თიკა ჯამბურია: "ჩემს დას ისე უნდოდა, გოგო ჰყოლოდა, რომ მე გავუჩინე"

მომღერალ თიკა ჯამბურიას ორი უფროსი და თავზე დაჰფოფინებს, მასზე დედობრივ მზრუნველობას იჩენენ. ია თიკაზე 13 წლით უფროსია, ნინო კი – 4 წლით. უმცროს დაზე ორივეს დიდი ამაგი აქვს, თიკას მომღერლად ჩამოყალიბებასა და მის პოპულარობაშიც მათ მიუძღვით წვლილი. კარგად ახსოვთ ის დღე, როცა პატარა თიკა სამშობიაროდან სახლში მიიყვანეს... სამ დას რადიკალურად განსხვავებული ხასიათები ხელს არ უშლის, ერთმანეთს გაუგონ. თიკას თქმით, ია ძალიან დამთმობი, გულჩვილია და ნაბოლარა დაიკო ხანდახან თავის ჭკუაზეც ატარებს. ნინოსთან კი ეს არ გასდის, ამიტომ ხუმრობით დედინაცვალს ეძახის. ვერც ჩვენთან ინტერვიუზე დაითანხმა. იამ კი თიკას ბავშვობა, თავიანთი ოჯახის ამბები "სარკესთან" სიამოვნებით გაიხსენა.
ჯამბურიების ოჯახში ოთხი შვილიშვილია, ია ერთი შვილის დედაა, ნინო – ორის, თიკას გოგონას კი ყველა ერთად ანებივრებს.
– ია, გაიხსენეთ ის დღე, როცა თიკა პირველად ნახეთ. როგორ შეხვდით დები ახალშობილს?
ია: მახსოვს, თიკა სამშობიაროდან სახლში რომ მოიყვანეს, მაღალი ტემპერატურა მქონდა. მას შემდეგ ჩვენს ოჯახში სხვანაირი ცხოვრება დაიწყო. მე არ ვეჭვიანობდი, ნინო კი ძალიან განიცდიდა თიკას არსებობას. ამბობდა, სახლში მოდაში აღარ ვარო. გარკვეული დროის შემდეგ თოჯინებიდან დის მოვლა–პატრონობაზე გადავინაცვლეთ. მე და ნინო სულ ვკამათობდით, ვინ გაასეირნებდა, ვინ დაბანდა, ვინ დააძინებდა, ვინ დაუუთოვებდა კაბებს და ასე შემდეგ.
თიკა: იას და ნინოს მანსარდში თავიანთი ოთახი ჰქონდათ მოწყობილი, თავიანთი საიდუმლოებები გააჩნდათ. მათი მშურდა და მინდოდა, მეც დიდი ვყოფილიყავი.
– რა საერთო თვისებები გაქვთ დებს?
თიკა: სამივე და ერთმანეთისგან რადიკალურად განვსხვავდებით. ია ძალიან მშვიდი, წყნარი, კეთილი ადამიანია. მე და ნინო აქტიურები და ზედმეტად ემოციურები ვართ. გარკვეულწილად, იას და ნინოს ნაზავიც ვარ. რაღაც თვისებები ერთისგანაც მაქვს აღებული და მეორისგანაც. იას უყვარს კითხვა, ქარგვა, ხატვა, ჩვენი სახლის კედლებს მისი ნაქარგები ამშვენებს. ძალიან კარგი დედაა. ია არის ჩემი ნამდვილი და, ნინო კი ჩემი დედინაცვალია... (იცინიან).
– "დედინაცვლობას" რაში ამჟღავნებს?
თიკა: მე და ნინო სულ ვჩხუბობთ. მის სამოსს არ უნდა შევეხო, არადა ნინო ჩემი ტანსაცმლით "გაიზარდა". ია კი უპრობლემოა, გულს ამოიღებს და მომცემს, ძალიან დამთმობია. ნინოსთან საქმე რთულადაა, ამიტომაც ერთხელ ვუთხარი, შენ ჩემი დედინაცვალი ხარ, ია კი ჩემი ნამდვილი დაა–მეთქი.
– ია, უმცროსი დის პოპულარობა თქვენზეც ვრცელდება?
ია: რა თქმა უნდა. მოსწავლე–ახალგაზრდობის სასახლეში პატარებს ინგლისურ ენას ვასწავლი და სამსახურში ხშირად მომიხსენიებენ, როგორც თიკას დას, მასთან მოკითხვას ხშირად მაბარებენ. თიკა 5 წლის იყო, ანსამბლ "მზიურში" რომ მივიყვანეთ. იმდროინდელ ჩანაწერებს რომ ვუსმენ, ახლაც გული მიჩუყდება და მეტირება. მისი სიმღერები გულს ისე ხვდება, რომ ცრემლებს ვერ ვიკავებ. თიკა სულ შრომობდა. მის მუსიკალურ კარიერაში ნინო იყო ჩართული. ნინო პატარა ასაკიდან მართავს მანქანას და თიკა ყველგან მას დაჰყავდა.
თიკა: ახლა რასაც ვიტყვი, ჩემი მასწავლებლები რომ წაიკითხავენ, გაგიჟდებიან! სკოლაში საკონტროლო წერა რომ მქონდა, გავიჩეჩავდი თმას, გავიკეთებდი ყურსასმენებს, იას ვურეკავდი და ამა თუ იმ თემაზე ვეკითხებოდი. ისიც მკარნახობდა და საკონტროლოებს ასე ვწერდი. ია ისეთი განათლებულია, მისი ცოდნის მარაგი რომ მქონდეს, პრეზიდენტი ვიქნებოდი.
ია: თიკას სულ ვურჩევ საინტერესო წიგნებს. მას კარგი ბიბლიოთეკა აქვს.
– თქვენი წყალობით, თიკამ ალბათ ინგლისური ენა კარგად იცის.
ია: კი, როგორ არ იცის, უბრალოდ მინდა, უკეთ იცოდეს. კერძო მასწავლებელი ჰყავდა, ჩემთან არ მეცადინეობდა. ყოველთვის მთხოვდა, მის ნაცვლად დავალებები მე გამეკეთებინა. როგორც უფროსი და, უარს ვერ ვეუბნებოდი.
– თიკა, ია თუ მღერის?
თიკა: ოჯახში ვმღერით – მე, დედა და ნინო. მამა და ია კი საერთოდ ვერ მღერიან, არადა ისე უყვართ, სულ მღერიან, მაგრამ ვაი, ამ სიმღერას. ხომ არიან ადამიანები, რომელთაც ხმა აქვთ და სმენა – არა ან პირიქით? მამას და იას არც ხმა აქვთ და არც სმენა, მაგრამ მაინც მღერიან. ტექსტით თუ გაარჩევ, რას ღიღინებენ. ერთ–ერთ პრივატღონისძიებაზე ია ჯგუფ "ქართულ ხმებს" სიმღერის დროს აჰყვა. ერთმა გამოხედა და უთხრა, ქალბატონო, არ ღირს, ნუ იხარჯებითო... (იცინიან).
– ია, მაშინ რა რეაქცია გქონდათ, როცა თქვენს ხელში გაზრდილმა თიკამ გათხოვება გადაწყვიტა?
ია: თიკას პირად ცხოვრებაში არასოდეს ვეძიები. მას თუ არ სურს საუბარი, კითხვებს არ ვუსვამ. თიკამ ყოველთვის იცის, რომ მის მოსასმენად ნებისმიერ დროს მზად ვარ. შემიძლია დილიდან საღამომდე ვუსმინო. რაც შეეხება ბექას (თიკას ყოფილი ქმარი ბექა ხოფერია. ავტ.), მას ვუყურებდით, როგორც ბავშვს, რომელიც ჩვენს ოჯახში იზრდებოდა. ჩვენთან ხშირად მოდიოდა და ყველას ძალიან შეგვიყვარდა. როცა დაქორწინება გადაწყვიტეს, ეს არ იყო მოულოდნელი ამბავი ჩემთვის. ქორწილში ძალიან ვიტირე.
თიკა: ია ძალიან გულჩვილია.
ია: თიკა ლაღია, არასოდეს იმჩნევს უხასიათობას, მე კი არ გამომდის.
თიკა: ჩემს ცუდ განწყობას არავის ვახვევ თავს. როცა რთული პერიოდი მქონდა ცხოვრებაში, მაშინ მივხვდი, რომ, საკუთარი თავის გარდა, ვერავინ გამომიყვანდა მდგომარეობიდან.
– თიკას გოგონას, პატარა ნინას, დედიდები ანებივრებენ?
ია: აი, ნინა სულ სხვა ფენომენია ჩემთვის. ის ახლა წყნეთშია. ტირის, დედა თუ არ მოდის ჩემთან, ია მაინც მოვიდესო.
თიკა: იას ისე უნდოდა, გოგო ჰყოლოდა, რომ ნინა გავუჩინე.
ია: ნინას რომ ვუყურებ, ზუსტად ისეთი განცდა მაქვს, როგორიც საკუთარი შვილის მიმართ. თიკა ძალიან თბილი დედაა. მგონია, რომ შვილის მიმართ სიმკაცრეს არც მომავალში გამოიჩენს.
თიკა: სამი დისშვილი მყავს, ნინო ორი შვილის დედაა, ია – ერთის. იას შვილი ჩემი მშობლებისთვის პირველი შვილიშვილია. ამდენ გოგოში პირველი ბიჭია ოჯახში, პრინცივით ვექცეოდით. ულამაზესი ბავშვი იყო. დღეს კი ეს პატარა პრინცი ჩემზე მაღალი და ჩემზე მეტად აზრზე მოსული ტიპია. ის მართლა ჩემს ხელში გაიზარდა. კალათბურთელია, დეიდა თიკა მშობელთა კრებაზე დაჰყვება და კარგი მეგობრები ვართ.
მინდა, მოგიყვეთ იას ქორწილის ამბები. მართალია, მაშინ საბავშვო ბაღში დავდიოდი, მაგრამ ყველაფერი დეტალებში მახსოვს, ისიც კი, თუ რა მეცვა. ქორწილში დავპატიჟე ბაღის ჯგუფელები, ვიცეკვე ტანგო, ვიმღერე. მახსოვს, მამა როგორ ნერვიულობდა იას გათხოვების გამო, ისიც მახსოვს, როგორ "დავაწყნარე", მამა, არ ინერვიულო, ძალიან მალე მე გავთხოვდები და მერე ნინოც გამომყვება–მეთქი. არ დაგავიწყდეთ, მაშინ 5 წლის ვიყავი... (იცინიან).
– თიკას ოჯახის დანგრევა დღემდე სალაპარაკო თემაა. არავის ეგონა, დიდი სიყვარულით დაწყებული ურთიერთობა ასე მალე თუ დასრულდებოდა.
ია: რასაკვირველია, ჩვენთვის ძალიან მძიმე იყო ამ ამბის გადატანა. ნინა ახალი გაჩენილი ჰყავდა, თიკას ძალიან ემოციური პერიოდი ჰქონდა. ყველა ერთად დავუდექით გვერდით – დები, მეგობრები, მშობლები. ამით არ მთავრდება ყველაფერი. ვიცი, მისი ცხოვრება უკეთესობისკენ შეიცვლება. ადამიანი საკუთარ შეცდომებზე სწავლობს. თიკამ ძალიან პატარა ასაკში შექმნა ოჯახი.
თიკა: შენც ძალიან პატარა გათხოვდი. დედაც არ იყო დიდი, მამას რომ ცოლად გაჰყვა. ამიტომ ჩვენს ოჯახში ადრე გათხოვება უცხო არ არის.
ია: იმ ასაკში მე არ ვიყავი მზად ოჯახის შესაქმნელად, თიკა კი იყო. მას კარგი ოჯახი ექნებოდა, კარგი დედაა და კარგი ცოლი იყო.
– თიკა, თქვენს ცხოვრებაში ახალი ურთიერთობა არ დაწყებულა? რამდენიმე ხნის წინ სოციალურ ქსელში გავრცელდა ბიჭთან ერთად გადაღებული თქვენი ფოტოები, რასაც ჭორებიც მოჰყვა. რა ხდება, სიყვარული გეწვიათ?
თიკა: რა სისულელეა! არავითარი სიყვარული! 22 წლის ვარ და ამ ეტაპზე სერიოზულ ურთიერთობას არავისთან ვაპირებ, გათხოვებას – მით უმეტეს! გათხოვება არ მინდა! წლების შემდეგ, როცა ღირსეული პიროვნება გამოჩნდება ჩემს ცხოვრებაში, ხელმეორედ მაშინ შევქმნი ოჯახს. აბა, პირველ ქორწინებას ხომ არ გადავყვები?!
– სამზარეულოში რომელი ჯობიხართ?
ია: თიკა ძალიან კარგი მზარეულია, გურმანია და გემრიელი საჭმელებიც გამოსდის. ერთ–ერთ ჩემს დაბადების დღეზე ყველა კერძი თიკამ გააკეთა და ყველაფერი ბრინჯით შეაზავა... (იცინიან). ნინო პროფესიონალი კულინარია, მან ყველა ქვეყნის სამზარეულო იცის და უგემრიელეს სადილებს ამზადებს, მის ფონზე იმის თქმა, რომ მე კარგ აჯაფსანდალს ვაკეთებ, უხერხულია.
ლანა კიკნაძე