გიგი გაჩეჩილაძე: "მიკვირს, სალომე მანამდეც რომ არ დამშორდა"

უკვე 4 თვეა, რაც პოპულარული შეყვარებული წყვილი, მოცეკვავეები გიგი გაჩეჩილაძე და სალომე ჭაჭუა ერთად აღარ არიან. მათი რომანი 8 წელი გრძელდებოდა. შორიდან ყველაფერი იდეალურად ჩანდა, წყვილი დაქორწინებაზე ისე ლაპარაკობდა, თითქოს ეს ამბავი გადაწყვეტილი იყო. მოულოდნელად კი ცნობილი გახდა, რომ ერთმანეთს დაშორდნენ. ყოფილი შეყვარებულები დეტალებზე ლაპარაკისგან დიდხანს იკავებდნენ თავს, თუმცა ფაქტს ადასტურებდნენ. გიგიმ თემას ტაბუ პირველად "სარკესთან" მოხსნა და აღიარა, რომ დაშორება მისი ბრალია. არც ის დაუმალავს, რომ სალომეს მიმართ გრძნობა არ განელებია, ერთი თვის განმავლობაში შერიგებასაც ცდილობდა, მაგრამ ურთიერთობა ვეღარ აღადგინეს. ის კი მოახერხეს, რომ კოლეგებად დარჩენილიყვნენ. დღემდე ერთად მუშაობენ და იმ საქმეს აკეთებენ, რომლის გარეშეც ცხოვრება ვერ წარმოუდგენიათ.
როგორი იყო გიგი გაჩეჩილაძისთვის სალომეს გარეშე გატარებული 4 თვე და რას აპირებს მომავალში, მასთან ინტერვიუდან შეიტყობთ.
– გიორგი, საუბარი დავიწყოთ იმ კითხვით, რომელიც თქვენი და სალომეს დაშორებამ გააჩინა – რა უნდა მომხდარიყო ისეთი, რომ 8 წლიანი სიყვარული, თანაც ისეთი, როგორიც თქვენ გქონდათ, დასრულებულიყო?
– ერთმანეთი მართლა ძალიან გვიყვარდა. ბავშვობიდან ერთად მოვდიოდით, ყოველ შემთხვევაში, სალომეს ბავშვობიდან. მიზეზის თქმას არ ვაპირებთ, ეს ჩვენი პირადია და ჩვენთვისვე დავიტოვებთ. მართალი არ ვიქნები, თუ არ ვიტყვი, რომ ეს დაშორება ჩემი ბრალია. ბევრი დაიწერა, მათ შორის მესამე პირი ჩადგაო. ამას სალომეს მხრიდანაც გამოვრიცხავ და ჩემი მხრიდანაც. როგორ ურთიერთობაშიც უნდა ვიყო ადამიანთან, ეს იქნება მეგობრული თუ სასიყვარულო, ღალატი ნაკლებად ვიცი. იმას არ ვაკეთებ, რაც არ მინდა, რომ მე გამიკეთონ. რაღაც მოხდა ჩვენ შორის და ეს ჩემი ბრალი იყო, სალომე არაფერ შუაშია.
– დაშორების გადაწყვეტილება ერთად მიიღეთ?
– კი, ერთად მივიღეთ, მაგრამ ძალიან მიკვირს, მანამდე რატომ არ მიიღო სალომემ. რაღაც ისეთი მოხდა, რის გამოც მე სალომეს აუცილებლად დავშორდებოდი, ამიტომ ვთქვი, აქამდე როგორ არ დამშორდა–მეთქი... ისეთი რაღაცეები მოხდა, ორივემ მივიღეთ გადაწყვეტილება, რომ ასე ჯობდა.
– სტუდიაში ერთად მუშაობას აგრძელებთ. ეს ძნელი არ არის ორივესთვის?
– ძალიან ჩვეულებრივი ურთიერთობა გვაქვს, ერთად ვასწავლით, სემინარებს ერთად ვატარებთ. რაღაც ვარიანტში ეს ძალიან რთულია, ყოველ შემთხვევაში, ჩემთვის. სალომესთვის არ ვიცი და არც ვეკითხები. თუ ოდესმე რამე მოხდება, მოხდება. ორი ვარიანტია: ან ყველაფერს უნდა გავუძლოთ, ისე ვიმუშაოთ და ვაკეთოთ საქმე, ან საერთოდ უნდა ჩამოვშორდეთ ერთმანეთს, ყველაფერი დავანგრიოთ, რაც აქამდე გვიკეთებია, მათ შორის სტუდიაც, საქმეც. საღად მოაზროვნე ადამიანი პირველ ვარიანტს აირჩევდა და მეც ამ გზას ვადგავარ.
– ოჯახის წევრები როგორ შეხვდნენ ამ ამბავს?
– მეგობრებსაც და ოჯახის წევრებსაც ეგონათ, რომ ეს ჩვენი მორიგი ჩხუბი იყო და რაღაც ნაწილს დღემდე ასე ჰგონია.
– ხანგრძლივადაც ყოფილხართ გაბუტული?
– ყველაზე ხანგრძლივი დაშორება 2 თვიანი იყო, მაგრამ ეს ჩვენი მიზეზით არ ყოფილა, მშობლების გამო მოხდა. თან, ეს 4 წლის წინ იყო. ამჯერად მეოთხე თვე გადის, რაც ერთმანეთს დავშორდით. ყველას, ჩემებსაც, სალომეს ოჯახის წვერებსაც, მეგობრებსაც ჰგონიათ, რომ ეს ჩვეულებრივი წაკინკლავებაა. ვერც ხვდებიან, რომ დავშორდით, რადგან ისევ ერთად გვიწევს მუშაობა.
– შერიგების შანსი არ არსებობს?
– ცხოვრებაში ვერაფერზე იტყვი, შანსი არ არისო.
– ყოველ შემთხვევაში, ცადეთ მაინც?
– პირველი ერთი თვე სულ ვცდილობდი შერიგებას.
– რატომღაც ისე ხდება, რომ დროში გაწელილი სასიყვარულო ურთიერთობები ხშირ შემთხვევაში ასე მთავრდება. თქვენი აზრით, დაქორწინებულები რომ ყოფილიყავით, მაინც დაშორდებოდით ერთმანეთს?
– აქამდეც კითხულობდნენ, ერთმანეთი არ მოგბეზრდათო. მე ცოტა სხვა შეხედულებები მაქვს და სხვანაირად ვაზროვნებ. თუ ადამიანი გბეზრდება, მნიშვნელობა არ აქვს, ჯვარდაწერილი ხარ თუ ხელი გაქვს მოწერილი. ადამიანი ადვილად არ მბეზრდება, რაღაც ისეთი უნდა გააკეთოს, რომ თავი მომაბეზროს. ჩემსა და სალომეს შორის კი ასეთი არაფერი ყოფილა. არც სალომე მომბეზრებია და არც ეს ურთიერთობა.
– აბა, რა მოხდა, სიყვარული დამთავრდა?
– ეს რომ ვთქვა, სულელი უნდა ვიყო. ან ვინ დამიჯერებს, რომ სიყვარული 8 წლის შემდეგ დამთავრდა. ეს სისულელეა, მაგრამ ზოგჯერ ყველაფრისთვის საკმარისი სიყვარული არ არის, ზოგჯერ არის კიდეც. ხან ისეა, ხან ასე, ცხოვრებაა, რა.

– ტელეპროექტის "ცეკვავენ ვარსკვლავების" დასრულების შემდეგ მისი მონაწილეებიდან ბევრს გაუფუჭდა შეყვარებულთან ურთიერთობა – გიორგი ვარდოსანიძე, ნუკი კოშკელიშვილი, რუსკა მაყაშვილი, ეკო ფანგანი. თქვენი და სალომეს ამბავი ხომ ცაზე მეხის გავარდნასავით იყო. ეს უბრალო დამთხვევაა თუ მართლა პროექტის ბრალია?
– სამაგიეროდ, ერთი წყვილი შედგა. ოთარ ტატიშვილის მეწყვილე მზია ორველაშვილი და ერთ–ერთი ქორეოგრაფი, რომელიც ამ პროექტისთვის იყო ჩამოსული, ერთად არიან, თუ არ ვცდები, იქორწინეს. არა მგონია, თქვენ მიერ ჩამოთვლილთაგან რომელიმე ცეკვებს დაეშორებინოს.
– თქვენ და სალომეს ერთმანეთის ოჯახებთან ახლო ურთიერთობა გქონდათ. ახლა რა მდგომარეობაა?
– მის ოჯახთან შეხება აღარ მიწევს. აქამდე სალომესთან სახლში ავდიოდი, მაგრამ ეს იმას არ ნიშნავს, რომ ერთმანეთს გადავემტერეთ. სალომეს უბანში ხშირად მიწევს ყოფნა, რადგან იქ ჩემი მეგობრები ცხოვრობენ.
სალომეს რაც შეეხება, ჩემს მშობლებთან ძალიან კარგადაა. მისი ურთიერთობა ჩემს მშობლებთან ჩემით არც დაწყებულა და არც დამთავრდება. ჩემამდე სალომეს ჩემი მშობლები ასწავლიდნენ და ისედაც საკმაოდ ახლო ურთიერთობა ჰქონდათ.
– დაშორება როგორ გადაიტანეთ, მძიმე განცდები გქონდათ?
– არ დავმალავ, ერთი თვე დეპრესია მქონდა, ზედმეტად ცუდად ვიყავი, მაგრამ დრო ყველაფრის მკურნალია. ამ შემთხვევაში დეპრესიიდან გამოსვლის ჩემი მეთოდები მაქვს, მაგრამ ვერ გავამხელ. ახლა გაურკვევლობაში ვარ. იმ გაგებით კი არა, რომ არ ვიცი, რა მინდა, უბრალოდ ჯერჯერობით არაფრის სურვილი არ მაქვს, ჩემთვის ვარ, მეგობრები მყავს და ვარ ასე.
– ამ ზაფხულს რა გეგმები გაქვთ?
– სტუდიაში სასწავლო წელს მოვრჩით და დასვენების რეჟიმზე გადავდივარ, რომელიც უკვე 2 წელია არ მქონია. ამ ზაფხულს ვაპირებ ყველაფრის ანაზღაურებას. დასასვენებლად წასვლას ვგეგმავ ბელგიაში, გერმანიაში, ამერიკაში და ტაილანდში. გერმანიაში კონგრესია, ჩვენი ფედერაციის წევრებს მივყვები. სხვა ქვეყნებში ვისთან ერთად წავალ, არ ვიცი, შეიძლება მარტოც წავიდე. იტალიაში მარტო ვიყავი და ზედმეტად კარგადაც გავერთე. მოგზაურობა ძალიან მიყვარს, საერთოდ ცხოვრებაც არ მიყვარს ერთ ადგილზე. ბავშვობიდან შევეჩვიე, რომ ჯერ აქ ვცხოვრობდი, შემდეგ ამერიკაში. სიმართლე გითხრათ, ერთ ადგილზე დიდხანს ვერ ვჩერდები. საქართველოში მეცხრე წელია ვცხოვრობ. ამერიკაში 6 წელი ვიცხოვრე.
– ისევ აპირებთ წასვლას?
– შემოთავაზებები არის. უნდოდათ, მე და სალომე ერთად წავეყვანეთ. ახლა სხვა ტიპის შემოთავაზებებია ჩემთან, მაგრამ აქ სტუდია, ოჯახის ბიზნესია მისახედი. მშობლებისთვის საქართველოში ერთადერთი შვილი მე დავრჩი, ჩემი და–ძმა ამერიკაში არიან. ძალიან კი მინდა იქ, მაგრამ არ გამოდის. არ მინდა, ყველაფერი მივატოვო და წყალში ჩავყარო, რის შექმნასაც ჩემმა მშობლებმა მთელი ცხოვრება მოანდომეს.
– თქვენი სიძის, გოჩა ჩერტკოევის ცხოვრებაში რა სიახლეებია?
– გოჩა რამდენიმე ფილმში გადაიღეს. თავის საქმეს მიჰყვება, როგორც სამსახიობო კარიერას, ისე საცეკვაოს. ხშირად ვეკონტაქტებოდით ერთმანეთს, სანამ მანქანას გამომიგზავნიდა. რაც ავტომობილი გამომიგზავნა, გოჩა ცოტა მივატოვე. რა თქმა უნდა, ეს ხუმრობით, მაგრამ მაინც, ამ ბოლო დროს ისე ხშირად არ ვეხმიანები. "ცეკვების" პირველ სეზონშიც მონაწილეობის მისაღებად მე ჩამოვიყვანე.
– რა მანქანა გამოგიგზავნათ სიძემ?
– "პორშე". ეს საჩუქარი ძალიან მიხარია და მომწონს. ახლა მეორე მანქანას ველოდები, ე კლასის "მერსედესს" დამპირდა, 2011 წლიანს და ვნახოთ, აბა!
– მალე "ცეკვავენ ვარსკვლავები" ისევ დაიწყება. მიიღებთ მონაწილეობას?
– არა. ეს მეორე სეზონის დამთავრებამდეც ვთქვი. სიმართლე გითხრათ, შემოთავაზება არც ყოფილა, მაგრამ რომც ყოფილიყო, მაინც უარს ვიტყოდი.
– რატომ არ გინდათ მონაწილეობის მიღება, პოპულარობა ხომ სწორედ ამ პროექტმა მოგიტანათ?
– ცხოვრებაში არასოდეს მომდომებია პოპულარობა. ამ პროექტში ჩემი მონაწილეობის მიზანი ის იყო, რომ ცეკვისთვის მომეტანა პოპულარობა, რადგან ეს ჩემი საქმეა, ბავშვობიდან ამას ვაკეთებ. ჩვენი სტუდიიდან სამი მოცეკვავე მიიღებს მონაწილეობას – ოთო ფოლადაშვილი, სალომე ჭაჭუა და ჯულიანა ბარგ–ნარი. მათაც და პროექტსაც წარმატებებს ვუსურვებ და აუცილებლად ვუგულშემატკივრებ.
– გოჩა ჩერტკოევი იქნება კვლავ ჟიურიში?

– მისთვის არ შეუთავაზებიათ, თორემ უარს არ იტყოდა. ეს ორი სეზონიც გოჩა ჩემი და საქართველოს ხათრით ჩამოდიოდა აქ. საქართველოზე გიჟდება, ისე ძალიან უყვარს. პირველ სეზონზე სრულიად უანგაროდ ჩამოვიდა, სასტუმროს ხარჯებსაც თვითონ იხდიდა. ყველაფერი გააკეთა, რომ ის სეზონი კარგად ჩატარებულიყო. მეორე სეზონზე გარკვეული ანაზღაურება კი ჰქონდა. მესამე სეზონზეც რომ შესთავაზონ ჟიურის წევრობა, ალბათ ჩამოვა, რადგან ამ ყველაფერს თავისი ქვეყნის სიყვარულით, მონატრებით აკეთებს. რამდენიც უნდა თქვას, რომ აქ ვერ ჩერდება, მას საქართველო ძალიან უყვარს.
– პროექტის შემდეგ იყო საქართველოში ჩამოსული?
– არა, ასე ხშირად ვერ ჩამოდის. აქ 20 თუ 22 წელი არ იყო ნამყოფი, ამ პროექტის გამო ჩამოვიდა. ძირითადად ჩვენ ჩავყავდით იქით, ხან ჩემი ძმა, ხანაც დედაჩემი და მამაჩემი. სექტემბრიდან მუშაობას ვიწყებ და რამდენიმე გეგმა მაქვს ბიზნესის სფეროში, რომელსაც იქამდეც ვაკეთებდი, სანამ "ცეკვავენ ვარსკვლავები" დაიწყებოდა.
– რა ბიზნესია?
– სათამაშო აპარატების, ტოტალიზატორების ქსელი მქონდა და გავყიდე. ახლა რა ბიზნესს დავიწყებ, ჯერ არ გაგიმხელთ. რაღაც ვარიანტში ცეკვასთანაც იქნება დაკავშირებული. კვების ობიექტის გახსნასაც ვაპირებ.
– ბიზნესის კეთება სად ისწავლეთ, გამოცდილება სად მიიღეთ?
– ამერიკაში ერთ–ერთი წარმატებული ბიზნესმენის ოჯახში გავიზარდე, რომელიც პრეზიდენტ ბუშის მესამე დამფინანსებელი იყო. ის ჩემი გერლფრენდის მამა გახლდათ. მისგან ბევრი რაღაც ვისწავლე, ვნახე. ბავშვობიდან ძალიან დამოუკიდებლად ვიზრდები. 11 წლის ვიყავი, როცა აქედან ამერიკაში მარტო წავედი, მეორეჯერ 18 წლისა წავედი. ამერიკაშიც რაღაც პერიოდი მარტო ვცხოვრობდი. შეჩვეული ვარ, რომ ჩემს საქმეში არავინ ერევა. რადგან ჩემი საცეკვაო კარიერა დასრულდა, ვცდილობ, ყველაფერი ცეკვებს დავუკავშირო, რადგან ცეკვა ჩემი ცხოვრებაა და, რაც გამიკეთებია, ყველაფერი ცეკვამ გამაკეთებინა.
როგორც გითხარით, გერმანიაში ჩვენი ფედერაციის კონგრესია, შემდეგ მეორე კონგრესსაც დავესწრები. ჯერ საერთაშორისო კლასის მსაჯის წოდებას ავიღებ, შემდეგ – მთავარი მსაჯის, ძალიან ხშირად ვივლი აქეთ–იქით, სხვადასხვა ტურნირში მივიღებთ მონაწილეობას.
ეკა ლემონჯავა
წყარო