• გიღალატეს? ანუ როგორ მოიშოროთ მოწინააღმდეგე...

    გიღალატეს? თავს დამცირებულად და უბედურად გრძნობ, თუმცა ისევ გიყვარს და მზად ხარ, ნებისმიერ მომენტში მიიღო. თუ შენ მისი დაბრუნება გსურს, მზად ხარ აპატიო და კვლავ მის გვერდზე ყოფნით დატკბე...

    მაშინ, პირველ რიგში, სიბრაზე ჩაიცხრე, მაქსიმალურად ეცადე, დამშვიდდე და გახსოვდეს, რომ შენი ბედნიერებისთვის იბრძვი.

    1. ყველაზე კარგი იქნება, თუ შენს მეორე ნახევარს თავს ისე მოაჩვენებ, თითქოს ვერაფერს ხვდები.

    ასე ის მოდუნებული იქნება და შენც საშუალება გექნება, გამუდმებით საქმის კურსში იყო. ხშირად გალანძღე მისი თანდასწრებით ასეთი ქალები. ილაპარაკე საკუთარ თავზე, აღნიშნე, რომ ბედნიერ ვარსკვლავზე დაიბადე; სუფთა ხარ და სხვის კაცებზე არ ნადირობ და ასეთი ქალები გეცოდება. თავი ყოველთვის ბედნიერად მოაჩვენე.

    2. არ აჩვენო, რომ ეჭვიანობ და აკონტროლებ. სანამ ბრძოლაში ხარ ჩაბმული, შენმა მოწინააღმდეგემ იეჭვიანოს.

    3. ყოველთვის ფორმაში იყავი. ყურადღება მიაქციე პარფიუმს, ვიზუალურ მხარეს, თეთრეულს, საწოლის ინტერიერს, თქვენს ფიზიკურ ურთიერთობას. შეუქმენი მყუდრო, სუფთა და სასიამოვნო გარემო. შეეცადე, მის სამოსს ყოველთვის შენი სურნელი ასდიოდეს.

    ქალი, რომელთანაც ის დადის, გამუდმებით უნდა გრძნობდეს შენს არსებობას. ხშირ შემთხვევაში ხომ კაცები მათ ატყუებენ, რომ ცოლთან გაყრას აპირებენ.

    4.
    ჩართე ის შენს საქმეებში, ხშირად ჰკითხე რჩევები, დაიხმარე პრობლემების გადაჭრაში. ერთი სიტყვით, მოიქეცი ისე, რომ დღის უმეტეს ნაწილში შენზე ფიქრობდეს. თუმცა არ აიძულო, არაფერი დააძალო, ყველაფერი საკუთარი სურვილით უნდა გააკეთოს. სთხოვე ტკბილად და თბილად. დაძალება და იძულება შენს მოწინააღმდეგეს დაუთმე.

    5. სახლი უნდა გახდეს მისთვის ის ადგილი, სადაც დასვენებას შეძლებს.

    6. მოუწყვე საღამოები, ხშირად დაუძახე მის მეგობრებს და ისიამოვნეთ. იმ შემთხვევაშიც კი, თუ მისი მეგობრების გარემოცვა დიდად არ გსიამოვნებს, ეს ყველაფერი მაქსიმალურად ბუნებრივად და სიამოვნებით უნდა აკეთო.

    7. გააკეთე ისე, რომ თავიდან შეუყვარდე. მას ხომ უყვარდი და შეიძლება ახლაც უყვარხარ, უბრალოდ, რაღაც აკლია, შენში შეიცვალა – გარეგნობა, ხასიათი, მოქცევა... ყველაფერს მიაქციე ყურადღება - უბრალოდ, შეიყვარე საკუთარი თავი.

    8. დამოუკიდებელი ქალები უფრო მიმზიდველები არიან მამაკაცებისთვის. რაც უნდა ეცადონ, თავისზე დამოკიდებული გახადონ ქალი, საბოლოო ჯამში მაინც მოსწონთ, როცა ის დამოუკიდებელია და მის აჩრდილად არ იქცევა. თუ არ მუშაობ, მაშინ სასწრაფოდ მონახე რამე. თუმცა ისე არ მოიქცე, რომ მას შენს ცხოვრებაში თავი ზედმეტად აგრძნობინო.

    9.
    უნდა აგრძნობინო, რომ ის ერთადერთი მამაკაცი არ არის და რომ მთელი ცხოვრება სახლში ჯდომას და მის მოვლას არ აპირებ. ეს ყველაფერი ძალიან მსუბუქად უნდა გააკეთო, ქმედებით აგრძნობინო და არა კამათით.

    10.
    შენ ინდივიდი ხარ, ნუ ჩაკლავ შენს შესაძლებლობებს; მხოლოდ იმით ნუ შემოიფარგლები, რომ მასზე იზრუნო. მოძებნე ჰობი, რაიმე ახალი გასართობი, რაც განწყობას აგიმაღლებს.

    11. რთულია, მაგრამ მაინც შეეცადე, არ უსაყვედურო, როცა სახლში გვიან დაბრუნდება; არ აგრძნობინო, რომ ამან ხასიათი გაგიფუჭა. პირიქით, დახვდი კარგ განწყობაზე და ლამაზ ფორმაში, ყოველთვის მიმზიდველი უნდა იყო (იფიქრე იმაზე, რომ შენი მოწინააღმდეგე მას ზეიმით ხვდება, აუცილებლად ზრუნავს იმაზე, რომ სექსუალურად გამოიყურებოდეს). ეს ყველაფერი აუცილებლად დააფიქრებს მას.

    12.
    რაც შეიძლება, ბევრი გაიგე შენს მოწინააღმდეგეზე საერთო ნაცნობებისა და ინტერნეტის საშუალებით. კარგია, თუ მას პირადად გაიცნობ. ასე შეძლებ მისგან განსხვავებული იყო და ბევრად კარგად დაანახო საყვარელ ადამიანს შენი დადებითი და მისი უარყოფითი მხარეები. იმ შემთხვევაში, თუ შენი მოწინააღმდეგე ნაცნობი, უფრო მეტიც, დაქალი აღმოჩნდება, არ შეიმჩნიო და ისე გააგრძელე ბრძოლა.

    ყოველთვის ეცადე, რომ მაკომპრომიტირებელი ფაქტები მოიპოვო, ის ქალი მამაკაცთან ერთად ნახო, ხელი შეუწყო მათი ურთიერთობის გაღრმავებას. მერე შენს მეორე ნახევარს სასხვათაშორისოდ მოუყევი იმ ქალზე.

    ესაუბრე ისეთ დეტალებზე, რაც შენს მოწინააღმდეგეს ახასიათებს და რაც შენს ქმარს ძალიან აღიზიანებს ქალში. უნდა იმოქმედო ფრთხილად და ეფექტურად, ითამაშო მამაკაცის ხასიათზე, ის ქალი ისეთი კუთხით დაანახო, რომ ინტერესი განელდეს.

    13. არასდროს მიმართო შანტაჟს. ეს შეიძლება ქონებას ეხებოდეს და საერთო ბავშვს. არც პატარა განაწყო მამის წინააღმდეგ. ასეთ საქციელს დადებითი შედეგი არასდროს ექნება. ძალით მამაკაცს ვერ დააკავებ, ის თავისი სურვილით უნდა დაბრუნდეს შენთან. შენ კი მაქსიმალურად უნდა ეცადო, რომ ასეთი სურვილი კვლავ გაუჩნდეს.

    14. არავითარ შემთხვევაში არ იფიქრო შურისძიებაზე.

    15.
    არ დაიდანაშაულო თავი. იფიქრე იმაზე, რომ შენ იმ ქალთან შედარებით დედოფალი ხარ.

    ჟურნალი "და ქალი"

    3 027 ნახვა
    GOGATV

    abezara