რატომ დაარტყეს ერთმანეთს ნიკა გრიგოლიამ და მიშა ანდღულაძემ

ბოლო დროს "კომედი ჯგუფის" გარშემო სკანდალი არ წყდება. ყოფილი თანამშრომლები – იუმორისტები – ერთმანეთის მიყოლებით ალაპარაკდნენ იმ დაპირისპირებაზე, რაც ჯგუფის შიგნით არსებობდა და რამაც, ერთი შეხედვით, მეგობრული და შეკრული გუნდი დაშალა. ცოტა ხნის წინ "სარკეში" პაროდისტი გიორგი აფციაური ყვებოდა იმ მიზეზებზე, რამაც მასა და ვანო ჯავახიშვილს შორის ბზარი გააჩინა. ამჯერად კი იუმორისტებს შორის დაპირისპირებაზე ნიკა გრიგოლია გვესაუბრება, რომელსაც აფციაურამდე გაცილებით ადრე დაატოვებინეს "კომედი შოუ". "გული მწყდება, რომ იმ გადაცემებში არ ვარ, სადაც ამდენი ხანი ვმუშაობდი და მისთვის ბევრი რამ გავაკეთე", – გვითხრა ნიკამ.
ნიკა გრიგოლია პირველად 2011 წელს დაითხოვეს სამსახურიდან უდისციპლინობის მიზეზით, მაგრამ ტელეკომპანიის მაშინდელი დირექტორის, გოგი გეგეშიძის სურვილით, დააბრუნეს. ოქტომბრის არჩევნების შემდეგ ნიკა მეორედ აღმოჩნდა "ბორტგაღმა". ამ თემაზე ის პრესასთან არ საუბრობდა, "სარკესთან" პირველად დაარღვია დუმილი და იმ პრობლემებზე ალაპარაკდა, რაც "კომედი შოუში" არსებობს.
– ნიკა, ყოველთვის თავს არიდებდით სამსახურიდან წამოსვლის მიზეზებზე საუბარს. ახლა მაინც თუ შეგიძლიათ გვითხრათ, რა მოხდა სინამდვილეში?
– ჯგუფის რაღაც ნაწილი ერთმანეთს ბევრ რაღაცაში არ ვეთანხმებოდით. "კომედი ჯგუფიდან" პირველად 2011 წელს გამომიშვეს, მაგრამ ტელევიზიის მაშინდელმა დირექტორმა გოგი გეგეშიძემ დამაბრუნა. მაშინ ჩემმა მეგობრებმა გათავისუფლების მიზეზად უდისციპლინობა დაასახელეს.
– რითი გამოიხატებოდა თქვენი უდისციპლინობა?
– ალბათ ისინი სამსახურში დაგვიანებას გულისხმობდნენ. რეალურად მართლა ვაგვიანებდი, მაგრამ ასე არამარტო მე ვიქცეოდი. როცა ხედავ, შენი მეგობრის დაგვიანებას გამართლება აქვს, შენსას – არა, საწყენია. ამის გამო ჯარიმას, სანქციას ვიხდიდი. მეუბნებოდნენ, ბიძაშენი თემური, რომელიც ზესტაფონიდან ჩამოვიდა, საავადმყოფოში შენ კი არ უნდა მიიყვანო, შენმა ძმამ წაიყვანოს ან ტაქსით გაუშვიო. როცა ვეტყოდი, რომ ბავშვი ექიმთან მიმყავდა და დამაგვიანდებოდა, მეუბნებოდნენ, ამ კვირაში მეოთხედ მიგყავს ექიმთან, ამიტომ ცოლ–შვილი ტაქსით ატარეო. ასეთ დამოკიდებულებას ვერ ვიგებდი. უკმაყოფილება ძირითადად ასეთი რაღაცების გამო ხდებოდა და არა იმიტომ, რომ საქმეს ვერ ვაკეთებდი ან ცუდი ხარისხის ხუმრობას ვწერდი.
– ვინ მიიღო თქვენი გათავისუფლების გადაწყვეტილება?
– რამდენიმე ადამიანმა... ალეკო მალხაზიშვილი დირექტორია, ვანო ჯავახიშვილიც ერთ–ერთი მათგანია, ვინც გადაწყვეტილებებს იღებს. დასაწყისში მეც ამ გუნდში ვიყავი.
– რა ხდება ასეთი შიგნით, რომ თავიდან დათო გოგიჩაიშვილი წავიდა, მერე – თემო მჟავია, ამიკო ჩოხარაძე, ლევან გოგორელიანი. რამდენიმე ხნის წინ – გიორგი აფციაური...
– როცა დათო თავის გუნდთან ერთად ცალკე წავიდა, მე რიგითი თანამშრომელი ვიყავი, მაგრამ მისი ხელმძღვანელობით კმაყოფილი გახლდით. ის ჩემი მეგობარი არასოდეს ყოფილა, მაგრამ ხუმრობით სულ ვამბობ, რომ მას "კომედი ჯგუფისგან" ძეგლი თუ არა, მოკრძალებული ბიუსტი მაინც ეკუთვნის. დღევანდელი მუშაობის პრინციპი მისი აწყობილია. მას შემდეგ სისტემა არ შეცვლილა, უბრალოდ მოთხოვნები გავამკაცრეთ. დათო გოგიჩაიშვილს ჩემთვის შენიშვნები მოუცია, თუნდაც დაგვიანებასთან დაკავშირებით, მაგრამ იმასაც აფასებდა, რომ საქმეს კარგად ვაკეთებდი. ჩემს მეგობრებთან, რომლებმაც სამსახურიდან გამომიშვეს, სულ ეს არგუმენტი მომყავდა, რომ ჩემს საქმეს ყოველთვის კარგად ვასრულებდი. არავის ვეჯიბრებოდი, მაგრამ ყოფილა შემთხვევა, სამსახურში დაგვიანებით მივსულვარ და იმაზე მეტი გამიკეთებია, ვინც იქ დილიდან ღამემდე მჯდარა. როცა ჩვენ შორის მეგობრული ურთიერთობის რღვევა დაიწყო, ეს ყველაფერზე აისახა.
– დათო გოგიჩაიშვილის გუნდს რატომ არ გაჰყევით, როცა ის "რუსთავი 2"–დან წავიდა?
– ამისთვის ერთადერთი მიზეზი მქონდა – ალეკო მალხაზიშვილი ჩემი მეგობარი იყო. ამის გამო თავს ვალდებულად ვთვლიდი, მასთან დავრჩენილიყავი. შემომთავაზეს, რომ მათთან ერთად წავსულიყავი და ამ საუბარს ვანო ჯავახიშვილიც ესწრებოდა, მაგრამ ერთ მხარეს ჩემი მეგობრები იყვნენ და მეორე მხარეს – ისინი. ავუხსენი, რომ მეგობრებთან ერთად მინდოდა დარჩენა.
– გავიდა დრო და სწორედ ალეკო მალხაზიშვილმა გაგათავისუფლათ.
– ადამიანები შეიცვალნენ, ცოტა სხვანაირები გახდნენ, სხვანაირ შენიშვნებს იძლეოდნენ, სხვანაირი ხედვა ჩამოუყალიბდათ. ისეთები აღარ იყვნენ, როგორებიც გავიცანი. მე, პირადად, მეგობრების მიმართ ფანატიკური დამოკიდებულება მაქვს. ჩემს ცხოვრებაში საქმეს ძალიან დიდი ადგილი უკავია, მაგრამ მას მეგობრობაზე წინ ვერ დავაყენებ.
ბევრი რთული პერიოდი მქონია. იყო დრო, როცა სახლი არ მქონდა. ვანო ჭელიძემ, რომელიც ახლა დათო გოგიჩაიშვილის გუნდთან ერთადაა, თავის სახლში წამიყვანა, სადაც ცოლთან და შვილთან ერთად ცხოვრობდა. მითხრა, ერთ ოთახს გავათავისუფლებ და აქ დაიძინეო. ასეთ რაღაცებს ვერ დავივიწყებ, მაგრამ იმის გამო, რომ თავის დროზე ალეკომ ჩემში დაინახა საქმის კეთების პოტენციალი, გვერდით დამიყენა და ბევრი რამ მასწავლა, მისი ერთგული დავრჩი. მაშინ "რუსთავი 2"–ზე დაახლოებით ათი ადამიანი დავრჩით. ჩვენ სხვა სახეების მოძებნა დავიწყეთ და ვიპოვეთ კიდეც.
– ამბობენ, პირველად რომ გაგათავისუფლეს, მაშინდელი თავდაცვის მინისტრი ბაჩო ახალაია ჩაერია და "რუსთავი 2"–ში ამიტომ დაგაბრუნეს. ეს სიმართლეა?
– არც ახალაიასგან და არც სხვა რომელიმე ადამიანისგან გამიგია, რომ მან ვინმესთან დარეკა და ჩემი დაბრუნება სთხოვა. როცა "რუსთავი 2"–დან გამომიშვეს, ახალაიასთან არანაირი შეხება არ მქონია. ერთადერთი შემთხვევა იყო, როცა თავდაცვის სამინისტრომ ივენთის გაკეთება დაგვიკვეთა. ჩვენ სხვადასხვა სამინისტროებისგან, კომპანიებისგანაც ვიღებდით შეკვეთებს.
– როგორც ვიცი, ბერა ივანიშვილმა შემოგთავაზათ, მის ტელევიზიაში გადასულიყავით. მაშინ უკვე აღარ იყავით "კომედი ჯგუფის" წევრი, მაგრამ მის წინადადებას მაინც არ დათანხმდით. რატომ?
– ბერამ მითხრა, ვერ წარმომიდგენია, "კომედი ჯგუფიდან" რატომ უნდა გამოგიშვან, რატომ უნდა გქონდეთ პრობლემა შენ, თემო მჟავიას, ამიკოს და ფაქოსო. მართლაც შემომთავაზა თავის ტელეკომპანიაში გადასვლა, მაგრამ მადლობა გადავუხადე და უარი ვუთხარი. ეს გოგი გეგეშიძის გამო გავაკეთე. მაშინ გეგეშიძემ მითხრა, რომ ხელფასს მაინც გადამიხდიდა, ჩემს მეგობრებს დაარწმუნებდა, იქ საჭირო ვიყავი. ზუსტად ამის გამო "რუსთავი 2"–ში დავრჩი. ამ ადამიანთან კარგი დამოკიდებულება მქონდა, კმაყოფილი ვიყავი იმით, რასაც ის მიხდიდა. იმის გამო, რომ სხვა უკეთეს პირობებს მთავაზობდა, არხიდან არ წავსულვარ. მოკლედ, მაშინ გოგიმ ჩემი მეგობრების დარწმუნება შეძლო და "კომედი ჯგუფში" დამაბრუნეს.
– ოქტომბრის არჩევნების შემდეგ რა მოხდა?
– დირექტორმა მითხრა, რაშიც გადანაშაულებდნენ, გამოასწორე, სალაპარაკოს ნუ გახდიო. ამის შემდეგ მართლა პიონერივით ვიქცეოდი. არჩევნების შემდეგ კი ალეკო მალხაზიშვილმა თავის ოთახში ამიყვანა და მითხრა, ჩვენ გადავწყვიტეთ, სამსახურიდან გაგიშვათო. მიზეზი ასეთი იყო: აქამდე შენ ხელფასს ტელევიზია გიხდიდა, ამის შემდეგ კი ჩვენ ვეღარ გადაგიხდითო. ეს გამოგონილი მიზეზი იყო, რადგან გათავისუფლების შემდეგ ანაზღაურება ისევ მქონდა. მიზეზი ჯამაგირის პრობლემა რომ ყოფილიყო, მკითხავდნენ, 500 ან 300 ლარად თუ იმუშავებო. ძალიან საწყენია, როცა ამას დირექტორის პოზიციიდან ის მეგობარი გეუბნება, ვისთან ერთადაც დადიოდი, ჭამდი, სვამდი. თან მიზეზსაც რომ ვერ გიხსნის, ორმაგად საწყენია. ალბათ გულში ჰქონდათ ჩადებული, რომ მაშინ ვიღაცის თხოვნით დავბრუნდი. იმ პერიოდშიც ეტყობოდათ, რომ ცდილობდნენ, იქ აღარ ვყოფილიყავი.
– გიორგი აფციაურმა ვანო ჯავახიშვილი, ალეკო მალხაზიშვილი და კიდევ რამდენიმე ადამიანი მასზე ფსიქოლოგიურ ზეწოლაში დაადანაშაულა, თქვენზე კი თქვა, რომ ფიზიკურადაც გაგისწორდნენ. ეს სიმართლეა?
– როცა ალეკო მალხაზიშვილმა პირველად მითხრა, რომ სამსახურიდან მიშვებდა, ვუთხარი, გუნდთან ერთად დამელაპარაკე, მეგობრულად ამიხსენი, რა ხდება–მეთქი. სწორედ მაშინ მოგვივიდა მე და მიშა ანდღულაძეს შელაპარაკება.
– მიშა თქვენი ყოფილი ქვისლია. ვანო ჯავახიშვილის თქმით, თქვენ ერთმანეთს ოჯახურ საკითხზე დაუპირისპირდით.
– ეს ტყუილია! ოჯახურ თემაზე "ვანოს შოუს" ოთახში არასდროს არავისთან მილაპარაკია. ამაზე არც არავისთან ვსაუბრობ. ეს ყველაფერი ზუსტად სამსახურს ეხებოდა! ისინი კარგი იუმორისტები არიან, მაგარ ხუმრობებს წერენ, მაგრამ ჩემთვის არც ერთი ხუმრობა არც ერთი მეგობრის და არც ერთი ნათესავის წინ არ დგას! ქუჩაში რომ მაჩერებენ, იმას კი არ ვეუბნები, რომ ჩემი მეგობრები ცუდები არიან და ამიტომ გამომიშვეს ტელევიზიიდან, ვამბობ, რაღაც მოხდა და წამოვედი–მეთქი. მეგობრებზე ნაწყენი ვარ, მაგრამ ეს გამვლელებთან არ უნდა გამოვხატო.
გიორგი აფციაურიც ასე იქცეოდა, არაფერს ამბობდა. ვიცი, რომ მერე რაღაცებმა ის ზედმეტად გააბრაზა, გაამწარა და ყველაფერი თქვა. აფციაური ტყუილს არ ამბობს! მართალი თქვა, ნიკა გრიგოლია სცემესო. მანქანით არავინ დამხვედრია და არ ვუცემივარ, მაგრამ ჩემსა და მიშა ანდღულაძეს შორის დაპირისპირება ნამდვილად მოხდა, ვიჩხუბეთ. ერთი ადამიანი მეორეს ხელს რომ დაარტყამს, ჩხუბია, აბა, რა არის?! თათბირზე რომ მეუბნებოდნენ, ჩემი მეგობარი, თემო მჟავია უნდა დაესაჯათ და ეს საიდუმლოდ შემენახა, ამაზე ვკამათობდით. როცა გეუბნებიან, მეგობარს არ უთხრა, ხელფასი რამდენი გაქვსო, რთულია.

– ამბობენ, რომ იქ ყველაფერს ვანო ჯავახიშვილი განაგებს. ეს სიმართლეა?
– ვინმეს ჰგონია, რომ, მაგალითად, ვანო ჯავახიშვილი და ვახო ბიჭიკაშვილი სამსახურში რამეს თანაბრად წყვეტენ? არ წყვეტენ თანაბრად! ამ სამსახურში არიან ადამიანები, რომლებიც იღებენ გადაწყვეტილებას და შემდეგ დანარჩენებს აცნობენ. აქვე მინდა ვთქვა, დღევანდელ გუნდში ვანოს დამსახურება დიდია. ის სამსახურზე ავადმყოფურადაა შეყვარებული. თანამშრომელს ვერ ნახავთ, რომელიც საქმეს მასზე მეტი პასუხისმგებლობით ეკიდებოდეს. ვანო ძალიან ბევრს მუშაობს. ბევრი პროექტის წარმატება მისი მონდომების შედეგია.
– იმასაც ამბობენ, რომ თქვენს შიდა დაპირისპირებაში საქართველოს პრეზიდენტი მიხეილ სააკაშვილიც კი ჩარეულა.
– არასდროს გამიგია, რომ სააკაშვილი ჩვენს საქმეში ჩარეულიყო. როგორ უნდა დაგიდასტუროთ ის, რისი მომსწრეც არ ვარ ან ზუსტად არ ვიცი? ერთ რამეს კი გეტყვით, "კომედი ჯგუფს" გადაცემა "თქვენი შოუს" მიმართ უარყოფითი დამოკიდებულება ნამდვილად ჰქონდა. მომსწრე ვარ, რომ "თქვენი შოუს" ბიჭებისთვის უთქვამთ, რეკვიზიტებისთვის "კომედი ჯგუფის" ოთახში ნუ შემოდიხართო. ამას ვიღაც–ვიღაცები ნუ უარყოფენ! გიორგი აფციაური ყოველთვის იცავდა თავისი გუნდის წევრებს. როცა ალეკო მალხაზიშვილს გიორგი ცალკე შეჰყავდა სასაუბროდ, ის საუბარს აწყვეტინებდა, ყველასთან ერთად ამიხსენი, მათზე წინ არ ვდგავარო. მახსოვს, ივენთებზე გიორგი აფციაური რომ მიგვყავდა, ჩვენს კუთვნილ ჰონორარს ყველანი ვიღებდით, ის კი თავისი გუნდის წევრებს საკუთარ ანაზღაურებას უყოფდა.
– მართლა აუკრძალეს გიორგი აფციაურს სააკაშვილის პაროდიის კეთება?
– გიორგიმ მიამბო, ვანო ჯავახიშვილმა მითხრა, სააკაშვილის პაროდიას ტაბუ დაედოო. ამის გამო შეშფოთებული იყო.
– ახლა როგორი ურთიერთობა გაქვთ ალეკო მალხაზიშვილთან, ვანო ჯავახიშვილთან?
– "რუსთავი 2"–ის გადაცემების პროდაქშენის წევრებმა მითხრეს, რომ მათთან ერთად ვიმუშაო. როცა იქ მივდივარ და მეგობრები მხვდებიან, მეკითხებიან, სად დავიკარგე, რას ვაკეთებ და ასე შემდეგ. მე კი ასეთ უცნაურობაზე მეცინება. ამას წინათ შენობიდან გავდიოდი, როცა ალეკო მალხაზიშვილმა მითხრა, მოიცადე, არ წახვიდეო. ვუპასუხე, ახლა არ წავიდე, აქამდე სულ წადი, წადის მეუბნებოდი–მეთქი. ჩემი გათავისუფლების შემდეგ "კომედი არხიც" გახსნეს. ალეკო მალხაზიშვილმა დამირეკა, არ გინდა, ჩვენთან მოხვიდე, რამე სცადოო. ორი ვარიანტია, ან მეხუმრებით, ან დამცინით–მეთქი, ვუპასუხე. თუ სამსახურიდან იმიტომ გამიშვეს, რომ უდისციპლინო ვიყავი, მერე რატომ ჩათვალეს, რომ დისციპლინას დავიცავდი? თუ სამსახურიდან იმიტომ გამიშვეს, რომ საქმეს ვერ ვაკეთებდი, მერე რატომ ჩათვალეს, რომ გავაკეთებდი? თუმცა ჩემთვის არავის უთქვამს, რომ საქმეს ვერ ვაკეთებდი. ნებისმიერ ადამიანს მოვკლავ, ვინც მეტყვის, რომ იქ რამეს უხარისხოდ ვასრულებდი.
– რა გეგმები გაქვთ, სხვა რომელიმე ტელეკომპანიაში ხომ არ გადაინაცვლებთ?
– ბევრი შემოთავაზება მაქვს სხვადასხვა არხიდან, მაგრამ ვცდილობ, "რუსთავი 2"–ზე არსებულ პროდაქშენ ჯგუფთან ერთად გადაცემა ავაწყო, ანუ ჩემი ამჟამინდელი საქმიანობა ისევ ამ არხს უკავშირდება. მეგობრებს ყოველთვის ვეუბნებოდი, ჩვენი ბრალი იყო, რომ თუნდაც ამიკო ჩოხარაძე და სხვები ამ ჯგუფიდან წავიდნენ. როცა დირექტორი ხარ და გყავს ისეთი ნიჭიერი ადამიანი, როგორიც ამიკოა, მოდი, რა, მისი რესურსი გამოიყენე. თემო მჟავიაზე დაახლოებით 6–ჯერ, 7–ჯერ მეტი ხელფასი მქონდა. სხვაზე არ ვსაუბრობ, სხვას ჩემზე მეტი ჰქონდა. ეს იმ პირობებში, როცა მე და თემო ერთად ვმუშაობდით. მინდოდა, რომ სამსახურში მეგობრები მყოლოდა და ისინი არ გაეშვათ, მაგრამ სხვა ტელეკომპანიაში წავიდნენ. მათთან დღემდე ვძმაკაცობ. ახლაც ინტერვიუზე თემო მჟავიამ მომიყვანა. მათთან ვერანაირი სამსახური ვერასოდეს დამაშორებს.
დღესაც მუშაობენ "კომედი ჯგუფში" ადამიანები, რომლებიც ამბობდნენ, რომ ხელფასის და საყვედურების გამო იქ მუშაობა აღარ შეეძლოთ. იქ 100%–ით არამეგობრული და არაპროფესიონალური დამოკიდებულებაა. იმას კი არ ფიქრობენ, ადამიანს ისე მიუდგნენ, რომ მისი რესურსი მაქსიმალურად გამოიყენონ, მათ პირად ცხოვრებაში ერევიან. ამიკო დაიბარეს და უთხრეს, ძმაკაცთან ერთად ნუ ცხოვრობო. ვინ ეკითხებათ, ამიკოს სახლში ვინ ცხოვრობს?! ვინ გეკითხება, ნიკა გრიგოლია მოტოთი დადის თუ ნავით?! როცა ადამიანები შენს პირად ცხოვრებაში იწყებენ ჩარევას, ეს "მარაზმია"! რატომ უნდა გადამიწყვიტო შენ, ვისთან ვიმეგობრო და ვისთან არა?!
– გული ძალიან გაქვთ ნატკენი, თუმცა მათ მაინც უწოდებთ მეგობრებს.
– გული როგორ არ მექნება ნატკენი, როცა ვანო ჯავახიშვილი ჩემი ძმაკაცია, მასთან სახლში ვცხოვრობდი, ყველაფერი ერთად დავიწყეთ. იმავეს ვიტყვი ალეკო მალხაზიშვილზე, მიშა ანდღულაძეზეც, რომელსაც მთელი "კომედი ჯგუფი" დასცინოდა იმის გამო, რომ პირველი ჰონორარი მეგობრებს დაურიგა, თვითონ კი ორკასეტიანი მაგნიტოფონის საყიდელი ფული დაიტოვა. ახლა კი რა ხდება? ლაპარაკიც არ მინდა და არც ის მსურს, ჭორაობა გამომივიდეს. ადამიანს ვუყურებ და გული მტკივა, რომ ვიხსენებ, რა მაგარი ტიპი იყო, ჩემთან ერთად კარვით დადიოდა, ერთ ბოთლ ლუდს ვსვამდით, ფენოვან ხაჭაპურს ერთად ვყიდულობდით და დღეს კი შენი პრობლემა მისთვის მიუღებელია. იმედია, ამის შემდეგ რაღაცას მიხვდებიან და შეცვლიან. გააცნობიერებენ, რომ იქ მყოფი თითოეული ადამიანი საჭიროა, ყველას თავისი ადგილი აქვს და მათ განსხვავებული მიდგომა სჭირდებათ.
ეკა ლემონჯავა