რატომ ეყრება ლევან ყოჩიაშვილი ცოლს, მარინა ყაჭაშვილს

პოპულარულ სერიალ "ჩემი ცოლის დაქალებში" ერთ–ერთი მთავარი როლის შემსრულებელი, მსახიობი ლევან ყოჩიაშვილი, რომელმაც ცოტა ხნის წინ საზოგადოების გულისწყრომა იმით დაიმსახურა, რომ მისმა გმირმა დათომ ცოლს უღალატა, ცხოვრებაში რეალურად დგას ოჯახის დანგრევის პირას. მისი მეუღლე, მარინა ყაჭაშვილი, შვილებიანად მშობლების სახლშია გადასული. ლევანი ამბობს, რომ ცოლს ოფიციალურად არ გაშორებია, მაგრამ არც იმას გამორიცხავს, რომ შერიგება არ მოხდეს. ამის შესახებ მსახიობმა პირველად "სარკეს" გაანდო.
ლევან ყოჩიაშვილმა და მარინა ყაჭაშვილმა 15 წელი იცხოვრეს ერთად. ორი შვილი ჰყავთ – 14 წლის კესო და 5 წლის ვასიკო. როცა "ჩემი ცოლის დაქალები" დაიწყო, ლევან ყოჩიაშვილი თავისი გმირივით ერთგული ქმარი და მამა იყო. მისი და მისი ცოლის ერთობლივ ინტერვიუებშიც სრული ოჯახური იდილია ჩანდა.
მათი რომანი წლების წინ პატარა რაიონულ ცენტრში, დედოფლისწყაროში დაიწყო. ლევანი მომავალ საბედოს სახლში თავისი ფეხით მიადგა – მარინას დედა ინგლისურ ენაში ბავშვებს ამზადებდა და მე–8 კლასელი ლევანიც მასთან მიიყვანეს. მას და მასწავლებლის შვილს ერთმანეთი მაშინვე მოეწონათ. მერე საერთო მეგობრის წვეულებებზე ხვდებოდნენ ერთმანეთს, სადაც გრძნობა კიდევ უფრო გაძლიერდა. ლევანი ჯერ კიდევ სკოლის მოსწავლე იყო, როცა სასიდედროს სტუდენტ ქალიშვილთან შეხვედრის უფლება სთხოვა. მარინა მასზე ცოტათი უფროსი გახლავთ.
"კიდევ კარგი, ჩემი სასიმამრო არ დაგვხვდა სახლში, თორემ ვერაფრის თქმას მოვახერხებდი. ახლა მეშინია, რომ ვიხსენებ... ძლივს ამოვღერღე, რისი თქმა მინდოდა... მარინა 8 წელი მიყვარდა, სანამ დავქორწინდებოდით. ჩვენს სიყვარულზე ლეგენდები დადიოდა", – ყვებოდა "სარკეში" ლევან ყოჩიაშვილი.
მარინამ ინსტიტუტი დაამთავრა. ლევანი კი მე–3 კურსის სტუდენტი იყო, როცა გაიპარნენ და ცოლ–ქმარი გახდნენ მშობლების თანხმობის გარეშე.
სულ რაღაც წელიწადნახევრის წინ წყვილი ერთმანეთზე უზომოდ იყო შეყვარებული და ამის შესახებ "სარკეს" უყვებოდნენ. "მე ისევ ისე მიყვარს, როგორც 14 წლის წინ მიყვარდა. გრძნობა სულაც არ გამნელებია... ლევანი ძალიან მზრუნველი მამა და ყურადღებიანი მეუღლეა. არ არსებობს, რამე დაავიწყდეს და გამორჩეს... ამდენი წელია ერთად ვართ და ვცდილობთ, ერთმანეთი არ გავაბრაზოთ", – გვითხრა მაშინ მარინამ.
"ყველას უკვირს ჩვენი ურთიერთობა. მარინას მშობლებმა აღარ იციან, რითი მცენ პატივი და ასევე არიან ჩემი მშობლებიც... მარინას მადლობელი ვარ, რადგან სულ ხელს მიწყობს. ჩემს საქმეს ერთგულება სჭირდება. თუ ერთგული არ ხარ, არაფერი გამოვა. როცა ოჯახიდან გადასაღებ მოედანზე გაგიჟებულს გაგიშვებენ, რაღას გააკეთებ?! მარინა კარგად მივლის. ბევრი საყოფაცხოვრებო საკითხი არ მეხება, ყველაფერს ჩემი ცოლი აკეთებს და ამით ბედნიერი ვარ... მე რომ ვსწავლობდი, მარინა მუშაობდა. ერთგული და ჭკვიანი ქალია. სხვა ბევრი კარგი თვისებაც აქვს. ქალური ჭირვეულობა კი ახასიათებს, მაგრამ ისე არა, რომ შეგაწუხოს და გაგაგიჟოს. რამე თუ უნდა, თვითონ ვხვდები", – ასეთი სიყვარულით ახასიათებდა მსახიობი ცოლს.
...
ლევან ყოჩიაშვილს გადასაღებ მოედანზე შევხვდით. დაბნეული და ანერვიულებული ჩანდა. გვითხრა, ეს იმის ბრალია, მთელი დღეები რომ გადაღებებზე ვარ და ნორმალურად არ მძინავსო.
– ლევან, მართალია, რომ ცოლს გაშორდით?
– ოფიციალურად არ გავშორებულვართ, ისევ ცოლ–ქმარი გვქვია, მაგრამ გარკვეული პერიოდია, რაც ერთად აღარ ვართ.
– 15 წლის ცოლ–ქმარი, რომელთაც სულ რაღაც ერთი წლის წინ სიგიჟემდე უყვარდათ ერთმანეთი, რას უნდა დაეშორებინა? ყველა იფიქრებს, რომ თქვენ შორის ვიღაც მესამე ჩადგა.
– არა, მხოლოდ მაგ მიზეზით არ ხდება დაშორება. ყოფაში ათასი სხვა რამე შეიძლება გახდეს მიზეზი. ცხოვრებაა და რა არ შეიძლება მოხდეს? ცოლ–ქმარი ხან იჩხუბებენ, ხან გაიბუტებიან... ისევ ცოლ–ქმარი ვართ ჩვენ!
– მარინა მშობლიურ ქალაქში დაბრუნდა?
– დიახ და ბავშვებიც იქ ჰყავს. უმცროსი პატარაა და მე არ მაქვს მისი მოვლის დრო, დედასთან უნდა იყოს. უფროსი გოგონა დედოფლისწყაროს სკოლაში გადავიდა, ახლა არდადეგები აქვს. ხდება ცოლ–ქმრის ცხოვრებაში ასეთი რამეები. დეტალებს არ გეტყვით.
– სხვა დროსაც ყოფილა ასეთი შემთხვევა და შერიგებულხართ?
– არა, მსგავსი არასოდეს მომხდარა, მაგრამ ხომ ხდება და მე არც პირველი ვარ და არც უკანასკნელი.
– დაბნეული მეჩვენებით.
– ღამის 3 საათზე მივდივარ სახლში. სულ უძილო ვარ.
– შერიგებას ისევე რომანტიკულად შეეცდებით, როგორც სერიალში?
– ადამიანმა რაღაცეები უნდა მოინელოს, შეაფასოს, გადააფასოს... ჩვენი დაშორება ჩემი ბრალიც არის და მისიც. შვილები ძალიან განიცდიან და უნდათ, რომ შევრიგდეთ. იმაზეა დამოკიდებული, ვინც უნდა გაპატიოს. თუ უყვარხარ, გაპატიებს, თუ არ უყვარხარ – არა. გააჩნია, რა გააკეთე, მაგრამ მაინც ქალზეა დამოკიდებული. რაც ნინამ აპატია დათოს, შეიძლება სხვა ქალმა არ გაპატიოს. ნინას უყვარდა დათო და აპატია. ჰოდა, გაუმარჯოს!
– თქვენი მშობლები ცდილობენ, რომ შეგარიგონ?
– არა, დიდები ვართ უკვე. 35 წლის ვარ. ადრე მოვიყვანე ცოლი, 20 წლის ვიყავი, ჩვენი გოგონა რომ გაჩნდა.
– ცოტა ხნის წინ ისეთი სიყვარულით ლაპარაკობდით ერთმანეთზე...
– კი და ეს ამბავი ყველასთვის მოულოდნელი იყო, მაგრამ რას ვიზამთ?! 50 წელი არიან ხოლმე ერთად, შვილიშვილები ჰყავთ და მაინც შორდებიან.
– შეცდომებს ხშირად უშვებთ?
– ვცდილობ, შეცდომა არ დავუშვა. ყველაფერს ვერ გააკონტროლებ, მაგრამ საერთოდ, ძალიან ფრთხილი კაცი ვარ. ისეთი რამ არ უნდა გააკეთო, მერე შენს თავს რომ არ დაუსვა კითხვა – "რატომ?". მაგალითად, სერიალში ჩემს გმირს რა უნდოდა ნათიას ყოფილ ქმართან, ზაქროსთან, რომელმაც კარგად სცემა?! ასეთი რამ ჭკუის სასწავლებლად გამოდგება.
– საეჭვოდ კი დაემთხვა ერთმანეთს თქვენი გმირის და თქვენი პირადი ცხოვრების ამბები.
– ეს მსახიობების ბედია. შეიძლება შენს პერსონაჟს ფეხი სტკიოდეს და შენც აგტკივდეს. ფეხი მოუტეხია მსახიობს, როცა ფეხმოტეხილ კაცს თამაშობდა. კინოში თუ გერევა ცხოვრება, რეალურ ცხოვრებაშიც გერევა ყველაფერი. ეს პროფესია ემოციებზე, გრძნობებზეა დამყარებული. შეიძლება ჯერ ცხოვრებაში დაგემართოს რაღაც და მერე ის ფილმში გამოიყენო. ემოციურად იხსენებ, როგორ იყავი იმ დროს. აჰყვება ხოლმე ერთმანეთს ცხოვრებისეული და პერსონაჟის დეტალები.
– დათომ ცოლს რომ უღალატა, თქვენ გლანძღავდნენ მის გამო, თითქოს რეალობაში ხდებოდა ეგ ამბები.
– კი, სერიალში რომ ცოლს ვუღალატე, ხალხი ძალიან გაბრაზდა. ქუჩაში მაჩერებდნენ და მეუბნებოდნენ, ნინას დაუბრუნდი, ისეთი გვიყვარხარ, როგორიც იყავიო. ჰოდა, დავბრუნდი. სულ გარე–გარე მქონდა გადაღებები, ახლა კი "სახლში" ვიღებთ.
– თქვენი აზრით, ოჯახის შენარჩუნების გარანტი რა არის?
– ერთმანეთს ანგარიში უნდა გაუწიონ. ჩემთვის დიდი მნიშვნელობა აქვს, ვინ რას ფიქრობს შენზე და რას იფიქრებს. ერთმანეთის პატივისცემა და დაფასება უნდა იცოდე და, რა თქმა უნდა, სიყვარული უნდა გქონდეს. სხვა რეცეპტი არ არსებობს. ცხოვრებაში საკმაოდ ერთგული კაცი ვარ. სიყვარულიც ვიცი, თანაგრძნობაც, პატივისცემაც. ხანდახან ზედმეტადაც გამოვხატავ ამ ყველაფერს.
– ცხოვრებაში და სერიალში ცოლთან თქვენს დაშორებას ერთი და იგივე მიზეზი აქვს?
– არა! ჩვენი ამბავი სულ სხვაა. სერიალში ძალიან მძაფრია ყველაფერი. კაცი ორი შვილით რომეოდ გადაიქცა. ეგ კიდევ სხვა უბედურებაა. რადგან ხალხს ნერვები აეშალა, ესე იგი, გამოგვივიდა. ადამიანებს რომ რაღაც სწყინთ ერთმანეთისგან, ეგ უფრო ადვილი საპატიებელია. დათო კი რომეოდ იქცა და გვერდიდან საშინლად გამოიყურებოდა. მეც კი მიშლიდა ჩემი გმირი ნერვებს. იმათ ატყუებდა, ვისაც უყვარდა და მისი სჯეროდა. მიზეზი არ ჰქონდა, სხვა შეჰყვარებოდა. ცოლი ზედ ჰყვებოდა, სიმარტოვეს და სიცივეს არ გრძნობდა, ამიტომ ეს უფრო საშინელი მოსასმენი და სანახავია.
– ჯერ სერიალში დაშორდით და მერე ცხოვრებაში თუ პირიქით?
– სერიალში დაშორებამდე მოხდა ჩვენი ამბავი. დაახლოებით ამ წლის იანვრიდან აღარ ვართ ერთად.
– შერიგების შანსი არის?
– შეიძლება აღარც შევრიგდეთ.
– და სხვა ოჯახი შექმნათ?
– არა, ჯერ ასე არ არის საქმე.
– ახლა მარტო ცხოვრობთ?

– დიახ, მარტო ვარ.
– არაფერს ნანობთ?
– როგორ არა? ბევრი რამის გაკეთება შემეძლო, რაც არ გავაკეთე. ბევრი რამის სწავლა შემეძლო და არ ვისწავლე. ბევრ რამეს სულ ტყუილად ჩამოვრჩი.
რუსუდან ადვაძე