თამთა შედანია შემოდგომაზე ოცნების ქორწილს გადაიხდის

"მის საქართველო 2012" თამთა შედანია შემოდგომაზე საპატარძლო კაბას მოირგებს, ოღონდ არა – პოდიუმისთვის, ამჯერად საკუთარი ქორწილისთვის. მისი რჩეული 24 წლის ერეკლე მანგოშვილია. მათი ურთიერთობა წელიწადნახევრის წინ დაიწყო. 21 წლის მოდელი თამამად ამბობს, რომ წარმატებული კარიერის პარალელურად პირადი ცხოვრებაც კარგად ააწყო და ძალიან ბედნიერია.
თამთა 13 წლის იყო, როცა პირველი დამოუკიდებელი ნაბიჯი გადადგა და უცხოეთში გაემგზავრა. მოდის სამყაროს მკაცრ კანონებს ჯერ კიდევ ბავშვი შეეჭიდა და თავი გაართვა. წარმატება დიდი შრომის ფასად დაუჯდა. საკუთარი მიზანდასახულობა უფლებას არ აძლევდა, უკან დაეხია. "მის საქართველოს" გვირგვინიც მონდომების შედეგია. მის ცხოვრებაში ყველაზე მნიშვნელოვან დღეს, როცა საქართველოში ყველაზე ლამაზი ქალის ტიტული მიიღო, დიდი მწუხარებაც სდევდა თან. იმ პერიოდში მამას სამუდამოდ ეთხოვებოდა...
აი, ასეთი შუქ–ჩრდილებიანი გზით მოვიდა თამთა შედანია დღემდე და ახლა ამ ყველაფერზე "სარკეს" ესაუბრება.
– თამთა, "მის საქართველოს" ტიტულის ტარება, რა თქმა უნდა, სასიამოვნოა, მაგრამ ალბათ გარკვეული პასუხისმგებლობაცაა.
– ეს კონკურსი ჩვენს ქვეყანაში ყველაზე მნიშვნელოვანია. მოდელისთვის პრიორიტეტულია "მის საქართველოს" გვირგვინის ტარება. ამის შემდეგ ჩემ მიმართ ინტერესი საგრძნობლად გაიზარდა, ქუჩაში მუდმივად ყურადღების ქვეშ ვექცევი. ეს სასიამოვნო და ამავე დროს საპასუხისმგებლოცაა. სულ ფორმაში ვარ, საკუთარ თავს უფლებას არ ვაძლევ, სახლის წინ მდებარე მაღაზიაშიც კი მოუწესრიგებლად ჩავიდე. უამრავი თვალი მიყურებს და მაკვირდება.
– შეიძლება ითქვას, სამოდელო კარიერამ თქვენი ცხოვრება შეზღუდა?
– ჩემი თანატოლების მსგავსად არ ვცხოვრობ. ფაქტობრივად ოჯახზე მომიხდა უარის თქმა. მშობლებთან, ძმასთან იმდენ დროს ვერ ვატარებდი, რამდენიც საჭირო იყო. 13 წლის ასაკში პირველად მომიწია უცხოეთში წასვლა (პრაღაში გამართულ "ელიტ მოდელ ლუქის" კონკურსზე თამთა 15 საუკეთესო მონაწილეს შორის მოხვდა. ავტ.). ამან დამოუკიდებლად ცხოვრება მასწავლა. ეს, ერთი მხრივ, რთულიც იყო.
– მშობლებმა ასეთ პატარა ასაკში როგორ გაგიშვეს საზღვარგარეთ?
– მაშინ ჩემი მშობლები რომ არ დამდგომოდნენ გვერდით, დღეს ასეთი რეალიზებული ვერ ვიქნებოდი. ამ ყველაფერში თავისთავად დიდი როლი მიუძღვის "იმიჯ ცენტრის" ხელმძღვანელს, ია კიწმარიშვილს და იმ გუნდს, რომელმაც ჩემს წარმატებაში დიდი როლი ითამაშა.
– ვინ "შექმნა" თამთა შედანია?
– თამთა შედანია შექმნა თამთა შედანიამ. ჩემმა თავდაუზოგავმა შრომამ და მიზნისკენ სწრაფვამ აქამდე მომიყვანა. თავის ქებაში არ ჩამომართვათ, მაგრამ ასეთი მიზანდასახული რომ არ ვყოფილიყავი, არაფერი გამომივიდოდა. არ მახსოვს, დავღლილიყავი. 15 კასტინგის შემდეგ ორსაათიანი გადაღება მიწევდა, მაგრამ საქმეზე უარს არასდროს ვამბობდი. წარმატება დიდი შრომის ფასად დამიჯდა.
– სამოდელო სფერო ინტრიგებით არის ცნობილი. თქვენ თუ შეგხებიათ ეს უსიამოვნო მხარე?
– როცა კარიერას ვიწყებდი, ჩემ შესახებ ბევრი უსიამოვნო სტატია დაიბეჭდა. ვნერვიულობდი, ჩემი ოჯახი ამ ყოველივეს როგორ მიიღებდა. იმ პერიოდში სამოდელო კარიერის მიტოვებაზეც კი ვფიქრობდი, მაგრამ ეს კრიზისი დედამ დამაძლევინა. მთავარია ეს ეტაპი გადალახო, თორემ მერე გამოცდილება აღარ მოგცემს იმის უფლებას, ამ ტიპის სისუსტეებს ვერ გაუძლო. დღემდე ინტრიგების, ჭორების ქარცეცხლში ვარ მოქცეული, მაგრამ აღარ ვნერვიულობ. ჩვენს ქვეყანაში ჭორაობა ძალიან აქტუალურია. ასე რომ, უარყოფითი განწყობა გულამდე აღარ მიმაქვს.
– საქართველოში თქვენს კონკურენტად ვის მიიჩნევთ?
– ვერ ვიტყვი, რომ კონკურენტად ვერავის აღვიქვამ, რადგან ყველა ქალს თავისი შარმი და მიზიდულობა აქვს, საქართველოში კი ბევრი ლამაზი გოგოა და თითოეული ინდივიდუალურია. ამიტომ ვერ ვიტყვი, რომ საუკეთესო ვარ. ეს გემოვნების საკითხიც არის. მე მაქვს ჩემი ინდივიდუალური გარეგნობა და შარმი. კონკურენტის თვალით არავის ვუყურებ, საკუთარ თავში დარწმუნებული ვარ და ჩემს საქმეს ვაკეთებ.
– გარეგნობაზე როგორ ზრუნავთ, რა საშუალებებს მიმართავთ, რომ მუდამ იდეალურ ფორმაში იყოთ?
– როდესაც ხარ მოდელი, ავტომატურად ხარ პასუხისმგებელი შენს გარეგნობაზე. ამ სფეროში ვიზუალი უმთავრესია – სხეული, სახე, კანი, თმა. თუ ამ ყველაფერს არ მოუარე, მოდელი ვერ იქნები. როცა საზღვარგარეთ წავედი, იქ საკუთარი თავის მოვლა ძალიან მიჭირდა. შეჩვეული ვიყავი დედის მზრუნველობას, მისი შერჩეული რაციონით ვიკვებებოდი. როცა მარტო დავრჩი, ჯანმრთელობასთან დაკავშირებული პრობლემებიც დამეწყო, კუჭ–ნაწლავი დამიზიანდა. ეს პრობლემა მკურნალობით მოვაგვარე. მას მერე სულ ვცდილობ, ჯანსაღი ცხოვრების წესით ვიცხოვრო, ვვარჯიშობ, ცურვაზე დავდივარ, ყოველდღე ველოსიპედით ვსეირნობ და ყველაზე მთავარი – სწორად ვიკვებები. არ გეახლებით ცხიმიან საჭმელს, იშვიათად თუ შევჭამ ხინკალს და ხაჭაპურს, მეტწილად ხილს და ბოსტნეულს ვიღებ. ამიტომ წონის პრობლემა არ მაქვს. ორგანიზმიც ასეთ რეჟიმს მიეჩვია.
– რაიმე პლასტიკური ოპერაცია გაკეთებული გაქვთ?
– თქვენ პირველი არ ხართ, ვინც ამას მეკითხება. ამბობენ, რომ გავიკეთე ტუჩი, ცხვირი და მკერდი. არა, ბატონო, ეს ტყუილია! არანაირი პლასტიკური ოპერაცია არ გამიკეთებია. 21 წლის ასაკში რა საჭიროა პლასტიკური ოპერაციები? როცა 45 წელს გადავაბიჯებ, საჭიროდ თუ ჩავთვლი, რატომაც არა, ბოტოქსს გავიკეთებ. ცხვირში პოლიპების პრობლემა მაქვს და მათი ამოჭრაც გადავიფიქრე, არ მინდა, ფორმა შემეცვალოს, რადგან ამ ცხვირით საზღვარგარეთ დიდ ფულს ვშოულობ. ოდნავ კეხი მაქვს და ეს მათ ძალიან მოსწონთ.
– როგორც წესი, მოდელები ზაფხულში აქტიურდებიან, ბევრი სამუშაო უჩნდებათ. თქვენი საქმიანი შემოთავაზებები როგორ გადანაწილდა?
– ჯერჯერობით საქართველოში ვარ, მაგრამ ამერიკიდან და ევროპის სხვადასხვა ქვეყნიდან რამდენიმე შემოთავაზება მაქვს. რომელიც უფრო სარფიანი იქნება ჩემთვის, არჩევანს იმაზე გავაკეთებ. დაახლოებით ერთ თვეში წასვლა მომიწევს. რამდენიმე ხნის წინ ბაქოში ვიყავი, ოქროს სამკაულების ჩვენებაში მივიღე მონაწილეობა. სომხური ჟურნალისთვის "ლაქშერი" გადამიღეს და ჩემი ფოტო ყდაზე დაიბეჭდა. ჩემი ფოტოები ჟურნალ "ელ ოფისიალის" ყდაზეც დაიბეჭდა, რაც ასევე დიდი წარმატებაა. ახლა ჟურნალ "ვოგიდან" ველოდები შემოთავაზებას, ჩვენ შორის პირველი მოლაპარაკება უკვე შედგა.
– კარიერაში უფრო რთული პერიოდები გამოიარეთ თუ პირად ცხოვრებაში?
– როდესაც საზღვარგარეთ მიდიხარ, სეზონი უნდა გათვალო. ზოგჯერ სამუშაო სეზონი არ ამართლებს, თუმცა ეს არც წარუმატებლობაა და არც სირთულე. პირად ცხოვრებაში კი ყველაზე რთული პერიოდი მაშინ მქონდა, როცა "მის საქართველო" გავხდი. იმ დროს მამა დავკარგე. ის 44 წლის ასაკში წავიდა ამქვეყნიდან. უდიდესი ტრაგედია დაგვატყდა თავს. ნელ–ნელა ვაცნობიერებ, რომ მამა ჩვენ გვერდით აღარ არის. თავიდან ისეთი შეგრძნება მქონდა, თითქოს უცხოეთში იყო, რეალობას ვერ ვეგუებოდი. ამ რამდენიმე დღის წინ ჩემს მობილურში რაღაცეებს ვათვალიერებდი და მამაჩემის ნომერი რომ ამოვიკითხე, ცუდად გავხდი. ის აღარ არის...
ვცდილობ, ჩემმა 10 წლის ძმამ მძაფრად არ იგრძნოს ის დანაკლისი, რაც მე ასე მტკივნეულად განვიცადე.
– მამა რითი გარდაიცვალა?
– უბედური შემთხვევის შედეგად მენინგიტი ჩამოუყალიბდა და მალე გარდაიცვალა. 4 თვე იწვა საავადმყოფოში. ყველაფერი გავაკეთე, რომ ეცოცხლა, მაგრამ – ამაოდ.
– დედაზე, ძმაზე გვიამბეთ.
– ჩემი ძმა, დათა, ნიჭიერი ბიჭია, მისით ვამაყობ. ვცდილობ, ჩემი მთელი ჰონორარი მისი ოცნების ახდენას მოვახმარო. რაც შეეხება, დედას, ეკატერინე ჩიხუას, 39 წლისაა, ძალიან ახალგაზრდა და ლამაზია. დედა ჩემი დიდი მეგობარია. ერთად რომ მივდივართ, ყველას უკვირს, დედას რომ ვეძახი, გვეუბნებიან, დაქალებივით ხართო. ის ამაყობს თავისი შვილებით. ხშირად უთქვამს, არ ვნანობ, 18 წლის ასაკში რომ გავთხოვდი და შვილები გავაჩინე, რადგან ღმერთმა კარგი გოგო და ბიჭი მაჩუქაო.
– ცნობილია, რომ ახალგაზრდა ბიზნესმენს დაუკავშირეთ ცხოვრება. ესე იგი სასურველი სარძლო უკვე დაკავებულია?
– ჩემი რჩეული ერეკლე მანგოშვილია. ის არის ადამიანი, რომელიც ძალიან მიყვარს, მის გვერდით ბედნიერი ვარ. 24 წლის ბიზნესმენია. ასე რომ, დაკავებული ვარ.
– უკვე გათხოვდით?
– ჯერ არც ჯვარი დაგვიწერია და არც ხელი გვაქვს მოწერილი. ასე რომ, არც უფლის წინაშე ვართ ცოლ–ქმარი და არც – კანონის წინაშე. ჯერ ერთად არ ვცხოვრობთ. როგორც კი "მის საქართველოს" გვირგვინს სხვას გადავაბარებ, მაშინვე ვიქორწინებთ, ეს, სავარაუდოდ, შემოდგომაზე მოხდება.
– როდის გამოჩნდა ერეკლე თქვენს ცხოვრებაში?
– წელიწადნახევრის წინ. მისი პიროვნება იმდენად ახლოს მოვიდა ჩემთან, რომ მივხვდი, ის სწორედ "ის" იყო. ოჯახებმა ჩვენი სიყვარულის შესახებ იციან, ფაქტობრივად საცოლე და საქმრო ვართ. როცა მე, ჩემი ძმა და ჩემი საქმრო ერთად ვართ სახლში, დედაჩემი ხუმრობს, სამი მეფე მყავს – თამარი, დავითი და ერეკლეო... (იცინის). სასიძო დედას ძალიან მოსწონს. ინტერვიუებში ხშირად ვკითხულობ, რომ ქალები ან მხოლოდ კარიერაში არიან წარმატებულები, ან მხოლოდ პირად ცხოვრებაში. მე გამიმართლა, საქმეშიც წარმატებული ვარ და პირად ცხოვრებაშიც ბედნიერი. ერეკლე ხელს არ შემიშლის სამოდელო საქმიანობაში, პირიქით, ჩემს პროფესიას, ჩემს გადაწყვეტილებას დიდ პატივს სცემს. მეგობრები ხშირად გვეუბნებიან, ხასიათით ერთმანეთს გაჭრილი ვაშლივით ჰგავხართო. ერთიმეორეს თვალებით ველაპარაკებით, უსიტყვოდ გვესმის.
– ლამაზი ქალი ჰყავს გვერდით, ალბათ ეჭვიანობს კიდეც.
– ყველა ადამიანია ეჭვიანი და არც ერეკლეა გამონაკლისი, მაგრამ ზომიერების ფარგლებში.
– "მის საქართველო" რომ გყავს საცოლე, შეიძლება ეჭვიანობა ნორმადაც კი ჩაითვალოს.

– (იცინის)... ხანდახან მისი ეჭვიანობა სასიამოვნოცაა. როცა კონტრაქტით საზღვარგარეთ მივდივარ, არც ამას აპროტესტებს, ხშირად ჩემთან ჩამოდის ხოლმე. ერეკლე ძალიან თბილი და კეთილია. ჩემს მეგობრებს დიდ ყურადღებას აქცევს. მათ ისე ექცევა, როგორც დებს. ერთი ადამიანიც არ მეგულება, რომელიც მასზე ცუდს იტყვის.
– კონკურენტები როგორ დაამარცხა, რით შეძლო თქვენი გულის მოგება?
– კარგი კითხვაა... (იცინის). თავდაპირველად მისმა გარეგნობამ მომხიბლა, შემდეგ – ქცევებმა. შეძლო და თავი შემაყვარა. მის გვერდით რომ ვარ, თავი სიზმარში მგონია. მასთან ერთად ყოველი დღე განსხვავებულია. ერთმანეთს თვალდახუჭული ვენდობით.
– როგორი ქორწილი გექნებათ?
– ქორწილს ნოემბერში ვგეგმავთ. ჩემი ქორწილის ცერემონიალი ბავშვობიდან მაქვს დაგეგმილი, დეტალებიც კი ზეპირად ვიცი, სად რას და როგორ ვიზამ, თუმცა ამ ყველაფერს საიდუმლოდ დავტოვებ. ჩემს ქორწილში აუცილებლად დაგპატიჟებთ და ყველაფერს თავად ნახავთ.

– ბედნიერებას გისურვებთ.
– გმადლობთ!
ლანა კიკნაძე