"შენი წარსული მოვ....ან", ანუ მამაკაცთა სახეები "ჩემი ცოლის დაქალებში"
უკვე მესამე სეზონია, "რუსთავი 2"-ის ეთერით გადის სერიალი "ჩემი ცოლის დაქალები" და ის აქტუალურობას დღემდე არ კარგავს.
სცენარისტებმა ზუსტად მოარგეს ქართულ რეალობას სერიალის გმირების თავგადასავლები. განსაკუთრებული განსჯის საგანი ხდება მაყურებელში სერიალის გმირი მამაკაცების საქციელი.
უკვე გამოიკვეთა ფილმში ქართველი მამაკაცის ორი ტიპი – სანიმუშო მეოჯახე (დათო), მდიდარი, დედისერთა, საკუთარ თავში დარწმუნებული მოძველბიჭო (დიტო).
დათო, რომელიც მხოლოდ იმაზე ფიქრობს, არაფერი მოაკლოს ოჯახს, ცხოვრობს და ხარობს მხოლოდ ცოლ-შვილით, ერთ მშვენიერ დღეს მოინუსხება სექსუალური სტომატოლოგით, რომელსაც კინაღამ სათაყვანებელ ოჯახს შესწირავს.
დიტო – წარმატებული ბიზნესმენი, მას ემორჩილება საძმო, ჰყავს ქვეშევრდომები და მოარჯულა ცოლიც კი, რომლის სიყვარულსაც 20 წელი "მოთმინებით" ელოდა. მაგრამ დედისერთა დიტო უძლურია მკაცრი დედის წინაშე, მის განკარგულებას, გაიკეთოს ერეკლეს ქამარი და წავიდეს ნათელმხილველთან, ის უსიტყვოდ ემორჩილება.
ძლევამოსილი დიტო, სავარაუდოდ, არასოდეს გაივლებს გულში ცოლის ღალატს (ნუ, ერთი ღამით მეძავთან თუ წავა, ეს ღალატი არ იქნება); მეტიც, მას სასაცილოდ არ ეყო, როცა გაიგო, რომ ნინას არქიტექტორმა და წესიერმა ქმარმა უღალატა.
სამაგიერო ერთგულებას მოითხოვს დიტო ცოლისგან, კატოსგან, რომელსაც უამრავი თავგადასავალი ჰქონია მეორედ გათხოვებამდე. სექსუალურმა კატომ კარგად მოირგო ცოლის ამპლუა, თუმცა სად უნდა წავიდეს, რომ რომელიმე ყოფილი საყვარელი არ გადაეყაროს? "შენი წარსული მო...ან", "დაგიხვრეტ კოჭებს" – შეაფერხებს თუ არა კატოს ეს მუქარა და გინება, რომ არ გაიხსენოს წარსული ცხოვრება, ჯერ უცნობია. უცნობია ისიც, აპატიებს თუ არა ზედმეტად თავმოყვარე და ძველი ბიჭი დიტო ცოლს გვერდზე გახედვას.
ასევე, არავინ იცის, ბედნიერია თუ არა ოჯახს შერიგებული დათო და ნინა, რომელსაც ქმარმა კვლავ სამუდამო ერთგულება შეჰფიცა.
თქვენ მამაკაცის რომელ ქართულ ტიპაჟს ანიჭებთ უპირატესობას: დათოს თუ დიტოს?
