რატომ ვერ ამჩნევდა დათო ფორჩხიძე რეზიკო დიდებაშვილის ნიჭს

პროექტი "ახალი ხმა" უკვე მეორედ დათო ფორჩხიძის გამარჯვებით დასრულდა. ამჯერად უმცროსი თაობის წარმომადგენელი, 13 წლის რეზიკო დიდებაშვილი გახდა ხალხის ფავორიტი, რომელსაც პრიზად ამერიკაში გამგზავრება და იქ სტუდიაში ალბომის ჩაწერა ერგო. ფინალში მისი სიმღერა შეგირდისა და მწვრთნელის ნამდვილი ტრიუმფი იყო. არადა თურმე სულ პირველად, ამ კონკურსამდე დიდი ხნით ადრე, როცა დათომ რეზიკო გაიცნო და მოუსმინა, განსაკუთრებული ყურადღება არც მიუქცევია. მაშინ რა იცოდა, რომ მის წინ პატარა ტრიუმფატორი იდგა.
როგორ გაიარეს გზა გამარჯვებამდე, როგორ დაძლიეს ეჭვები და შიშები, მწვრთნელი და მოსწავლე "სარკეს" ერთად უამბობენ.

– რეზიკო, გილოცავთ გამარჯვებას! ფინალის დროს დარბაზში მსხდომებიც და ტელემაყურებლებიც მოწმეები გახდნენ, როგორ ელოდი შედეგის გამოცხადებას. მთელი ემოციები სახეზე გეწერა. რა შეგრძნება გქონდა, როცა შენ დაგასახელეს?
რეზიკო: გამარჯვება ძალიან მაგარი გრძნობაა. საერთოდ არ ველოდი და რუსკამ ჩემი სახელი რომ გამოაცხადა, დავიშოკე! სასწაული შეგრძნება იყო!
– დათო, რეზიკოს შესაძლებლობებს ყველაზე კარგად თქვენ იცნობდით და გამარჯვება თქვენთვის მოულოდნელი არ უნდა ყოფილიყო.
დათო: რაღაც მომენტში ვიფიქრე, რომ მოგებაც შეიძლებოდა, რადგან ჩემთან ერთად ეს ბავშვი იყო. რეზიკოს გარეშე გამარჯვებას ვერ შევძლებდი, მხოლოდ მას შეეძლო ჩემთვის ამ სიხარულის მოტანა. საქართველოში ძალიან ღიზიანდებიან, როცა ვიღაცას აქებენ, ამიტომ იმასაც ვფიქრობდი, ქებით რეზიკოს საქმეს ხომ არ ვუფუჭებდი... გავრცელდა ხმა, თითქოს ბავშვობიდან მე ვზრდიდი. ეს რომ მართალი იყოს, რეკლამას გავიკეთებდი, ვიტყოდი, მშობლებო, ფული გადამიხადეთ და თქვენს შვილებსაც ასეთებად ვაქცევ–მეთქი. რომ არა რეზიკო, ჩემი მთავარი მიზანი ღირსეულად დამარცხება იქნებოდა. თურმე მხოლოდ ამერიკაში მოხდა ასეთი რამ, რომ ერთი და იმავე მწვრთნელმა ზედიზედ ორჯერ მოიგო. მეგობრები მეუბნებიან, ესპანეთის ნაკრები ხარო, მაგრამ მე კი არა, რეზიკოა ჩემპიონი! სალომე ქათამაძის გამარჯვებაშიც სერიოზული წვლილი რეზიკომ შეიტანა (რეზიკო პროექტში "ახალი ხმა" სალომეს ბექვოკალისტებს შორის იდგა. ავტ.) და ეს გამარჯვება ალალია ამ ბავშვზე!
– არადა ფინალამდე ცოტა ხნით ადრე დამარცხებას გიწინასწარმეტყველებდნენ. მთავარ მიზეზად რეზიკოს ოჯახის მატერიალურ მდგომარეობას ასახელებდნენ, შვილისთვის ფინანსური მხარდაჭერის საშუალება არ აქვთო.
დათო: არ მინდა, რეზიკოს ოჯახის მატერიალურ შესაძლებლობებზე ვისაუბრო, მაგრამ თბილისში არაფერი იმალება. მას სამი დედმამიშვილი ჰყავს, მოსკოვის გამზირზე ცხოვრობენ. არ ვიტყვი, რომ გაჭირვებული, ღარიბი ხალხია, მაგრამ მატერიალურად შეძლებულები ნამდვილად არ არიან. რეზიკოს მთლიანად ხალხმა გაამარჯვებინა. უნიკალური ბავშვია და მაყურებელს თავი შეაყვარა. თავიდან ვფიქრობდი, ამას გვერდით ვერავინ დაუდგება–მეთქი, მაგრამ ფინალში მაგარი ბავშვები იყვნენ. იმასაც კი ვფიქრობდი, შეიძლება მეორედ მე აღარ გამამარჯვებინონ და ამ ბავშვის უბედურების მიზეზი არ გავხდე–მეთქი. რეზიკო რომ სხვა მწვრთნელთან წასულიყო, უფრო ადვილად მოიგებდა, მაგრამ ამ ბავშვმა თავის მორალს არ უღალატა. რეზიკოს უთხრეს, შეიძლება დათოსთან ერთად წააგოო, რადგან ძალიან ძნელია ზედიზედ ორჯერ მოგება.
23 მაისს რეზიკო 13 წლის გახდა, მასთან სტუმრად ვიყავით მისული. რომ წამოვედით, ჩემმა შვილმა მითხრა, რეზიკომ თქვა, ვიცი, რომ წავაგებო. როცა ეთერში ვთქვი, რეზიკოს ვიშვილებ–მეთქი, ხალხმა წამომაძახა, მართლა იშვილაო. რეზიკოს გამო ძალიან ვინერვიულე, 16 კილო დავიკელი. არ ვმსახიობობდი, მოვკვდი ამ ბავშვების გამო. იცით, ჩემი კოლეგებიც რამდენს შრომობდნენ? ეკა კახიანს უდიდესი შრომა არ დაუფასდა, როგორც დაიხარჯა, იმის ადეკვატურად არ განვითარდა მოვლენები.
– რეზიკო რომ გამოაცხადეს გამარჯვებულად, ეკრანიდან გაქრით. რატომ გქონდათ ასეთი რეაქცია?
დათო: პირველ შოუში სალომესთან ერთად დავემხე მუხლებზე და იატაკს ვკოცნიდი, რაც ამ შემთხვევაში არ უნდა გამეკეთებინა. მაშინ ისეთი განცდა მქონდა, რომ სალომესთან ერთად მეც მოვიგე, მაგრამ ახლა მგონია, რომ ეს შოუ რეზიმ მოიგო და არა – მე. ეს რეზიკოს გამარჯვება იყო! რეზიკოსთან ურთიერთობა უნდა გქონდეს, რომ მიხვდე, რა მაგარი ვინმეა. ქართულ სიმღერებსაც გადასარევად მღერის. ეს ბავშვი ძალიან ბევრს შრომობს, წვალობს. სულ მომზადებულია და, რაც მთავარია, დარბაზამდე მიაქვს სათქმელი. ბავშვებთან ვამბობდი, რასაც რეპეტიციაზე ვაკეთებთ, ამის 60 პროცენტი რომ იქ მივიტანოთ, ძალიან მაგარი იქნება–მეთქი, ამას კი 99 პროცენტი მიჰქონდა.

– რეზიკო, წაგებას ელოდი და როგორღა შეძელი, რომ ბოლომდე გებრძოლა?
რეზიკო: ფარ–ხმალი ბოლომდე არ დავყარე, ვიბრძოლე და ძალიანაც სწორად მოვიქეცი. ალბათ ხალხმა დაინახა, რისი გაკეთება შემეძლო და მხარი დამიჭირა. იმან, რომ დამარცხებაში წინასწარ ვიყავი დარწმუნებული, უფრო გამაძლიერა.
დათო: ახლა რეზიკომ ჩემგან ერთადერთი რამ უნდა ისწავლოს – პირველი შოუს მოგების შემდეგ როგორ არ გავჩერდი. რეზიკომ უნდა იცოდეს, რომ ყველაზე ძნელი იმის შენარჩუნებაა, რაც ახლა აქვს. ფორმაში უნდა იყოს, თავს მოუაროს, ხმას გაუფრთხილდეს. ჩვენც უნდა ვისწავლოთ ჩვენი მაგარი ტიპების გაფრთხილება. მე აღმოვჩნდი ჭკვიანი ტიპი, რომელმაც ასეთი ნიჭიერი ადამიანი დავინახე და მივეკედლე.
– სტეფანემ "სარკეში" თქვა, დათო ჩემზე ნიჭიერი არ არის, მაგრამ აშკარად ჩემზე ჭკვიანიაო.
დათო: არ ვიცი, ნიჭიერსა და ჭკვიანს შორის რა განსხვავებაა. სტეფანესთან შეჯიბრი ჩემი იდეაფიქსი არ ყოფილა. შოუს განმავლობაში ვცდილობდი, საზოგადოებისთვის დამენახვებინა, რომ მასთან მეგობრობა მინდოდა. ჩვენ შორის ფინალშიც მოხდა პატარ–პატარა კამათი, მაგრამ რეზის გამარჯვება სტეფანემ მომილოცა. წვეულებაზეც ერთად ვიყავით და ჩვეულებრივად გავაგრძელეთ ურთიერთობა.
სტეფანე არ არის წარუმატებელი ადამიანი, ბევრს მიაღწია და კიდევ ბევრს მიაღწევს. უბრალოდ გამიმართლა, რომ რეზი ჩემთან წამოვიდა. ჩვენ მართლა ვშოუმენობთ, მაგრამ კამერების გამორთვის შემდეგ მეგობრები ვართ. მე ასეთი სტრატეგია მაქვს, თავის შეკავება შემიძლია. სტეფანე გაბრაზებული არასოდეს მინახავს, ძალიან დიპლომატია, მაგრამ მე ვახერხებ მდგომარეობიდან მის გამოყვანას, ცუდი ბიჭი ვარ! ყველა მწვრთნელი მაგრად მუშაობს, მაგრამ ეს შოუ ჩემსა და სტეფანეს შორის დაძაბულობაზეა აგებული. სტეფანეს ვპირდები, რომ სულ ვეჭიდავები და ვეცდები, კარგი ბავშვები ჩემთან წამოვიყვანო.
– მას შემდეგ, რაც ზედიზედ ორი შოუ მოიგეთ, ეჭვი მაქვს, ამის შემდეგ ბავშვების ძირითადი ნაწილი თქვენს გუნდში ყოფნას ისურვებს.
დათო: ძალიან მინდა, ამ შოუში კიდევ ვიყო და მის ორგანიზატორებს ვპირდები, რომ მომავალშიც ვიბრძოლებ. მომავალ მონაწილეებს ვეტყვი, თუ რეზიკოზე მეტად იქნებით საკუთარ თავში დარწმუნებული, მხოლოდ ამ შემთხვევაში წამოდით ჩემთან. უნდა იცოდეთ, რომ ვერავინ დაგჩაგრავთ. ჩემს როლს კი ნუ გადაამეტებთ, ყოვლისშემძლე ნამდვილად არ ვარ. ჩემთან წამოსვლა მოგების გარანტია არ არის.
– ბავშვების სასახელოდ უნდა ითქვას, რომ დიდ ფსიქოლოგიურ წნეხს გაუძლეს.
დათო: ლიზა ყენიამ (მომღერალ მაია ჯაბუას შვილი, ავტ.) ძალიან მაგრად იმღერა. ეკა კახიანს ლიზა რომ ვურჩიეთ, ეს ნაცნობობის ბრალი არ იყო, ეს ბავშვი მართლა იყო ფინალის ღირსი. როცა რინგის შემდეგ ლიზა ისეთი წნეხის ქვეშ მოექცა, გულით ვუთანაგრძნობდი. ამის შემდეგ ასე რომ იმღერა, ყოჩაღ!
– რეზიკო, რამდენი წლიდან მღერი?
რეზიკო: როგორც ჩემი მშობლები ამბობენ, ჯერ ლაპარაკი არ ვიცოდი, რომ ვმღეროდი. ჩემს ოჯახში ყველა მღერის, მამაც, ჩემი დაც და მათგან შემიყვარდა სიმღერა. დაახლოებით 4 წელია, რაც ამ საქმეს სერიოზულად მოვეკიდე.
– ახლა რას აპირებ?
რეზიკო: თუ ახალი მუსიკალური პროექტი გამოჩნდება, იქაც მივიღებ მონაწილეობას. მართალია, მთელი კონკურსის განმავლობაში ძალიან ვნერვიულობდი, მაგრამ ეს ამად ღირდა.
დათო: მე ვფიქრობ, რომ რეზიკოს ბედი სხვანაირად წარიმართება. მოგებულ პრიზს მიიღებს, ამერიკაში წავა და მეც წამათრევს. იქ რეზიკოს ვიღაცეებს ვაჩვენებ. ლევინის, აშერის, შაკირას რამდენიმე სიმღერა უნდა ვასწავლო. იქ ხალხს უნდა ვუთხრა, ჯასტინ ბიბერს რომ გადაეკიდეთ, ერთხელ ამ ბავშვს მოუსმინეთ და თავზე ხელი მაინც გადაუსვით–მეთქი. ეს ჩემი ოცნებაა. ძალიან მაინტერესებს ამერიკელების შეფასებები. მე რომ მგონია, რეზიკო ამერიკელი ბავშვის დონეზე მღერის, საინტერესოა, იქ რას იტყვიან. იქნებ ვამეტებ, მაგრამ მე ბევრ უცხოელ კოლეგას ვკითხე აზრი, მათ რეზიკოს ჩანაწერები გადავუგზავნე და ყველამ მითხრა, უპირობოდ უძლიერესიაო.
რეზიკოს ახლა გარდატეხის ასაკი აქვს გასავლელი, მისთვის საბავშვო კონკურსები დამთავრდა. ვუსურვებ, რომ უფროსების კონკურსზე ერთხელ მაინც გამოვიდეს და მეტი აღარ უნდა. მინდა, ისეთი მომღერალი გახდეს, რომლის სიმღერებსაც შეიყვარებენ. მე 6–7 სიმღერით მოვედი აქამდე.
– დათო, როგორ ფიქრობთ, რეზიკოს წარმატება მის ნიჭთან ერთად იმ რეპერტუარის დამსახურებაცაა, რომელიც თქვენ შეურჩიეთ?
დათო: რეზიკოს ისეთი სიმღერები ვამღერე, რომლებსაც თანამედროვე უცხოელი ბავშვები მღერიან და ამან გაამართლა. ერთ–ერთ სატელევიზიო პროექტში რეზიკომ კასტინგი ვერ გადალახა, ის ადამიანი ამ ინტერვიუს წაიკითხავს და გაიხსენებს, რომ რეზიკო დიდებაშვილი კასტინგიდან უკან გამოუშვა. როცა მას ჰკითხა, რატომ ვერ გადავდივარო, უპასუხა, დიდივით მღერიო. რეზის შემჩნევის საშუალება ჰქონდათ, მაგრამ არ შეამჩნიეს. მის ასაკში ასეთი ფორჩხიძე რომ მყოლოდა გვერდით და ასეთი პედაგოგი, აშერი მეც მომისმენდა. რეზიკოს საბავშვო სიმღერები უკვე ეადვილება, აღარ მოსწონს, არ მამღეროო, მეუბნება.
ფინალში ვიმღერეთ სიმღერა, რომელშიც არის სიტყვა "გეთ ლაქი". ინგლისური არ ვიცი და, რა თქმა უნდა, ვიკითხე, მითხრეს, ამაში ცუდი არაფერიაო, მაგრამ როცა ნამდვილი ინგლისურის მცოდნე ჩამოვიდა, მან მითხრა, ეს სექსზეა და ბავშვები არ ამღეროო. ამიტომ ეს სიტყვა შევცვალეთ სიტყვით "ბი ლაქი". ვინ აღარ მწერს, ტექსტი ვერ ისწავლეთო. ვისწავლეთ, ასეთი დებილი არ ვარ! "ბი ლაქი" ნიშნავს, ამაღამ იღბლიანი ვიქნებიო და რეზიკო მართლაც იღბლიანი გამოდგა.
– რეზიკო, დათოს დიდი გეგმები ჰქონია შენთან დაკავშირებით. ამ ყველაფრისთვის მზად ხარ?
რეზიკო: რა თქმა უნდა! ვიცი, რომ ძალიან კარგი ადამიანის ხელში ვარ და რასაც მეტყვის, ისე გავაკეთებ. მე მჯერა დათოსი და ბოლომდე მივყვები.
დათო: სინამდვილეში, რაც არ მოსწონს, მეუბნება, ეს გოიმობაა, არ ვარგაო. რეზიკო თავისუფალი ადამიანია და რასაც ვუბრძანებ, იმას ბრმად არ აკეთებს. ყოველთვის აქვს თავისი პოზიცია. თავიდან ძალიან ბევრს წუწუნებდა, მე კი ვეუბნებოდი, იწუწუნე, რამდენიც გინდა და არ გააკეთო ის, რაც არ მოგწონს–მეთქი. თუ დაინახავს, რომ გავუბერე, მითხრას, დათო, ასე არ არისო და წავიდეს ჩემგან. ვიცი, ეს რომ მილიონერი გახდეს, მეც აუცილებლად წამიყვანს ამერიკაში. შეიძლება სიმღერები არ დამაწერინოს, მაგრამ მომივლის, ჩემი იქნება.
– თქვენი მოსწავლეები ერთმანეთზე ხომ არ იეჭვიანებენ?
დათო: ისეთებს, როგორებიც სალომე და რეზიკო არიან, კიდევ თუ შევნიშნავ, ხელიდან არ გავუშვებ. ვიცი, ამაზე არც რეზიკო იეჭვიანებს და არც სალომე... მე ერთი ავანტიურისტი, პროვოკატორი კაცი ვარ და რეზიკოს ნიჭს ვითვისებ. გეტყვით, რა არის ამ ბავშვის პლუსი: 200 კონკურსანტი მაინც მოვისმინე, ყველა მაგარი იყო, მაგრამ მათ ხანდახან რაღაცეები ეშლებოდათ. რეზიკოს არც ერთ რეპეტიციაზე ისეთი შეცდომა არ დაუშვია, რომ მეფიქრა, იქ დამღუპავს–მეთქი. სალომესაც კი მოსდიოდა შეცდომები, მაგრამ რეზის – არა.
– რეზიკო, როგორ გაიცანით დათო?
რეზიკო: "ანა–ბანაში" ვიყავი, როდესაც გვითხრეს, რომ კარგი მომღერალი ბავშვები სჭირდებოდათ და დათოსთან მოგვიყვანეს. "ახალ ხმაში" სალომეს ბექებში ვჭირდებოდით. მაშინ გავიცანით ერთმანეთი.

– მწვრთნელად იმიტომ აირჩიეთ, რომ იცნობდით?
რეზიკო: ერთადერთი მიზეზი, რის გამოც დათო ავირჩიე, მისი პროფესიონალიზმი იყო.

დათო: სალომემ ბექებისთვის ძალიან მაგარი ბავშვების ბანდა მომიყვანა. ყველა მაგრად მღეროდა, მათ შორის – რეზიკოც და მაშინ მოვისმინე მისი ლამაზი ტემბრი. ბექებში მდგარ ბავშვებს ერთმანეთისგან არ ვასხვავებდი, მაგრამ სალომე ქათამაძე მეუბნებოდა, ამ ბავშვს ყურადღება მიაქციეო. რეზიკო მაშინ გამომრჩა, მაგრამ სალომე არ მომეშვა. ვეუბნებოდი, მეტი რაღა ყურადღება მივაქციო, გამოვიყვანე, სცენაზე დავაყენე, ვამღერე–მეთქი.
ერთხელ ვფიქრობდით სიმღერისთვის რომელიმე მაგარი ბავშვის გამოყენებას და სალომემ მითხრა, რეზიკოს მოვიყვანო. მისი ნამღერი კიდევ ერთხელ მომასმენინა. პირველი ფრაზის შემდეგ დავიშოკე, ხტუნვა დავიწყე. ვერ ვიჯერებდი, რომ სიმღერას ბავშვი ცოცხლად ასე ასრულებდა. ამბობდნენ, ყველამ იცოდა, ამ ბავშვს ფორჩხიძე რომ აიყვანდაო და მაინტერესებს, ჩემს ადგილას რეზიკოს რომელი დათმობდით? მისთვის განსაკუთრებულად ვიბრძოლე. ამ ყველაფრის შემდეგ ჩასაფრებული ვიყავი, მას ელემენტარულ შეცდომასაც არ ვაპატიებდი და გავაგდებდი. ბავშვს არაფერი შეეშალა და ამისთვის ბრავო რეზიკოს!
– რეზიკო, დათო როგორი მწვრთნელია?
რეზიკო: მე და დათოს ძალიან ბევრი საერთო გვაქვს. ორივეს თანამედროვე მუსიკა მოგვწონს. როცა მასთან მოვხვდი, მივხვდი, რომ მაქსიმუმის გაკეთება შემეძლო. ერთად ვუძლებდით რთულ რეჟიმს. სტუდიიდან ღამის 4 საათზე მივდიოდით, დღე და ღამე ჩვენთან ერთად იყო, ჩვენთან ერთად მუშაობდა. დათოსგან უამრავი რამ ვისწავლე. დავრწმუნდი, რომ ვინც ბევრს იშრომებს, ყველაფერი გამოუვა. მართალია, მეგობრებთან ერთად გართობაც მიყვარს, მაგრამ მუსიკა ყველაფერს მირჩევნია, ამიტომ სულაც არ მწყდებოდა გული, როდესაც ჩემი მეგობრები ეზოში ერთობოდნენ და მე ვმეცადინეობდი.
– უკვე ძალიან პოპულარული ხარ. მოგწონს ყურადღების ცენტრში ყოფნა?

რეზიკო: რა თქმა უნდა. "ფეისბუქზე" უამრავი ადამიანი მიმეგობრებს, ქუჩაში მაჩერებენ. მათი სიყვარული მაბედნიერებს და უღრმესი მადლობა ყველას, გპირდებით, იმედს არ გაგიცრუებთ!
ქეთი დინოშვილი