ფაქოს რჩეულმა ფეისკონტროლი სადედამთილოსთან უნდა გაიაროს
შოუმენ ფაქოს, ლევან გოგორელიანის, ქორწინება 4 წლის წინ დასრულდა. წყვილმა თანაცხოვრებიდან 2 წლის თავზე ცალ–ცალკე ცხოვრება გადაწყვიტა. მას შემდეგ ფაქოს დიდი სიყვარული აღარც სწვევია, თუმცა ბავშვობის სიყვარულს დღემდე ვერ ივიწყებს, იმ ადამიანის მიმართ დღემდე არ განელებია გრძნობა. დაქორწინებას არ ჩქარობს, არ უნდა, ისევ შეცდომა დაუშვას. როცა უყვარს, რომანტიკულია. საყვარელი ქალის გამო ბევრი რამის გაკეთება შეუძლია, მისი ფანტაზია კი ამ დროს უსაზღვროა. ერთხელ შეყვარებულს სახურავზე მოუწყო ვახშამი. დღეს მისი მთელი ყურადღება საქმისკენ არის მიმართული და ამბობს, რომ გოგონებისთვის არ სცალია. თუმცა, ამ მხრივ, დედამისი აქტიურობს. თუ როგორ, ამაზე ქვემოთ.
– ფაქო, ალბათ ბევრი გიფიქრიათ იმაზე, რატომ ვერ შედგა თქვენი ქორწინება და დასკვნებიც გაკეთებული გექნებათ. როგორ ფიქრობთ, თქვენი შეცდომა რა იყო?
– მას შემდეგ 4 წელი გავიდა. ცოლი რომ მოვიყვანე, 21 წლის ვიყავი და რაღაც საკითხებზე შეხედულებები ბოლომდე ჩამოყალიბებული არ მქონდა, თუმცა ამ ნაბიჯს არ ვნანობ, რადგან მაშინ ისე მოვიქეცი, როგორც საჭირო იყო. აქ მხოლოდ ჩემს შეცდომებზე არ არის საუბარი, სხვა ფაქტორებიც იყო, რაზეც არ მინდა ლაპარაკი.
– ალბათ ოჯახის წევრები გახსენებენ, რომ დაქორწინების დროა.
– დედა ჩემს პირად ცხოვრებაში არ ერევა, მაგრამ ცოლი მოიყვანეო, მაინც მეუბნება.
– როგორი რძალი უნდა?
– დედაჩემთან "ფეისკონტროლის" გავლა ადვილი ნამდვილად არ არის. მე ნაკლებად ვრევ ჩემს ცხოვრებაში, თორემ რძალს თვითონაც დიდი სიამოვნებით შეარჩევდა. ჩემთვის ისეთები მოსწონებია, რომლებსაც მეც დადებითად ვაფასებდი. ერთი გოგოთი ისე მოიხიბლა, ისიც კი მითხრა, თუ მაგარი ბიჭი ხარ, მიდი და თავი მოაწონეო.
– და მაინც ვერ დაგითანხმათ, რომ დაქორწინებაზე იფიქროთ.
– პირველი ოჯახის დანგრევა ძალიან განვიცადე. უკვე 27 წლის ვარ და არ მინდა, მეორედაც შეცდომა დავუშვა. ძალიან ვფრთხილობ, იგივე რომ დამემართოს, ალბათ ვეღარ გადავიტან.
– ყოფილ მეუღლესთან გაქვთ ურთიერთობა?
– იშვიათად, სადმე დღესასწაულებზე თუ შევხვდებით და ერთმანეთს დაბადების დღეებსაც ვულოცავთ. მე და მარიმ 2 წელი ერთად ვიცხოვრეთ და შეუძლებელია ჩვენ შორის რაღაც გრძნობა არ არსებობდეს, თუმცა ამ გრძნობას იმხელა ძალა ნამდვილად არ აქვს, რომ ისევ ერთად ვიყოთ.
– მის მიმართ აღარაფერს გრძნობთ?
– რასაც სხვების მიმართ განვიცდი, მარის მიმართაც იმავეს არ ვგრძნობ, რადგან, როგორც უკვე გითხარით, 2 წელი ერთად გავატარეთ.
– როგორ გოგოს შეუძლია თქვენი გულის დაპყრობა?
– ჩემგან განსხვავებული უნდა იყოს, ოღონდ – ოდნავ. მე როგორი ვარ, ეს მე არ უნდა მკითხოთ. მიყვარს, როცა გოგოს ლავიწის ძვალი ლამაზი აქვს. ხელებსაც დიდ ყურადღებას ვაქცევ, მეწვრილმანე ვარ. ქალის გარეგნობა მხოლოდ ხელების სილამაზეზე კი არ არის დამოკიდებული, მასზე შეხების დროს რაღაცას უნდა ვგრძნობდე, ოღონდ – რას, ამას ვერ აგიხსნით. ყოველთვის სხვადასხვანაირი გოგოები მომწონდა. არ ვარ ის ტიპი, ვინც მათ ხშირად იცვლის. ერთგულიც გახლავართ.
– გამოდის, რომ იოლად არ გიყვარდებათ.
– ეს ბავშვობაში უფრო ხდებოდა. უცებ მიყვარდებოდა და რას აღარ ვაკეთებდი.
– სიგიჟეებს ჩადიოდით?
– რას – აღარ! რასაც ვაკეთებდი, იმხელა სიამოვნებას ვიღებდი, ბოლოს ვერც ვხვდებოდი, ისინი ამ ყველაფრის ღირსები იყვნენ თუ არა. ერთი გოგო მიყვარდა და ყოველდღე წითელი ვარდები მიმქონდა მისთვის. ერთხელ სახურავზე რომანტიკული ვახშამიც კი მოვუწყვე – წითელი ხალიჩა, მაგიდა, ვარდები, შამპანური... თან ჩემი დაბადების დღე იყო, ოღონდ მან არ იცოდა. სახურავზე უბრალოდ ავედით და ეს ყველაფერი დავახვედრე. მიმტანი ჩემი ძმაკაცი იყო.
– ასეთი საღამოთი შეძელით მისი მოხიბვლა?
– მიზანი მისი მოხიბვლა და გულის მოგება არ ყოფილა, მთავარი იყო, ეს ყველაფერი გამეკეთებინა, მე თვითონ მსიამოვნებდა... სერენადებიც კი მიმღერია.
– ბიჭისა და გოგოს ურთიერთობაში რა არის მთავარი?
– სექსზე ძალიან ბევრია დამოკიდებული. ქორწინებამდე წყვილს ერთმანეთთან ურთიერთობა აუცილებლად უნდა ჰქონდეს. არ აქვს მნიშვნელობა, გოგოს შეყვარებული ერქმევა თუ მეგობარი გოგო. შეიძლება ამის გარეშე ქორწინებამდე ბევრი წყვილიც ცხოვრობს, მაგრამ შემდეგ თუ აღმოაჩენენ, რომ ერთმანეთს ვერ ეწყობიან, ეს უკვე დამანგრეველი პრობლემა ხდება. მე თავიდანვე ამ აზრის ვიყავი და ამას კვლევებიც ადასტურებს, რომლის თანახმადაც, ოჯახის დანგრევის ძირითადი მიზეზი სექსია.
– ესე იგი თქვენთვის ქალწულობის შენახვა მოძველებული მოვლენაა?
– ქალიშვილობის ინსტიტუტი საქართველოში შეიძლება ჯერ კიდევ არის შემორჩენილი, მაგრამ მე არ ვიცი. ჩვენს ქვეყანაში ყველანი ვალდებულები ვართ, ერთმანეთის შეხედულებებს პატივი ვცეთ. ვინც თვლის, რომ ქალიშვილი უნდა იყოს, იყოს!.. გოიმები მათი შეყვარებულები არიან, რომ ამ გოგოებთან სექსი ვერ მოახერხეს. თუ ბიჭს თავის შეყვარებულთან სექსი არ უნდა, ეს უკვე ძალიან ცუდია.
– თქვენ ცოლად მოიყვანდით გოგონას, რომელიც ქალიშვილი არ იქნებოდა?
– არ ვიცი... ამაზე არასდროს მიფიქრია.
– სექსის გარდა, ურთიერთობაში კიდევ რა არის მნიშვნელოვანი?
– ურთიერთობაში მთავარი ნდობაა, როცა ეს არ არის, დიდი დისკომფორტი იქმნება. ნდობა კი თვითონ ურთიერთობაში იბადება, უნდა დარწმუნდე, რომ გოგო არ გატყუებს.
– თქვენ არ მოგიტყუებიათ ქალი?
– ბევრჯერ. ეს არ არის კარგი საქციელი, მაგრამ ხანდახან გოგოსთან დამოკიდებულებაში ტყუილი ხშირად გიწევს. სამაგიეროდ მეც მოვუტყუებივარ ქალს. ეს ხომ ჩვენი ცხოვრების კანონზომიერებაა – რასაც გავაკეთებთ, ჩვენვე გვიბრუნდება უკან. მე არ მივეკუთვნები იმ მამაკაცების რიცხვს, რომლებიც ამბობენ, რომ ქალს არასოდეს მოუტყუებია, ეს არ არსებობს!
– მშვენიერ სქესთან ურთიერთობას დიდ დროს უთმობთ?
– ამ ეტაპზე გოგოებისთვის ნაკლები დრო მაქვს. ისინი ვერც ხვდებიან, თუ რატომ შეიძლება, რომ სამსახურში ღამის 2 საათამდე ვიყო. ეს ჩემთვის სამუშაო აღარ არის, როგორც სახლში, ტელევიზიაშიც (ფაქო ტელეკომპანია "ჯიდიესში" მუშაობს), აქაც ისე ვარ და საქმეზე ვფიქრობ. დროის განაწილება ძალიან მიჭირს.
– რაიმე საერთო ნაკლი შეგიმჩნევიათ ზოგადად ქართველი გოგონებისთვის?
– ურთიერთდამოკიდებულების კომპლექსები აქვთ. ბევრ რაღაცას მხოლოდ იმიტომ აკეთებენ, რომ ვიღაცას ეჯიბრებიან. შეიძლება ყველანაირად მიმზიდველი იყოს და ეს კარგადაც ჰქონდეს გაცნობიერებული, მაგრამ შემდეგ ურთიერთობაში პრობლემებს ქმნიდეს. ქართველი ქალების უმრავლესობას არასრულფასოვნების კომპლექსები აწუხებთ.
– რა თვისება მოგწონთ მათში?
– ვფიქრობ, რომ დროსთან ერთად თბილები და თავისუფლები გახდნენ, მათთან ურთიერთობაც უკვე სასიამოვნოა. გართობაც ისწავლეს და ბიჭებთან ერთად ჯდომა მათთვის აღარაფერს ნიშნავს, ხელიც კი აქვთ გადახვეული. სექსუალური ხარო, გოგოს რომ უთხრა, ეს უკვე აღარ არის სირცხვილი, სილას აღარავინ გაგარტყამს.
– თქვენთვის გაურტყამს გოგოს ამის გამო სილა?
– არა, რადგან ყოველთვის ვიცი, ვის რა კომპლიმენტი უნდა ვუთხრა და რა დროს. ამაში ძალიან ფრთხილი ვარ. კომპლიმენტებს იშვიათად ვისვრი, რადგან განსაკუთრებულად უნდა მინდოდეს ქათინაურების თქმა, რომ ვუთხრა. ვფიქრობ, ქალებს იშვიათი კომპლიმენტი უფრო ახარებთ.
– როგორი გოგონებისთვის იმეტებთ ქათინაურებს?
– "სვეჟად" უნდა გამოიყურებოდეს, რომ მას კომპლიმენტი ვუთხრა. გოგო უბრალო და ზედმეტი "რემონტის" გარეშე უფრო მომწონს. შეიძლება სახის ზოგიერთ მონაკვეთში აუცილებელია გარკვეული მაკიაჟი, მაგრამ თავიდან ბოლომდე რატომ უნდა გაიდღაბნონ? მაკიაჟი ყოველდღიურობაში ნამდვილად არაა საჭირო, არც დილიდან საღამომდე მაღალქუსლიან ფეხსაცმელზე დგომა მიმაჩნია მართებულად და არც ქუჩაში საღამოს კაბით სიარული.
– პლასტიკურ ქირურგიას არაერთი ქალი მიმართავს. ამაზე რა აზრის ხართ?
– რაღაც დოზით მისაღებია, მაგრამ ქალი ისე არ უნდა გადაკეთდეს, შვილი რომ აღარ ჰგავდეს.
– როდის არის ქალი ყველაზე მომხიბვლელი?
– დილით ახალგაღვიძებული ქალი თუ ლამაზია და თან ჩემი მაისური აცვია, ესე იგი მასზე ვგიჟდები. ქალს ყველაზე მეტად ჩემი მაისური უხდება.
– საქართველოში ვინ მიგაჩნიათ ყველაზე ლამაზ ქალად?
– არ ვიცი... არც ამაზე მიფიქრია, თუმცა ბავშვობაში ერთი ადამიანი ძალიან მომწონდა და მთელი ცხოვრება მომეწონება. ამაზე საუბარი არ მინდა, რადგან დღეს ჩვენ კარგი მეგობრები ვართ, თუმცა ნათქვამიც მაქვს, მის მიმართ რასაც ვგრძნობ.
სოფიო ბოჭორიძე
