კეტრინ ჰეილი „გირჩევთ , ნუ დაპატიჟებთ ქორწილში ახლობლებსა და ნათესავებს!“

12 ივნისს ეკრანებზე გამოვიდა სურათი „დიდი ქორწილი“, რომელშიც მთელი „ჰოლივუდური ელიტა“ თამაშობს - რობერტ დე ნირო, სიუზან სარანდონი, რობინ უილიამსი, ამანდა სეიფრიდი და, რასაკვირველია, კეტრინ ჰეილი, რომელსაც მაყურებელი „შიშველი სიმართლიდან“ , „ცოტათი ორსულიდან“ და „კილერებიდან“ იცნობს. 34 წლის ამერიკელი მსახიობი მომღერალ ჯოშ კელიზეა დაქორწინებული. წყვილს ორი ნაშვილები ბავშვი ჰყავს. ერთი სამხრეთკორეელი ნენსი ლია, რომელიც უკვე 5 წლისაა, მეორე გოგონა კი 2012 წლის აპრილში იშვილეს.

„ჯობს, მშვიდი ოჯახური ვახშამი მოაწყოთ“

- რით მიგიზიდათ ამ ფილმმა - „დიდი ქორწილი“ ?
- პირველ რიგში იმით, რომ ჩემი პარტნიორები ცოცხალი ლეგენდები იქნებოდნენ. მათთან მუშაობა უდიდესი ბედნიერებაა. გარდა ამისა, რეჟისორი ჯასტინ ზაკემი ჩემი დიდი ხნის მეგობარია, ერთმანეთის ნახევარი სიტყვიდან გვესმის და სულ ვმხიარულობთ. ამი-ტომაც, გადაღებებზეც ხშირად უწევდა საყოველთაო ხარხარის შეჩერება და გამეორება: „კარგი, მოვრჩით სიცილს! ხომ უნდა ვიმუშაოთ კიდეც!“ სცენარიც ძალიან მომეწონა - ერთდროულად სასაცილოა და სევდიანიც. ჩემი გმირი ლაილა განუმეორებელია: გამუდმებით ელის კრიტიკას და ამიტომაც თავს თავდასხმით იცავს.
- რაზეა ფილმი?
- ლაილა და დონი, რომელსაც რობერტ დე ნირო ასახიერებს, ათი წლის წინ გაიყარნენ, მაგრამ უქმეებზე უნდა მოიკატუნონ თავი, რომ ბედნიერი ოჯახია. სიტუაცია მალე გამოდის კონტროლიდან.
- ეს რეალისტური ამბავია?
- ასეთი რამეები ხშირად ხდება ცერემონიებზე, ალბათ იმიტომ, რომ მეტისმეტად ბევრი სხვადასხვა ადამიანი ხვდება ერთ წრეში. ამიტომაც ჩემი რჩევაა: ნუ უხმობთ ქორწილზე ყველა ნათესავსა და ახლობელს, თორემ აფეთქებას ელოდეთ! ჯობს, მშვიდი ოჯახური ვახშამი მოაწყოთ, მერე კი - წვეულება მეგობრებისთვის (იცინის).
- თქვენ და თქვენი ქმარი ჯოშ კელი ერთად არ ცხოვრობდით დაქორწინებამდე, რატომ?
- მინდოდა, ცხოვრება ქორწილის მერე რაღაცით მაინც განსხვავებული ყოფილიყო მანამდე არსებულისგან.
- ორი გოგონა იშვილეთ. საკუთარ შვილებზე რას ფიქრობთ?
- ამას არ გამოვრიცხავთ, თუმცა დიდი ხანია გადავწყვიტე, რომ ჩემს ოჯახში აყვანილი ბავშვებიც უნდა ყოფილიყვნენ. ჩემმა მშობლებმა ჩემი დაიკო იშვილეს, ამიტომ ჩემთვის ეს სავსებით ბუნებრივია.

- რა განცდა გქონდათ, როცა პირველი ბავშვი ნელი გაჩნდა თქვენს ცხოვრებაში?
- მასზე რამდენიმე თვე ვოცნებობდი, მის ფოტოებს ვუყურებდი და ვფიქრობდი, როგორი იქნებოდა მისი ჩემთან ყოფნა. როცა, ბოლოს და ბოლოს, ხელში ავიყვანე, ეს განუზომელი ბედნიერება იყო! ჩუმად იყო, იშვიათად ტიროდა და ფართოდ გახელილი თვალებით იყურებოდა გარშემო. ცოტა შემაშინა კიდეც ამ ამბავმა: „ეს სამუდამოა. ახლა დედა ვარ. ღმერთო, იმედია, გავართმევ თავს!“ ბედის ირონიით, როცა ნელი ვიშვილე, სწორედ მაშინ ვთამაშობდი ფილმში „ცხოვრება, როგორიც არის“ - განვასახიერებდი გოგონას, რომელმაც თავისი გარდაცვლილი მეგობრების პატარა გოგონა იშვილა. ჩემს გმირთან ერთად ვიზრდებოდი. ერთადერთი იმა-ზე ვდარდობდი, რომ მასთან ბევრ დროს ვერ ვატარებდი.
- შარშან კიდევ ერთი გოგონა იშვილეთ - ადელაიდა მარი ჰოუპი.
- ჯოშისთვის ეს სიურპრიზი იყო: კორეელი ბავშვების შვილად აყვანის მომლოდინეთა სია ისეთი დიდი იყო, გვეგონა, ერთი წელი მაინც უნდა გვეცადა. უცებ დამირეკეს და მითხრეს, რომ ბავშვი უკვე ამერიკაში იყო. მაშინვე ვაცნობე ჯოშს და ისიც ძალიან ბედნიერი იყო. ჯოში თავიდანაც იოლად დათანხმდა შვილად აყვანის იდეას.
- ყველაფერში ასეთი თანხმობა გაქვთ ქმართან?
- დროთა განმავლობაში სულ უფრო მეტად გვესმის ერთმანეთის და მეტსაც ვიგებთ ერთმანეთზე. ორი სხვადასხვა ხასიათისა და სხვადასხვა ცხოვრებისეული გამოცდილების მქონე ადამიანი ცდილობს ერთად ცხოვრებას - ქორწინების მთელი არსი ეს არის. თავიდან მას ბევრი რამ აოცებდა (იცინის). როცა ერთმანეთს ვხვდებოდით, რიგით მეექვსე მაწანწალა ძაღლი წავიყვანე სახლში და ჯოში გადაირია. მე კიდევ ავტირდი და ქმარს უგულო ვუწოდე. მერე ხელები გაშალა და თავი დამანება, თუ გინდა, ძაღლების თავშესაფარი გახსენიო.

- როგორ ახერხებთ ოჯახისა და სამუშაოს შეთავსებას?
- როცა ნელი ავიყვანეთ, იმედი მქონდა, ერთდროულად დედობა და მსახიობობა საკმაოდ მარტივი იყო, მაგრამ მალე მივხვდი, რა ძნელი ყოფილა ეს. როცა ბავშვთან ვიჯექი, სამსახურზე ვნერვიულობდი, როცა ვმუშობდი - გოგონაზე ვდარდობდი. ადელაიდას მოსვლის შემდეგ გრაფიკის შეცვლა მომიხდა და ბავშვებზე გავაკეთე ძირითადი აქცენტი. ჩემთვის ოჯახი ყველაზე მთავარია.

ჟურნალი „რეიტინგი“