კოტე თოლორდავა: "ჩემს პირველ ბიჭთან დაშვებულ შეცდომას მეორესთან აღარ გავიმეორებ"

მსახიობი კოტე თოლორდავა სერიალში "ჩემი ცოლის დაქალები" უშვილობის პრობლემას ებრძვის, რეალურ ცხოვრებაში კი სამი შვილის, ორი ვაჟის და ერთი ქალიშვილის მამაა.
პირველი შვილი, ბორისი (ბუკა), 21 წლის ასაკში შეეძინა. მაშინ მსახიობ მარიამ ჯოლოგუაზე იყო დაქორწინებული. იმ დროს განცდილი სიხარული არ ავიწყდება. შემდეგ ორი შვილი – ტასო და თარაში – უკვე მეორე ქორწინებიდან, განო მელითაურისგან ჰყავს. ბუკა 13 წლისაა, ტასო – 4 წლის, თარაში კი – 1 წლის. ბუკა პატარა და–ძმას ხშირად სტუმრობს და მათთან ერთად ბევრ დროს ატარებს. მამას სერიალის გადაღებებზეც დაჰყვება. გადაღებებზე კოტეს პატარა ტასოც დაჰყავს, რომელიც მამას უკვე სცენაზე დადგომასაც სთხოვს.
– კოტე, ბუკა თქვენი, ასე ვთქვათ, სიყრმის შვილია და მისი დაბადება ალბათ ყოველთვის განსაკუთრებულად გახსენდებათ.
კოტე: აბა, რა! ეს ჩემს ცხოვრებაში ერთ–ერთი ყველაზე ბედნიერი დღე იყო. ბუკაზე განსაკუთრებული გრძნობა მქონდა, რადგან პირველია. ტასოს და თარაშის დაბადებაც ძალიან გამიხარდა, თუმცა ბუკასი – სხვანაირად, პირველი შვილი, თანაც ბიჭი. სხვათა შორის, არც ვიცოდი, რომ ვაჟს ველოდებოდი. არ ვამბობდი, მაგრამ ბიჭი ძალიან მინდოდა. როცა ექიმმა მითხრა, ჯანმრთელი შვილი და თან ვაჟკაცი შეგეძინაო, სიხარულისგან გიჟივით დავრბოდი, ბიჭი მყავს–მეთქი, ვყვიროდი. ღობემ გამაჩერა თორემ, ალბათ იმის იქითაც გავიქცეოდი.

– 21 წლის ბიჭს მამობა ბოლომდე არც გექნებოდათ გაცნობიერებული.
კოტე: იმ დროს თვითონაც ბავშვი ვიყავი, თუმცა ბუკას დაბადების მომენტს ისე ველოდებოდი და ისე მინდოდა, გაჩენილიყო, ჯერ დაბადებული არც იყო, რომ ძალიან მიყვარდა. სხვათა შორის, მამაჩემის სახელი ჰქვია. ბორისი კონსტანტინეს ძე, კონსტანტინე ბორისის ძე – სულ ასე მოდის. ჩვენთან, ოჯახში, ასეთი ტრადიციაა და ეს არავითარ შემთხვევაში არ უნდა დამერღვია. მამაჩემი მეზღვაურია და ბუკა რომ დაიბადა, ზღვაში, გემზე იყო. ერთხელაც, როცა დარეკა, ვუთხარი, ბორის, უმცროსი ბორიას დაბადებას გილოცავ–მეთქი. უცებ იქიდან ხმა გავიგონე, ბატონო ბორია, ცუდად ხომ არ ხართ, დაბრძანდითო. სიხარულისგან თურმე შებარბაცდა. შვილიშვილის დაბადება რომ გაიგო, იმ დღეს მთელი ეკიპაჟი დათვრა.
– ბუკა, რას გრძნობა ახლა, როცა შენი დაბადების ამბავს იგებ?
ბუკა: რა თქმა უნდა, ამ ამბის კიდევ ერთხელ მოსმენა ძალიან მესიამოვნა. მამა ჩემს დაბადებაზე ადრეც მიამბობდა. პირველი შვილი ხარ და ეს განსაკუთრებული სიხარული იყოო, მეტყვის ხოლმე, მაგრამ ბაბუაჩემის რეაქციები არ ვიცოდი. ახლა გავიგე პირველად და ძალიან გამიხარდა.
კოტე: ბუკა 7 წლამდე სულ ამბობდა, მამას ვგავარო. თუ ვინმე ეტყოდა, რომ დედას ჰგავდა, სწყინდა კიდეც.
ბუკა: ახლაც უფრო მამას ვგავარ.
– რითი ჰგავხართ ერთმანეთს?
ბუკა: ორივე ძალიან ემოციურები, მგრძნობიარეები ვართ. რაღაცეები ადვილად მიხარია, ადვილად მწყინს და გულიც ადვილად მწყდება. მამაც ასეა.
– როგორი მამაა კოტე, რბილი და დამთმობი?
ბუკა: მშვენიერი! რა თქმა უნდა, ცოტა მკაცრიც არის, ჩემგან მეტს მოითხოვს. ამასთანავე, ძალიან კეთილი და მზრუნველი მამაა. გარდა იმისა, რომ ჩემი მამაა, ძმაკაციცაა.

– კოტე, როცა ერთად ცხოვრობდით, ბუკას მოვლის პროცესში ჩართული იყავით?
კოტე: მაშინ, როგორც გითხარით, მეც პატარა ვიყავი, ჩემი გონება სხვაგან დაქროდა, მაგრამ ეს პირველი შვილი იყო და მზე და მთვარე მასზე ამომდიოდა. ძალიან განვიცდიდი იმ პერიოდს, როცა ბუკა ჩემთან არ ცხოვრობდა. ეს ძალიან მტკივნეული იყო. მინდოდა, სულ ჩემთან ყოფილიყო, ახლაც ასე მინდა, მაგრამ, ბუნებრივია, არ გამოდის. ის დედასთანაც უნდა იყოს და მამასთანაც. ბუკას რომ ვუყურებ, ვრწმუნდები, რომ ძალიან მგავს და ჩამოყალიბებული კაცია. მის ასაკში მე ასეთი არ ვიყავი. უნდა ნახოთ, თავის დასთან, ძმასთან როგორ იქცევა! პირი ღია მრჩება ხოლმე, ასე 20 წლის ასაკში ვერ ვიქცეოდი. ბუკას რომ ვუყურებ, ნეტავ, იცოდეთ, გული როგორი სიხარულით მევსება!
– ბუკა, ხშირად სტუმრობ მამასთან?
ბუკა: რა თქმა უნდა. კვირაში რამდენიმე დღე მასთან ვარ.
კოტე: შაბათ–კვირა ბუკა ჩემთან არის. ახლა ბუკა საქმიანი კაცია. სხვათა შორის, მასაც მსახიობობა უნდა. მისი ამ გადაწყვეტილებით მაინცდამაინც აღფრთოვანებული არ ვარ, მაგრამ დამოუკიდებელი ადამიანია და მის არჩევანს პატივს ვცემ, ყველანაირად გვერდში დავუდგები.
– ბუკა, მსახიობი მშობლების გამო მოგწონს ეს პროფესია?
ბუკა: ნაწილობრივ – კი. ფაქტობრივად სულ თეატრში ვარ. ბევრჯერ ყოფილა, რომ დედასთან, "თავისუფალ თეატრში" წავსულვარ სამეცადინოდ, მამასთანაც ხშირად დავდივარ თეატრში.
კოტე: ერთი პრემიერაც კი არ გამოუტოვებია.
ბუკა: ეს რაღაცნაირი ტრადიციაა, რომ მათ არც ერთ პრემიერას ვტოვებ.
– რა ემოციებით უყურებ დედას და მამას დარბაზიდან?
ბუკა: გააჩნია, რა როლი აქვთ. მაგალითად, დედა ერთ–ერთ სპექტაკლში ღარიბ გოგოს თამაშობს, რომელსაც ქმარი უკვდება. ასეთ დროს დედა მეცოდება, ძალიან ემოციური ვარ. როცა მამაც ისეთ როლს თამაშობს, რაღაც უჭირს, იმასაც განვიცდი. ძირითადად ჩემი არჩევანი მსახიობობას უკავშირდება, თუმცა ხანდახან აზრი მეცვლება, რადგან რთული პროფესიაა.
– მამა რას გასწავლის, ძირითადად რაზე გესაუბრება?
ბუკა: ძირითადად ჯენტლმენობას, ქალებთან ურთიერთობას მასწავლის... მეცადინეობაში მეხმარება. კაცს რაც უნდა ჰქონდეს, ყველაფერს მასწავლის.
კოტე: გაოგნებული ვუყურებ!
– ბუკა, შენ როგორი ემოციებით შეხვდი და–ძმის დაბადებას?
ბუკა: როცა ტასო და თარაში დაიბადნენ, ძალიან ბედნიერი ვიყავი. დასა და ძმაზე ვოცნებობდი, უფრო სწორად, და მინდოდა. ტასო რომ დაიბადა, სიხარულისგან გავაფრინე. მერე უკვე ძმაც მომინდა. სადმე რომ დამჭირდეს, გოგოს ხომ არ წავიყვან დასახმარებლად, ბიჭი მჭირდება. ამიტომ თარაშის დაბადება დიდი სიხარული იყო.
კოტე: საათივით აქვს აწყობილი ცხოვრება. სხვათა შორის, ბუკა ფანტასტიკური უფროსი ძმაა. ამათ რომ ვუყურებ, დედას ვფიცავარ, გული სიამაყით მევსება. კარგი აღმზრდელივით იქცევა, დინჯად, გაწონასწორებულად აძლევს მათ რჩევებს, უვლის.
რაღაც უცნაურია, მაგრამ სამივე შვილზე ვიცოდი, ვინ დაიბადებოდა. ტასოზე გავიგეთ, რომ გოგო იქნებოდა, მაგრამ მე და განო მანამდეც ვგრძნობდით, რომ ის გოგო იქნებოდა. შვილებზე მაგარს ცხოვრებაში ვერაფერს შევქმნით.
– ბიჭის, მით უმეტეს ორის, მამობა დიდი პასუხისმგებლობაა.
კოტე: ბუკას შემთხვევაში, როგორიც ვიყავი, ისეთ შეცდომას თარაშთან აღარ დავუშვებ. მაშინ მეც პატარა გახლდით და თან რაღაც ისეთი ტიპი, რა... რატომღაც ამასაც ვთხოვდი, რომ ესეც ასეთი ყოფილიყო. თუ ვერ ერევი, უკნიდან მიდი, ვედრო ან რამე ჩაარტყი–მეთქი, ვეუბნებოდი და ერთხელ, სამწუხაროდ, მართლა ჩაარტყა ვიღაცას რაღაც და ძალიან განვიცადე. მივხვდი, რომ ეს არასწორი იყო. ბუკა ძალიან ჭკვიანი, გაწონასწორებულია. მას მუშტებით გასარჩევი არასდროს ექნება, სიტყვით მოაგვარებს ყველაფერს. სადაც საჭიროა, იქ ივაჟკაცებს კიდეც და მუშტსაც გაიქნევს, მაგრამ ასეთი ტიპი არ არის და არც არის საჭირო, იყოს.
ბუკა კარგად სწავლობს, კითხვა უყვარს. სულ თვითონ ეძებს რაღაცეებს. თან სიმპათიურია, მამას ჰგავს. დედასაც ჰგავს, მაგრამ ხიბლი და "პრელესტი" ყველაფერი მამისგან აქვს. აქედან გამომდინარე, ზუსტად ვიცი, რომ ბუკა ყველაფერში წარმატებული იქნება.
– ბუკა, სერიალ "ჩემი ცოლის დაქალებზე", რომელმაც მამას დიდი პოპულარობა მოუტანა, უყურებ?
ბუკა: ყველა სერია მაქვს ნანახი. შეიძლება რაღაც სცენები გამოვტოვო, მაგრამ მამას თამაშს, შანსი არაა, არ გამოვტოვებ.
კოტე: სხვათა შორის, ძალიან კარგი მრჩეველია. თავის აზრს აუცილებლად მეტყვის, შენიშვნას რატომღაც არასდროს მეუბნება.
– ბუკა, მამაში რა მოგწონს?
ბუკა: ნიჭიერია და მართლა საამაყო მამაა. ამისმა ფანებმა გადამთელეს! სულ მამაზე მეკითხებიან. რა მოსწონს, რა – არა, როგორი ხასიათი აქვს, ცხოვრებაშიც დიტოსნაირია თუ არა – ძირითადი კითხვები ეს აქვთ ხოლმე.
– მოგწონს მისი პერსონაჟი დიტო?
ბუკა: დიტო ზედმეტად დანის მოტრიალე, უბანში მდგომი ბიჭია, მაგრამ მნიშვნელოვანი პერსონაჟია, ხალხს ეხმარება, კეთილია, თუმცა, უხეშად რომ ვთქვათ, ზედმეტი "კაიბიჭობა" გამოსდის.
– რამე მსგავსებას ხედავ დიტოსა და მამას შორის?
ბუკა: კი, მამაც ძალიან ყურადღებიანი და კეთილია. თითქოს არაფერი ეპარება, შეცდომას შეგისწორებს, კარგზე კი შეგაქებს... მამაც ადვილად ბრაზდება. მისი პერსონაჟიც ელემენტარულ რამეზე ბრაზდება ან ცუდი რეაქცია აქვს. მამაც ასეა. როცა ბრაზდება, შეიძლება არ შეიმჩნიოს, მაგრამ მე მაინც ვატყობ, რომ ცუდ ხასიათზეა.
– მაგალითად, რაზე შეიძლება კოტე გაგიბრაზდეს?
ბუკა: თუ პირობას დავარღვევ ან მოვატყუებ. ამიტომ ყოველთვის ვცდილობ, იმის გაკეთებისგან თავი შევიკავო, რაც მას გააბრაზებს.
კოტე: ჩემი აფეთქება ისე არ გამოიხატება, როგორც დიტოსი. მე უფრო ვცდილობ, თავი შევიკავო და რაღაცეები გავაკონტროლო.
– ბუკა, გინდა, მამას ჰგავდე?
ბუკა: მინდა, მამაჩემივით სოლიდური ვიყო. მას ჯენტლმენობა ახასიათებს, ძალიან კაცურია და მინდა, ეს მისგან გამომყვეს.
კოტე: სხვათა შორის, დიტო ცუდი ტიპი არ არის, მაგრამ ის დინოზავრივითაა, როგორც ისინი გადაშენდნენ, ჩემი აზრით, დიტოც გადაშენებული ტიპების გადმონაშთია. ახლა ასეთი მამაკაცები თითქმის აღარ არიან. გარკვეული კუთხით, ეს სამწუხაროც არის იმიტომ, რომ ვაჟკაცური და პრინციპულია. თუ იქამდე მივედით, რომ დიტოს სერიალში შვილი ეყოლა, ალბათ ძალიან ბევრ საინტერესო რაღაცას ჩემი ცხოვრებიდან გადმოვიტან.
– ტერმინი "ბაბუ", რომელსაც სერიალში იყენებთ, პოპულარული გახდა. თქვენც ასე ხომ არ მოგმართავენ?
კოტე: წითელა რომ გადავიტანე, ყველა მოდიოდა და მეუბნებოდა: "ვა, ბაბუ, გამოჯანმრთელდი?" "ბაბუ, გილოცავ, გვაკლდი". წონაში ძალიან დავიკელი. სერიალში რომ მოვედი, 98 კილო ვიყავი. დიეტა დავიწყე, მაგრამ წითელამ სასწაული გააკეთა, 74 კილო ვარ, 24 კილო მაქვს დაკლებული.
– სერიალის გადაღებაზე შვილები თუ დაგყავთ?
კოტე: შეძლებისდაგვარად – კი. ბუკამ წინა სეზონში დიტოს ბავშვობა ითამაშა. ახალგაზრდა დიტო არაჩვეულებრივად განასახიერა. რაც შეეხება ტასოს, ეს დღეებია დაიწყო საუბარი: "მამა, სერიალში მინდა", "მამა, სცენაზე მინდა".
– ტასომ მითხრა, მამიკოს დავავალე, დაიკო მინდაო.
კოტე: ეს შეკვეთა მოცემულია! როცა ახალ სახლში გადავალთ, შვილი კიდევ გვეყოლება. ახლა რეალურად უსახლკაროდ, ქირით ვართ. სამშენებლო კომპანიაში გვქონდა ფული შეტანილი. კომპანიის დირექტორი დაიჭირეს, ახლა გამოუშვეს, მაგრამ მშენებლობა შეჩერებულია და ვართ ასე გარეთ დარჩენილი. იმედი მაქვს, ყველაფერი გამოსწორდება.
ეკა ლემონჯავა