კახა ახვლედიანი: მაქსიმუმ, 50-კაციან ქორწილზე დავთანხმდები...

"ტემპერამენტიანი, თავნება, ფეთქებადი და ცოტა არ იყოს, მშიშარა გახლავთ. ის კარგად ახერხებს გრძნობებით მანიპულირებას. მოსწონს ფლირტი და მარტივად იქცევს სხვების ყურადღებას. წარმატებულია ამბიციური ბუნების გამო. მისთვის სიყვარული მოდის გონებით და არა - გულით. სასიყვარულო ურთიერთობაში ერთგულია და ყველა დეტალს პასუხისმგებლობით ეკიდება", - ასე ახასიათებენ ასტროლოგები მაიმუნის წელში დაბადებულ ადამიანს, ეს კი მსახიობისა და ტელეწამყვანის - კახა ახვლედიანის ზოდიაქოს ნიშანია.

-  ასტროლოგიის თან მჯერა, თან - არა. ჩემი ნიშნის დახასიათება რომ წავიკითხე, ხასიათთან ბევრი თანხვედრა აღმოვაჩინე. სურვილიც მაქვს, პირადი ჰოროსკოპი შევადგინო, რომლითაც მომავალში ვიხელმძღვანელებ.

-  "მაიმუნის წელში დაბადებული ადამიანი ცვალებადი, წინააღმდეგობრივი ხასიათით გამოირჩევა".
-  ვერ დაგეთანხმები, ცვალებადი ხასიათი საერთოდ არ მაქვს. ემოციური ვარ, რის გამოც კონფლიქტიც არაერთხელ მქონია. შემიძლია, წვრილმანზეც ვიჩხუბო, მაგრამ 2 წუთში ვმშვიდდები. არც კი ვიცი, რა არის დეპრესია. რთული პერიოდი არაერთხელ მქონია, დეპრესია - არასდროს.

-  "ჭკვიანი და მოხერხებულია".
-  შემიძლია, არასასიამოვნო სიტუაციიდან თავი დავიძვრინო. უჭკუო და მოუხერხებელი რომ ვიყო, ამას ვერ შევძლებდი.

-  "ადვილად უმკლავდება ყველაზე რთულ პრობლემებსაც კი".
-  ზოგჯერ მაქვს ისეთი პრობლემა, რომელზე ფიქრიც არ მინდა. ჰოდა, ასეთ პრობლემებს ვაიგნორებ.

-  "მას ყველაფრის გაკეთება და მიღწევა მომენტალურად სურს; უმნიშვნელო ბარიერიც კი ხასიათს უფუჭებს, გეგმებს უცვლის".
-  მაგალითად, მაისური რომ მომეწონება, მინდა იმ წუთშივე ვიყიდო, მაგრამ ზოგადად წინააღმდეგობები არ მთრგუნავს.

-  "ტემპერამენტიანი, თავნება და თავხედია".
-  ვარ, ვარ, ვარ (იცინის), მაგრამ ჩემი სითამამე უზრდელობაში არასდროს გადადის. თამამი სხვების თვალში ვჩანვარ, სინამდვილეში კი შინაგანად ძალიან მორიდებული ადამიანი გახლავართ. საქმე საქმეზე რომ მიდგება და სითამამე მჭირდება, მორიდებული ვხდები. მაგალითად: მერიდება სტუმრად მისვლის; მერიდება იმ გოგოს მშობლების გასაცნობად მისვლა, რომელიც მომწონს და ა.შ.

-  ქალთან ურთიერთობისას თამამი ხარ თუ - მორიდებული?
-  ქალს გააჩნია: ხან ძალიან თამამი ვარ, ხან - მორიდებული. ქართველ გოგონებს დაკვირვება აკლიათ.

-  რას გულისხმობ?
-  გოგო ადვილად უნდა მიხვდეს, ბიჭს რა დონეზე მოსწონს. როცა მამაკაცი შენთან ურთიერთობისას მორიდებულია და თავს უხერხულად გრძნობს, ეს იმას ნიშნავს, რომ შენზე სერიოზულად ფიქრობს...

-  თავად ადვილად ხვდები, გოგოს რა დონეზე მოსწონხარ?
-  ეგრევე ვხვდები! ქალებს კარგად ვიცნობ. ისინი ყავის დალევის, საუბრის დროს თავს "იწვავენ". გამოხედვას დიდი მნიშვნელობა აქვს, თვალები პატრონს ხშირად გასცემენ.

-  "არ იცის წყენის გულში ჩადება".
-  ვერ ვიტყვი, რომ ეს კარგი თვისებაა. ყველაფრის "გატარება" არ შეიძლება.

-  "ძალიან ცნობისმოყვარე ადამიანია. ზოგი მიიჩნევს, რომ მას ყველაფერში ცხვირის ჩაყოფა უყვარს".
-  ცნობისმოყვარე ვარ, მაგრამ სხვის ცხოვრებაში ცხვირს არასდროს ვყოფ, მეგობარს კი რჩევას ხშირად ვაძლევ, ჩემს აზრებს ვუზიარებ.

-  "ის წარმატებულია ამბიციური ბუნების გამო".
-  ქართველები ყველანი ამბიციურები ვართ. გენს დიდი მნიშვნელობა აქვს... დღეს მაქვს ამბიცია, კარგი ტიპი ვიყო, ჩემი პატარა მეგობრებისთვის კი მისაბაძი ადამიანი.

-  "სასიყვარულო ურთიერთობაში ერთგულია და ყველა დეტალს პასუხისმგებლობით ეკიდება".
-  ძალიან ერთგული ვარ, მაგრამ ამას ბევრი ვერ იჯერებს. ზოგი მიიჩნევს, რომ მექალთანე მამაკაცებმა ერთგულება არ იციან - ეს "ჩარჩოში ჩასმული" შეხედულებაა, ცხოვრებაში კი პირიქით უფრო ხშირად ხდება. მამაკაცები, რომლებსაც ასეთი იმიჯი არ აქვთ, ერთგულებით ნაკლებად გამოირჩევიან.

-  "საქმეს ალღოს ადვილად უღებს. რის გაკეთებასაც სხვები მთელ საათს ანდომებენ, მას შეუძლია, ნახევარ საათში გააკეთოს".
-  მთავარი მონდომება და საქმისადმი ინტერესია, მერე ხელს ვეღარაფერი შეგიშლის.

-  "ისეთივე წარმატებით ხარჯავს ფულს, როგორც გამოიმუშავებს".
-  ფულის შეგროვება არ ვიცი, მაგრამ ეს იმას არ ნიშნავს, რომ უაზროდ მფლანგველი ვარ. მიყვარს კარგად ჩაცმა, კარგი ნივთები. ვიცი, რომ თანხა ბოლომდე არ უნდა დავხარჯო, დანაზოგი უნდა მქონდეს, მაგრამ ამას ვერ ვახერხებ.

-  "არც ერთ სხვა ნიშანს არ შეუძლია ხალხთან ისე მარტივად კომუნიკაცია, როგორც მაიმუნს. მას შეუძლია გაგაცინოს მაშინაც კი, როცა ტირილის ხასიათზე ხარ".
-  ჩემი ეს თვისება მეგობრებს ძალიან მოსწონთ. მათ კარგ განწყობაზე ადვილად ვაყენებ, ზოგჯერ პირიქითაც ხდება - მწარე ხუმრობით ვიღაცას განწყობილებას ვუფუჭებ, მაგრამ ამას გამიზნულად არ ვაკეთებ.

-  "ის კარგად ახერხებს გრძნობებით მანიპულირებას".
-  მსახიობს ცხოვრებაში თამაში არ აინტერესებს. "კაი ტიპი" თამაშს არ დაიწყებს.

-  შენ "კაი ტიპი" ხარ?
-  ვფიქრობ, რომ "კაი ტიპი" ვარ.

-  "სასურველი ადამიანის მოხიბვლა წამში შეუძლია".
-  ო! მთლად ასეც არ არის საქმე. საერთოდ, ურთიერთობისას ადვილად ვიხსნები, გულწრფელი ვარ. ჰოდა, დღეს გულწრფელი ადამიანების ისეთი დეფიციტია, რომ შეიძლება, ჩემი თანამოსაუბრე ამ თვისებამაც მოხიბლოს.

-  შენს პირად ცხოვრებაში რა ხდება?
-  არაფერიც არ ხდება, არადა, ძალიან მინდა, ყურებამდე შეყვარებული ვიყო.

-  ასე ძალიან გყვარებია?
-  არ ვიცი.

-  ია სუხიტაშვილთან ურთიერთობა "ყურებამდე შეყვარება" იყო?
-  ალბათ, იყო...

-  როგორი მამა ხარ?
-  ახლა არა მიშავს, მაგრამ იყო პერიოდი, როცა ბავშვს საერთოდ ვერ ვნახულობდი. შემდეგ რაღაც პერიოდი ვხვდებოდი, მერე ისევ "დავიკარგე" - დეტალებზე ლაპარაკი არ მინდა. ჩემს შვილთან ახლა ძალიან თბილი და მეგობრული ურთიერთობა მაქვს. კარგი შვილი მყავს, თავის ასაკისთვის ზედმეტად სერიოზული ბიჭია.

-  "მაიმუნისთვის უდიდესი სიყვარული მოდის გონებით და არა - გულით".
-  საერთოდ, ყველაფერი გონებიდან მოდის. სიყვარულის გულთან დაკავშირება მოგონილი ამბავია. არ მჯერა ერთი ნახვით შეყვარების - ეს ილუზია და ფანტაზიის ნაყოფი მგონია.

-  "ამაოდ ეცდებით, თქვენ მიმართ მისი ნამდვილი ზრახვები ამოიცნოთ".
-  ზოგჯერ ასეც ხდება.

-  ნამდვილ ზრახვებს რატომ მალავ?
-  არ არის საჭირო, ყოველთვის და ყველას ნამდვილი სახე უჩვენო.

-  აბა, ცხოვრებაში არ ვთამაშობო?..
-  დამიჯერე, ეს თამაში არ არის.

-  "თუ გაბრაზდა, უფრთხილდით: სტიქიასავით დაუნდობელია და გზად შემხვედრს, ყველაფერს ანადგურებს".
-  ჩემი გაბრაზება ძნელია. დიდი ნებისყოფა მაქვს, მაგრამ თუ გონებაში რაღაც "გადაიკეტა", მერე კონტროლს ვკარგავ. ვაღიარებ, განრისხებულს საგნებიც დამიმტვრევია.

-  "ბუნებით ამაყია".
-  ნაკლებად. ვამაყობ, როცა ქართველი სპორტსმენი, მუსიკოსი, მსახიობი წარმატებას მიაღწევს.

-  გვარიშვილობით ამაყობ?
-  არა!

-  "ჯიუტია".
-  უჰ! ძალიან ჯიუტი ვარ. ვფიქრობ, ჯიუტ ადამიანთან ურთიერთობა უფრო საინტერესოა, ვიდრე - დამყოლთან.

-  "მიდრეკილება აქვს ქორწინების გარეშე ურთიერთობებისადმი, რაც მის ცხოვრებას ხშირად ართულებს".
-  ქორწინება დიდი პასუხისმგებლობაა და ამას გავურბივარ. ქართველებს გვაქვს მშობლებთან მისვლის და გოგოს ხელის თხოვნის ტრადიცია. ვერ წარმომიდგენია, ეს როგორ უნდა გავაკეთო? ვერასდროს დავჯდები ნეფე-დედოფლის მაგიდასთან 7 საათის განმავლობაში და ყოველი სადღეგრძელოს შემდეგ, ფეხზე ვერ წამოვდგები. ქართულ ტრადიციებს პატივს ვცემ, ქართული მენტალობა მაქვს, მაგრამ ასეთი რაღაცების კეთება არ შემიძლია. მირჩევნია, ჩემი ბედნიერების დღე ახალგაზრდულ გარემოში, ვიწრო სამეგობრო წრეში აღვნიშნო. მშობლები 500-კაციან ქორწილებს რომ გეგმავენ, ეს არ მომწონს.

-  შენს რჩეულს მრავალრიცხოვანი ქორწილი რომ მოუნდეს, როგორ მოიქცევი, დათმობაზე წახვალ?
-  კარგი, რა, რას მეუბნები? ამის შანსი არ არის; მაქსიმუმ, 50-კაციან ქორწილზე დავთანხმდები...

თამუნა კვინიკაძე
ჟურნალი ”გზა”