პრეზიდენტობის კანდიდატი „ჩემი ცოლის დაქალების“ რეჟისორისგან ბოდიშის მოხდას ითხოვს

„ჩემი ცოლის დაქალების“ გასული შაბათ-კვირის სერიები ისეთ სევდიან თემას ეძღვნებოდა, როგორიც ქელეხია. სცენარისტმა ამ ტრადიციის „გამაიმუნება“ მაქსიმალურად შეძლო, „ახალმა სიტყვამ გლოვაში“ მაყურებლის უმრავლესობას სახეზე ღიმილი მოჰგვარა, თუმცა ლელა მებურიშვილის კატოს მცდელობა, ქელეხი სვეტურ ივენთად გადაექცია, კრახით დასრულდა.

რასაკვირველია, გარდა სერიალის რეიტინგზე ზრუნვისა, იგრძნობოდა სცენარისტის მისწრაფება, რომ ამ თემასთან დაკავშირებით საზოგადოებაში სალაპარაკო თემა „აეგდო“ , რასაც მიაღწია კიდეც. რამდენად მიზანშეწონილია 200-კაციანი ქელეხები, რომლებიც ზოგ შემთხვევაში ღრეობად გადაიქცევა ხოლმე, ეს საკითხი დღის წესრიგში ალბათ კიდევ დიდხანს დარჩება და აქტუალობასაც არ დაკარგავს, თუმცა ზოგიერთი მაყურებლისთვის წინა ორი სერია საკმაოდ არასასიამოვნო სანახავი გახლდათ.

მაგალითად, პრეზიდენტობის კანდიდატ, მიხეილ-გელა სალუაშვილისთვის, რომელმაც სერიალის შემქმნელებს პრეტენზიები წაუყენა.

„ვგმობ ქართულ გადაცემა-სერიალში „ჩემი ცოლის დაქალები“ , ბოლო სერიაში ქართული ტრადიციის, კერძოდ, ქელეხის პროცესის აბუჩად აგდებას. (ქ)=9, (ე)=4, (ლ)=16, (ე)=4, ანუ 94164=კამუჰ, ანუ ებრაულად სულის გაცილებას. ეს პროცესი აღწერილია საღვთო წიგნში და არის ქართული ტრადიციის განუყოფელი ნაწილი, რის გარეშეც სული სამოთხის გზას დიდი წვალების შემდეგ თუ დაადგება გარდაცვალების შემდეგ.
კატეგორიულად მოვითხოვ, სერიალის რეჟისორებმა ბოდიში მოუხადონ ქართულ საზოგადოებას, ჩადენილი მომაკვდინებელი ცოდვის გამო ღვთისა და ერის წინაშე.
პატივისცემით, მიხეილ-გელა სალუაშვილი“ .

ზემოხსენებული წერილი, რომელიც „ფეისბუქზე“ გამოქვეყნდა, სერიალის ერთ-ერთმა მსახიობმა, ბასა ხარაზმა საკუთარ გვერდზე გააზიარა.