დათუნა მგელაძე რუსულ შოუბიზნესში მიდის

მომღერალი დათუნა მგელაძე მოსკოვში მიემგზავრება. მისი მიზანი ერთ–ერთ მუსიკალურ კონკურსს უკავშირდება, რომლის სახელსაც არ ახმაურებს. ამბობს, რომ საქართველოში თავის საქმეს ვეღარ აკეთებს და უნდა, უცხო ქვეყანაში სცადოს ბედი. როგორც ჩანს, მისი მოსკოვური გეგმები კონკურსის ფარგლებს სცდება და უფრო ბევრ რამეს მოიცავს. დათუნამ გვითხრა, რომ მოსკოვში მისი ერთ–ერთი მასპინძელი მომღერალი თამუნა ამონაშვილი იქნება, რომელიც წლებია რუსეთში ქმართან, რეჟისორ რეზიკო არჩვაძესთან ერთად ცხოვრობს.
– ბილეთი უკვე ავიღე და რამდენიმე დღეში მოსკოვში მივემგზავრები. კონკურსში უნდა მივიღო მონაწილეობა, მაგრამ მის სახელწოდებას ვერ დაგისახელებთ. ვერც იმ პიროვნების ვინაობას გაგიმხელთ, ვისგანაც ეს წინადადება მივიღე, რადგან მას არ სურს. ამ შემოთავაზებას იმიტომ დავთანხმდი, რომ აქ არაფერი ხდება. სანამ რამე გამოჩნდება, ისე ხომ არ ვიქნები? აქამდე სხვა ქვეყანაში წასვლაზე არასოდეს მიფიქრია, რადგან ქართულ შოუბიზნესში ვიკიდებდი ფეხს. ახლა იქ მინდა, ჩემი საქმე ავაწყო. აქედან ოპტიმისტური განწყობით მივდივარ. მოსკოვში დროებით ჩემს მეგობართან დავბინავდები. იქ თამუნა ამონაშვილი მელოდება. 26 წლის ასაკში ფაქტობრივად ახალ ცხოვრებას ვიწყებ. მოსკოვში დიდი მუსიკალური ბაზარია, დიდი ფული ტრიალებს და იმედი მაქვს, წარმატებას მივაღწევ, – გვითხრა დათუნამ.
რამდენიმე ხნის წინ მან ნინი ქარსელაძესთან ერთად დუეტი ჩაწერა. კლიპის სატელევიზიო ჩვენებამ ჭორი ააგორა, რომ მათ შორის რომანი იყო. დათუნა ირწმუნება, რომ მის პირად ცხოვრებაში ახალი არაფერი ხდება და ისევ სიყვარულის მოლოდინშია.
– ამ კლიპის მიზანი არ იყო, ჩემსა და ნინიზე ჭორები აგორებულიყო, ჩვენ მეგობრები ვართ. ტოქ შოუში ჩვენი კომენტარები ისე დაჭრეს, რომ ხალხს ეგონა, ჩვენ შორის რაღაც ხდებოდა, მთელი თბილისი მირეკავდა და მეკითხებოდა, მართლა გვიყვარდა თუ არა ერთმანეთი. შეყვარებული არ ვარ. ჩემს ცხოვრებაში სიყვარული იგვიანებს, მე კი მოუთმენლად ველოდები. მე თუ მკითხავთ, დიდი საცოდაობაა, რომ აქამდე არავინ მყვარებია. ერთი კი ვიცი, რომ "ის" მთელი არსებით შემიყვარდება. ისე, მაგარი წუნია კი ვარ. მანდილოსანს გამადიდებელი შუშით ვაკვირდები, – გაგვიმხილა მომღერალმა.
ქართველ მსმენელებს თავი რომ არ დაავიწყოს, დათუნა მათ სამ ახალ სიმღერას უტოვებს. "სარკე" ახალგაზრდა მომღერალს წარმატებებს უსურვებს.
ლანა კიკნაძე