როგორ გაცვალა მოდელმა მარიამ ბერძენიშვილმა გივი სიხარულიძე ლევან მასპინძელაშვილზე

მუსიკალური კონკურსი „საქართველოს ვარსკვლავი“ ფინალისკენ მიდის. წინა კვირას „რუსთავი 2“ -ის გენერალურმა დირექტორმა ნიკა გვარამიამ პროექტის წესები შეცვალა და საუკეთესო ხუთეული უცვლელად დატოვა, ანუ პროექტი არავინ დატოვა. აუტსაიდერებს შორის იყო ლევან მასპინძელაშვილიც.
ლევანის ცხოვრება პროექტმა მთლიანად შეცვალა. ყველა სიკეთესთან ერთად, მას თაყვანისმცემელი გოგონებიც გაუჩნდა. მათ შორისაა მოცეკვავე და მოდელი მარიამ ბერძენიშვილი. ეს ის მარიამია, ვახო ბიჭიკაშვილმა „ვანო ჯავახიშვილის შოუში“ გივი სიხარულიძეს საჩუქარად რომ ჩაუსვა კალთაში. მარიამმა ლევანი პირველივე საკონკურსო კონცერტზე შენიშნა. მას მერე მის ვიდეოებსა და ფოტოებს აზიარებს „ფეისბუქზე“ . მარიამი ლევანს „რუსთავი 2“ -ში შევახვედრეთ და ერთობლივი ინტერვიუ ჩავწერეთ.

- ლევან, პირველ რიგში შენი და მუსიკის ურთიერთობაზე გვიამბე.
- მე და მუსიკა დიდი ხანია ვმეგობრობთ, უბრალოდ, არავინ იცოდა ამის შესახებ, ჩემი ოჯახის წევრებისა და მეგობრების გარდა.
- პროფესიონალურ დონეზე მეგობრობთ?
- არა, სამოყვარულო დონეზე. სახლში ჩემით ვისწავლე გიტარაზე დაკვრა. კარგად არ ვუკრავ, მაგრამ ჯერჯერობით მე მყოფნის. პედაგოგი არ მყოლია, ჩემთვის ვერთობოდი სახლში. ახლა აღმოჩნდა, რომ ბევრი ადამიანი მისმენს და მოსწონს ჩემი სიმღერა, რაც ძალიან მახარებს.
- აქამდე არც ერთ პროექტში არ გიცდია ბედი?
- არა, არც „საქართველოს ვარსკვლავში“ მოვხვდებოდი, ჩემი მეგობარი რომ არა, ერთად ვმუშაობთ და მან დამარეგისტრირა. რომ დამირეკეს, სამსახურში ვიყავი, კასტინგზე უნდა მოხვიდე „რუსთავი 2“ -შიო რომ მითხრეს, ძალიან გამიკვირდა. მთელი სამსახური იცინოდა, ყველამ იცოდა ჩემ გარდა.
- პროფესიით ვინ ხარ?
- ტურიზმისა და სარეკლამო ბიზნესის სპეციალისტი ვარ. ამ სპეციალობით არასდროს მიმუშავია. ახლა ვმუშაობ ონლაინ მარკეტინგში. მანამდე ვმუშაობდი „თიბისი“ ბანკში, საქართველოს ბანკში და ორგანიზაციაში, რომელიც მარილის იმპორტით იყო დაკავებული.
- მოკლედ, დიპლომიანი და სამსახურიანი სასიძო ხარ.
- (იღიმება), სასიძო ვარ, დიპლომიანიც, სამსახურიანიც.
- რა შეიცვალა შენს ცხოვრებაში მას მერე, რაც „საქართველოს ვარსკვლავში“ გამოჩნდი?
- ცხოვრების რიტმი, ცხოვრების წესი მთლიანად შეიცვალა. აღარ დავდივარ სამსახურში, როცა რეპეტიცია არ მაქვს, შუადღემდე მძინავს. შეიცვალა ხალხის დამოკიდებულება ჩემ მიმართ. ქუჩაში მცნობენ.
- თაყვანისმცემელი გოგონებიც გაჩნდნენ?
- (იცინის) კი, გაჩნდნენ, თაყვანისმცემლების არმია არ მყავს, მაგრამ რამდენიმე გოგონა შეინიშნება.
- ერთი ჩვენც შევნიშნეთ, მარიამ ბერძენიშვილი და შენთან წამოვიყვანეთ.
- მარიამი მეც ძალიან შევნიშნე (იღიმება).
- მარიამ, ლევანი მხოლოდ იმიტომ მოგწონს, რომ კარგად მღერის, თუ სხვა ინტერესებიც გაჩნდა პარალელურად?
- (იცინის) თავიდან სიმღერის გამო მომეწონა, მერე „ფეისბუქზე“ მოვძებნე. „საქართველოს ვარსკვლავის“ გვერდზე ერთ-ერთ ფოტოზე მონიშნეს და მივაგენი, თორემ ისე კარგადაა „შეფუთული“ , ვერ ვიპოვიდი (იცინიან). მივწერე პირველივე ორშაბათს, რომ ძალიან მომეწონა. მადლობა გადამიხადა. შემდეგ ორშაბათსაც მივწერე და მერეც, მაგრამ პასუხები აღარ მოუწერია.
ლევანი:
- ეტყობა, ვერ მოვიცალე, თორემ... ვინც განსაკუთრებულ ტექსტს მწერს, იმას განსაკუთრებულად ვპასუხობ. ვინც „ყველაზე მაგარი ხარო“ , მწერს, იმას მხოლოდ მადლობას ვუხდი.
- მარი განსაკუთრებული იყო?
- არ მახსოვს, ალბათ კი, რადგან შემდეგ მიმოწერა გავაგრძელეთ.
- მარიამ, ლევანის ვიდეოებს აზიარებ შენს გვერდზე, ერთ-ერთი ასეთი წარწერითაც ვნახეთ - „ჩემი ბიჭი“ ...
- (იცინის) ჩემი ბიჭია, მიყვარს, მომწონს. ვიძინებ - ვუსმენ, ვიღვიძებ - ვუსმენ. ყველაზე მეტად მისი ხმის ტემბრი მომწონს. მბურძგლავს, რომ ვუსმენ (იცინიან).
- ლევან, შენ არ გბურძგლავს, მარიამს რომ უყურებ?
- გულახდილად თუ გაინტერესებთ, არა. ისე, კარგი, მომხიბვლელი გოგონაა, ისეთი, როგორზეც, წესით, უნდა დაგბურძგლოს, მაგრამ დღეს ხომ პირველად ვნახე „ლაივში“ .
- მარიამის არსებობის შესახებ თუ იცოდი მანამდე, სანამ მოგწერდა.
- არა, თუმცა შემდეგ გავიგე, რომ პოპულარული გოგონაა, იცნობენ „რუსთავი 2“ -ში, „კომედი შოუს“ სკეტჩებშიც მიუღია მონაწილეობა, გივი სიხარულიძის კალთაშიც მჯდარა, გავიგე (იცინიან). ცეკვავს თურმე, ერთ-ერთ კლუბშიც მუშაობდა.
- მარიამ, ხომ არ მღერი კიდეც?
- მხოლოდ აბაზანაში.
- ლევან, ზოგადად როგორი გოგონები იქცევენ შენს ყურადღებას?
- ჟღალთმიანი და ჭორფლიანი.
- შეყვარებული ხარ?
- არა.

მარიამი:
- ჟღალი და ჭორფლიანი გოგონები იშვიათია საქართველოში.
- ლევან, ჟიურის წევრებზე რას გვეტყვი, ვისი შეფასების დროს ნერვიულობ ყველაზე მეტად?
- პრინციპში, არც ერთის. მიშა მშვილდაძის კომენტარები მომწონს, განსაკუთრებულია, გვახალისებს და ზუსტ შენიშვნას გვაძლევს.
- მარიამ, ყველა კონცერტს ესწრები?
- კი, და სულ ვნერვიულობ, ლევანი არ გავარდეს. ბოლო კონცერტზე აუტსაიდერებში რომ მოხვდა, ჩემი დაქალი მეუბნებოდა, დღეს ვიღაც აცრემლებული წავა სახლშიო, მაგრამ გადავრჩი. ჩემმა მეგობრებმა უკვე იციან ლევანის მიმართ ჩემი დამოკიდებულება. „ლევანი დააფიცე და ყავას მოგიდუღებსო“ , - ერთი მეორეს ეუბნება ხოლმე.
ლევანი:
- ძალიან საყვარელია, ისეთი ემოციებით მწერს ხოლმე, რომ ვკითხულობ, ძალიან მსიამოვნებს. ასეთი თაყვანისმცემელი ბევრი არ მყავს, ამიტომ ვაფასებ.
- ლევან, ხომ არ იცი, რატომ შეცვალა პროექტის წესები ნიკა გვარამიამ?
- მიზეზი მარტივია, ჩემი აზრით, უნდოდა კიდევ ერთი კონცერტი ჩაეტარებინათ ამ შემადგენლობით.
- შენი პროგნოზი როგორია?
- შეიძლება მოვიგო (იცინიან), გამორიცხული არაფერია, ძალიან ძლიერი მონაწილეები არიან, სუპერგოგონები და სუპერპატარა ბიჭუნა.
- მარიამ, ლევანის გამოვარდნის შემთხვევაში იტირებ?
- კი.
ლევანი:
- ვის მხარზე იტირებ, მარიამ?
- ჩემი დაქალის მხარზე ალბათ, რადგან გვერდით ის მიზის ყოველთვის კონცერტზე.
- ლევან, შემდეგ კონცერტზე რას გვიმღერებ?
- ნიკელბექის რეპერტუარიდან ვმღერი ძველ სიმღერას. ბევრი მწერდა, ამ მომღერალს გიგავს ხმა და იმღერეო. გადავწყვიტე, მსმენელის სურვილი გავითვალისწინო. ამიტომ ამ სიმღერას მივუძღვნი გულშემატკივრებს და, პირველ რიგში, მარიამს.

ნინო მჭედლიშვილი
ჟურნალი „რეიტინგი“