უცნაური ქორწინებები

ჩვენს შეშლილ დროებაში ბევრს როდი განაცვიფრებს ცნობები ცხოველთა ქორწინებების შესახებ. კეთილი პატრონები გართობის მიზნით „კანონიერად აქორწინებენ“ ძაღლებს, კატებს, ცხენებს და თუთიყუშებსაც კი. ზოგიერთი კიდევ უფრო შორს მიდის და ცოლად ირთავს... გველს ან დელფინზე თხოვდება. რას იზამ, ერთი ცნობილი ფრაზის არ იყოს, „სიყვარულს რას გაუგებ, ჩემო ოლღა!“

ქალია და გუნება!
ახლახან ისრაელში ფრიად უჩვეულო ქორწინება შედგა. იქორწინეს 41 წლის მილიონერმა შერონ ტენდლერმა ლონდონიდან და 35 წლის... დელფინმა სინდიმ.
ქალბატონმა დელფინთა ვოლიერში მცხოვრები სინდი თხუთმეტი წლის წინ გაიცნო, როდესაც პირველად ჩავიდა ისრაელის საკურორტო ქალაქ ეილათში. ბრიტანელი ქალბატონი დელფინით პირველივე დანახვაზე მოიხიბლა, ანუ ეს იყო ერთი ნახვით შეყვარება. მას შემდეგ შერონი წელიწადში ორ-სამჯერ ჩადიოდა ეილათში, რათა თავის ახალ მეგობართან ერთად გაეტარებინა დრო. მთელი ამ ხნის განმავლობაში იგი საუცხოოდ გრძნობდა თავს, მხოლოდ საყვარელ არსებასთან განშორება იყო აუტანელი. ეილათში თავისი ერთ-ერთი მორიგი ჩასვლისას შერონმა დელფინის მომთვინიერებელს უჩვეულო თხოვნით მიმართა: ნება დაერთოთ მისთვის, გარკვეული თანხის საფასურად სინდის ცოლი გამხდარიყო.

ქორწილი „საქმროს სახლში“ , ვოლიერში შედგა. მას ესწრებოდა მრავალრიცხოვანი სტუმარი პატარძლის მხრიდან, დელფინარიუმის შოკირებული დამთვალიერებლები და აგრეთვე სასიძოს მეგობრები. როგორც წესი და რიგია, პატარძალს თეთრი კაბა ეცვა, იყო ამბორი და საქორწინო სუფრა, სადაც თევზეულის კერძები ჭარბობდა. საზეიმო წვეულების ბოლოს პატარძალი წყალში მოისროლეს, რათა იგი თავისი კანონიერი მეუღლის ალერსით დამტკბარიყო. „მე მსოფლიოში ყველაზე ბედნიერი ქალი ვარ!“ - განაცხადა შერონმა. მისი თქმით, როცა იგი სინდისთან ერთად დაცურავს, მას სიმშვიდე და ნეტარება ეუფლება.

ეს ყველაფერი, ცხადია, მდიდარი ქალბატონის ახირებად შეიძლება ჩავთვალოთ, მაგრამ თვითონ შერონი საკუთარ თავს დამთხვეულად არ მიიჩნევს. „უბრალოდ, მე მარტოსული ადამიანი ვარ და ვერავისთან ვგრძნობ თავს ასე კარგად და მშვიდად“
როგორც კი ახალგამომცხვარი ქმარი საკმარისად შეეჩვევა თავის ცოლს, ახალდაქორწინებულები ლონდონში, შერონის სახლში გადავლენ, სადაც სინდის უკვე ელოდება ზღვის წყლით სავსე უზარმაზარი აუზი.

კობრა - ჩემი ცოლი
ცხოველებთან დაქორწინებების რაოდენობით ინდოეთს პირველი ადგილი უჭირავს მსოფლიოში. ამის მიზეზი ადგილობრივი ცრურწმენებია. არც ისე დიდი ხნის წინ ინდოეთის ორისის შტატში, ალბათ, ერთ-ერთი ყველაზე უჩვეულო საქორწინო ცერემონია გაიმართა. ორი ათასი სტუმრის თანდასწრებით 30 წლის მამაკაცი... გველზე დაქორწინდა.
შარმა დალმიას, როგორც საქმროს შეეფერებოდა, საზეიმო სამოსი ეცვა. მღვდელმსახურმა დალოცა კავშირი, წაიკითხა ტრადიციული მანტრები. პატარძალი მშვიდად იწვა მის გვერდით იატაკზე.
„მართალია, გველებს ლაპარაკი არ შეუძლიათ, მაგრამ მაინც ვამყარებთ კავშირს ჩვენებურად. ყოველ დილით და საღამოს მე რძეს ვდებ ჭიანჭველების ბუდესთან, სადაც ჩემი მეუღლე ცხოვრობს. იგი გამოდის და მე არასოდეს მკბენს, - ამბობს შარმა. - ზოგჯერ ერთად ვთბებით მზეზე, ხანდახან ჩემთან სახლშიც შემოდის“ .
დალმია ინდური საზოგადოების ყველაზე დაბალ კასტას განეკუთვნება და ვაიშნავთა სექტის წევრია. სწორედ მისმა მიმდევრებმა დაითანხმეს იგი, გველზე ექორწინა, რომელიც ინდოეთში წმინდა ცხოველად ითვლება. სექტის წევრთა აზრით, ეს კავშირი მათ წარმატებას მოუტანს და ყველა ფათერაკისგან დაიხსნის. ასეთივე აზრისაა შარმას დედაც. „ძალიან ბედნიერი ვარ. ჩემი ვაჟი ხშირად ავადმყოფობდა, ჩვენ კი მკურნალობის ფული არ გვქონდა. მაგრამ მას შემდეგ, რაც გველთან გააბა კავშირი, სნეულებებმა უკან დაიხიეს და ჩემს შვილსაც შეუყვარდა კობრა“ , - განაცხადა ახალგამომცხვარმა დედამთილმა.

წყევლის საფასური
აი, ოცდათოთხმეტი წლის სელვაკუმარს სოფელ ვილაკულამიდან კი თავისი მიზეზები ჰქონდა... ძაღლზე დასაქორწინებლად. მას ამ გზით სურდა თავი დაეღწია „ძაღლის წყევლისგან“ , რის შედეგადაც დაინვალიდდა.
სელვაკუმარს ჯანმრთელობის პრობლემები მას შემდეგ დაეწყო, რაც გზაზე შემხვედრი ორი ძაღლი მოკლა. რამდენიმე დღის შემდეგ სმენა დაუქვეითდა, თითქმის მთლიანად დაკარგა მეტყველებისა და დამოუკიდებლად გადაადგილების უნარი. ექიმების დახმარებით ნელ-ნელა დადგა ფეხზე და ჯოხით სიარული ისწავლა, მაგრამ ჯანმრთელობა სრულად მაინც ვერ აღიდგინა.
სასოწარკვეთილმა ინვალიდმა ადგილობრივ მაგებს მიმართა, რომლებმაც აუხსნეს სელვაკუმარს, რომ იგი საკუთარი სისასტიკის მსხვერპლი გახდა და წყევლა დაიტეხა თავზე, რისგან თავის დაღწევის ერთადერთი საშუალება ძაღლზე დაქორწინება ყოფილა.
მცირე ხნის ძიების შემდეგ საქმრომ თავისი არჩევანი 4 წლის მომხიბლავ ძუკნაზე - სელვიზე შეაჩერა. სელვაკუმარის სახლში დიდი ზარ-ზეიმი გაჩაღდა, თუმცა ორგანიზატორები იძულებული გახდნენ ოდნავ გადაეხვიათ ტრადიციებისთვის, რომლის თანახმადაც, პატარძალს სასიძოს სახლში შესვლისას რძეს და ხილს სთავაზობენ: სელვის რძე და ძვალი შესთავაზეს, რაც მან სიამოვნებით მიირთვა. შემდეგ ახალდაქორწინებულთა მილოცვის ცერემონია დაიწყო, მაგრამ პატარძალს ხმაურის შეეშინდა და მოკურცხლა, თუმცა სიძის ყურადღებიანმა მეგობრებმა სწრაფად მოძებნეს დედოფალი და თავის კუთვნილ ადგილზე დააბრუნეს.

მდიდარი მემკვიდრე
რამდენიმე ანალოგიური ქორწინება აშშ-შიც დარეგისტრირდა. ამ ქვეყნის ზოგიერთ შტატში ნებადართულია, უფრო ზუსტად, არ არის აკრძალული ცხოველებზე დაქორწინება. უბრალოდ კანონმდებლებს აზრადაც არ მოუვიდოდათ, რომ ვიღაც სრულ ჭკუაზე მყოფი ინდივიდი ფაუნის ამა თუ იმ წარმომადგენელზე მოისურვებდა გათხოვებას ან მის ცოლად მოყვანას.
მარგარეტ ჯონსს, ილინოისის შტატიდან, როდესაც ბედის უკუღმართობით განსვენებული მილიონერის ქვრივი გახდა და შეიტყო, რომ მისმა ყოფილმა მეუღლემ მთელი თავისი ქონება საყვარელ ნაგაზს - ბობის დაუტოვა, ასეთი ქორწინება ძალიანაც დაუჯდა ჭკუაში! და გაჰყვა კიდეც ცოლად მდიდარ მემკვიდრეს.

აჩქარების სიკეთე
ფრანგ პიერ გის შეჯიბრებაზე აგვიანდებოდა, ამიტომ შინიდან საუზმის გარეშე გამოვარდა და ასპარეზობის ადგილზე გვარიანად მოშიებული მივიდა. ალბათ ამიტომაც მოიპოვა ჩემპიონის ტიტული, ვინაიდან ძეხვის ბაზრობაზე ქალაქ რეტელში მან ნახევარ საათში თექვსმეტი ძეხვი გადასანსლა, რომელთაგან თითოეული ას გრამზე მეტს იწონიდა.
მაგრამ მსოფლიო რეკორდამდე ცოტა მაინც დააკლდა. ორი წლის წინ ჩემპიონმა ამავე დროში ოცი ძეხვი შეჭამა. თუმცა იქნებ ასე ჯობდა კიდეც, რადგან მაშინდელი რეკორდსმენი ასპარეზობის შემდეგ საავადმყოფოში მოხვდა.
დაფნის გვირგვინით შემკულმა პიერმა თავისი გამარჯვება გულშემატკივრებთან ერთად რესტორანში აღნიშნა, სადაც მისთვის ასევე არ უღალატია მადას.

„მაღალი სიყვარული“
ახალგაზრდა პარიზელი პიერ სილვანო ალპინიზმითაა გატაცებული, მაგრამ რადგან ახლომახლო მთები არსადაა, იგი სიმაღლეებს ყველაზე მაღალ პარიზულ შენობებზე ასვლით იპყრობს. პიერი სწორედ „მოყვარულ მეკლდეურთა სექციაში“ შეხვდა ალპინისტ პრისცილას. ისინი მალე მიხვდნენ, რომ ერთმანეთისთვის იყვნენ შექმნილი და ქორწილიც წმინდა კლოტილდას ეკლესიის სახურავის ქვემოთ გადაიხადეს. მეჯვარეები მათ გვერდით ეკიდნენ, მღვდლები - ოდნავ ზემოთ.
მშობლებს ქვემოთ, დედამიწაზე მოუხდათ ლოდინი. ისინი უკვე არც ისე ახალგაზრდები არიან და, თანაც, არც სიმაღლეთა დაპყრობისკენ მიუწევთ გული.


მთვარის წყლის გამყიდველი
პოლიციელებს ბრაზილიაში მოსაწყენად აშკარად არ სცალიათ. მაგალითად, ამჟამად ისინი ეძებენ თაღლითს, რომელმაც 200 ათასი დოლარის ქონება დააგროვა. ის კი იმით გამოიმუშავა, რომ 14 დოლარად ყიდდა ერთ გალონ წყალს, რომელიც, მისი თქმით... მთვარიდან იყო ჩამოტანილი და, რაღა თქმა უნდა, სამკურნალო თვისებები ჰქონდა. არც ერთ მყიდველს აზრადაც არ მოსვლია, რომ მთვარეზე წყალი არ არის, არადა, მათ შორის საკმაოდ კულტურული ადამიანები იყვნენ, ერთი ასტრონომიც კი.

„უსახლო“ სოფელი
ევროპის ერთ-ერთი ყველაზე კურიოზული სოფელი ირლანდიის აღმოსავლეთ სანაპიროსთან მდებარე მცირე კუნძულზეა განლაგებული. ამ სოფელში არც ერთი სახლი არ დგას. მთელი მოსახლეობა 70 ძველ და სანაოსნოდ გამოუსადეგარ გემზე ცხოვრობს, რომლებიც ნაპირზეა დამაგრებული. რა თქმა უნდა, დიდი ხნის წინაც შეიძლებოდა ნორმალურ შენობებში გადასვლა, მაგრამ სოფლელები კატეგორიული წინააღმდეგნი არიან. მართალია, კომფორტი მეტი იქნება, მაგრამ სოფელი თავის უნიკალურობას დაკარგავს.

რისთვის ვამსხვრიოთ ავეჯი...
ირლანდიის დედაქალაქ დუბლინის ერთ-ერთ ბარში ასეთი განცხადებაა გამოკრული: „ბარის მეპატრონე დაბეჯითებით სთხოვს პატივცემულ სტუმრებს, ჩხუბის დროს არ ისარგებლონ მისი დაწესებულების ჭურჭლითა და ავეჯით. ამ მიზნით მომარაგებულია და შემოსასვლელშია მიყუდებული საუკეთესო ხარისხის ხელკეტები და ჯოხები. ისინი უკვე გამოცდილია, ბევრჯერ და წარმატებით იქნა გამოყენებული ამ საქმეში“ .

პაატა გეგელაშვილი
ჟურნალი „რეიტინგი“