილი ბავშვთან ბევრ დროს ატარებს, ხშირად სეირნობენ ერთად.
– ცნობილია, რა მძიმე შრომა დგას ბალეტის უკან. ოდესმე პროფესიის შეცვლაზე გიფიქრიათ?
მაია: არის შემთხვევები, როცა ყველა პროფესიის ადამიანი ფიქრობს, სხვა საქმით ხომ არ დაკავდეს, მაგრამ ჩვენს შემთხვევაში ასე არ არის. სახლში კი ვცდილობთ, ბალეტი დავივიწყოთ.
უილიამი: ბალეტის სიყვარული იმდენად გვაქვს სულში გამჯდარი, რომ ამაზე სერიოზულად არასდროს გვიფიქრია.
მანანა ნოდია