მრავალნატანჯი ეპოპეა ზომბების მსოფლიო ომის შესახებ ბრედ პიტის მონაწილეობით
ჰოლივუდურ კინემატოგრაფში ძალიან პოპულარულია ზომბი-თემა. რამდენიმე ნომრის წინ ჩვენც გაგაცანით სერიალი ''მოსიარულე მიცვალებულები'' , რომელსაც მსოფლიოში მილიონობით თაყვანისმცემელი ჰყავს და ძალიან აქტიურად უყურებენ საქართველოში. თავის დროზე ეს თემა მილა იოვოვიჩის ''ბოროტების სავანემ'' წამოსწია წინ.
პირველი სერია საკმაოდ საინტერესო, დამაინტრიგებელი იყო და შეიძლება ითქვას, ზომბები საერთაშორისოდ პოპულარული გახადა. მას შემდეგ ზომბებზე შავი კომედიებიც კი გამოდიოდა ცისფერ ეკრანებზე.
უკვე რამდენიმე თვეა, კინომოყვარულები დიდი ინტერესით ელოდებიან ბლოკბასტერს ამავე თემაზე სახელად ''ზომბების მსოფლიო ომი'' . როდესაც სოციალურ ქსელებში ფილმის პირველი ტრეილერი გამოჩნდა, აშკარა იყო, რომ ძალიან მასშტაბურ პროექტთან გვქონდა საქმე. მის წარმოებაში რამდენიმე კომპანია იყო ჩართული, მათ შორის ბრედ პიტის Plan B . პიტმა კი ბლოკბასტერის მთავარი გმირის, გარი ლეინის როლი მოირგო.
''ზომბების მსოფლიო ომი'' 2006 წელს მაქს ბრუკსმა დაწერა. ეს არის აპოკალიპტური საშინელებათა ჟანრის წიგნი. სხვათა შორის, ეს მწერალი ადრეც იყო ''შემჩნეული'' ზომბების სიყვარულში, როდესაც 2003 წელს მსგავს თემაზე წიგნი გამოსცა.
2013 წელს კი ნაწარმოებმა კინოეკრანებზე გადაინაცვლა და მსოფლიო პრემიერა 21 ივნისს გაიმართა, საქართველოშიც ორიოდ კვირის წინ გამოვიდა. ფილმის რეჟისორი გახლავთ მარკ ფოსტერი. გადავინაცვლოთ ფილმის შინაარსზე _ ბრედ პიტის გმირი, გარი ლეინი, გაეროს განსაკუთრებით სახიფათო მისიებში იყო ჩართული, თუმცა ოჯახის გამო საქმიანობას თავი დაანება და ისტორიის დასაწყისში ტკბილ ოჯახურ ცხოვრებაშია ჩართული. ის ცოლსა და ორ გოგონასთან ერთად საავტომობილო საცობში მოხვდება, ერთი შეხედვით, თითქოს უჩვეულო არაფერი ხდება, სანამ მოტოციკლისტი მის მანქანის სარკეს არ მოტეხს...
შეიძლება ითქვას, რომ ფილმის პირველივე წუთებიდან ისეთი ამბავი ხდება, რომ კინოთეატრის (ან სახლის) სავარძელს, გპირდებით, ორივე ხელით იქნებით ჩაჭიდებული. მით უმეტეს, როცა კინოთეატრებში 3 დე სათვალესაც მოირგებთ და აგრესიული ზომბების ნაკადი პირდაპირ თქვენკენ ''გამოეშურება'' . ერთი-ორჯერ გადავსებულ დარბაზში ისეთი კივილი გაისმა, რომ აშკარა იყო, ზოგიერთი მაყურებელი გვარიანად შეშინდა.
გარი ლეინი როგორღაც თავის შვილებთან ერთად ერთ-ერთი სახლის სახურავზე ავა, სადაც მას გაეროს მიერ გამოგზავნილმა ვერტმფრენმა უნდა მოაკითხოს. გარის ოჯახის უსაფრთხოებას ერთი პირობით დაჰპირდებიან, თუკი ის გაემგზავრება კორეაში, საიდანაც, სავარაუდოდ, ზომბების პანდემია დაიწყო და ახალგაზრდა ვირუსოლოგთან ერთად გაარკვევს, რა მოხდა სინამდვილეში.
ფილმს საკმაოდ კარგი დინამიკა აქვს, მაყურებელს არ მოსწყინდება ამ ამბის ყურება და გარდა ამისა, ძალიან კარგი ნამუშევარია სპეცეფექტების თვალსაზრისით, რაც ფილმს სანახაობრივად საკმაოდ დატვირთულს ხდის.
ბრედ პიტის კინოკომპანიამ ნაწარმოების ეკრანიზაციაზე უფლება ჯერ კიდევ 2007 წელს მოიპოვა. იმავე წელს დამტკიცდა რეჟისორი, 2009 წელს კი გადაწყდა, რომ სცენარში გარკვეულ ცვლილებებს შეიტანდნენ და ამისთვის ახალი სცენარისტი დაიქირავეს. 2011 წლის ივლისში ფილმის გადაღებები მალტაზე დაიწყო. ''ზომბების მსოფლიო ომის'' გადასაღებად 125 მლნ დოლარი გამოიყო, გადაღებებმა კი მალტიდან იმავე წელს ჯერ გლაზგოში, შემდეგ კი ბუდაპეშტში გადაინაცვლა. 
ფილმი, წესით, 2012 წელს უნდა გამოსულიყო, დეკემბერში და ახალი წლის წინ ხალხი კარგად შეეშინებინა, თუმცა პროდიუსერებმა გარკვეული ცვლილებების აუცილებლობა დაინახეს, ამიტომაც 2012 წლის ივლისში კვლავ დაუბრუნდნენ გადასაღებ მოედანს და რამდენიმე კვირა დაამატეს, რათა კადრები თავიდან გადაეღოთ. მუშაობისას სცენარის თავიდან გადაწერა გახდა საჭირო, ამიტომაც ჯერ დეიმონ ლინდელოფი დაიქირავეს, შემდეგ კი დრიუ გოდარდს მიმართეს, რომელმაც საბოლოო შტრიხები შეიტანა სცენარში. 2012 წლის სექტემბერ-ოქტომბერში კვლავ დაინიშნა დამატებითი გადაღებები.
მრავალნატანჯი და გაუბედურებულსცენარიანი ფილმის პრემიერა, როგორც იქნა, 2013 წლის 2 ივნისს შედგა, როდესაც მან მოსკოვის 35-ე საერთაშორისო კინოფესტივალი გახსნა.
ნინო მურღულია
ჟურნალი ''რეიტინგი''
