ეკა ჯამაგიძე თავისუფლებით ტკბება
სერიალ ''ჩემი ცოლის დაქალებში'' კატოს თანამშრომელი სალი ერთი ჩვეულებრივი ''სვეტსკი'' გოგოა, რომელიც ჩაცმა-დახურვასა და ჭორაობაზე გიჟდება. სალის როლის შემსრულებელი ეკა ჯამაგიძე ნამდვილად შესაშურ ფორმაშია და ალბათ ბევრი გაოცდება, როცა გაიგებს, რომ მისი უფროსი შვილი 20 წლისაა. ცოტა ხნის წინ ეკამ საცხოვრებელი შეიცვალა და ახლა ახალსახლობას ზეიმობს.
- დილის ძილი ძალიან მიყვარს, მაგრამ როცა სახლში ყველაფერი შენზეა დამოკიდებული, ამ ფუფუნებას იკლებ და წინა პლანზე სხვა რაღაცები გადმოდის. აქამდე მშობლებთან ერთად ვცხოვრობდი, მოგეხსენებათ, როცა დედა გვერდით გყავს, ყველაფრით განებივრებული ხარ, მაგრამ ცოტა ხნის წინ მე და ჩემი ქალიშვილი ცალკე გადმოვედით საცხოვრებლად და უკვე მე მიწევს დიასახლისობა. მიუხედავად იმისა, რომ ვიცი, დილაობით შვრიის ფაფის ჭამა სასარგებლოა ჯანმრთელობისთვის, კანისთვის, მაინც ვერ ვაკეთებ ამას და დილას ყავით ვიწყებ. ვერ გეტყვით, ეს გამოფხიზლებაში მეხმარება-მეთქი, რადგან ყოფილა შემთხვევა, ძილის წინ დამილევია ყავა და მშვენივრად დამიძინია, ალბათ უფრო ჩვევაა დილაობით ყავის დალევა, ვიდრე გამოსაფხიზლებელი საშუალება. სახლიდან გასვლის წინ ყველაფერი აუცილებლად მოწესრიგებული უნდა დავტოვო. სხვათა შორის, მეგობრები სულ მაგაზე დამცინიან, რა გაქვს ამდენი დასალაგებელი, მარტოები ხართ, სახლს როგორ ურევთო (იცინის). რა ვქნა, მიყვარს სისუფთავე და წესრიგი, ამიტომ მუდმივად ვცდილობ, სახლი მოწესრიგებული იყოს.
ზრუნვა საკუთარ თავზე
... თუ გადაღება ან განსაკუთრებული შეხვედრა არ მაქვს, შინიდან გასვლის წინ მაკიაჟს არასდროს ვიკეთებ, ვიღებ შხაპს, ვიცვამ, ყოველდღიურობაში თმასაც ჩემით ვიკეთებ და გავდივარ, ამისთვის სულ ნახევარი საათი მჭირდება. მოგეხსენებათ, ნამზეური ძალიან მიყვარს, ახლაც გარუჯული ვარ და მომწონს შეფერილი სხეული, ამ დროს ყველაფერი გიხდება. რაც შეეხება წონას, არაფერს ვაკეთებ ფორმის შესანარჩუნებლად, ჩემი სხეული ალბათ უფრო გენეტიკის დამსახურებაა. ექვსი წელი იქნება, არ მივარჯიშია, მაგრამ ფორმას არ ვკარგავ. თუმცა ამ ზამთარს ექვსი კილო მოვიმატე, რაც გასაოცარი იყო ჩემთვისაც კი, მაგრამ ნელ-ნელა ჩავდექი ფორმაში. უბრალოდ, კვება შევზღუდე, ეს იყო და ეს. ახლა ორი კილო მაქვს ზედმეტი და ამასაც მოვუვლი.
საყიდლებზე... 
... როცა შესაძლებლობა მაქვს, საზღვარგარეთ ვყიდულობ საჭირო ნივთებს, მაგრამ თუ არ მიწევს წასვლა, ქართულ ბაზარს ვჯერდები. მაღაზიებში მარტო სიარული საშინლად არ მიყვარს, ძალიან ძნელად ვიღებ გადაწყვეტილებას, ვიყიდო თუ არა კონკრეტული ნივთი. როცა რამე მომეწონება, ვინმეს რჩევა მჭირდება, უნდა მითხრას, რომ ძალიან კარგია და მერე ვიყიდი. შემიძლია, ბოლო კაპიკებიც გადავიხადო სასურველ ნივთში, თუ ის ძალიან მომეწონა.
დიასახლისი ახალ ბინაში…
... ადრეც ვცხოვრობდი მარტო და ვიცი, რამდენი რამაა გასაკეთებელი ოჯახში. ბინის ყიდვა და გაფორმება იმხელა პროცედურებთან ყოფილა დაკავშირებული, რომ გავოცდი, მარტომ გავართვი ამ ყველაფერს თავი და კმაყოფილი ვარ. მთავარი მონდომებაა, თორემ ადამიანი ყველაფერს შეძლებს. ახლა, შეიძლება ითქვას, ახალსახლობას ვზეიმობ. თუ საქმე არ მაქვს, გარეთ არ გავდივარ, მიხარია შინ ყოფნა, თავს კარგად ვგრძნობ. როცა ცუდ ხასიათზე ვარ, მაშინაც მიყვარს შინ ჯდომა და მუსიკის მოსმენა, თუმცა ხანდახან ასეთ მომენტში ქუჩაშიც გავდივარ განსატვირთად. აქამდე სხვა ინტერესები მქონდა, ახლა უკვე საოჯახო ნივთებზე დავიწყე ყურადღების გამახვილება და მომწონს, როცა რაღაც ახალს ვიძენ. რაც შეეხება დიასახლისობას, ძალიან მაგარ სალათებს ვაკეთებ, მეგობრებს ჩემი მომზადებული ყველა კერძი მოსწონთ, განსაკუთრებით უყვართ ჩემი გამომცხავრი მჭადი, არც სოდას ვუმატებ, არც მარილს, უბრალოდ ძალიან კარგ, ზესტაფონიდან ჩამოტანილ ფქვილს ვყიდულობ და უგემრიელესი გამოდის. საოჯახო საქმეებიდან ყველაზე მეტად უთოობა არ მიყვარს, სარეცხს რომ ვრეცხავ, მანამ არ ვაუთოებ, სანამ არ მჭირდება. ამას ვინც წაიკითხავს, შეიძლება დამცინოს, მაგრამ ასეა და რა ვქნა. ზაფხულში განსაკუთრებით მძიმეა უთოსთან ურთიერთობა. 
შვილები
... ჩემი შვილი ანა 15 წლის გახდა 3 ივნისს, დაბადების დღე ერთ-ერთ ლაუნჯბარში გადაიხადა, სადაც 40 ბავშვი ჰყავდა დაპატიჟებული და მინდა გითხრათ, რომ გამაგიჟეს, სულ სხვანაირი თაობა მოდის. მეცხრე კლასშია, კარგად სწავლობს, ამ თემაზე ზედმეტი ლაპარაკი არ გვჭირდება, თუმცა კლასგარეშე წიგნების კითხვა ეზარება. სკოლაში რომ მივდივარ და მასწავლებლები აქებენ, ერთიორად ვმაღლდები. მე და ანას მეგობრული ურთიერთობა გვაქვს, მარტო იმაზე ვსაყვედურობ, რომ უყურადღებოა და არ უფრთხილდება ჩემს დალაგებულს (იცინის). 
რაც შეეხება გასართობად წასვლას, რასაკვირველია, მეგობრებთან ვუშვებ, მაგრამ იცის, რომ 10 საათზე სახლში უნდა იყოს და ამას არ აპროტესტებს. კლუბებში სიარული დიდად არ იზიდავს და ამიტომ ამ თემაზე არ ვკამათობთ. თუ მაინცდამაინც სადმე უნდა წასვლა, მეც მივყვები. დაბადების დღეებზე და დაქალებთან წასვლაზე, რასაკვირველია, პრობლემა არ აქვს. ჯერ პატარაა, კარგი ბავშვია და არ მინდა, რამე გაუთვალისწინებელი მოხდეს, ამიტომ ყველანაირად ვიცავ ჩემს შვილს. ვიღაცას შეიძლება აზიატი ვეგონო, მაგრამ რა ვქნა, ასეთი ვარ. მოგეხსენებათ, დაკავებული ვარ, ამიტომ ანას ხშირად უწევს მარტო ყოფნა და ამას საერთოდ არ აპროტესტებს, მარტოც კარგად გრძნობს თავს. უნდა ვთქვა, რომ ჩამოყალიბებული, დამოუკიდებელი ბავშვია. რაც შეეხება ჩემს უფროს შვილს, 20 წლის გიორგის, ის მოსკოვში ცხოვრობს და სწავლობს, ცოტა ხნის წინ ვიყავი მასთან ჩასული და თავისი უკრაინელი შეყვარებული გამაცნო. სიმართლე გითხრათ, არ მომეწონა, ჩემი შვილი სჯობს. 
- ''ქართული'' დამოკიდებულება გაგჩენია ამ საკითხის მიმართ, ქართველი დედების უმეტესობას რომ აქვს, ისეთი...
- ასეა, რომ გავიცანი, ვუთხარი კიდეც, იმხელა უკრაინაში მასზე ლამაზი ვერავინ ნახე-მეთქი (იცინის). რატომ, ცუდი გოგოაო? - გაუკვირდა. ცუდი არ არის, მაგრამ შენ ჯობიხარ-მეთქი, პირდაპირ ვუთხარი. მე ჩემი სათქმელი და აზრი გავუზიარე და თვითონ როგორც საჭიროდ ჩათვლის, ისე უნდა მოიქცეს, ვინც ჩემს შვილს ეყვარება, იმას მივიღებ, როგორიც უნდა იყოს.
''ჩემი ცოლის დაქალები''
... მართალია, ბოლო რამდენიმე სერიაში ჩვენი ოფისი არ ჩანს, რადგან სცენარმა ასე მოითხოვა, მაგრამ დავბრუნდებით ისევ ეკრანზე... ჩემი გმირი ჩემგან რადიკალურად განსხვავებულია, მაგრამ იქიდან გამომდინარე, რომ სალისნაირი ''სვეტსკი'' გოგონები მრავლადაა ჩვენ გარშემო, ამ პერსონაჟის შექმნა არ გამჭირვებია. ადრე ''თიბისი'' სტუდიაშიც ვმუშაობდი, მაგრამ ძალიან გადატვირთული გრაფიკი მქონდა და წამოვედი, გადაწყვეტილება სერიალის სასარგებლოდ მივიღე, აქ ჩემს საქმეს ვაკეთებ, ჩემს პროფესიას ვემსახურები.
გართობა და თავისუფალი დრო
... უდროობაზე ვერ დავიწუწუნებ, საკმაოდ ბევრი თავისუფალი დრო მრჩება, მაგრამ სახლში ყოფნა იმდენად მსიამოვნებს, რომ არსად გასვლა არ მინდა. თუმცა კვირაში ერთხელ გოგონები სადმე გასართობად გავდივართ. რაც შეეხება პოპულარობას, ნამდვილად ვერ ვიტყვი, რომ ამის გამო ქუჩაში ვერ გავდივარ და ყურადღებით მაწუხებენ-მეთქი.
რაც შეეხება თაყვანისმცემლებს, ვცდილობ, უცნობ ადამიანებთან ''ფეისბუქითაც'' არ მქონდეს ურთიერთობა და მეგობრებშიც არ ვიმატებ იმას, ვისაც არ ვიცნობ. არადა, დაახლოებით 3000 ადამიანი მთხოვს მეგობრობას. თავისუფლად ძალიან კარგად ვგრძნობ თავს, მიჩვევა იცის თავისუფლებამ. სხვათა შორის, ოჯახის შექმნა ამ ეტაპზე არ მინდა, თავს არაჩვეულებრივად ვგრძნობ, ახალგაზრდა ვარ და ვტკბები თავისუფლებით. ჯერჯერობით არ არსებობს ჩემს ცხოვრებაში კაცი, რომლითაც დავინტერესდები. როგორც ყველას, ალბათ ბოლოს მეც გამიჩნდება ოჯახის შექმნის სურვილი და მერე ვნახოთ, რა იქნება (იღიმის).
ციცი ომანიძე
ჟურნალი ''რეიტინგი''
