ვის გამო დაიკლო თიკა ჯამბურიამ 12 კილო

ბოლო დროს მომღერალ თიკა ჯამბურიას შესახებ დიდი მითქმამოთქმა ატყდა, თიკამ წონაში საგრძნობლად დაიკლო და ქალაქსაც სალაპარაკო მიეცა. ამბობენ, თიკა შეყვარებულია და ამიტომ გახდაო. თუმცა ჩვენი რესპონდენტი აღნიშნავს, რომ დიეტაზე არ არის, უბრალოდ, ბევრს მოძრაობს, რადგან ცხოვრების წესი შეიცვალა და სწორად იკვებება. ცოტა ხნის წინ თიკა `ქართული ოცნების~ ახალგაზრდული ფრთის პიარმენეჯერი გახდა, იმავდროულად თეატრალური უნივერსიტეტის დამამთავრებელ კურსზეა. თიკა თავად გაგვიმხელს, როგორ მოახერხა ასეთ კარგ ფორმაში ჩადგომა.

12 კილოთი ნაკლები...

- უამრავი ხალხი მირეკავს და მეკითხება, როგორ გავხდი. განსაკუთრებულს არაფერს ვაკეთებ, უბრალოდ, ცხოვრების რეჟიმი შემეცვალა, უფრო აქტიური გავხდი, თეატრალურ უნივერსიტეტს ვამთავრებ, ვმუშაობ, ბევრს ვმოძრაობ, თან ზაფხულია, მომინდა კარგ ფორმაში ვყოფილიყავი და კვების რაციონიც შევცვალე. უფრო ჯანსაღ საკვებს ვიღებ, შევზღუდე ცომეული, ცხიმიანი საკვების მიღება, ამ ყველაფერს ნელ-ნელა შევეჩვიე და ისეთი შედეგი გამოიღო, რომ ორ თვეში 12 კილო დავიკელი. რაიმე კონკრეტული დიეტა არ დამიცავს, არადა, მთელი ცხოვრება სხვადასხვა დიეტას ვიცავდი, დავდიოდი დიეტოლოგებთან, მგონი, ყველასთან ვარ ნამყოფი, მაგრამ, როგორც ჩანს, ყველაზე ეფექტური ფეხით სიარული და სწორი კვება აღმოჩნდა.
ცუდი ორსულობის გამო არანორმალურად გავსივდი, არ ვიტყვი, რამდენი კილო მქონდა ზედმეტი, მაგრამ საშინლად ვიყავი მომატებული. ვიტამინებმა და ნემსებმა ძალიან გამასუქა, მაგრამ, საბედნიეროდ, ფორმაში ვდგები. უდიდესი კომფორტია, როცა ყველა კომპლიმენტს გეუბნება და აღნიშნავენ, რომ გახდი, თან უფრო თავდაჯერებულიც ვარ. ისეთი დიდი არასდროს ვყოფილვარ, რომ კუჭის ოპერაციაზე მეფიქრა, თუმცა ამბობენ, თიკამ ოპერაცია გაიკეთა და იმიტომ გახდაო. საბედნიეროდ, ისე არ გავსუქებულვარ, რომ ამაზე მეფიქრა, თუ არ ვცდები, 100-120 კილო უნდა იყო, რომ ქირურგიული ჩარევით მოახდინო წონის კორექცია.
სამოსი
...უბედნიერესი ვარ, რომ ჩემი სამოსის უმეტესობა დიდი მაქვს (იღიმება). ეს ის შემთხვევაა, როცა ტანსაცმელი ფაქტობრივად არ მაქვს, მაგრამ მაინც ბედნიერი ვარ. ჩემს გარდერობში ყველაფერი დიდი ზომისაა. ყველა შარვალი დიდი მაქვს, მაგრამ ეს მახარებს. სიმართლე გითხრათ, საკუთარ თავს დიდად ვერ ვატყობ, რომ ძალიან გავხდი, სამოსს და ფოტოებს რომ ვუყურებ, უფრო ვხვდები ცვლილებას. ჯერჯერობით კომპლექსები კიდევ მაქვს, მაინც მგონია, რომ რაღაც არ მიხდება, რაღაც ცუდად მაქვს, მაგრამ კიდევ რომ დავიკლებ 10 კილოს, მერე ჩემთვის სასურველ ფორმაში ვიქნები. მიუხედავად წონისა, მაინც ვახერხებდი იმის ჩაცმას, რაც მომწონდა, ოღონდ ვცდილობდი, ეს გამაღიზიანებელი არ ყოფილიყო. არ მიყვარს, როცა მსუქნებს მოკლე კაბა აცვიათ. დღეს უკვე თავისუფლად ვიცვამ ასეთ ქვედაბოლოს, რადგან მიმაჩნია, რომ მიხდება. გარდერობის მთლიანდ შეცვლა არ დამჭირვებია, რაღაც დეტალები შევცვალე.

შოპინგი
...იმდენად მიყვარს საშოპინგოდ სიარული, შემიძლია მთელი დღე ვიარო, მაგრამ დაღლას ვერ ვგრძნობ; ბოლოს სახლში რომ ვბრუნდები და ყველაფერს ვყრი, მაშინ ვხვდები, როგორ დავღლილვარ. ძალიან მსიამოვნებს ყიდვის პროცესი, შემიძლია, ყველა მაღაზიაში შევიდე და ყველაფერი ვნახო. საყიდლებზე მარტოსაც შემიძლია სიარული, მაგრამ ჩემი უფროსი და ია დამყვება ხოლმე და სტიმულს მაძლევს, რომ რაღაც შევიძინო. შეფასების თვალსაზრისით კი დედაჩემის აზრს ვაქცევ დიდ ყურადღებას.
ადრე მხოლოდ ჩემი სამოსის ყიდვაზე ვზრუნავდი, ახლა კი ჯერ ნინასთვის ვიძენ უამრავ სამოსს და მერე, თუ თანხა მრჩება, საკუთარ თავზე ვზრუნავ. გარდა ამისა, ძალიან მსიამოვნებს საჩუქრების გაკეთება.

...ვერ ვიტყვი, რომ მაინცდამაინც ძვირიან და ბრენდულ მაღაზიებში დავდივარ, ''თბილისი მოლი'' მომწონს და ხშირად ვსტუმრობ. არ მიყვარს, როცა ჩემი ასაკის გოგონები არანორმალურად ბევრ ფულს ხარჯავენ ერთ ნივთში. პირადად მე ძალიან დიდ თანხას ერთ ნივთში მაშინ გადავიხდი, როცა ასაკში ვიქნები და გარშემო ყველა ჯანსაღად მეყოლება. ასეთ დროს ჩემს მეგობრებზე ვფიქრობ, რომელთაც არ აქვთ იმის საშუალება, რომ ძვირი გადაიხადონ ამა თუ იმ ნივთში, ამიტომ ვცდილობ, საშუალოფასიანი სამოსი ვიყიდო, რაც ყველასთვის მისაღები იქნება.

დღის რეჟიმი

...დილით 9-ის ნახევრიდან 9 საათამდე ვიღვიძებ, ახლა ნინა სახლში არაა, თორემ მაღვიძარას როლს ის ასრულებს. ადგომის შემდეგ მივირთმევ ჰერკულესის ფაფას, ვემზადები და მივდივარ სამსახურში ან ინსტიტუტში, შემდეგ ისევ სამსახურში გავრბივარ. ახლახან დავიწყე მუშაობა `ქართული ოცნების~ ახალგაზრდული ფრთის პიარმენეჯერად და ძალიან კმაყოფილი ვარ. როგორც იცით, ერთ-ერთ რადიოში ვმუშაობდი, მაგრამ ჩემს გადაცემას რეიტინგი არ ჰქონდა და დაიხურა, ჰოდა, მეც წამოვედი. სამუშაო საათების დასრულებისთანავე შინ ვბრუნდები, მერე კი შეიძლება მეგობრებთან ერთად გავიდე სადმე. დილა-საღამოს მუცლის პრესს ვაკეთებ, როდესაც შორ მანძილზე არ ვარ წასასვლელი, ფეხით გადავადგილდები. ძალიან მინდა, ტრენაჟორებზე ვიარო, მაგრამ ჯერჯერობით ვერ ვახერხებ.

ნინა
...ნინა წყნეთშია დედასა და ჩემი ოჯახის წევრებთან ერთად, ძალიან მიჭირს მის გარეშე ყოფნა, ძალიან მენატრება, ამიტომ დღის უმეტეს ნაწილს ტელეფონთან ვატარებ. უკვე ძალიან კარგად ლაპარაკობს, მირეკავს და მეუბნება, დედა ძალიან მენატრებიო. სამსახურიდან რომ ვბრუნდები, წყნეთში გავრბივარ, რომ დაძინებამდე მაინც ვნახო ბავშვი. სხვათა შორის, ძალიან კარგად მღერის, ამ ბოლო დროს კი, როგორც იქნა, მე დამემსგავსა. თავიდან მამის მხარეს ჰგავდა, დღესდღეობით კი ისეთია, როგორიც მე ვიყავი ბავშვობაში. რომ მღერის, ჩემნაირ სახეს იღებს, ძალიან ვუყვარვარ. დედაჩემი მის გაზრდაში ყველანაირად მეხმარება, უფრო მეტიც, თვითონ ზრდის, მე ნინასთვის მეგობარი დედა უფრო ვიქნები. აგვისტოში ალბათ აჭარაში წავალ, იქ კონცერტები მექნება, ყოველ ღამე სიმღერა მომიწევს, ამიტომ ნინას წაყვანას ვერ მოვახერხებ, თუმცა დედაჩემი შემპირდა, რომ ჩამოიყვანს და ცოტა ხნით ჩემთან ერთად იქნებიან.

პირადი
...არავის გამო არ დამიკლია წონაში. როცა ქალი კარგად გამოიყურება, პირველ რიგში, ეს მისი კომფორტია, ჰოდა საკუთარი თავისთვის გავხდი. სანამ ჭარბი წონა მქონდა, ჩემზე ამბობდნენ, რას ჰგავსო, გავხდი და ახლა იმაზე დაიწყეს ლაპარაკი, ვის გამო გახდაო. ყველას ვეუბნები, რომ საკუთარი კომფორტისთვის დავიკელი წონაში.

- ''ფეისბუქში'' რომანტიკული ფოტოები დადე, ამიტომ გაჩნდა ეჭვი, რომ შეყვრებული ხარ...
- არ მინდა ამაზე ლაპარაკი, არც იმის თქმას მინდა, რომ შეყვარებული ვარ და არც იმის, რომ არ ვარ, ეს ჩემი პირადი ცხოვრებაა და არ მინდა საჯარო გახდეს. მარტო იმას ვიტყვი, რომ ძალიან კარგად ვგრძნობ თავს, მეორედ გათხოვებას ჯერ არ ვაპირებ, 22 წლის ვარ. რადგან პირველი ოჯახი ადრეულ ასაკში შევქმენი და უკვე ნინა მყავს, აღარსად მეჩქარება და თან გათხოვების სურვილიც არ მაქვს.
რაც შეეხება ნინას და ბექას ურთიერთობას, როცა მამას შვილის ნახვის სურვილი აქვს, მე დაბრკოლებას არ ვუქმნი, მე და ბექას ჩვეულებრივი ურთიერთობა გვაქვს.
ციცი ომანიძე
რეიტინგი ''რეიტინგი''