რატომ დაშორდნენ ელენე კალანდაძე და ნოდარ ხუციშვილი ერთმანეთს
ახალგაზრდა მომღერალ ელენე კალანდაძის და ცნობილი მომღერლის გიო ხუციშვილის ვაჟის, ნოდარ ხუციშვილის ოჯახური ბედნიერება მხოლოდ ორ თვეს გაგრძელდა. არადა ქორწინებამდე სამწლიანი რომანი ჰქონდათ. იმ პერიოდში "სარკესთან" თავიანთი სიყვარულის ბედნიერ პერიოდზე ლაპარაკობდნენ. ელენე ამბობდა, რომ ნოდარმა რომანტიკულობით, გრძნობის ორიგინალურად გამოხატვით მოხიბლა. ერთხელ გულისსწორისთვის შეყვარებულ ბიჭს საკუთარი კარდიოგრამაც კი გაუგზავნია ფოსტით...
ქორწილი ერთი წლის წინ, 9 ივნისს ჰქონდათ. აგვისტოში კი უკვე ერთად აღარ იყვნენ. გაბზარულ გულსა და დანგრეულ ურთიერთობაზე, რომელიც ელენემ წარსულში დატოვა, "სარკეს" უამბობს და წლებს, რომლებიც ნოდარის სიყვარულით გაატარა, უკვე განვლილ ეტაპად მოიხსენიებს. ახლა მთლიანად მუსიკალურ კარიერაზე ზრუნვით არის დაკავებული და დიდი გეგმებიც აქვს.
– ელენე, თქვენს შემოქმედებაში რა სიახლეებია?
– ბენდთან ერთად ვმუშაობ, კორპორატიულ საღამოებში ვმონაწილეობ. მე და დიჯეი ბენეს ერთობლივი პროგრამა გვაქვს და აქტიურად ვმუშაობთ. ზაფხულია და ახლა ზღვისპირეთიდან ველოდები შემოთავაზებებს. გარდა ამისა, მეგობრებთან ერთად დავაარსე მუსიკალური სკოლა–სტუდია. ახალგაზრდებს ვასწავლით სიმღერას, ცეკვას, მუსიკალურ ინსტრუმენტებზე დაკვრას. უკვე 100 მოწაფე გვყავს. ჩვენ კი გამოვედით თინეიჯერული ასაკიდან, მაგრამ მათთან ურთიერთობით ვიხანგრძლივებთ ბავშვობას.
– როგორი პედაგოგი ხართ?
– ისეთი, როგორიც წარმომედგინა – მეგობრული. ვცდილობ, ურთიერთობით, საუბრით ბავშვები გავათავისუფლო იმ კომპლექსებისგან, რომლებიც აქვთ. ასე რომ, საქმის თვალსაზრისით, აქტიური ვარ.
– თქვენს პირად ცხოვრებაში კი ვერ ვიტყვით, რომ ყველაფერი კარგად არის. თქვენი და ნოდარ ხუციშვილის ქორწინება დასრულდა. როგორ გადალახეთ ეს სიძნელე?
– მე და ნოდარი 3 წელი შეყვარებულები ვიყავით. ზუსტად ერთი წლის წინ, 9 ივნისს ვიქორწინეთ. ჩვენმა თანაცხოვრებამ დიდხანს არ გასტანა – ორ თვეში დავიშალეთ. ამ მოკლე ხანში უამრავი უსიამოვნება მოხდა... აღარაფერი მიკვირს, ცხოვრება სავსეა სიურპრიზებით, კარგითაც და ცუდითაც. ამ წარუმატებლობამ დიდი გამოცდილება შემმატა. სამომავლოდ ყველაფერს გავითვალისწინებ.
– დღევანდელი გადმოსახედიდან როგორ ფიქრობთ, თქვენი ურთიერთობა შეცდომა იყო?
– ნამდვილად, ეს იყო ძალიან დიდი შეცდომა. შეიძლებოდა ეს ყოველივე არ მომხდარიყო, მაგრამ, რადგან მოხდა, რას ვიზამთ. ღმერთს მადლობა, რაც მოხდა, რადგან შეიძლება უარესიც ყოფილიყო.
– რამდენიმეწლიანი სიყვარულის ისტორია ასე მალე როგორ დასრულდა?
– ეს ის შემთხვევა არ იყო, რომ ერთ მშვენიერ დღეს მივხვდით, ერთმანეთი აღარ გვიყვარდა. მიზეზებზე ლაპარაკი ძალიან მიჭირს. სიმართლე გითხრათ, არც მახსოვს, ეს პერიოდი ჩემს ცხოვრებაში თუ არსებობდა. ცუდ რაღაცეებს ადვილად ვივიწყებ. ძალიან დიდი ხანია, ეს თემა დავმარხე. ახლა ახალი ელენე ვარ, სხვა შემართებით და ენერგიით.
– თქვენ შორის ვიღაც მესამე ჩადგა?
– დიახ, მესამე იყო.
– რა სიტყვებით დასრულდა ურთიერთობა?
– მშვიდად დავილაპარაკეთ და განქორწინებით დავასრულეთ ყველაფერი.
– შერიგება აღარ გიცდიათ? ინიციატივა არც ერთს გამოგიჩენიათ?
– არა, მასთან არანაირი შეხება არ მქონია. მას მერე თვალითაც არ მინახავს. არ არის საჭირო და მორჩა!
– თქვენი აზრით, ღალატი არის შეცდომა, რომელიც ქალმა კაცს არ უნდა აპატიოს?
– ეს ინდივიდუალურია. არიან ადამიანები, რომლებიც პატიობენ, შეიძლება ჩემს ადგილას სხვა ქალი სხვაგვარად მოქცეულიყო, მაგრამ მე ასე არ შემეძლო. პატივს ვცემ საკუთარ თავს, ოჯახს და მეგობრებს. ქალიც და კაციც უნდა ეცადონ, კბილებით გადაარჩინონ ოჯახი, მაგრამ, როცა თავს ზემოთ ძალა არ არის, რა უნდა ქნა? თან საოცრად რთულია, როცა შანსს აძლევ, მხოლოდ ცალმხრივად ცდილობ და მაინც არაფერი გამოდის. ამ მცდელობას ერთადერთი დადებითი მხარე ის აქვს, რომ საკუთარ თავთან ხარ მართალი. ფიქრობ, რომ ურთიერთობის შენარჩუნებას არაფერი დააკელი, მაგრამ...
– მშობლებისთვის ძალიან მტკივნეული იქნებოდა თქვენი დაშორება ქორწინებიდან ორი თვის თავზე.
– რასაკვირველია, ჩემი ოჯახი გაოგნებული იყო. როგორც თქვენ გაგიკვირდათ ჩვენი დაშორების ამბავი და გულწრფელად მკითხეთ, ორ თვეში როგორ დასრულდაო, მათაც ანალოგიური რეაქცია ჰქონდათ. გაკვირვებულები იყვნენ ჩემი მეგობრები, ნათესავები, ოჯახის წევრები. მე უკვე აღარაფერი მიკვირს, ჩემ გარშემო ისეთი რაღაცეები მესმის, ორ თვეში კი არა, ქორწინების ღამესვე ფიქრობენ განქორწინებაზე.
ეს პერიოდი ყველამ ერთად გადავლახეთ. ცხოვრება ახალი დღით მითენდება, ჩემს წარსულში არ ჩავრჩენილვარ, არც არაფერს მივტირი, რას ან ვის უნდა მივტიროდე? განა ღირს ვინმე გვემად და ცრემლად? არა! დიახ, ჩემი მშობლები იყვნენ ის ადამიანები, რომლებიც გვერდში დამიდგნენ, თუმცა სანამ ვინმეს რამეს ვეტყოდი, საკუთარ თავს შემოვუძახე და გავძლიერდი. მარტომ გავიარე ყველაზე რთული დღეები. რაღაც პერიოდი არავისთან მინდოდა ამ თემაზე ლაპარაკი.
– ნოდარის მშობლებთან საუბარი გქონდათ?
– ძალიან ცივილიზებულად ვილაპარაკეთ და ამით დამთავრდა ყველაფერი. მას მერე ჩვენ–ჩვენი ცხოვრება განვაგრძეთ.
– ახლა თქვენ გვერდით არავინ არის?
– ჩემს ცხოვრებაში თაყვანისმცემლები ყოველთვის იყვნენ და ახლაც არიან, მაგრამ სერიოზული ურთიერთობა არავისთან მაქვს.
– რატომ, ახალი ურთიერთობის წამოწყების ხომ არ გეშინიათ?
– ნდობა დავკარგე, თუმცა ამ ყველაფერს დრო უნდა. ალბათ გამოჩნდება ადამიანი, რომელიც ჩემს გულს დაიმსახურებს, ისეთი პიროვნება იქნება, ვინც დამაფასებს. ამ ეტაპზე კი ახალი ურთიერთობის წამოწყება, შეიძლება ითქვას, მეზარება. 23 წლის ვარ, ახლა უკვე სულ სხვა პრიორიტეტები მაქვს. მინდა, სასიმღერო კარიერას ბოლომდე მივყვე, კვალიფიკაციის ამაღლების მიზნით საზღვარგარეთ წავიდე. მინდა, ყველანაირი შანსი გამოვიყენო, რასაც ცხოვრება მაძლევს.
– სიყვარულისგან კი ისვენებთ.
– ახალ სიყვარულს ნამდვილად არ ვეძებ. ჩემთვის ვცხოვრობ – მშვიდად და წყნარად. ეს ჩემთვის დიდი გაკვეთილი იყო, ბევრ რამეზე დამაფიქრა. ამიერიდან ყველაფერს დიდი ყურადღებით დავუკვირდები. დაზუსტებით ვიცი, რომ ჩემზე წინ არავის დავაყენებ. როცა ადამიანი მიყვარდება, არ აქვს მნიშვნელობა სქესს და ურთიერთობას, იმდენად ჩემიანად ვთვლი, რომ დისტანციას არ ვიჭერ, გულს ვიგლეჯ და მას ვჩუქნი. ასე არ უნდა მოიქცე, რადგან არ იცი, გულს რა წამს დაგიფხრეწს და გადაგიგდებს. ამიერიდან კი ამ ზღვარს დავიცავ. ახალ ურთიერთობას გამადიდებელი შუშით დავაკვირდები. ჩემს ცხოვრებაში ამ ეტაპის დასრულებამ მიმახვედრა, რომ ძლიერი პიროვნება ვარ, მიზანდასახული და უშიშარი.
– ზემოთ ახსენეთ, კვალიფიკაციის ასამაღლებლად საზღვარგარეთ წავალო. რომელ ქვეყანაში აპირებთ წასვლას?
– რამდენიმე ხნის წინ ჰოლანდიაში ვიმოგზაურე. ამ ქვეყანამ ჩემზე იმხელა შთაბეჭდილება მოახდინა, სავარაუდოდ, სწავლას სწორედ იქ გავაგრძელებ. პროფესიით მარკეტოლოგი ვარ, არაერთხელ მიმუშავია ამ განხრით, მაგრამ ჩემი ინტერესის წყარო იმდენად უშრეტია, ალბათ სულ სხვა განხრით წავალ მაგისტრატურაში. ახლა ფიქრის პროცესში ვარ. ვფიქრობ მუსიკალურ კარიერაზე. საქართველოში მომღერლები ჩაკეტილები ვართ, დიდი არეალი არ არის. სამწუხაროდ, მუსიკალური განათლება არ მაქვს, მაგრამ არც ახლაა გვიანი. ადრე სიმღერა ჩემთვის ჰობი იყო, ახლა უპირველესი საქმეა.
– საზღვარგარეთ ცხოვრებას მიჩვეული ხართ. როგორც ვივიც, ბავშვობაში მშობლებთან ერთად დიდხანს იყავით უცხოეთში.
– დიახ, ისრაელში 9 წელი ვიცხოვრე, ბელგიაში – 5. ჩვენს ქვეყანაში არის რაღაცეები, რასაც არ ვემხრობი, ბევრი რამ კი მისაღებია, თუმცა დაკონკრეტებისგან თავს შევიკავებ.
ლანა კიკნაძე
