სააკაშვილის და ივანიშვილის პაროდისტები ვერაფრით დამეგობრდნენ

პრეზიდენტ მიხეილ სააკაშვილის ახალგამოჩეკილ პაროდისტ ქართლოს ნატროშვილს, მისი წინამორბედებისგან განსხვავებით, გაუმართლა – მან მიხეილ სააკაშვილი რამდენიმე ხნის წინ ერთ–ერთ რესტორანში გაიცნო. საქართველოს პრეზიდენტი "კომედი შოუს" მსახიობების წვეულებაზე მოულოდნელად გამოცხადდა, ცოტა ხნით დარჩა და კარგადაც მოილხინა. ამ ქეიფის ამსახველი კადრები სოციალურ ქსელებშიც გავრცელდა.
ქართლოსისგან განსხვავებით, ბიძინა ივანიშვილის პაროდისტი ნიკა კაკაბაძე პრემიერს არასოდეს შეხვედრია და არც ის იცის, ქვეყნის მეორე პირს მის ხუმრობებზე რა რეაქცია აქვს. ნიკა სიტყვაძუნწი, დინჯი მოსაუბრეა, ქართლოსი კი – ენერგიული და მოუსვენარი. "სარკე" მათ ერთობლივი ინტერვიუს ჩასაწერად ხალხმრავალ ადგილზე შეხვდა. ჩვენმა რესპონდენტებმა მაშინვე მიიპყრეს გარშემომყოფების ყურადღება, განსაკუთრებით კი ქართლოსმა, რომელიც პრეზიდენტის ხმით შეუჩერებლად ლაპარაკობდა.
– პრემიერმინისტრსა და პრეზიდენტს შორის კოაბიტაცია არ შედგა, თქვენ შორის მაინც თუ არსებობს ამის შანსი?
ნიკა: ჩვენ შორის კოაბიტაცია შემდგარია.
ქართლოსი: მე და ნიკას გვაქვს კოაბიტაციასთან მიახლოებული ტენდენციები. კოაბიტაცია დადებითად ჩვენ დავხატეთ, ვიდრე რეალურად არის. ვისურვებდი, რომ საქართველოს ნამდვილი პრეზიდენტი და პრემიერმინისტრი ისე ხშირად ხვდებოდნენ ერთმანეთს, როგორც მე და ნიკა. ერთმანეთს ზოგიერთ საკითხში არ ვეთანხმებით, მაგრამ იმაში კი ვთანხმდებით, რომ საქართველოს მომავალი ძალიან მაგარი უნდა იყოს.
ნიკა: თუ პრემიერი და პრეზიდენტი ერთად იმუშავებენ, კოაბიტაცია უფრო გაუადვილდებათ. ქართლოს, შენ რომ "რუსთავი 2"–ზე იყო და მე – "მეცხრე არხზე", წარმომიდგენია, რა იქნებოდა.
ქართლოსი: ვთვლი, რომ ერთ ტელეკომპანიაში ყოფნა უფრო კარგია, ერთმანეთს ვავსებთ.
– რა რეაქცია გქონდათ, როცა ერთმანეთს პრემიერის და პრეზიდენტის "რანგში" პირველად მოუსმინეთ?
ქართლოსი: ნიკასთან შეხვედრა კარგად მახსოვს.
ნიკა: ძალიან კარგად მახსოვს, ქართლოსი "რუსთავი 2"–ში პირველად რომ მოვიდა. თავიდან, რომ შემოვიდა, გამიკვირდა, ეს ვინ არის–მეთქი.
ქართლოსი: ეს 2013 წლის 27 თებერვალი იყო.
ნიკა: საერთოდ არ ვიცოდი, ვინ იყო, მაგრამ პრეზიდენტის პაროდია რომ გააკეთა, ძალიან მომეწონა. ქართლოს, ჩემს პაროდიაზე იტყვი, არ მომეწონაო და...
ქართლოსი: ნიკას პაროდია თებერვლის შუა რიცხვებში ვნახე, ცოტა ხანში კი "რუსთავი 2"–ში მეც მივედი. ჩემი დებიუტი ნიკასთან ერთად შედგა და ეს ძალიან კარგი იყო. ნიკას სკეტჩი ტელევიზიით მქონდა ნანახი და გულში გავიფიქრე კიდეც, ეს სად იპოვეს–მეთქი.
– თქვენი გმირები ხასიათით, ქცევებით ერთმანეთის ანტიპოდები არიან. თქვენც ასეთივე განსხვავებული ტემპერამენტი გაქვთ?
ქართლოსი: ვერ ვიტყვი, რომ რადიკალურად განვსხვავდებით. ჩვენ შორის განსხვავებები უფრო მეტად მაშინ შეინიშნება, როცა პაროდიას ვაკეთებთ. იმ დროს ერთმანეთს საერთოდ ვემიჯნებით. სხვათა შორის, იმ მომენტში ნიკას ვერ ვიტან!
ნიკა: მე ასე არ ვარ, კეთილი ადამიანი გახლავართ, მაგრამ როლში კარგად რომ შევიდე, აუცილებელია, ქართლოსს ვერ ვიტანდე.
– ნიკა, რაღაც ცუდ ხასიათზე მეჩვენებით.
ნიკა: ამან ისეთი ქვეყანა დამიტოვა, უკეთეს ხასიათზე ვერ ვიქნები.
ქართლოსი: აბა, აბა! სხვათა შორის, ორივენი ძალიან პუნქტუალურები ვართ. სხვათა შორის, იცით, ტელეფონში ნიკას ნომერი როგორ მიწერია? "პირველი ოქტომბერი!".
ნიკა: მე ასე – "ქართლოსი პაროდისტი". ერთმანეთისადმი მეგობრული დამოკიდებულება გვაქვს და ძირითადად სკეტჩების დროს ვხვდებით. ქართლოსი ძალიან დადებითი ადამიანია.
ქართლოსი: დარწმუნებული ვარ, რომ ნიკას ოჯახს აუცილებლად ვესტუმრები, ნიკაც მოვა ჩემთან. მინდა, რომ ჩვენი მაგალითი ნამდვილმა პრემიერმა და პრეზიდენტმაც გადაიღონ. ჯერჯერობით მხოლოდ სამსახურში ვხვდებით ერთმანეთს.
ნიკა: ჯერ სამსახურებრივი "რომანია". სამწუხაროდ, ამის იქით დრო არ გვრჩება.
– თქვენი გმირების ხასიათთან რაიმე საერთოს პოულობთ?
ქართლოსი: რითი ვგავარ მიშას? პირველ რიგში, ენერგიით. როცა მის ხმაზე ვსაუბრობ, ალბათ მისნაირად ვფიქრობ და არც მე ვგრძნობ დაღლილობას. ამ დროს ჩემი ლექსიკიდან სიტყვა "მეზარება" ქრება. ერთი სიტყვით, როცა მიშას ხმით ვლაპარაკობ, მიშა ვარ!
ნიკა: პრემიერს შეიძლება ხასიათით ვგავარ. მაინცდამაინც მხიარული არ ვარ, არც ანეკდოტები მიყვარს, ჩემებური სტილი მაქვს. ფინანსურადაც არ ვგავარ, თუმცა ამაზე დიდად არ ვწუხვარ. მშვიდი ვარ, ბევრი ლაპარაკი არ მიყვარს. პრემიერი როცა დაღლილია, ჩემნაირ ხასიათზე დგება. ამ დროს ჩაკითხვებით თავს ნუ მოაბეზრებთ, თორემ გაბრაზდება და გეტყვით, "აიტივის" ჟურნალისტი ხართო.
– თქვენ რაზე ბრაზდებით ხოლმე?
ნიკა: გაბრაზება მეც მეხერხება და ძირითადად უპასუხისმგებლობაზე ვბრაზდები.
– ქართლოს, ახლაც ისე ხართ პრეზიდენტის როლში შესული, აუცილებლად უნდა გკითხოთ: რითი არ ჰგავხართ მას?
ქართლოსი: ამას წინათ "სარკის" ინტერვიუში ვთქვი კიდეც, რომ ხანდახან პრეზიდენტს ისეთი რაღაც აცვია, რასაც არ ჩავიცვამდი, თუმცა ზოგჯერ გემოვნებითაც ვგავართ ერთმანეთს.
ნიკა: რაც მას აცვია, შეიძლება ის შენ ვერც ჩაიცვა.
ქართლოსი: ნიკა, აქ სტილს ვგულისხმობ, ნუ მკბენ!
ნიკა: მგონი, ესეც იყო თურქეთში! თუ ვცდები?
ქართლოსი: კი, იქ მეც ვყოფილვარ! სხვათა შორის, მეექვსე კლასში რომ ვიყავი, 15 თუ 16 მაისი იყო, ველოსიპედით ტრაქტორს შევეჯახე და ძალიან მძიმე ტრავმა მივიღე. საბედნიეროდ, ხელის მოტეხვას გადავურჩი. ტრაქტორს იმიტომ დავეჯახე, რომ არ მუშაობდა და ყანაში არ იყო გასული. უსაქმოდ იდგა და მის საჭესთან შევარდნაძისდროინდელი ღიპიანი მძღოლი იჯდა.
– ერთმანეთის პაროდიებზე გეცინებათ?
ნიკა: არა, საერთოდ არ მეცინება, ყელში მაქვს ამოსული!
ქართლოსი: ერთად როცა ვართ და ნიკა ბიძინას პაროდიას აკეთებს, არ მეცინება, მაგრამ ტელევიზორში ან კომპიუტერში თუ ვნახე, ვერ მაჩერებენ, იმდენს ვიცინი. საერთოდ, იშვიათად მეცინება, მაგრამ "ვანოს შოუში" დაბინტული ხელით რომ ვიყავი და მერე ეს გადაცემა ვნახე, სიცილით მოვკვდი. ნიკა მაწვნით და ფუნთუშით რომ შემოვიდა, ბოლოს კი ტრაილერის ხმას მიბაძა, ამაზე ხომ საერთოდ ცუდად გავხდი!
– ნიკა, თქვენ რა რეაქცია გაქვთ, როცა საკუთარ თავს ეკრანზე უყურებთ?
ნიკა: ეკრანიდან ჩემი ცეკვა რომ ვნახე, მომეწონა. მართლა საშინელება იყო.
– მას შემდეგ, რაც ეკრანზე გამოჩნდით, თქვენდამი ადამიანების დამოკიდებულება შეიცვალა?
ქართლოსი: ორივე ცნობადი სახე გავხდით. 4–5 სკეტჩში თქვენც რომ მიიღოთ მონაწილეობა, ხალხი გიცნობთ.
ნიკა: სასიამოვნოა, როცა ქუჩაში შენს დანახვაზე ხალხს ეღიმება. სოფელში რომ ჩავდივარ, გარეთ ვეღარ გამოვდივარ, ყველა სახლში მეპატიჟება და დალევას მთავაზობს.
– ჩვეულებრივ დღეებში, როცა გადაღებები არ გაქვთ, თქვენი გმირების ხმებით "სარგებლობთ"?
ნიკა: არა, არ მიყვარს.
ქართლოსი: ხშირად – არა. კახეთში, ჩემს სოფელში ვიყავი და ყველა იმას მეკითხებოდა, ბიძინა როგორ არისო. ნიკა, ძალიან მაინტერესებს, მე ვინმე მკითხულობს?
ნიკა: ანუ ჩემკენ თუ გკითხულობენ? რა თქმა უნდა, არა! ყველა ჩემიანია და შენ რატომ უნდა გიკითხონ?!
ქართლოსი: რა ვიცი, კახეთში რომ გავიარე, გლეხებმა, პრემიერი მოგვიკითხეო და...
ნიკა: სასოფლო–სამეურნეო სამუშაოებზე არ გავსულვარ.
ქართლოსი: აი, ხომ ხედავთ! თავის ბიზნესცენტრში ზის გამოკეტილი, მე კი ხალხში დავდივარ.
– როგორ ფიქრობთ, რომლის პაროდია უფრო აქტუალურია დღეს?
ქართლოსი: ეს იმდენად განსხვავებული ადამიანების პაროდიაა, ორივე აქტუალურია. ბიძინას პაროდისტი რომ არ იყოს, ჩემი პაროდია დაობლდებოდა.

ნიკა: ჩემი პაროდია უფრო აქტუალურია! არა, ვხუმრობ. როცა იმ სკეტჩებს ვუყურებ, სადაც მარტო ვიყავი, ან მარტო ქართლოსი იყო, ინტერნეტით ნახვაც ნაკლები აქვს და კომენტარებიც. ერთად როცა ვართ, უკეთესი შოუ გამოდის.
– ქართლოსმა წინა ინტერვიუში გვითხრა, პრეზიდენტს მოხარშულს ვცნობო. ნიკა, თქვენც ასე კარგად იცნობთ თქვენს გმირს?
ნიკა: მე შემწვარს ვიცნობ.
ქართლოსი: თუ ადამიანი არ შეისწავლე, ისე მის პაროდიას ვერ გააკეთებ. ნიკას ბიძინას კარგი ნიუანსები აქვს დაჭერილი.
ნიკა: ვთვლი, რომ ბიძინას ისე არ ვიცნობ, როგორც ქართლოსი – მიშას. მე უფრო მეტად მას მიმიკებით ვემსგავსები. შესწავლის პროცესი მიმდინარეობს, რაღაც სიახლეებიც იქნება.
– გავიგე, რომ "კომედი შოუს" მსახიობების ერთ–ერთ წვეულებაზე, სადაც თქვენც იყავით, საქართველოს პრეზიდენტი მიხეილ სააკაშვილი იყო სტუმრად. გვიამბეთ, როგორ იქეიფეთ მასთან ერთად.
ქართლოსი: პრეზიდენტის იქ მოსვლა ძალიან მოულოდნელი იყო, არავინ ელოდებოდა. 9 საათს 15 წუთი აკლდა, როცა მოვიდა. ჩვენთან 42 წუთი დაჰყო და წავიდა. როცა ის ადამიანი მოდის მოულოდნელად, რომლის პაროდიასაც აკეთებ, ბუნებრივია, ძალიან გაგიხარდება. მეც გამიხარდა, ხელიც ჩამოვართვი და მის ხმაზეც მივესალმე. დაახლოებით წუთნახევარი მისი ხმით ვლაპარაკობდი, ოღონდ ტექსტი არ მახსოვს, იმდენად აღელვებული და გახარებული ვიყავი.
– პრეზიდენტს ამაზე რა რეაქცია ჰქონდა?
ქართლოსი: მას ისე ჩაეღიმა, აშკარად ძალიან მოეწონა.
ნიკა: ჩაეღიმა – არა, გაეღიმა!
– კონკრეტულად რა გითხრათ?
ქართლოსი: მითხრა, მაგრად გამოგდის, ყოჩაღო. მისი ღიმილი ჩემთვის ყველაფერი იყო. პაროდია რომ არ მოსწონებოდა, არ გაეღიმებოდა.
ნიკა: მეც ჩვეულებრივად ხელი ჩამოვართვი. მისი მოსვლა მართლა მოულოდნელი იყო. როცა ქვეყნის პირველი პირი შენთან მოდის და იუმორს აფასებს, ეს ძალიან სასიხარულოა.
ქართლოსი: სხვათა შორის, ანალოგიურად გამიხარდება, სადმე პრემიერმინისტრიც რომ ვნახო.
ნიკა: ჩვენთვის პოლიტიკა არ არის მთავარი. მთავარია, როცა ქვეყნის პრეზიდენტი იუმორს აფასებს.
ქართლოსი: ერთ–ერთ საიტზე დაიწერა, თითქოს საქართველოს პრეზიდენტი ნიკა გვარამიასთან ერთად მოვიდა რესტორანში. ხაზგასმით აღვნიშნავ, სააკაშვილი რესტორანში რომ მოვიდა, ნიკა გვარამია უკვე იქ იყო.
– ქართლოს, ამბობენ, რომ პრეზიდენტი სპეციალურად თქვენ გასაცნობად მოვიდა.
ქართლოსი: ეს ამ წამს გავიგე, რომ მას პირადად ჩემი გაცნობა სურდა. ის მხოლოდ ტელევიზიით მყავდა ნანახი... სამიოდე სადღეგრძელო შესვა და როგორ მოულოდნელადაც მოვიდა, ისე მოულოდნელად წავიდა.
– ქართლოსს აშკარად ეტყობა, რომ პრეზიდენტი უყვარს. ნიკა თქვენც ასე ძალიან გიყვართ პრემიერი?
ნიკა: რა თქმა უნდა. შენი გმირი თუ არ შეიყვარე, ისე ვერც გააკეთებ.
ეკა ლემონჯავა