ლენუკა ყიფშიძე: "მამას არ უნდა, რომ მეორედ გავთხოვდე"
მოდელ ლენუკა ყიფშიძის ცხოვრებაში მამაკაცი გამოჩნდა, ვისთანაც თავს კარგად გრძნობს. უნდა, ოჯახი შექმნას, შვილები გააჩინოს, მაგრამ მამა, ცნობილი მსახიობი ზურა ყიფშიძე, კატეგორიული წინააღმდეგია, არ სურს, მისი ქალიშივლი სახლიდან წავიდეს. მისი აზრი 31 წლის ლენუკასთვის ძალიან მნიშვნელოვანია, თითქმის გადამწყვეტია.
ყიფშიძეების ოჯახში ლენუკას როლიც მნიშვნელოვანია. შვილს უვლის, ორ ძმისშვილს მამიდობას უწევს, საშინაო და "საგარეო" საქმეებსაც აგვარებს. ახლახან ერთ–ერთი ორგანიზაციის მარკეტინგის დირექტორი გახდა. ეს მისი ოცნება ყოფილა. გვითხრა, ყოველთვის მინდოდა, რაღაცის დირექტორი ვყოფილიყავი და გამომივიდაო.
– ლენუკა, გავიგე, რომ თქვენს ცხოვრებაში სიახლეებია. ჩვენც ხომ არ გვიამბობთ მათ შესახებ?
– ამ თემასთან დაკავშირებით მხოლოდ ერთს გეტყვით, ჩემს ცხოვრებაში არის ადამიანი, ვისთანაც თავს კარგად ვგრძნობ. ამ ეტაპზე მხოლოდ ამის თქმა შემიძლია. სხვა სიახლეც მაქვს. რამდენიმე თვეა, რაც სპორტ–ბიზნეს–მენეჯმენტში დავიწყე მუშაობა, მარკეტინგის დირექტორი გახლავართ. ესპანურ ბრენდს ვუწევთ პოპულარიზაციას. სპორტულ სფეროში გადავვარდი, თავიდან ბოლომდე ამ საქმეში ვარ ჩართული.
– დირექტორობა კარგად გამოგდით?
– მთელი ბავშვობა ვოცნებობდი, რაღაცის დირექტორი ვყოფილიყავი და ეს ოცნება 31 წლის ასაკში შემისრულდა. ეს ის საქმეა, რაც ძალიან მხიბლავს.
– საქმეს დედის როლს როგორ უთავსებთ?
– მიყვარს ეს როლი. ჩემი შვილი, ნიკუშა ნინუა, 12 წლისაა, გარდატეხის პერიოდი ეწყება და ახლა მას დედა განსაკუთრებულად სჭირდება. რთული ბავშვი არ არის, ძალიან მოსიყვარულეა. ჩემთან ერთად დაძინება უყვარს. საღამობით სულ მთხოვს, რომ მასთან ერთად დავიძინო. მის აღზრდაში მთელი ოჯახი მონაწილეობს. კარგად სწავლობს. მამაჩემი ნიკუშას მის მეორე ბაბუას, ჩემს მამამთილს ამსგავსებდა. ახლა კი ყველა ჩემს ძმას, გიორგის ამსგავსებს – ერთნაირი ტიპები არიან. ახლა გიოსაც ხელი აქვს მოტეხილი (სპექტაკლის დროს მოიტეხა) და ნიკუშასაც. ერთად რომ სხედან, ძალიან სასაცილოები არიან. ყიფშიძეების დამახასიათებელი თვისებაა, რაღაც რომ გვეწყინება, თვალები მაშინვე ნაღვლიანი გვიხდება. ნიკუშა ამ თვისებით ჩვენ გვგავს. ჩემსავით ემოციურია.
– გიფიქრიათ იმაზე, როგორ მიიღებს ნიკუშა მამაკაცს, რომელიც თქვენი ცხოვრების თანამგზავრი გახდება?
– რა თქმა უნდა, ჩემს ცხოვრებაში შვილი უპირველესია. იმ ადამიანს ჩემი შვილიც უნდა უყვარდეს, სხვაგვარად არაფერი გამოვა. როცა ოჯახის შექმნას გადავწყვეტ, ამ თემაზე პირველად ნიკუშას დაველაპარაკები.
– ოჯახის შექმნა ახლო მომავლის საკითხია?
– ვერაფერს გეტყვით. ადრე ძალიან მეშინოდა ახალი ურთიერთობის წამოწყების, ახლა ამ შიშმა გამიარა. პირობას ვდებ საჯაროდ, როგორც კი გათხოვებას დავაპირებ, ამის შესახებ პირველად თქვენს მკითხველს ვუამბობ.
– თქვენი ოჯახი, წასული თაობაც და ახლანდელიც, საზოგადოებაში ყოველთვის ცნობილი და პოპულარული იყო. როგორია ურთიერთობები ამ ოჯახის შიგნით, მის წევრებში, უფროსებსა და უმცროსებს შორის?
– ერთი დიდი იტალიური ოჯახი ვართ, ყველა ერთად ვცხოვრობთ. თქვენ არ იცით, საღამოობით რა ხდება ჩვენს ოჯახში. სამზარეულო სავსეა მეგობრებით და ჩვენი სახლიდან დიდი ჟრიამული გადის. ყიფშიძეებმა დედაჩემს ძეგლი უნდა დავუდგათ. ის სახლში ჩაჯდა, თავის დროზე კი მოდელი, მსახიობი, ძალიან აქტიური ქალი იყო, მოტოციკლეტით მოძრაობდა. ახლა რომ ვუყურებ, სულ სახლში ზის და ამაზე გული მწყდება. მან შვილებს და ქმარს თავი შესწირა. ძალიან რთულია ზურასნაირი კაცის ცოლობა. ის ყოველთვის ცნობილი იყო, სულ ქალები ეხვია გარს. დედასთვის მითქვამს, ზურასნაირ ქმარს ვერ ავიტანდი–მეთქი.
იგივე შემიძლია ვთქვა ჩემს ძმაზე. გიორგის ატანა ძალიან რთულია. ზოგადად ხელოვანი ადამიანი ხასიათის სირთულით გამოირჩევა.
– როგორი დაძმობა გაქვთ?
– მე და გიოს გამორჩეული დაძმობა გვაქვს. ძმაკაცები ვართ, ყველაფერს ვუზიარებთ ერთმანეთს. ამ ბოლო პერიოდში ცოტა ჩამოვშორდით, თავისი ოჯახი აქვს, სულ საქმეზეა, სახლიდან არის გასული. ბავშვობაში ვხოცავდით ერთმანეთს, სკამებიც კი გვისვრია. მახსოვს, რომ გავთხოვდი, უფრო სწორად, გავიპარე, დამირეკა და მითხრა, სახლში მოსული არ დაგინახოო. ამის გარდა, ისეთი სასწაულები მითხრა, რომ თქმაც არ ღირს. ეს იყო და ეს, სხვა უთანხმოება გიოსთან არ მახსოვს. ჩვენ შორის საიდუმლო არაფერია.
– ძმა და მამა დღემდე აკონტროლებენ თქვენს პირად ცხოვრებას?
– ზურა ძალიან ეჭვიანია. რომ ჩავიცვამ და წასასვლელად მოვემზადები, სულ მეკითხება, სად მიდიხარ და როდის მოხვალო. ვეტყვი ხოლმე, კარგი, რა, მამა, ლამის 80 წლის ვარ და კიდევ ყველა დეტალს კითხულობ–მეთქი. ხშირად უკითხავს, კიდევ თუ აპირებ გათხოვებასო. ძალიან არ უნდა, რომ ხელმეორედ შევქმნა ოჯახი. ამ სახლიდან ჩემს წასვლას ზურა ვერ გადაიტანს.
– როგორც ვიცი, ბატონი ზურას მოთხოვნით, არც ცხვირის ოპერაცია გაიკეთეთ და არც ხალი მოიშორეთ. მისი აზრი თქვენთვის გადამწყვეტია?
– ზურას აზრს ზედმეტად ვითვალისწინებ. როცა ჩავიცვამ, ხშირად ვეკითხები, ის სამოსი მიხდება თუ არა. კატეგორიული წინააღმდეგი იყო, როცა ერთხელ წამომცდა, ხალს მოვიშორებ–მეთქი. მითხრა, ეს შენი ნიშანია, მე ასეთი მომწონხარო. ბებიაჩემმა, ლენა ყიფშიძემ, ცხვირის ოპერაცია რომ გაიკეთა, ზურა 2 წელი არ ელაპარაკებოდა. ბებიაჩემს ერთ–ერთი კინოშემოთავაზება ჰქონდა, მაგრამ "წოპეს ცხვირის" გამო დაიწუნეს. ერთხელ მეც ვთქვი, კეხს გავისწორებ–მეთქი, მაგრამ მამამ კატეგორიულად მითხრა, ხელი არ მოჰკიდო, თორემ დაგასიკვდილებო!
– თქვენ როგორი შვილი ხართ მამისთვის?
– მისი მისამართით ბევრი მოსაფერებელი სიტყვა შემიძლია გითხრათ. ძალიან მწყდება გული, რომ ჩვენს ქვეყანაში მამაჩემი ისე არ დააფასეს, როგორც ამას იმსახურებდა. წლები გადის, ადამიანი ბერდება. ვხედავ, რომ ზურას საოცარი ენერგია აქვს დაგროვილი, რომლის დახარჯვაც უნდა, მაგრამ... გაგიკვირდებათ და, უცხოეთში უფრო აფასებენ. ამას წინათ მოსკოვიდან ნიკიტა მიხალკოვმა დაურეკა და საერთაშორისო კინოფესტივალის ჟიურის წევრობა შესთავაზა. ეს ზურასთვის დიდი პატივია. ადრე სოფიკო ჭიაურელი იყო საერთაშირისო კინოფესტივალის ჟიურის ერთ–ერთი წევრი. საწყენია, ჩვენს ქვეყანაში ხალხი იმქვეყნად რომ წავა, მერე აფასებენ.
– ამბობენ, რომ მამიდა–ძმისშვილების ურთიერთობა განსაკუთრებულია, რადგან ერთი გვარისანი არიანო. ამას საკუთარი ოჯახის მაგალითზეც იტყოდით?
– ვგიჟდები ჩემს ძმისშვილებზე – ნატალიასა და ალექსანდრეზე. ისინი ყველაზე საყვარელი არსებები არიან ჩემთვის. ნატალია ერთი კვირა ჩვენთან არის, ერთი კვირა – დედასთან. ამას წინათ ტელეფონით მითხრა, შენ რომ არ მყავდე, რა მეშველებოდაო. დავდნი, ეს სიტყვები რომ გავიგონე! ხშირად დეს მეძახის. ალექსანდრე ჯერ წლის და თვეებისაა.
– ოჯახურ საქმეებში დედას ეხმარებით?
– მე ყველაზე აქტიური ვარ ოჯახში. მე და კრისტიმ (გიორგი ყიფშიძის პირველი ცოლი. ავტ.) ზურას და ლელას (ლენუკას დედა. ავტ.) ჩერეპაშკები შევარქვით. არ იცით, რა რაჭველები არიან! სახლის დალაგება, სადილ–ვახშმების კეთება კარგად გამომდის.
– იმ ასაკში ხართ, როცა საუკეთესო დროა მეორე შვილის გაჩენისთვის. ამაზე გიფიქრიათ?
– როცა ოჯახს შევქმნი, შვილებს აუცილებლად გავაჩენ, ორს მაინც, თუ, რა თქმა უნდა, ამას უფალი ინებებს. მეორე შვილი გოგო მინდა. იცით, ჩემი გოგონა, როგორი მსურს, რომ იყოს? შავგვრემანი, ღია ფერის თვალებით.
– პერიოდულად თქვენზე სხვადასხვა ჭორი ვრცელდება. ამაზე როგორ რეაგირებთ?
– მინდა, რომ ეს დაწეროთ: ჩემ ირგვლივ ძალიან ბევრი კაცი ტრიალებს – გიოს მეგობრები ჩემი მეგობრებიც არიან. საკმარისია, რომელიმე ბიჭის გვერდით დამინახონ, ეგრევე "ბირკა" მაქვს აკრული. ძალიან ემოციური ვარ და ამ ყველაფერს მძაფრად აღვიქვამ. ხშირად მიტირია, ჩემზე ასეთ სისულელეებს რატომ ლაპარაკობენ–მეთქი. რას ვიზამ, ვინც მიცნობს, იცის, როგორიც ვარ.
ლანა კიკნაძე
