სალომე გოგიაშვილს ქმარი მოკლე კაბას არ აცმევს

"იმ დილით, როცა ვიცი, რაღაც ახალი უნდა ჩავიცვა, კარგ ხასიათზე ვიღვიძებ", – გვითხრა ტელესახე სალომე გოგიაშვილმა. საზღვარგარეთული შოპინგები, მაღაზიიდან მაღაზიაში სიარული, სამოსის შერჩევა, მოზომება, შეძენა – ეს ყველაფერი მისთვის ნაცადი საშუალებაა, როცა სურს, გუნება გამოიკეთოს. ქმართან, ვახო ნიკოლეიშვილთან ერთად საყიდლებზე სიარული ძალიან უყვარს, მაგრამ ითვალისწინებს, რომ ეს პროცესი საათზე მეტ ხანს არ უნდა გაგრძელდეს, თორემ მერე ქმარს "ისტერიკა" ეწყება. მის გემოვნებას სალომე ენდობა და უჯერებს კიდეც. არც ვახო მისცემს უფლებას, გამომწვევად ჩაიცვას და არც თავად აქვს ამის სურვილი.
– სალომე, ასაკთან და დროსთან ერთად როგორ შეიცვალა თქვენი გემოვნება და სტილი? 
– ბავშვობის ფოტოებს რომ ვუყურებ და ვხედავ, რა მაცვია, მეცინება. დედაჩემის ბავშვობის ფოტოებზე ხომ ძალიან ვხალისობ. ვერც წარმომედგინა, თუ მსგავსი ტანსაცმლის ჩაცმა შეიძლებოდა. დედასთვის რომ მითქვამს, რა გაცვია–მეთქი, დროთა განმავლობაში მოდაში შემოსულა და მერე მეც ჩამიცვამს.
ვცდილობ, მოდის ტენდენციებს მივყვე. ყველაფერს ვაქცევ ყურადღებას – სტილს, ფერს... გააჩნია, იმ პერიოდში ტენდენციური რა არის. ვთქვათ, როცა გრძელი კაბები შემოდის მოდაში, ჩემი გარდერობიც შესაბამისად იცვლება. ერთი პერიოდი ძალიან მოდური იყო წითელი და ჩემს გარდერობში საგრძნობლად მოიმატა ამ ფერმა, მიუხედავად იმისა, რომ მაინცდამაინც არ მიყვარს.
– აშკარაა, რომ ფერების სიჭრელეს არ ერიდებით.
– გარუჯულ სხეულს ღია ფერები ძალიან უხდება და, რა თქმა უნდა, ჩემი საზაფხულო გარდერობი ძალიან ჭრელია. მაქვს ფერადი შარვლები, ქვედატანები, მაისურები...
– არის ისეთი სტილი, რომელიც საკუთარ თავზე ვერ წარმოგიდგენიათ?
– არასოდეს ჩავიცვამ შორტებს და მინი ქვედატანს. ჯერ ერთი, ამის უფლებას საკუთარ თავს არ ვაძლევ და მეორეც, მეუღლე, შვილები მყავს და არც ასაკი მიწყობს ხელს. სხვათა შორის, ერთმა ქალბატონმა "ფეისბუქში" მომწერა, შენ მსუბუქი ყოფაქცევის ქალი ხარ, რადგან მომდგარი შარვლები გაცვია, ჩემს ახალგაზრდობაში ასეთი შარვლები ბოზებს ეცვათო... ისეთი ჯინსებიც მაქვს, რომლებიც ტანზე მომდგარი და დახეულია. ჩემს გარდერობში თითქმის ყველაფერს შეხვდებით – გამოსასვლელი სამოსიდან დაწყებული ყოველდღიური ტანსაცმლით დამთავრებული. გამომწვევი სამოსი ნაკლებად მაქვს. არ მიყვარს, როცა გამომწვევად მაცვია, ვერც ვიხდენ, არც მომწონს და არც ჩემში ზის. მყავს მეგობრები, რომლებსაც ასე ჩაცმა უხდებათ. მათ რომ ვუყურებ, მომწონს, მაგრამ ჩემი სტილი არაა.
– როგორია თქვენი შოპინგის პროცესი?
– ძალიან მიყვარს მეუღლესთან ერთად სიარული, რადგან რაც მინდა, იმას ვყიდულობ და უარს არაფერზე მეუბნება. მარტო რომ მივდივარ, ვფიქრობ, ახლა ბავშვებს ვუყიდი და ჩემთვის მერე მოვალ–მეთქი, მაგრამ ის "მერე" აღარასოდეს მოდის. როცა ქმართან ერთად მივდივარ, მეუბნება, შენთვის მოვედით, ამიტომ ჯერ შენ იყიდი და მერე ბავშვებს ვუყიდოთო. ოღონდ, თუ ერთ საათს გადავაჭარბე, საშინელი გამომეტყველება აქვს. როცა დიდხანს დავდივარ, ისტერიკაში ვარდება. კაცებს ყიდვის პროცესი არ უყვართ. თავად ზუსტად იცის, რა უნდა, უცებ იყიდის და წავა. მე უნდა ჩავიცვა, ორი საათი ვუყურო ჩემს თავს, ვიფიქრო. ამიტომ ჩემი ქმრისთვის ეს რთული პროცედურაა.
მყავს ბავშვობის მეგობარი, თაკო, რომელთან ერთადაც ახლახან საზღვარგარეთ ვიყავი. მაღაზიაში რომ შევდიოდით, ის ერთ მხარეს მიდიოდა, მე – მეორე მხარეს. მერე ერთმანეთს ვეძახდით, ამას შეხედე, როგორ მოგწონს–თქო. ერთმანეთს რომ შევხედავდით, ზუსტად ერთნაირი სამოსი გვეჭირა ხელში. ბევრს ვიცინოდით. საბოლოოდ ერთნაირი ტანსაცმელი ვიყიდეთ. ახლა სულ პრობლემა გვაქვს, ერთმანეთს ვურეკავთ, რას იცვამ, რომ ერთნაირ ფორმაში არ ვიყოთ–თქო.
– უიღბლო შოპინგი გქონიათ, როცა მაღაზიიდან იმედგაცრუებული და ხელცარიელი გამოსულხართ?
– საჩემო რამეს ყველგან ვპოულობ, თუმცა ახლა ერთი შემთხვევა გამახსენდა. სარფიდან საზღვარზე რომ გადადიხარ, იქ გახსნეს სავაჭრო ცენტრი. ამბობდნენ, რომ არაჩვეულებრივი კოლექციები ჰქონდათ. ერთ ზაფხულს მე და დედა ბავშვებთან ერთად შეკვეთილში ვისვენებდით. გადავედით სავაჭრო ცენტრში, ოღონდ თავბედი ვიწყევლეთ. იმედი მქონდა, რომ მაისურს მაინც ვიყიდდი, მაგრამ მსგავსი სამარცხვინო და საშინელი არაფერი მინახავს. საყურეც კი ვერ შევიძინე. ეგ იყო პირველი შემთხვევა, როდესაც უკან ხელცარიელები დავბრუნდით.
– ყველაზე კარგად რომელ ქვეყანაში არჩევთ სამოსს?
– ამ მხრივ, ძალიან მიყვარს თურქეთი, ყველა სახის მაღაზიაა, კარგი არჩევანია. ბოლოს იტალიაში ვიყავი. იტალიელებს დახვეწილი გემოვნება, სამოსის კარგი შეხამების უნარი აქვთ. მე და ვახომ ფლორენციაში აღმოვაჩინეთ ასაკოვანი იტალიელი დიზაინერი, რომელიც სამოსს თავად კერავდა და ყიდდა. მსგავსი სილამაზე არსად მინახავს. მაღაზიაში თავად დიზაინერი გვხვდებოდა. ძირითადად მამაკაცის კოსტიუმები ჰქონდა და ქალის რამდენიმე კაბა. ჰალსტუხებსაც კი საკუთარი ხელით კერავდა. ჩემმა მეუღლემ რაღაცეები შეიძინა. აღფრთოვანებული დავრჩი კლიენტებისადმი ფლორენციელთა მიდგომით. ისეთი დახვედრა იციან, რომ არ იყიდო, მოგერიდება.
საქართველოში მაღაზიაში თითქოს ბრაზდებიან, საყიდლად რომ შედიხარ. აქ ნაკლებად თუ დაჯდება დიზაინერი მაღაზიაში, ამბიცია აქვს, რომ გამყიდველი სხვა უნდა ჰყავდეს. იტალიაში კი ის კაცი თავად ყიდდა, დეტალურად გვიხსნიდა, რა როგორ ჰქონდა შეკერილი. იმდენად შეგვიყვანა აზარტში, რომ ვახომ კოლექციის ნახევარი შეიძინა. მერე ამბობდა, ამდენი რად მინდაო.
ვგიჟდები ბაქოზე, თუმცა, რაც იქ იყიდება, აქ რომ ჩამოიტანო, არ შეიძენენ. ისეთი ხასხასა ფერებია, ზუსტად ვიცი, აქ არავინ ჩაიცვამს.
– ქალთა უმრავლესობისთვის დილა იმაზე ფიქრით იწყება, რა ჩაიცვას. თქვენ როგორ აკეთებთ არჩევანს?
– მეც ბევრს ვფიქრობ, რადგან მინდა, ყოველდღე კარგად გამოვიყურებოდე. ერთი და იგივე ტანსაცმელი მბეზრდება. მივხვდი, რომ შოპინგთერაპია ყველაზე მაგარი წამალია დეპრესიიდან, ცუდი ხასიათიდან გამოსასვლელად. მაღაზიაში რომ შევდივარ, ჩემი გონება მხოლოდ ამითაა დაკავებული, სხვა დანარჩენი აღარ მახსოვს. გაცილებით უკეთეს ხასიათზე ვიღვიძებ, როდესაც ვიცი, რომ ახალი სამოსი უნდა ჩავიცვა.
– როცა წვეულებაზე ან შეხვედრაზე მიდიხართ, ქმარს ეკითხებით, რა ჩაიცვათ თუ დამოუკიდებლად იღებთ გადაწყვეტილებას?
– სულ ვეკითხები, ძალიან მომწონს მისი გემოვნება. ვიცი, რომ კარგ რჩევებს მომცემს. მოკლე კაბა შეიძლება არ ჩამაცვას. ისეთ რჩევებს მაძლევს, რომ არ ვიყო გამომწვევი და თან ლამაზიც ვიყო.
– ქმარს კლასიკურად ჩაცმული უფრო მოსწონხართ თუ ჯინსებსა და კედებში?
– სპორტულად – არა. არც მე მიყვარს სპორტული სტილი. ჩემს გარდერობში მხოლოდ ორი წყვილი კედია და მათაც იშვიათად ვხმარობ. ვახოც შეჩვეულია, რომ სულ მაღალქუსლიანი ფეხსაცმელი მაცვია. თუ მოხდა და დაბლები ჩავიცვი, მაშინვე მეკითხება, ესენი რატომ გაცვიაო. ჩემთვის მაღალქუსლიანი ფეხსაცმელი ყოველდღიურია.
– ყველაზე მეტად რომელ ფერებს იხდენთ?
– როგორც ყველა ქართველი, მეც შავზე ვგიჟდები, უპრობლემო ფერია. ზამთარში თუ მუქი ფერებისკენ მიმდის თვალი, ზაფხულში ჭკუიდან გადავდივარ და მაქსიმალურად ვცდილობ, ღია ფერები მეცვას. თუ კარგი ამინდია, მეც კარგ ხასიათზე ვარ, მხიარული ფერები კი კარგ განწყობას მიქმნის.
– კარგ სამოსს კარგი აქსესუარებიც უხდება.
– ყველაზე მეტი საყურეები და ბეჭდები მაქვს, ასევე – ყელსაბამები, სამაჯურები. უფრო ისეთი სამკაულები მაქვს, რასაც ეთერში ვიკეთებდი და ყოველდღიურობაში არ ვიყენებდი.
– კოქტეილის კაბებს ყიდულობთ თუ იკერავთ?
– არის შემთხვევები, როდესაც ვიკერავ. წვეულებაზე რომ მივდივარ, ბოლო მომენტში მახსენდება, რომ ახალი კაბა მინდა და ფორიაქი მეწყება. ამიტომ შეკერვის დრო რომ აღარ მაქვს, ვყიდულობ.
– მეუღლისგან ძვირფას კაბებს, აქსესუარებს საჩუქრად იღებთ?
– ჩემი აქსესუარები ძირითადად მეუღლის ნაჩუქარია. რაც შეეხება ტანსაცმელს, რამდენიმე ლამაზი კაბა იყიდა ჩემთვის.
– სამოსით შეგიძლიათ მიხვდეთ, ადამიანი როგორია, როგორი ხასიათი აქვს?
– ხასიათი – არ ვიცი, მაგრამ მაშინვე ვხვდები, როგორი გემოვნება აქვს. არასოდეს ვუსვამ ხაზს იმას, თუ ვის აცვია ძვირფასი და ვის იაფი სამოსი. ადამიანი შეიძლება შინაგანად ძალიან კარგი იყოს, მაგრამ არ ჰქონდეს საშუალება, ძვირადღირებული ტანსაცმელი ჩაიცვას. ყველაზე დიდი ნაკლია, როდესაც სამოსით იწყებენ შეფასებას. არასოდეს არავის ვაკრიტიკებ. მაღიზიანებს ამბიციური ადამიანი, როცა უნდა, ყველაზე მაგრად გამოიყურებოდეს და ამისთვის მილიონიან კაბას იცვამს.
ქეთი დინოშვილი