ვარსკვლავური "უიქენდი" ქართულად

სანამ აგვისტო, შვებულების აქტიური პერიოდი დადგება, დასვენების დღეებს, ე.წ. "უიქენდებს" ყველა თავისებურად ატარებს. ზოგი ორი დღით საკუთარ აგარაკს მიაშურებს, ზოგი უბრალოდ სახლში ჯდომას ამჯობინებს, ზოგი საღამოობით ბარებსა და კლუბებში ერთობა. ზოგიერთიც ზღვისპირეთს აკითხავს...
ალბათ საინტერესოა, როგორ ატარებენ კვირის ბოლოს ქართველი ვარსკვლავები. "ამბები.გე" რამდენიმე მათგანს - ქრისტინე იმედაძეს, თიკა ფაცაციასა და ანრი ჯოხაძეს დაუკავშირდა.

ქრისტინე იმედაძე:
- ქრისტინე, თბილისში ხარ?
- კი, ახლა ქუჩაში ვარ, გარგარი ვიყიდე და სახლში მივდივარ.

- შაბათ-კვირის გატარებას კლუბში ხომ არ აპირებ?
- არა, რას ამბობ. დიდად არ მიყვარს ეგ ამბავი, მგონი, დავბერდი. ისე, ბავშვობიდან არ მყვარებია კლუბში გართობა, თუ წახვალ, ან ზედ გადაგივლიან, ან სასმელს მოგაწუწავენ, ან ერთი კარგი ჩხუბის მომსწრე გახდები... სიამოვნებას მანიჭებს მეგობრებთან ერთად ყოფნა, ვინმეს აგარაკზე, ან ვინმეს თუნდაც აივანზე, სადმე ბუნებასთან ახლოს, ეს საოცრად მამშვიდებს, ვიდრე ხმაურიანი თავშეყრა სადმე თბილისურ კლუბში.

- ისე, როგორც ვიცი, თბილისში არ იყავი და ახლა ჩამოხვედი...
- ჰო, ბებია გარდამეცვალა და ამისთვის ჩამოვედი. რამდენიმე თვის წინ უკრაინაში წავედი, იქ რაღაც პროექტები იგეგმება, რომელშიც ჩართული ვარ და ამის შესახებ ცოტა ხანში გაგანდობთ. ახლა მხოლოდ იმას ვიტყვი, რომ საქმე სიმღერას ეხება...

ანრი ჯოხაძე:
- ანრი, მოგესალმები. დღეს შაბათია, როგორ აპირებ "უიქენდის" გატარებას?
- სახლში ვარ, არაფერსაც არ ვაკეთებ და ოჯახურ ატმოსფეროში ვისვენებ. არც საღამოს ვაპირებ სახლიდან გასვლას... ცოტა ხანში "იურმალის" კონკურსზე ვაპირებ გამგზავრებას, მიწვეული ვარ, სადაც ქართველ გამომსვლელს, სალომე ქათამაძეს უნდა ვუგულშემატკივრო. იქიდან რომ დავბრუნდები, დასასვენებლად ბულგარეთში უნდა გავემგზავრო. შემდეგ კი ბათუმს ვეწვევი, სადაც ბათუმის ოპერის თეატრში კონცერტის გამართვას ვაპირებ...

- ისე, კი გამიკვირდა, საღამოს კლუბში წასვალას და გართობას რომ არ აპირებ...
- არა, რა კლუბი, მგონი, დავბერდი...

- რა დროს სიბერეა?!
- ისე, მართალია, სიბერე არაფერ შუაშია, ადრეც ასე იყო, კლუბში ვერ ვერთობი, ვინაიდან საქართველოში გართობა არ იციან. კლუბებში გულისამრევი სიტუაცია "იჩითება" ხოლმე. თან, ხალხმრავლობა არასდროს მომწონდა... თუმცა მეგობრების წრეში, ვისთანაც მსიამოვნებს ყოფნა და ვინც მიმიწვევს, ყოველთვის მივდივარ და ვერთობი...

- ისე, ბოლო დროს კლიმპეიკერის ამპლუაც მოირგე... მოსწონთ პროფესიონალებს შენი ნამუშევრები?
- სიმართლე გითხრა, არავისთან მივსულვარ და არ მითქვამს, აბა, ბატონო ჩემი ვიდეორგოლი თუ მოგეწონათ-მეთქი? თუმცა ჩემს კლიპებში ისეთი რანგის მსახიობებს ვათამაშებ, რომ მათი თანხმობა და შეფასება ჩემთვის ბევრს ნიშნავს... გივი ბერიკაშვილი რომ გეტყვის, - შენ რომ არა, ამის შანსი არც მომეცემოდაო... სხვა მაღალი რანგის მსახიობების მიერ გამოთქმულ კომპლიმენტებზე რომ არაფერი ვთქვა. ისე, კლიპინდუსტრია საქართველოში საკმაოდ დაბალ დონეზეა, ფაქტობრივად, კონკურენტი არც მყავს. თან, ახალგაზრდა რეჟისორებს ცოტა იდეის დეფიციტიც აქვთ...

თიკა ფაცაცია:
- თიკა, ახლა სად ხარ?
- ჩემს აგარაკზე. არაგვის ხეობაში. ოჯახით ჩამოვედით, ცოტა ხნის წინ მე და ბავშვები სოფლის ბაზრიდან დავბრუნდით, სადაც პროდუქტი შევიძინეთ. ჩემს უფროს ბიჭს უკვე ვასწავლი, როგორ უნდა შეარჩიოს ხილი თუ ბოსტნეული... ახლა ვაპირებთ, რომ გავგრილდეთ და ჩვენს აუზშიც ჩავხტებით, მანამდე კი ყველამ ერთად გავწმინდეთ. მერე მზეს მივეფიცხებით.

- ველოსიპედით არ სეირნობთ?
- ველოსიპედი მე არ მაქვს, სამაგიეროდ ჩემს შვილებს აქვთ და მათთვის ეს სერიოზული გასართობია.

- როგორც გატყობ, აგარაკზე დასვენება სიამოვნებას განიჭებს.
- ძალიან მიყვარს ეს ბუნება და ჩემი აგარაკი. სიმართლე გითხრა, აქ ყველაზე კარგად ვისვენებ და ვერთობი. თან, ჩემს ოჯახთან ერთად ვარ... როგორც ჩანს ქალაქური ცხოვრება ძალიან დამღლელია და ამიტომაც არის, რომ აგარაკზე სულიერად ვისვენებ...

- წიგნის კითხვა თუ გიყვარს?
- კი, ცოტა ხანში ჰამაკში ჩავჯდები და რაღაცას წავიკითხავ. საღამოს მეგობრებს ველოდები... ისე აქ სამეზობლოსაც ვსტუმრობთ, მახლობლად ბევრი ახლობელი ცხოვრობს. ზღვაზე წასვლას სამი წელია ვგეგმავ და ჯერ არ გამომივიდა ეგ საქმე... წელს ვნახოთ, აგვისტოში იქნებ ბათუმსაც ვეწვიო.

ლალი ფაცია