დათო ქაცარავას ცოლი ქმრის თაყვანისმცემლებისგან შეტევას უძლებს

სპორტული გარეგნობა, მამაკაცური შარმი, გალანტურობა და ფილმებით მოპოვებული პოპულარობა დათო ქაცარავას ოჯახს ბევრ პრობლემას უქმნის. მისი თაყვანისმცემელი ქალები პირდაპირ შეტევაზე არიან გადასული და სულაც არ აბრკოლებთ, რომ მათი ყურადღების ობიექტი უკვე 15 წელია ერთი ქალის, საკუთარი ცოლის, სოფო ხაჭაპურიძის ერთგულია. ამ ხნის განმავლობაში მათმა ურთიერთობამ რთული ეტაპებიც გამოიარა, იყო ჩხუბიც და ხანმოკლე დაშორებაც, მაგრამ, როგორც დათო ამბობს, ეს ყველაფერი მათ სიყვარულს ხიბლს მატებდა.
ცოლ–ქმარს, რომლებიც დღემდე შეყვარებულებივით გამოიყურებიან, ოჯახური ცხოვრების პერიპეტიებზე სასაუბროდ შევხვდით.

– როგორ დაახასიათებდით იმ გზას, რაც თქვენმა ოჯახმა დღემდე გამოიარა?
დათო: ჩვენი 15 წლიანი ურთიერთობის განმავლობაში ძალიან საინტერესო და ლამაზი ეტაპების გავლა მოგვიხდა. 21 წლის ვიყავი, როცა ერთმანეთი შეგვიყვარდა. ყველაფერი ძალიან ლამაზი იყო და ამიტომ სულაც არ მიკვირს, რომ ეს სიყვარული დღემდე არ ნელდება. იყო ჩხუბი, გაშორებები, ერთმანეთის მოკვლის სურვილიც კი! ყველაფერი ქართულად გამოგვდიოდა, მაგრამ ერთმანეთი იმდენად გვიყვარს, ეს ეტაპები ჩვენს ურთიერთობას მხოლოდ და მხოლოდ ხიბლს მატებდა, რადგან შემდეგ შერიგება ათმაგად ტკბილი და გემრიელი გამოდიოდა.
– ეს რა ეტაპზე ხდებოდა, სანამ შეყვარებულები იყავით თუ ქორწინების შემდეგაც?
დათო: ცოლქმრული ცხოვრების დაწყებიდანვე ვჩხუბობდით, ოღონდ ეს იყო ძალიან ხანმოკლე ჩხუბი. უკვე 8 წელია ცოლ–ქმარი ვართ, ამ ხნის განმავლობაში ორჯერ დავშორდით, მაგრამ მეც და სოფომაც ზუსტად ვიცოდით, რომ ეს ჩვენი ფლირტის ნაწილი იყო.
– რა იყო ძირითადად თქვენი ჩხუბის მიზეზი?
სოფო: დათო ცნობილი, პოპულარული ბიჭია და ორივე სქესის წარმომადგენლების მხრიდან გამუდმებით ყურადღების ცენტრშია, რთულია, ამ ყველაფერს მარტივად შეხედო. ბევრს უკვირს, შენ საერთოდ ჭკუაზე როგორ ხარ, როგორ არ ეჭვიანობო. ჩხუბის მიზეზი ძირითადად ჩემი ეჭვიანობა იყო. გარდა ამისა, შეყვარებულობის პერიოდში მამაკაცებს უყურადღებობა სჩვევიათ, მათთვის დრო ცოტა სხვანაირად აღიქმება. მაგალითად, ქალს 5 წუთში ენატრება, კაცს, მინიმუმი, ერთ კვირაში.
– დათო, სოფო ეჭვიანობას რითი პასუხობთ?
დათო: ყოველთვის ვცოფდებოდი, ახლაც ვცოფდები და ალბათ მომავალშიც გავცოფდები, რადგან ვიცი, სოფო როგორ მიყვარს. როცა ის ეჭვიანობს, ეს იმის ნიშანია, რომ ვერ ხვდება, როგორ მიყვარს და რამდენად მნიშვნელოვანია ის ჩემთვის.
სოფო: ვიცი, რომ დათოს ძალიან ვუყვარვარ და მეც მიყვარს, მაგრამ იყო შემთხვევები, როცა რაღაცეებს ვხედავდი. ბოლო–ბოლო, სულელი ხომ არ ვარ?! ყველაფერზე თვალის დახუჭვა სწორად არ მიმაჩნია.
– ანუ კონკრეტული მიზეზები გქონდათ?
სოფო: მიზეზებიც მქონდა და ვაღიარებ, რომ ბუნებითაც ეჭვიანი ვარ.
– კონკრეტულად რა იყო მიზეზები?
სოფო: უცნობები პირდაპირ დარეკვას ვერ ბედავენ, მაგრამ უკვე გაცნობილები სოციალური ქსელებით ამას ახერხებენ. სოციალური ქსელი ბარიერების გარღვევის არაჩვეულებრივი საშუალებაა, ასეთი არაერთი მცდელობა ყოფილა. როცა გოგონები დათოს მისამართით ზედმეტად ავლენენ ინტერესს, რა თქმა უნდა, ვღიზიანდები. ხომ იცი, რომ მას ოჯახი ჰყავს? არ მგონია, ვინმეს იმის წარმოდგენა შეეძლოს, რომ დათოსთან რამე შანსი აქვს.
– დათო, სოფო თქვენს თაყვანისმცემლებს მედგრად იგერიებს?
დათო: სოფო არ იგერიებს, ამ ყველაფერს ერთმანეთში ვარკვევთ. როგორც წესი, შეტევებზე არ გადადის ხოლმე.
სოფო: დათო გალანტური კავალერია, ძალიან კეთილი და ყურადღებიანია მანდილოსნის მიმართ. ამიტომ მსგავსი რეაქციები ზოგიერთ ქალს სხვა რაღაცა ჰგონია, ფიქრობს, რომ მორჩა, დათო ხვალ ცოლად მოიყვანს! ქალებისადმი მის დამოკიდებულებას არასწორად იგებენ. მიმაჩნია, რომ მამაკაცი ასე უნდა იქცეოდეს, მაგრამ, სტატუსიდან და შინაარსიდან გამომდინარე, ქალმა ეს ყველაფერი შესაბამისად უნდა აღიქვას.
– დათო, გვერდით არაჩვეულებრივი ქალი გყავთ. თქვენ არასოდეს გიეჭვიანიათ?
დათო: რა თქმა უნდა, ვეჭვიანობ, მაგრამ ამას ბევრად უკეთესად ვნიღბავ, ვიდრე სოფო. ჩემი ცხოვრებისეული გამოცდილება გარკვეულწილად ეჭვიანს მხდის, მაგრამ ზუსტად ვიცი, როცა გიყვარს და უყვარხარ, ამ გრძნობას გასაქანი არ უნდა მისცე. ამან შეიძლება ძალიან ცუდ შედეგამდე მიგიყვანოს.
– სოფოს თაყვანისმცემლები ისევე რომ აქტიურობდნენ, როგორც თქვენი, რა რეაქცია გექნებოდათ?
დათო: სერიოზული! ალბათ ბევრი იქნებოდა ნაცემი და დასისხლიანებული.
სოფო: რაღაც შემოთავაზებები მქონდა, სერიალის კასტინგებზე დამიძახეს, მაგრამ ჩემმა მეუღლემ ქვა ააგდო და თავი შეუშვირა, არც ერთ კასტინგზე არ გაჭაჭანდებიო.
– დათო, მამაკაცებს რომ გკითხოთ, რეალიზებული ქალები მოგწონთ, თქვენ კი კასტინგზე ცოლი არ გაუშვით?
დათო: სოფო თვითრეალიზებულია, თავისი საქმის არაჩვეულებრივი პროფესიონალია. ერთ–ერთი სპორტკომპლექსის პიარის და მარკეტინგის დირექტორია. მას ნახევარი თბილისი იცნობს, საქმიანი ურთიერთობები აქვს სხვადასხვა ბიზნესის თუ შოუბიზნესის წარმომადგენლებთან. ვიცი, ზოგადად რა სიტუაციაა გადასაღებ მოედანზე. შესაძლებელია, ისეთ სცენაში თამაშის საკითხი დაგიყენონ, ჩემთვის მისაღები არ იყოს, იქ ჩემმა ცოლმა ითამაშოს. ამას გარდა, არ მინდა, სალაპარაკო გახდეს, სოფო კარგად თამაშობს თუ ცუდად. მოკლედ, არ მსურს, ჩემი მეუღლე განხილვის საგანი გახდეს! მე ვიცი, როგორ მაქებენ და მაკრიტიკებენ, ეს საკმარისია. ეს ჩემი მიდგომა და პოზიციაა, რომელიც სოფომ გაიზიარა და დიდი მადლობა ამისთვის.
– რა შეცვალა წლებმა თქვენს ურთიერთობაში?
დათო: ცვლილება მხოლოდ უკეთესობისკენაა. ძალიან ლამაზი და კარგი ურთიერთობა გვაქვს თავისი ჩხუბებით.
– და დღემდე ასე გრძელდება?
დათო: რა თქმა უნდა! ეს არც არასდროს დამთავრდება. ამის გარეშე ურთიერთობა ძალიან ტკბილი იქნებოდა, მე კი მარილიანი და ცხარე მიყვარს, როგორც ჭეშმარიტ მეგრელს.
სოფო: ზოგიერთ მამაკაცს საჩუქრები, სიურპრიზები არ უყვარს. დათოს ეს შეყვარებულობის დროს უყვარდა, მერე ცოტა დაავიწყდა, ახლა კი ისევ გაახსენდა. თავისთავად სასიამოვნოა, საჭირო მომენტში საჭირო დოზით სიურპრიზს რომ გიკეთებს.
– სოფო, რაზე შეიძლება დათო გაგიბრაზდეთ?
სოფო: ასე რომ ვთქვათ, გაჭედვა ყველა ქალს ემართება. მეც რაღაცაზე რომ გავჭედავ და ვუკაკუნებ და ვუკაკუნებ, ამაზე მიბრაზდება.
– თქვენი აზრით, უნდა აპატიოს თუ არა ცოლმა ქმარს ღალატი, გაითვალისწინოს თუ არა, რომ ის მამაკაცია, ქართველია და ასე შემდეგ?
სოფო: არ ვიცი. კაცის ფსიქიკა მართლა განხვავებულია და ეს ყველა ქალმა უნდა შეიგნოს. ძალიან მტკივნეული და სასწაულად მძიმე თემაა. არის სიტუაციები, როცა მართლა უნდა აპატიო. როცა იცი, რომ შენი ურთიერთობა ჭეშმარიტ გრძნობაზეა დამყარებული, მასთან დრო, შვილები, აღუწერლად ლამაზი წუთები გაკავშირებს... არ ვიცი, იქ რა ადგილი აქვს ღალატს.
– სამი შვილის მშობლები ხართ. რა შეცვალა მათმა დაბადებამ თქვენში?
დათო: ბავშვი ჩვენი ურთიერთობის ლოგიკური გაგრძელება იყო. ყველაზე დიდი საჩუქარი, რაც ამ ცხოვრებისგან შეიძლება მიიღო, ეს არის კარგი და ჯანმრთელი შვილები. მათ თავიანთი წილი სიყვარულის ოკეანე აქვთ, მაგრამ ამით ჩვენს ურთიერთობას არაფერი დააკლდა, პირიქით, კიდევ უფრო ლამაზი და ძლიერი გახადა ის.
– სოფო, დიასახლისობისთვის იცლით?
დათო: სოფოს დიასახლისობა კი მომენატრა!
სოფო: სხვათა შორის, ხანდახან მეც მენატრება ხოლმე. საჭმელების კეთება, ნამცხვრების, ტორტების ცხობა მეხერხება, გამიკეთებია კიდეც და დათოსაც მოსწონდა.
– დათო, როგორც ვიცი, ერევანში იყავით გადაღებებზე. რა ფილმში მიიღეთ მონაწილეობა?
დათო: რუსულ–სომხურ ერთობლივ პროექტში მივიღე მონაწილეობა. ფილმი სათავგადასავლოა. მისი პრემიერა რუსეთში იგეგმება. დიდი იმედი მაქვს, რომ ამ ფილმით ჩემთვის რუსული ბაზარი გაიხსნება და ჩემით რუსი პროდიუსერები დაინტერესდებიან. ცოტა ხანში ყაზახეთში მივფრინავ. ერთ–ერთ ყველაზე ცნობილ რეჟისორთან ვითამაშებ ბანდიტის როლს. რუსულ ტელესერიალშიც ვარ დამტკიცებული, რომელსაც "მსროლელი" ჰქვია. ერთ–ერთი მთავარი პერსონაჟი, კავკასიელი სპეცრაზმელი უნდა ვითამაშო. ამას გარდა, კიდევ ორ პროექტს მთავაზობენ, მათ შორის, გერმანელი ოფიცრის როლს. იმდენად შემიყვარდა ეს საქმე და ისეთი სერიოზული ნარკოტიკია, ალბათ ვერასდროს გადავაგდებ, სანამ ის არ გადამაგდებს.
სხვათა შორის, მე და ჩემი უფროსი ბიჭი მიშო ქართულ–აზერბაიჯანულ სერიალში დაგვამტკიცეს. სამწუხაროდ, მიშო ჩემი შვილის როლში არ იქნება. ერთ–ერთი მთავარი გმირის შვილი იქნება.
ეკა ლემონჯავა